༧གོང་ས་མཆོག་གཏོང་ལེན་ཚོགས་པའི་མཛད་སྒོར་ཆིབས་བསྒྱུར།

དེ་རིང་ཞོགས་པར་རྡ་ཤོད་གཏོང་ལེན་ཚོགས་པའི་འཛུགས་སྐྲུན་ལེགས་འགྲུབ་ཀྱི་མཛད་སྒོ་ཞིག་ཚོགས་ཡོད་ཅིང་། སྐུ་མགྲོན་གཙོ་བོར་༧གོང་ས་མཆོག་ཆིབས་བསྒྱུར་གྱིས་བཀའ་སློབ་ལམ་སྟོན་གནང་ཡོད།   

དེ་རིང་ཕྱི་ཚེས་ ༡༩ ཉིན་གྱི་ཞོགས་པའི་ཆུ་ཚོད་ ༩།༣༠ སྟེང་ངྷ་རམ་ས་ལ་དང་ས་རཱ་མཐོ་སློབ་བར་གྱི་གཞུང་ལམ་ཉེ་འགྲམ་དུ་གཏོང་ལེན་ཚོགས་པའི་( Tong Len Charitable Trust)ཞེས་པ་འཛུགས་སྐྲུན་ལས་གཞིའི་ཁྲོད། ཕྲུ་གུའི་སྡོད་ཁང་དང་། ཡིག་ཚང་བཅས་ཀྱི་ཨར་ལས་ཡོངས་སུ་མཇུག་བསྒྲིལ་བའི་མཛད་སྒོ་ཞིག་ཚོགས་ཡོད་ཅིང་། དབུ་འབྱེད་མཛད་སྒོའི་སྐུ་མགྲོན་བཙོ་བོར་༧གོང་ས་མཆོག་ཆིབས་བསྒྱུར་བསྐྱངས་ཡོད། གཞན། བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་དང་ལྷན་ཁང་ཁག་གི་བཀའ་བློན་རྣམ་པ། སྤྱི་འཐུས་རྒྱུན་ལས། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ། ཧི་མ་ཅཱལ་མངའ་སྡེའི་བློན་ཆེན་ཟུར་པ་སྐུ་ཞབས་ཤུ་རེ་ཤན་ངྷར་ཀུ་མེལ་(Shanta Kumar )མཆོག གཏོང་ལེན་ཚོགས་པའི་ཕྱི་རྒྱལ་ཡན་ལག་ཁག་གི་འགན་འཛིན་དང་སྦྱིན་བདག་ཁག ཧི་མ་ཅལ་མངའ་ཁུལ་གྱི་ཚོགས་པ་ཁག་གི་སྐུ་ཚབ། གཏོང་ལེན་བསྟི་གནས་ཁང་གི་ཕྲུ་གུའི་ཕ་མ། ས་རཱ་མཐོ་སློབ་དང་ཐང་སྟོང་གླུ་གར་ཚོགས་པའི་དགེ་སློབ། ས་གནས་ཡུལ་མི་བཅས་མི་མང་ ༢༠༠ ལྷག་འདུ་འཛོམས་གནང་འདུག

མཛད་སྒོའི་ཐོག་མར་༸གོང་ས་མཆོག་གིས་བསྟི་གནས་ཁང་གི་ཡིག་ཚང་དང་ཕྲུ་གུའི་ཉལ་ཁང་བཅས་ལ་རབ་གནས་གནང་བ་དང་། སློབ་ཕྲུག་ཚོས་༸གོང་ས་མཆོག་ལ་བསྟོད་གཞས་ཕུལ་རྗེས། གཏོང་ལེན་དགེ་རྩ་ཚོགས་པའི་འགན་འཛིན་གྲྭ་བློ་བཟང་འཇམ་དབྱངས་ལགས་ཀྱིས་ཐོག་མ་ ༢༠༠༢ ལོར་གཏོང་ལེན་ཚོགས་པ་ཐོག་མར་མགོ་འཛུགས་གནང་སྟངས་དང་ད་ལྟའི་གནས་སྟངས། མ་འོངས་པར་མུ་མཐུད་ཚོགས་པ་རྒྱ་སྐྱེད་གཏོང་འཆར་ཡོད་པ་སོགས་ངོ་སྤྲོད་གནང་བྱུང་།

