“བོད་གཞུང་དམངས་ཡོངས་རང་བཙན་ཐོག་ཕྱིན་ཡང་ང་མ་ཤི་བར་དབུ་མའི་ལམ་ཡིན”

བཞུགས་སྒར་དབུ་མའི་ལམ་མི་མང་ལས་འགུལ་ཁང་གི་འགན་འཛིན་གཞོན་པ་སྤྱི་ཟུར་ཡོན་ཏན་རྒྱ་མཚོ་ལགས་སུ་བོད་ནང་གི་ཛ་དྲག་གནས་བབ་དང་འབྲེལ་ཏེ། བཙན་བྱོལ་སྤྱི་ཚོགས་ནང་ལས་འགན་འཁྱེར་ཕྱོགས་དང་རང་བཙན་དང་དབུ་མའི་ལྟ་གྲུབ་སྐོར་ལ་བཅར་འདྲི་ཞུས་ཡོད།

    དྲི་བ། དེང་སྐབས་བོད་ནང་གཅིག་རྗེས་གཉིས་མཐུད་དུ་བོད་པའི་རྩ་དོན་ཐོག་རང་ལུས་མེར་བསྲེགས་གཏོང་བཞིན་པ་ཐོས་ཡོང་སྐབས་སེམས་ཚོར་གང་འདྲ་འདུག་གམ།

    ལན། ཉིན་འདི་འགའི་བོད་ནང་གི་གནས་ཚུལ་དེ་དག་ཧ་ཅང་ཛ་དྲག་པོ་ཞིག་དང་བློས་འགན་མི་བཟོད་པ་ཞིག་རེད། བསྡད་ན་སྡོད་མ་ཚུགས་པ་ཞིག་དང་། ཕྱིན་ན་འགྲོ་མ་ཤེས་པ་ཞིག་ཡོང་གི་འདུག ཁོ་ཚོས་གཅིག་རེ་གཅིག་རེ་བྱས་ཏེ་སོ་སོའི་ལུང་པ་ནས་ལུས་མེ་ལ་བསྒྲོན་ཡོང་དུས། ང་ཚོས་རྒྱལ་ཁབ་གཞན་ཞིག་ནས་སྐད་བརྒྱབ་བསྡད་ན་གང་འདྲ་ཞིག་ལ་སླེབས་ཀྱི་ཡོད་ན་བསམ་གྱི་འདུག དོན་དག་འདིའི་འབྱུང་རྩ་རྒྱ་ནག་དམར་ཤོག་གི་མགོ་ཁྲིད་ཚོས་སྲིད་ཇུས་དྲང་པོ་མ་བྱས་པ་ལས་བྱུང་བ་རེད། བོད་པའི་སྐུ་ཚབ་སྔ་ཕྱི་ཐེངས་བཅུ་གཅིག་ཙམ་ཕེབས་པ་དང་། ང་ཚོའི་མངོན་འདོད་ངོ་མ་ཡིག་ཐོག་ནས་ཕུལ་བ་རེད། དགོས་འདུན་དེ་དག་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་ས་གནས་མི་རིགས་རང་སྐྱོང་གི་བཅའ་ཁྲིམས་ནང་གསལ་བའི་ཆ་རྐྱེན་ཁག་རེད། མདོར་བསྒྲིལ་ན་རྒྱ་ནག་དམར་ཤོག་ཚོགས་པའི་མགོ་ཁྲིད་ཚོས་སོ་སོའི་རྒྱལ་ཁབ་ཀྱི་རྩ་ཁྲིམས་དང་བཅའ་སྒྲིག་ལ་རྡོག་རོལ་གཏོང་གི་ཡོད་པ་རེད། གནས་སྟངས་དེའི་འོག་ཏུ་བོད་མི་ཚོ་ཨ་ཆད་ཨུ་ཐུག་སྟེ་སོ་སོའི་ལུས་མེ་ལ་སྲེག་གི་ཡོད་པ་རེད།

    དྲི་བ། བོད་ནང་རང་ལུས་མེར་བསྲེགས་གཏོང་མཁན་དེ་དག་གི་དགོས་འདུན་གཙོ་བོ་གང་ལ་ངོས་འཛིན་གནང་གི་ཡོད་དམ།  

