བོད་ནས་ཕེབས་པའི་བྱིས་པ་ཆུང་ཆུང་སྐོར་ཞིག་དང་གླེང་མོལ།

ཁ་སང་འདི་གའི་གསར་འགོད་པ་ཤེས་རབ་དགའ་ཚལ་སློབ་གླིང་གི་ཉེ་འཁྲིས་སུ་ཡོད་པའི་དབུས་སྣེ་ལེན་ཁང་དུ་བཅར་ཏེ། ཉིན་འདི་འགར་བོད་ནས་གསར་དུ་ཕེབས་མཁན་དག་ལ་རྒྱུས་ལོན་བྱས་སྐབས། ད་ཆར་བོད་ནས་ཕེབས་མཁན་མང་ཆེ་བ་བྱིས་པ་ལོ་ཆུང་ཆགས་ཡོད་པ་དང་། དེ་དག་ཁྲོད་ཀྱི་ན་མ་སོན་པའི་བུ་མོ་ཆུང་ཆུང་སྐོར་ཞིག་ལ་བཅར་འདྲི་བྱས་ཡོད། 

རང་ལོ་ ༡༥ ཡིན་ཞིང་ཕ་ཡུལ་ཁམས་འབྲི་རུ་རྫོང་ནས་ཡིན་པའི་བུ་མོ་པདྨ་བཀྲ་དབྱངས་ལགས་སུ་བཅར་འདྲི་བྱས་སྐབས། “ ངའི་མིང་ལ་པདྨ་བཀྲ་དབྱངས་ཟེར་གྱི་ཡོད། ཕ་ཡུལ་འབྲི་རུ་རྫོང་དུ་སློབ་ཆུང་ལོ་རིམ་གཉིས་པ་བར་ཕྱིན་པ་ཡིན། སློབ་གྲྭའི་ནང་སློབ་ཚན་གཙོ་བོ་རྒྱ་ཡིག་ཁྲིད་ཀྱི་ཡོད་སྟབས། སློབ་གྲྭར་འགྲོ་མ་འདོད་པར་རྩ་དགོངས་ཞུས་ཏེ་ད་བར་ཁྱིམ་དུ་ལས་ཀ་བྱས་ནས་བསྡད་པ་ཡིན” ཟེར།  

རྒྱ་གར་དུ་ཡོང་སྟངས་སྐོར་དྲིས་པར། “ ངའི་སྤུན་མཆེད་ཅིག་རྒྱ་གར་ནས་བོད་དུ་ལོག་སྐབས། ཁོང་གིས་རྒྱ་གར་ལ་སོང་ན་༧རྒྱལ་བ་རིན་པོ་ཆེར་མཇལ་ཐུབ་པ་མ་ཟད། སློབ་སྦྱོང་གི་གོ་སྐབས་ཡག་པོ་ཡོད་པ་རེད་ལབ་སོང་། དེ་ནས་ཕ་མ་གཉིས་ལ་རྒྱ་གར་དུ་འགྲོ་རྒྱུ་ཡིན་ལབ་པས། ཁོང་གཉིས་ཀྱིས་ང་རྒྱ་གར་ལ་བཏང་བྱུང་། ལྷ་སར་ལམ་ཁྲིད་པ་ཞིག་ལ་རྒྱ་སྒོར་ ༡༠༠༠༠ སྤྲད་དེ་གངས་རི་བརྒྱུད་རྐང་པ་བརྒྱབ་ནས་ཡོང་བ་ཡིན། གངས་རིའི་ནང་དཀའ་ངལ་ཆེན་པོ་འཕྲད་སྟབས།  ད་ལྟ་ངས་མིག་ཡ་གཅིག་གིས་མཐོང་གི་མི་འདུག” ཟེར།