    ལན། བོད་ནང་སྐུ་ལུས་མེར་བསྲེགས་གཏོང་གི་ཡོད་པ་དེ་དག་གི་འབོད་སྒྲ་གཙོ་བོ། བོད་མིར་རང་དབང་དགོས་པ་དང་། ༧གོང་ས་མཆོག་བོད་དུ་གདན་འདྲེན་ཞུ་དགོས་པ་དེ་རེད། ༧གོང་ས་མཆོག་བོད་དུ་ཕེབས་རྒྱུ་དེ་གཞིས་བཞུགས་བོད་མིའི་མངོན་འདོད་གཙོ་བོ་ཞིག་ཆགས་འདུག ང་ཚོས་བསམ་བློ་བཏང་ནའང་ཤེས་མི་ཐུབ་པ་ཞིག་མ་རེད། བོད་ནང་གི་བོད་མི་ཚོར་ཟ་འཐུང་གི་རང་དབང་ཙམ་ལས་གཞན་འགྲོ་བ་མི་ཞིག་ལ་འཐོབ་འོས་པའི་རང་དབང་སྣ་གཅིག་ཀྱང་ཡོད་པ་མ་རེད། མ་མཐར་ཡང་བོད་ཆོས་ལྡན་གྱི་ཞིང་རེད། གནའ་རབས་ལོ་རྒྱུས་ནས་བཟུང་སྟེ། བོད་པ་ཚོས་ཆོས་ཀྱི་དོན་དུ་ལུས་སྲོག་ལོངས་སྤྱོད་བློས་བཏང་མྱོང་བ་དང་། བློས་གཏོང་ཕོད་པའི་མི་རིགས་ཤིག་ཡིན། ད་ལྟ་དམར་ཤོག་གིས་ཆོས་དད་རང་དབང་དང་གཏམ་བརྗོད་རང་དབང་ལ་བཀག་སྡོམ་བྱས་ཡོང་སྐབས། བོད་པ་ཚོར་དེ་ལས་ལྷག་པའི་སྡུག་བསྔལ་ཞིག་དང་ཁོང་ཁྲོ་སློང་བྱེད་ཅིག་ཡོད་པ་མ་རེད།

    དྲི་བ། རང་ལུས་མེར་བསྲེགས་གཏོང་གི་ཡོད་པ་དེས་རྩ་དོན་ཐོག་འཕྲལ་ཕུགས་ཀྱི་ཕན་གནོད་གང་འདྲ་འབྱུང་སྲིད་དམ། 

    ལན། སྤྱིར་བཏང་ང་ཚོ་བོད་པ་མི་འབོར་ཉུང་ཉུང་རེད། འདི་ལྟར་གཅིག་རྗེས་གཉིས་མཐུད་དུ་སྲོག་ཤོར་ན་ཕངས་པོ་རེད་དེ། རྩ་དོན་འཐབ་རྩོད་བྱེད་མཁན་ཞིག་ལ་བསམ་བློ་བཏང་ན། ལས་འགུལ་འདི་དག་ཧ་ཅང་གི་རླབས་ཆེན་རེད། བོད་ནང་ད་བར་ལས་འགུལ་སྤེལ་བ་ཡོངས་རྫོགས་འཚེ་མེད་ཞི་བའི་ལས་འགུལ་ཁོ་ན་ཆགས་ཡོད། ལྷག་པར་དུ་རང་ལུས་མེར་བསྲེགས་གཏོང་གི་ཡོད་པ་དེར་འཛམ་གླིང་ཐོག་གི་མི་སུ་འདྲ་ཞིག་ཡིན་ཡང་ཡིད་འགུལ་ཐེབས་པ་དང་དོ་སྣང་འདྲེན་པ་ཞིག་ཆགས་ཡོད། ལས་འགུལ་འདི་དག་གིས་བོད་པའི་རྩ་དོན་ཐོག་འཕྲལ་ཕུགས་རྒྱང་གསུམ་ལ་ཕན་ཐོགས་ཆེན་པོ་ཡོང་གི་རེད་ལ། བོད་པའི་རྩ་དོན་ཙམ་མ་ཟད་འཛམ་གླིང་ལ་མིག་དཔེ་ཡག་པོ་ཞིག་དང་། དེང་སྐབས་དཀའ་རྙོག་ནང་ཚུད་ཡོད་པའི་ལུང་པ་དང་མི་རིགས་ཚོ་ལའང་ཕན་ཐོགས་ཡོད་པ་ཞིག་རེད་དྲན་ཡོད། རྒྱ་ནག་གི་མགོ་ཁྲིད་ཚོ་ལའང་འཛམ་གླིང་ཐོག་གདོང་བསྟན་ཏེ་སྐད་ཆ་བཤད་མ་ཐུབ་པ་ཞིག་བཟོ་བཞིན་ཡོད་པ་རེད། 

    དྲི་བ། ད་ལྟའི་ཆར་བོད་དོན་འཐབ་རྩོད་ཀྱི་གནས་ཚད་དེ་གང་འདྲ་ཞིག་ལ་བསླེབས་ཡོད་པར་མཐོང་གི་ཡོད་དམ།

    ལན། གང་ལ་གང་འཚམ་ཚད་མཐོ་བོར་བསླེབས་ཡོད་པ་རེད་བསམ་གྱི་ཡོད། ལྷག་པར་དུ་བོད་ནང་གི་ལས་འགུལ་སྤེལ་སྟངས་དེ་ཚོ་ཚད་མཐོ་བོ་ཞེ་དྲག་རེད། འཐབ་རྩོད་ཀྱི་ངོ་བོའི་ཐད་ནས་ཀྱང་ལོ་རྒྱུས་ཐོག་བོད་རང་བཙན་གཙང་མ་ཡིན་ཡང་། བོད་ནང་གི་གནས་སྟངས་དང་རྒྱ་ནག་གི་འཕེལ་རྒྱས། རྒྱལ་སྤྱིའི་འགྱུར་བ་སོགས་ལ་བསྟུན་ཏེ་ད་ཆར་རང་བཙན་བློས་བཏང་སྟེ། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་སྒྲོམ་གཞིའི་འོག་ནས་རང་སྐྱོང་རྩོད་ཀྱི་ཡོད་པ་རེད། ང་ཚོའི་དགོས་འདུན་ཆུང་དུ་ཕྱིན་ཡོད་ཀྱང་། རྒྱལ་སྤྱིའི་ངོས་ལེན་དང་རྒྱབ་སྐྱོར་ལྡབ་འགྱུར་གྱིས་ཆེ་རུ་ཕྱིན་ཡོད་པ་རེད། འོན་ཀྱང་ཕྱི་ཕྱོགས་ཀྱི་བོད་པ་ཚོས་ད་དུང་གནང་དགོས་པ་དང་། ལས་འགུལ་ཐོག་ཤུགས་སྣོན་དགོས་ས་གང་མང་ཞིག་མཐོང་གི་འདུག རྒྱ་བལ་འབྲུག་གསུམ་ཁུལ་དུ་བོད་པ་མང་པོ་ཡོད་པ་རེད་ལ། ཕྱིའི་རྒྱལ་ཁབ་སུམ་ཅུ་བཞི་བཅུ་ཞིག་ཏུ་བོད་པ་འབྱོར་ཡོད་པ་རེད། དེ་དག་གིས་རྩ་དོན་ལས་འགུལ་ཐོག་མདུན་སྐྱོད་དང་བློས་གཏོང་ཆེ་ཙམ་གནང་དགོས་ཀྱི་འདུག་དྲན་ཡོད།

    དྲི་བ། ད་ལྟའི་བོད་ནང་གི་ཛ་དྲག་གནས་སྟངས་ཐོག་བོད་མིའི་སྒྲིག་འཛུགས་ཀྱི་ངོས་ནས་ཕྱག་ལས་གནང་སྟངས་ཐད་འདོད་པ་ཁེངས་ཀྱི་ཡོད་དམ།

    ལན། ཐེངས་འདིའི་བཀའ་སྤྱི་གཉིས་ཀྱི་ལས་འགུལ་ཐོག་ང་ལ་བསམ་ཚུལ་ཕྲན་བུ་ཡོད། ༢༠༠༨ ལོར་བོད་ནང་ཛ་དྲག་ཆགས་སྐབས་བཀའ་སྤྱི་གཉིས་ཀྱིས་ཛ་དྲག་ལས་འགུལ་ཚོགས་ཆུང་བཙུགས་པ་རེད་དེ། སྤྱི་འཐུས་ཚོ་བོད་མི་མང་གི་སྐུ་ཚབ་ཡིན་སྟབས་ལས་འགུལ་སྤེལ་ཡོད་པ་རེད། དེར་མི་མང་གིས་ཀྱང་རྒྱབ་སྐྱོར་གནང་ཡོད་པ་རེད། འོན་ཀྱང་བཀའ་ཤག་གི་ངོས་ནས་ཕྱིའི་རྒྱལ་ཁབ་ཁག་གི་གཞུང་ལ་འབྲེལ་བ་གནང་རྒྱུ་ཙམ་ལས་ལས་འགུལ་ནང་དངོས་སུ་གོམ་པ་བརྒྱབ་ཡོད་པ་མ་རེད། དེ་འགྲིག་འདུག་བསམ་ཡོད། ད་ལོར་ཡང་བཀའ་ཤག་གི་གནང་སྟངས་ཐོག་ཐལ་ཆ་ཤོར་ཉན་གི་མ་རེད། ང་ཚོས་ལམ་དབུ་མ་རྩོད་ཀྱི་ཡོད་པ་རེད། བོད་རྒྱ་གཉིས་ཕན་དང་། བོད་རྒྱའི་འཆམ་མཐུན་གླེང་གི་ཡོད་པ་རེད། རྒྱ་ཕྱོགས་ནས་ངོས་ལེན་བྱས་ཀྱང་རུང་ལ་མ་བྱས་ཀྱང་རུང་། རྒྱལ་སྤྱིའི་ཐོག་རྒྱབ་སྐྱོར་རག་ཐབས་དང་། རྒྱ་རིགས་མི་མང་གི་བློ་འགུག་ཐབས་ཐོག་བཀའ་ཤག་གིས་ཕྱག་བརྐྱངས་བརྐྱངས་ལ་སྡོད་དགོས་པ་རེད་བསམ་ཡོད།