མ་འོངས་པའི་དམིགས་ཡུལ་གང་ཡོད་སྐོར་དྲིས་པར། “ ༧རྒྱལ་བ་རིན་པོ་ཆེར་མཇལ་རྗེས། སུ་ཇཱ་སློབ་གྲྭར་སོང་སྟེ་སློབ་སྦྱོང་ཡག་པོ་བྱ་རྒྱུ་དེ་ཡིན། མ་གཞི་ང་ད་ལྟ་ལོ་ཆེན་པོ་ཆགས་ཡོད་ཀྱང་བོད་ནང་སློབ་སྦྱོང་གི་གོ་སྐབས་རག་མེད་སྟབས། སུ་ཇཱ་སློབ་གྲྭ་ནས་བོད་ཡིག་སོགས་སློབ་ཚན་ཁག་གི་ཐོག་ཤུགས་རྒྱག་རྒྱུ་ཡིན” ཞེས་བརྗོད་བྱུང་།

རང་ལོ་ ༡༤ ཡིན་ཞིང་ཕ་ཡུལ་དམར་ཁམས་ནས་ཡིན་པ་ངག་དབང་པདྨ་ལགས་སུ་བཅར་འདྲི་བྱས་སྐབས། “ངའི་མིང་ལ་ངག་དབང་པདྨ་ཟེར།  དམར་ཁམས་སློབ་གྲྭའི་ནང་ལོ་རིམ་གཉིས་པ་བར་འགྲོ་མྱོང་ཡོད། ང་ཚོའི་སློབ་གྲྭ་དེར་བོད་ཡིག་དང་རྒྱ་ཡིག དབྱིན་ཡིག་བཅས་སློབ་ཀྱི་ཡོད་ཀྱང་། ནང་མིར་དཀའ་ངལ་ཡོད་སྟབས་རྗེས་སུ་སློབ་གྲྭར་འགྲོ་ཐུབ་མ་སོང” ཟེར།  

རྒྱ་གར་ལ་ཡོང་སྟངས་སྐོར་དྲིས་པར། “ ང་རང་སྤུན་མཆེད་དང་མཉམ་དུ་འགྲམ་བརྒྱུད་ནས་རྒྱ་གར་ལ་ཡོང་བ་ཡིན། ངའི་སྤུན་མཆེད་ཡག་པོ་ཡོད་སྟབས་ལམ་ཁྲིད་མཁན་ལ་སྒོར་མོ་སྤྲོད་དགོས་མ་སོང་ལ། ལམ་ཁ་ནས་དཀའ་ངལ་ཀྱང་འཕྲད་མ་སོང” ཟེར།  

མ་འོངས་པའི་དམིགས་ཡུལ་སྐོར་དྲིས་པར། “ ང་རང་སུ་ཇཱ་སློབ་གྲྭར་འགྲོ་རྩིས་ཡོད། སློབ་གྲྭ་དེར་སོང་རྗེས་བོད་ཡིག་དང་དབྱིན་ཇི། རྒྱ་གར་སྐད་ཡིག་བཅས་སྦྱོང་དགོས་བསམ་ཡོད། གང་ཡིན་ཟེར་ན། ང་མ་འོངས་པར་དགེ་རྒན་ཞིག་བྱ་རྒྱུའི་འདོད་པ་ཡོད” ཅེས་བརྗོད་བྱུང་།

རང་ལོ་ ༡༥ ཡིན་པའི་ཕ་ཡུལ་ཁམས་འབྲི་རུ་ནས་ཡིན་པ་འཇུབ་བཟང་སྐྱིད་ལགས་སུ་བཅར་འདྲི་བྱས་སྐབས། “ ངའི་མིང་ལ་འཇུབ་བཟང་སྐྱིད་ཟེར། ངས་ལྷ་ས་པེ་ཅིང་མཐོ་རིམ་སློབ་འབྲིང་དུ་འཛིན་རིམ་བཅུ་བ་བར་སློབ་སྦྱོང་བྱས་པ་ཡིན། སློབ་གྲྭ་དེར་སློབ་མ་ ༢༠༠༠ ཙམ་ཡོད་པ་ཕལ་ཆེ་བ་རྒྱ་རིགས་རེད། སློབ་ཚན་ཚང་མ་རྒྱ་ཡིག་རྒྱ་སྐད་རེད། ཆབ་སྲིད་སློབ་ཁྲིད་སྐབས་རྒྱ་རིགས་དགེ་རྒན་ཚོས་ཏཱ་ལའི་བླ་མ་ཁ་བྲལ་བ་དང་ཆབ་སྲིད་ཀྱི་ལག་ཆ་རེད་ཟེར་ནས་སྐད་ཆ་སྡུག་ཅག་བཤད་ཡོང་སྐབས། སེམས་པ་སྐྱིད་པོ་ཁྱོན་ནས་མི་འདུག དེའི་རྗེས་རྩ་དགོངས་ཞུས་ཏེ་རྒྱ་གར་ལ་ཡོང་བ་ཡིན” ཟེར།