    དྲི་བ། བོད་ནང་གི་གནས་སྟངས་ཐོག་བཙན་བྱོལ་སྤྱི་ཚོགས་ཀྱི་བོད་པ་མི་རེ་ངོས་རེ་ནས་འགན་འཁུར་དང་ལས་འགུལ་གང་འདྲ་སྤེལ་དགོས་པར་མཐོང་གི་ཡོད་དམ།

    ལན། སྤྱིར་བཙན་བྱོལ་ནང་གི་བོད་པ་མི་རེ་ངོ་རེ་ནས་ལས་འགུལ་སྤེལ་དང་མི་སྤེལ། རྩ་དོན་ཐོག་ནུས་པ་མཉམ་སྤུངས་བྱ་ཐུབ་དང་མི་ཐུབ་ཟེར་བ་དེ་ཚོགས་སྐྱིད་སྒྲིག་འཛུགས་ཁག་ལ་རག་ལས་ཡོད་པ་རེད་དྲན་ཡོད། བཙན་བྱོལ་སྤྱི་ཚོགས་ནང་ཚོགས་པ་མང་པོ་ཡོད། མི་མང་བརྒྱ་ཆའི་ ༩༩ ཚོགས་པ་དེ་དག་གི་ཁོངས་སུ་འདུས་ཡོད་པ་རེད། བཞུགས་སྒར་ལ་མཚོན་ན་༼ མཉམ་འབྲེལ་འཐུས་ཚོགས ༽ཟེར་བའི་ཚོགས་སྐྱིད་སྒྲིག་འཛུགས་ ༡༡ ཙམ་མཉམ་དུ་འདུས་པའི་ཚོགས་པ་ཞིག་ཡོད། ཚོགས་པ་སོ་སོར་ལས་འགན་ཁ་ཁ་དང་ལྟ་བ་ལངས་ཕྱོགས་སོ་སོ་ཡོད་ཀྱང་། རྩ་དོན་ཛ་དྲག་ལ་ཐུག་ཡོང་སྐབས་གདུང་ཤུགས་ཆིག་སྒྲིལ་ཐོག་ལས་འགུལ་སྤེལ་དགོས་པ་རེད། མི་མང་ལ་སྣེ་ཁྲིད་མཁན་ཡག་པོ་བྱུང་བ་ཡིན་ན། རྒྱ་ཆེའི་མི་མང་གིས་ནམ་ཡང་ཕྱིར་འཐེན་བྱ་རྒྱུ་མ་རེད། བཙན་བྱོལ་ནང་དུ་བོད་མི་ཆིག་འབུམ་ལྷག་ཡོད་པ་དེ་བོད་ནང་གི་བོད་མི་ས་ཡ་དྲུག་གི་སྐུ་ཚབ་རེད། དེ་ལ་ལས་འགན་མང་པོ་ཞིག་ཡོད་པ་ངོས་ཟིན་དགོས་པ་རེད།  མི་སྒེར་སོ་སོའི་མི་ཚེ་འཁྱོལ་ཐབས་བྱས་བསྡད་ན་འགྲིག་གི་མ་རེད།

    དྲི་བ། བོད་ནང་རང་སྲོག་གཏོང་མཁན་མང་ཆེ་བ་གྲྭ་བཙུན་ཆགས་ཡོད་པ་དང་། བོད་པའི་རྩ་དོན་དེ་ཡང་ཆོས་རིག་ལ་འབྲེལ་བ་དམ་པོ་ཡོད་སྟབས། བཙན་བྱོལ་ནང་གི་ཆོས་ལུགས་ཆོས་བརྒྱུད་ཁག་གི་བླ་སྤྲུལ་ཚོར་ལས་འགན་གང་འདྲ་ཡོད་པར་གཟིགས་ཀྱི་ཡོད་དམ།

    ལན། ཁྱེད་ཀྱི་དྲི་བ་འདིའི་ཐད་ང་ལ་བསམ་ཚུལ་མང་པོ་ཞིག་ཞུ་རྒྱུ་ཡོད། ནམ་ཞིག་བོད་རྒྱ་གཉིས་གདོང་ཐུག་བརྒྱབ་སྟེ་བོད་མི་ཁྲི་ཁ་ཤས་ཉི་མ་གཅིག་ལ་བསད་པ་ཡིན་ན། རྒྱ་གཞུང་གིས་དེ་རྒྱལ་ཁ་ཆེན་པོ་ཞིག་ལ་བརྩི་བ་མ་རེད་ལ། བོད་རང་ལ་མཚོན་ནའང་དེ་ཙམ་གྱི་གྱོང་ཆེན་པོ་མ་རེད། ལྐོག་ལྐོག་སིལ་སིལ་གྱིས་བོད་པའི་ཆོས་དང་རིག་གཞུང་གི་ཟུར་དང་སྣེ་ཙམ་རེ་རྩ་མེད་བཏང་བ་ཡིན་ན། རྒྱ་གཞུང་གི་དམིགས་ཡུལ་འགྲུབ་ཀྱི་ཡོད་པ་རེད་ལ། བོད་རང་ལ་མཚོན་ནའང་མི་རིགས་རྩ་མེད་ཀྱི་ཕྱོགས་སུ་གོམ་པ་རེ་རེ་བཞིན་སྤོ་ཡི་ཡོད་པ་རེད། གནས་ལུགས་དེ་ཧ་གོ་བའི་ཐོག་ནས་ཕྱི་ལོགས་སུ་བཞུགས་པའི་བླ་སྤྲུལ་མི་ཆེན་ཚོས་ཆེ་ས་ནས་བོད་མི་རིགས་དང་རྒྱལ་ཁབ། བསྟན་པ་ཆབ་སྲིད་ཡུན་གནས་ཡོང་ཆེད་དང་། ཆུང་ས་ནས་སོ་སོའི་ཆོས་ལུགས་ཆོས་བརྒྱུད་འཛིན་སྐྱོང་སྤེལ་གསུམ་ལ་འགན་འཁྲི་ཡོད་པ་དང་། རྗེས་འཇུག་སྐྱ་སེར་མི་མང་གི་མངོན་འདོད་ལ་རྒྱབ་སྐྱོར་གནང་སྟེ། ནུས་ཤུགས་གཅིག་ཏུ་བསྒྲིལ་ནས་ཕྱག་ལས་ཤིག་གནང་དགོས་པ་དང་། མི་རྒྱུ་གཉིས་ཐོག་ནས་རྩ་དོན་ཆེད་འགུལ་ཀྱོག་ཅིག་རྒྱག་རྒྱུའི་དུས་ཚོད་སླེབས་ཡོད་པ་རེད། བོད་ནང་དུ་ཚེ་སྲོག་གིས་ཆོས་རིག་སྲུང་སྐྱོབ་བྱེད་ཀྱི་ཡོད་དུས། ཕྱི་ཕྱོགས་ནས་དེ་ལས་རྒྱ་ཆེ་བ་ཞིག་དང་གཏིང་ཟབ་པ་ཞིག་སྒྲུབ་ཀྱི་ཡོད་མདོག་མདོག་བྱས་ཏེ་སྡོད་ས་ཡོད་པ་མ་རེད། བཙན་བྱོལ་དུ་དགོན་པ་རྫིག་པོ་མང་པོ་བརྒྱབ་པ་དང་། ཕྱི་རྒྱལ་དུ་ཆོས་ཚོགས་མང་པོ་བཙུགས་པ་དེ་སངས་རྒྱས་བསྟན་པ་སྤེལ་ཆེད་ཡིན་རྒྱུ་རེད། དེ་འགྲིག་གི་ཡོད་པ་རེད། དོན་ངོ་མའི་ཐོག་ནས་སངས་རྒྱས་བསྟན་པ་གནས་དང་མི་གནས་དེ། བོད་གནས་དང་མ་གནས་ལ་རག་ལས་ཡོད་པ་ཧ་གོ་དགོས་པ་རེད།

    དྲི་བ། དབུ་མའི་ལམ་ལ་གྲུབ་འབྲས་ཡོད་མེད་ཐད་དགོངས་ཚུལ་གང་འདྲ་ཡོད་པ་དང་། ཉིད་ཀྱིས་དབུ་མའི་ལམ་ལ་རྒྱབ་སྐྱོར་ཤུགས་ཆེན་ཞུ་དོན་གང་ཡིན་ནམ། 