རྒྱ་གར་དུ་ཡོང་སྟངས་སྐོར་ལ། “ ད་ལོའི་ཕྱི་ཟླ་ ༩ པའི་ནང་ང་ཚོ་སློབ་མ་ ༥ ཙམ་རྒྱ་གར་ལ་ཡོང་བ་ཡིན། གཙང་ས་སྐྱ་རུ་ཉེན་རྟོག་པས་འཛིན་བཟུང་བྱས་སོང་། ཉེན་རྟོག་པས་ཁྱོད་ཚོ་གང་ལ་འགྲོ་བཞིན་ཡོད་ཅེས་དྲིས་སྐབས། རྒྱ་གར་ལ་སློབ་སྦྱོིང་བྱེད་དུ་འགྲོ་རྒྱུ་ཡིན་ལབ་པ་ཡིན། མི་དེ་ཁོང་ཁྲོ་ལངས་ཏེ་ཀྲུང་གོར་སློབ་གྲྭ་ཡོད་པ་མ་རེད་དམ་ཟེར་ནས་ང་ཚོར་ཉེས་རྡུང་མང་པོ་བཏང་སོང་། ཟླ་ ༡ ཙམ་གྱི་རྗེས་གཞིས་རྩེ་བཙོན་ཁང་ནས་ཀློད་གྲོལ་བཏང་སོང་། ཕྱི་ཟླ་ ༡༡ ནང་ལྷ་སར་ལམ་ཁྲིད་ཞིག་ལ་རྒྱ་སྒོར་ ༡༠༠༠༠ སྤྲད་དེ་བསྐྱར་དུ་ཡོང་བ་ཡིན” ཟེར།

 ཁོ་མོའི་དམིགས་ཡུལ་སྐོར་དྲིས་སྐབས། “ ང་རྒྱ་གར་ལ་བོད་ཡིག་དང་དབྱིན་ཡིག་སློབ་སྦྱོང་བྱེད་དུ་ཡོང་བ་ཡིན། ང་ཚོའི་སློབ་གྲྭར་བོད་ཡིག་བསླབ་རྒྱུ་ཡོད་པ་མ་རེད། བོད་ནང་བོད་ཡིག་ལ་ཆ་འཇོག་ཀྱང་མི་འདུག ངས་རྒྱ་ཡིག་ཡག་པོ་ཤེས་ཀྱི་ཡོད་ཀྱང་། སོ་སོ་བོད་པ་ཞིག་ཡིན་པའི་ཆ་ནས་བོད་ཡིག་སྦྱང་རྒྱུའི་སེམས་ཤུགས་ཆེན་པོ་ཡོད། ད་ལྟ་ང་རང་སྦིར་སློབ་གྲྭར་འགྲོ་རྩིས་ཡོད། མ་འོངས་པར་སྨན་པ་ཞིག་བྱ་ཐུབ་ན་བསམ་གྱི་འདུག” ཅེས་བརྗོད་སོང་།

རང་ལོ་ ༡༦ ཡིན་པའི་ཕ་ཡུལ་སྟོད་གཉའ་ལམ་རྫོང་ནས་ཡིན་པའི་སངས་རྒྱས་སྒྲོལ་མ་ལགས་སུ་བཅར་འདྲི་བྱས་སྐབས། “ ངའི་མིང་ལ་སངས་རྒྱས་སྒྲོལ་མ་ཟེར་གྱི་ཡོད། ང་ལ་ནང་མི་སྤུན་མཆེད་ ༨ ཡོད། ཕ་ཡུལ་གྱི་སློབ་གྲྭའི་ནང་རྒྱ་ཡིག་དང་བོད་ཡིག་གཉིས་ཀ་སློབ་ཀྱི་ཡོད་ཀྱང་། དགེ་རྒན་ཚོས་སློབ་ཚན་ཡག་པོ་སློབ་ཀྱི་མི་འདུག་པས་སློབ་གྲྭར་འགྲོ་རྒྱུར་ཉོབ་སོང” ཟེར།