    ལན། ངས་དབུ་མའི་ལམ་གྱི་སྐོར་ལ་དེབ་ཅིག་བཏོན་ཡོད། དེབ་དེའི་ནང་༧གོང་ས་ཆོག་གིས་དྲུག་ཅུ་རེ་གྲངས་ནས་དབུ་མའི་ལམ་ལ་དགོངས་པ་བཞེས་ཕྱོགས་དང་བཀའ་སློབ་ཕེབས་སྟངས་ཕྱོགས་བསྡུས་བྱས་ཡོད། དེབ་དེ་རྩོམ་སྒྲིག་གི་བརྒྱུད་རིམ་ཁྲོད་དབུ་མའི་ལམ་ལ་ཞིབ་འཇུག་བྱས་ཡོང་དུས། སོ་སོར་སྔར་ལས་ལྷག་པའི་དབུ་མའི་ལམ་ལ་དགའ་དད་སྤྲོ་གསུམ་དང་། ཡིད་ཆེས་གཏིང་ཟབ་མོ་སྐྱེ་ཡོང་གི་འདུག སྡོམ་བརྒྱབ་ན། བོད་པའི་གནད་དོན་དེ་རྒྱལ་སྤྱིའི་སྒང་དུ་བསླེབས་པ་དང་། བོད་གཞིས་བྱེས་གཉིས་ཀྱི་འབྲེལ་ལམ་དེ་རིང་གི་གནས་སྟངས་འདིར་བསླེབས་པ་དབུ་མའི་ལམ་ལ་བརྟེན་ཏེ་བྱུང་བ་ཉག་ཅིག་རེད། རེ་ཟུང་གིས་ ༡༩༧༩ ལོར་ཏིན་ཞའོ་ཕིན་དང་འབྲེལ་བ་བྱུང་རྗེས་དབུ་མའི་ལམ་བྱུང་བ་རེད་ཟེར་མཁན་ཡོད་མོད། དེ་ནི་དབུ་མའི་ལམ་ལ་རྒྱུས་མངའ་མེད་མཁན་ཚོས་དཀྲོགས་བཤད་བྱེད་སྟངས་ཤིག་རེད། ༡༩༦༢ ལོར་༧གོང་ས་མཆོག་གིས་ཌལ་ཧོར་ནས་མི་མང་ལ། ང་ཚོས་རང་བཙན་བརྩད་དེ་སྡོད་རྒྱུ་ལས་རང་སྲིད་རང་སྐྱོང་ཐོག་ཕེབས་ན་ཡག་གི་རེད་གསུངས་ཡོད། ༡༩༦༩ ལོར་༧གོང་ས་མཆོག་གིས་ངྷ་རམ་ས་ལར་ང་ཚོ་བོད་མི་ས་ཡ་དྲུག་པོ་དེས་མགོ་འཐོན་ལ་མ་ཐོན་བྱས་ཏེ་སྡོད་པ་ལས། རྒྱ་མི་ས་ཡ་ཆིག་སྟོང་དང་མཉམ་དུ་བསྡད་ན་ཁྱད་པར་ཁྱོན་ནས་མི་འདུག མི་ལ་དགོས་པ་བདེ་སྐྱིད་རེད། ང་ཚོར་བདེ་སྐྱིད་བྱུང་ན་རྒྱ་མི་དང་མཉམ་དུ་བསྡད་ན་འགྲིག་གི་རེད་གསུངས་ཡོད།

    དྲི་བ། དེང་སྐབས་བོད་ཕྱི་ནང་གཉིས་སུ་བོད་རང་བཙན་ཐོག་སྐད་སྒྲ་ཆེ་རུ་འགྲོ་བཞིན་ཡོད་པ་དང་། བཙན་བྱོལ་ནང་གི་གཞོན་སྐྱེས་མང་པོ་ཞིག་གིས་དབུ་མའི་ལམ་ལ་གྲུབ་འབྲས་འཐོན་གྱི་མེད་སྟབས། བོད་རང་བཙན་རྩོད་དགོས་པ་རེད་ཟེར་མཁན་ཡོང་གི་ཡོད་པའི་ཐད་དགོངས་འཆར་གང་འདྲ་ཡོད་དམ།

    ལན། བཙན་བྱོལ་སྤྱི་ཚོགས་ནང་ལས་ཀྱི་སྣེ་མོ་བ་རེ་ཟུང་དང་གཞོན་སྐྱེས་ཚོའི་ཁྲོད། བོད་ནང་རང་བཙན་ཐོག་ལས་འགུལ་སྤེལ་གྱི་ཡོད་པ་རེད། སྐུ་ལུས་མེར་བསྲེགས་བཏང་བ་དེ་དག་ཀྱང་བོད་རང་བཙན་ཆེད་རེད་ཟེར་མཁན་ཡོང་གི་འདུག ང་རང་གི་བསམ་པར་དེ་འདྲ་ཞིག་ཨེ་ཡིན་ནམ་བསམ་གྱི་ཡོད། གང་ཡིན་ཟེར་ན། ད་ལོའི་ཆོ་འཕྲུལ་སྨོན་ལམ་སྐབས་༧གོང་ས་མཆོག་གིས “ བོད་ནང་རང་བཙན་རྩོད་ཀྱི་ཡོད་པ་རེད་ཟེར་བ་དེ་བདེན་པ་མ་རེད། བོད་ནང་གི་ལས་བྱེད་དང་གནད་འགག་ཅན་གྱི་མི་མང་པོ་ཞིག་ང་ལ་འབྲེལ་བ་ཡོད། ཁོང་ཚོའི་དབུ་མའི་ལམ་ལ་རྒྱབ་སྐྱོར་བརྒྱ་ཆའི་བརྒྱ་གནང་གི་འདུག ཕྱོགས་མང་པོ་ཞིག་ལ་བསམ་བློ་བཏང་ན་རྒྱ་ནག་ལས་ལོགས་སུ་སྡོད་ཐབས་མེད་པ་གསལ་བོ་རེད ” ཟེར་ནས་ལབ་སོང་། ཞེས་བཀའ་གནང་ཡོད་པ་རེད། སྤྱིར་བཏང་༧གོང་ས་མཆོག་ལ་དགོངས་གཞི་གང་ཞིག་ཡོད་པ་དེའི་ཐོག་ལ་གཞིས་བཞུགས་མི་མང་རྒྱག་གཅིག་མཆོངས་གཅིག་ཡིན། ༢༠༠༥ ལོར་ཨཱ་མར་ཝ་ཏིའི་དུས་འཁོར་དབང་ཆེན་རྗེས་བོད་ནང་ནས་རི་དྭགས་སེམས་ཅན་གྱི་པགས་རིགས་མེར་བསྲེགས་བཏང་བ་ལས་གསལ་བོ་ཆགས་ཡོད། འོན་ཀྱང་། དབུ་མའི་ལམ་དང་རང་སྲིད་རང་སྐྱོང་ལ་རྒྱབ་སྐྱོར་བྱེད་ཀྱི་ཡོད་པ་དེ་༧གོང་ས་མཆོག་ལ་བསྟུན་བསྒྱུར་བྱས་པ་དེ་འདྲ་མ་རེད། ཁོང་ཚོའི་ཉིན་རེའི་ཚོ་བའི་དགོས་མཁོ་དང་མིག་གི་མདུན་ལ་ལྷག་པའི་གནས་ཚུལ་གཞི་ལ་བཞག་སྟེ་གསུང་གི་ཡོད་པ་རེད།

    དྲི་བ། དུས་ཚོད་དང་མི་རབས་ཀྱི་འགྱུར་བ་དང་བསྟུན་ཏེ་གཞུང་དམངས་གཉིས་ཀྱི་རྩ་དོན་འཐབ་རྩོད་ཀྱི་ལངས་ཕྱོགས་བོད་རང་བཙན་ཐོག་འཕོ་འགྱུར་འགྲོ་སྲིད་པ་ཞིག་ལ་མཐོང་གི་ཡོད་དམ།  