རྒྱ་གར་ལ་ཡོང་སྟངས་སྐོར་དྲིས་པར། “ཕ་ཡུལ་གྱི་མི་ཚོས་རྒྱ་གར་ལ་སོང་ན་ཡག་པོ་ཡོད་པ་རེད་ཟེར་གྱི་འདུག དེ་ནས་ངའི་ཕ་ལགས་ཀྱིས་བོད་པ་ལམ་ཁྲིད་ཞིག་ལ་རྒྱ་སྒོར་ ༧༠༠༠ སྤྲད་དེ་འགྲམ་བརྒྱུད་ནས་བལ་ཡུལ་དུ་ཡོང་བ་ཡིན། ཕ་ཡུལ་ནས་ཡོང་ཁར་ཕ་མ་གཉིས་ཀྱིས་ང་ལ་རྒྱ་གར་ལ་སོང་སྟེ་དབྱིན་ཡིག་ཡག་པོ་སྦྱང་དགོས་པ་རེད་ལབ་སོང” ཟེར།

མ་འོངས་པའི་དམིགས་ཡུལ་སྐོར་དྲིས་པར། “ ང་སྦིར་སློབ་གྲྭ་སོང་སྟེ་དབྱིན་ཡིག་དང་བལ་ཡུལ་སྐད་ཡིག་གཉིས་སྦྱང་རྒྱུ་ཡིན། མ་འོངས་པར་དགེ་རྒན་ཞིག་བྱ་རྒྱུ་ཡིན། ངས་བསམ་ན་ང་རང་བོད་དུ་ལོག་ཐུབ་ས་མ་རེད་བསམ་གྱི་འདུག “ ཅེས་བརྗོད་བྱུང་།

རང་ལོ་ ༡༤ ཡིན་པའི་ཕ་ཡུལ་ཁམས་འབྲི་རུ་ནས་ཡིན་པའི་བུ་མོ་བསྟན་འཛིན་ཆོས་སྐྱིད་ལགས་སུ་བཅར་འདྲི་བྱས་སྐབས། “ ངའི་མིང་ལ་བསྟན་འཛིན་ཆོས་སྐྱིད་ཟེར། ཕ་ཡུལ་ནས་ཕྱུགས་རྫི་ལ་འགྲོ་དགོས་སྟབས་སློབ་གྲྭ་འགྲོ་རྒྱུའི་གོ་སྐབས་བྱུང་མ་སོང་། ཕ་མས་བཤད་ན་སློབ་གྲྭའི་སློབ་ཚན་གཙོ་བོ་རྒྱ་ཡིག་རེད་ཟེར་གྱི་འདུག” ཟེར།

རྒྱ་གར་དུ་ཡོང་སྟངས་སྐོར་ལ། “ངའི་ཨ་ཁུ་ཞིག་གིས་བཤད་ན། རྒྱ་གར་ལ་སོང་ན་བླ་མ་མཇལ་ཐུབ་རྒྱུ་དང་ཤེས་ཡོན་སྦྱང་རྒྱུ་གཉིས་ཀ་རག་གི་རེད། རྒྱ་གར་གྱི་ས་ཆ་སྐྱིད་པོ་ཡོད་པ་རེད་ཟེར་གྱི་འདུག དེ་ནས་ང་རྒྱ་གར་ལ་ཡོང་འདོད་ཆེན་པོ་སྐྱེས་སོང་། ཕ་ཡུལ་ནས་ལྷ་ས་བར་ནང་མིས་སྐྱེལ་ནས་ཡོང་བ་ཡིན། འགྲམ་དུ་མི་ཞིག་ལ་རྒྱ་སྒོར་ ༡༠༠༠༠ སྤྲད་དེ་རྐང་པ་བརྒྱབ་སྟེ་ཡོང་བ་ཡིན། བལ་ཡུལ་དུ་བསླེབས་སྐབས་༧རྒྱལ་བ་རིན་པོ་ཆེའི་སྐུ་པར་མཇལ་རྒྱུ་འདུག་པས། སེམས་ལ་ཞེད་སྣང་ཞིག་སྐྱེས་སོང་། ང་ཚོའི་ཕ་ཡུལ་ན་བླ་མའི་སྐུ་པར་མཇལ་རྒྱུ་ཡོད་པ་མ་རེད” ཟེར།