    ལན། ད་ལྟའི་སྲིད་བྱུས་འདི་ལས་སླ་པོའི་ཐོག་ནས་འགྱུར་ཆོག་ཆོག་ཅིག་མ་རེད། ༧གོང་ས་མཆོག་ལ་ཐུགས་མོས་ཆེན་པོ་ཡོད་པའི་སྲིད་བྱུས་ཞིག་ཡིན་པ་མ་ཟད། བོད་ཕྱི་ནང་གཉིས་ནས་མང་མོས་རྒྱབ་སྐྱོར་ཐོབ་ཡོད་པ་ཞིག་ཆགས་ཡོད་པ་རེད། ལྷག་པར་དུ་བོད་མི་མང་སྤྱི་འཐུས་གྲོས་ཚོགས་ནང་ཐེངས་མང་པོར་གྲོས་ཆོད་སྣོན་འཇོག་བྱས་ཡོད་པ་ཞིག་རེད། གལ་སྲིད་གཞུང་དམངས་གཉིས་ནས་རང་བཙན་ལྟ་བུའི་སྲིད་བྱུས་གཞན་པ་ཞིག་གི་ཐོག་འགྱུར་བ་གཏོང་རྒྱུ་ཡིན་ན། དེ་དང་མཉམ་དུ་བོད་པའི་རྩ་དོན་འཐབ་རྩོད་ལ་ཨ་རི་དང་ཕྱིའི་རྒྱལ་ཁབ་ཁག་གི་རོགས་རམ་མི་དགོས་པ་ཞིག་དང་། བཙན་བྱོལ་གཞུང་དམངས་རྒྱ་གར་གཞུང་ལ་བརྟེན་མི་དགོས་པའི་ལམ་ཁ་ཞིག་ཀྱང་འཚོལ་དགོས་པ་རེད། བོད་གཞུང་དམངས་གཉིས་ཀྱིས་བདུན་ཅུ་དོན་གྲངས་བར་བོད་རང་བཙན་བརྩད་པ་རེད། སྔོན་མ་ང་ཡང་རང་བཙན་རྩོད་མཁན་ཞིག་ཡིན། བོད་ནང་དངོས་སུ་བསྐྱོད་དེ་གསང་བའི་ཐོག་བོད་རང་བཙན་ཐོག་ལས་ཀ་བྱས་པ་ཡིན། བཙན་བྱོལ་ནང་དུ་ཡང་བོད་རང་བཙན་ཆེད་གོམ་བགྲོད་སྔ་ཕྱིར་ཕྱིན་པ་ཡིན། ང་བོད་རང་བཙན་ཆེད་བཙོན་དུ་འགྲོ་མྱོང་ཡོད། བོད་ཀྱི་གཞོན་ནུ་ལྷན་ཚོགས་ཀྱིས་ང་ལ་གཟེངས་རྟགས་ཀྱང་སྤྲད་མྱོང་ཡོད། ད་ལྟ་བསམ་བློ་བཏང་ན། སྐབས་དེ་དག་ལ་སོ་སོའི་ཚོར་བའི་རྗེས་སུ་རྒྱུག་བསྡད་པ་ལས་སྤྱི་དམངས་ཀྱི་འདོད་འདུན་དང་། མི་རིགས་ཤིག་གི་འཕྲལ་ཕུགས་ལ་བསམ་བློ་གཏོང་མ་ཐུབ་པ་ཞིག་ལ་ཚོར་གྱི་འདུག ནམ་ཞིག་བོད་པའི་རྩ་དོན་འཐབ་རྩོད་ཀྱི་སྲིད་བྱུས་དེ་གྲོས་ཚོགས་ཀྱིས་རང་བཙན་ཐོག་གཏན་འབེབས་བྱས་ཏེ། བོད་གཞུང་དམངས་ཡོངས་རང་བཙན་ཐོག་བསྐྱོད་པ་ཡིན་ན་ཡང་། ང་རང་མ་ཤི་བར་དུ་དབུ་མའི་ལམ་ལ་འགྲོ་རྒྱུ་ཡིན་ལ། དབུ་མའི་ལམ་གྱི་ཐོག་ནས་ལས་འགུལ་དང་བློས་གཏོང་གང་འདྲ་ཞིག་བྱ་དགོས་ཀྱང་ཕངས་སེམས་གང་ཡང་མེད།

    སྤྱི་ཟུར་ཡོན་ཏན་རྒྱ་མཚོ་ལགས་ནི། ཕྱི་ལོ་ ༡༩༣༧ ལོར་ལ་སྟོད་དིང་སྒང་དུ་སྐྱེས་ཤིང་། ༡༩༥༩ ཟླ་ ༤ ནང་ནང་བལ་ཡུལ་ཤར་ཁུམ་པོར་བྲོས་བྱོལ་དུ་འབྱོར་རྗེས། ༡༩༦༡ ལོར་རྡོ་གླིང་བཙན་རྒོལ་རྒྱལ་སྐྱོབ་ཀྱི་ལས་འཁུར་བཞེས་ཏེ་ལོ་ ༧ རིང་བོད་ནང་གསང་བའི་ལས་ཀ་བྱས་ཡོད་འདུག དེའི་རྗེས་ངྷ་རམ་ས་ལར་རང་བདེན་ཚོགས་ཆུང་ནང་ལོ་བརྒྱད་དང་། ངྷ་ས་སྟོད་སྐྱིད་ཚོགས་གཞོན་དང་ཚོགས་གཙོ་ལོ་དགུ། ཆོལ་གསུམ་གཅིག་སྒྲིལ་ཚོགས་པའི་ནང་ལོ་བཅུ་བཞི། དབུས་གཙང་ཆོལ་ཁའི་རྒྱུན་ལས་ལོ་བཅོ་བརྒྱད། སྐབས་བཅུ་གཉིས་པའི་དབུས་གཙང་སྤྱི་འཐུས་བཅས་ཀྱི་འགན་བཞེས་ཡོད་པ་དང་། ད་ཆར་དབུ་མའི་ལམ་མི་མང་ལས་འགུལ་ཁང་གི་འགན་འཛིན་གཞོན་པའི་ཕྱག་ནས་གནང་མུས་རེད། 

གསར་འགོད་པ། དོན་འགྲུབ་བཀྲ་ཤིས།

༼ བོད་ཀྱི་དུས་བབ་ཚགས་ཤོག་ལས་འདིར་བསྐྱར་འགོད་བྱས། ༽