 ཁོང་གི་དམིགས་ཡུལ་སྐོར་དྲིས་སྐབས། “ ད་ལྟ་ང་རང་ལོ་ཆེན་པོ་ཆགས་ཡོད་སྟབས། ཡི་གེ་ཤེས་ཀྱི་མ་རེད་བསམ་གྱི་འདུག ཡིན་ནའང་། བོད་ཡིག་དང་དབྱིན་ཡིག་ཐོག་ཤུགས་བརྒྱབ་སྟེ་དགེ་རྒན་ཞིག་བྱ་འདོད་ཡོད” ཅེས་བརྗོད་བྱུང་།

རང་ལོ་ ༡༤ ཡིན་ཞིང་ཕ་ཡུལ་འབྲི་རུ་རྫོང་ནས་ཡིན་པའི་བུ་མོ་ཀུན་བཟང་ལགས་སུ་བཅར་འདྲི་བྱས་སྐབས། “ ངའི་མིང་ལ་ཀུན་བཟང་ཟེར་གྱི་ཡོད། ངའི་ནང་ལ་མི་ ༧ ཡོད། ཕ་མས་སློབ་གྲྭ་སོང་ན་རྒྱ་མིའི་ཡི་གེ་སྦྱང་དགོས་པ་རེད་ཟེར་གྱི་འདུག དེའི་སྟབས་ཀྱིས་ང་རང་ཕ་ཡུལ་དུ་ཕྱུགས་རྫི་བྱས་ཏེ་བསྡད་པ་ཡིན” ཟེར།

རྒྱ་གར་ལ་ཡོང་སྟངས་སྐོར་དྲིས་པར། “ ཉེ་སྔོན་ཕ་མ་གཉིས་ཀྱིས་རྒྱ་གར་ལ་སོང་ན། རྒྱལ་བ་རིན་པོ་ཆེར་མཇལ་ཐུབ་པ་དང་། སློབ་གྲྭའི་ནང་དུའང་རྒྱ་མིའི་ཡི་གེ་སྦྱང་དགོས་པ་མ་རེད། དགེ་རྒན་ཚོས་ཀྱང་རྡུང་གི་མ་རེད་ཟེར་གྱི་འདུག དེ་ནས་ལམ་ཁྲིད་ཞིག་ལ་རྒྱ་སྒོར་ ༡༠༠༠༠ ལྷག་སྤྲད་དེ་ཡོང་བ་ཡིན། ཕ་ཡུལ་དུ་མི་གཞན་གྱིས་རྒྱ་གར་སྐྱིད་པོ་ཡོད་པ་རེད་ཟེར་གྱི་འདུག་ཀྱང་། ང་རང་རྒྱ་གར་གྱི་ཁ་ལག་ལ་དགའ་བོ་མི་འདུག” ཟེར།

མ་འོངས་པའི་དམིགས་ཡུལ་སྐོར་དྲིས་པར། “ ང་ལ་རྒྱ་གར་ན་སྤུན་མཆེད་གང་ཡང་མེད། དེ་ཡིན་དུས་སུ་ཇཱ་སློབ་གྲྭར་བོད་ཡིག་དང་དབྱིན་ཡིག་ཡག་པོ་སྦྱངས་རྗེས་བོད་དུ་ལོག་གི་ཡིན། བོད་དུ་ལོག་ནས་ཕ་ཡུལ་དུ་དགེ་རྒན་བྱ་རྒྱུ་ཡིན། ངའི་ཕ་མ་དང་ནང་མི་ཚོས་སློབ་སྦྱོང་ཡག་པོ་ཆགས་ན་བོད་ལ་ལོག་ཤོག་ཟེར་གྱི་འདུག” ཅེས་བརྗོད་བྱུང་།

གསར་འགོད་པ། དཔལ་ལྡན།