དེའི་རྗེས་ཧི་མ་ཅལ་མངའ་སྡེ་བློན་ཆེན་ཟུར་བ་སྐུ་ཞབས་ཤུ་རེ་ཤན་ངྷར་ཀུ་མེལ་མཆོག་གིས་ཁོང་༸གོང་ས་མཆོག་དང་མཉམ་དུ་དེ་རིང་གི་མཛད་སྒོར་ཞུགས་ཐུབ་པ་དེ་མི་ཚེའི་ནང་གི་དོན་དག་རྩ་ཆེན་པོ་ཞིག་ཏུ་ངོས་འཛིན་བྱེད་ཀྱི་ཡོད་པ་དང་། ལོ་ ༤༥ སྔོན་ཁོང་གིས་ཧི་མ་ལ་ཡ་ཞེས་པའི་དུས་དེབ་ཞིག་པར་བསྐྲུན་བྱས་སྐབས། ༧གོང་ས་མཆོག་གིས་ཁོང་ལ་གདེང་འཇོག་གནང་ཡོད་ཚུལ་དང་། དེའི་རྗེས་སུའང་ཁོང་བཟའ་ཟླ་གཉིས་ཐེངས་མང་པོར་༸གོང་ས་མཆོག་ལ་མཇལ་འཕྲད་ཀྱི་གོ་སྐབས་བྱུང་སྟབས། ཁོང་ཉིད་ཀྱི་ངོས་ནས་༸གོང་ས་མཆོག་དང་རྒྱ་གར་སྤྱི་ཚོགས་ཞབས་ཞུ་བ་སྐུ་ཞབས་གུ་རུ་གྷོལ་ཝར་ཀེལ་མཆོག་གཉིས་མི་ཚེ་ནང་གི་བརྩི་མཐོང་ཆེ་ཤོས་ཀྱི་གང་ཟག་གཉིས་ཆགས་ཡོད་སྐོར། ཁོང་ཉིད་ཀྱི་ངོས་ནས་སྐྱོ་བོ་དང་ཉམ་ཐག་རིགས་ལ་རོགས་རམ་བྱེད་ཀྱིན་པར་ཡི་རངས་བཅས་གནང་སོང་ལ། ཁོ་རང་རྒྱ་གར་གྲོས་ཚོགས་འཐུས་མི་ཞིག་ཡིན་པའི་ཆ་ནས་ལས་དོན་འདིར་ཞལ་འདེབས་དངུལ་ཧིན་སྒོར་འབུམ་ ༡༠ གནང་རྒྱུ་ཡིན་པའི་ཁས་ལེན་ཡང་བྱས་སོང་།  

དེའི་རྗེས་༸གོང་ས་མཆོག་གིས་སྐུ་མགྲོན་རྣམས་ལ་འཚམས་འདྲི་དང་འབྲེལ་བཀའ་སློབ་གནང་དོན། “ ངོས་རང་ལ་མཚོན་ན་ལོ་ཤས་སྔོན་ནས་འཇམ་དབྱངས་ལགས་ཀྱིས་སྤེལ་བའི་ལས་དོན་སྐོར་ལ་རྒྱུས་མངའ་ཡོད་ལ། སྐབས་ཤིག་ཁོང་ང་སྡོད་སར་ཕྲུ་གུ་འགའ་འཁྲིད་ནས་བསླེབས་སོང་། དེ་རིང་འདིར་དངོས་སུ་ཐུག་རྒྱུ་བྱུང་བ་རེད། འདིར་སྡོད་མཁན་གྱི་ཕྲུ་གུ་རྣམས་ཁྱིམ་ཚང་ཉམ་ཐག་གི་ཕྲུ་གུ་ཡིན་པ་མ་ཟད། ཕ་མ་ཚོས་གད་སྙིགས་སྒྲུག་ནས་འཚོ་ཐབས་བྱེད་ཀྱི་ཡོད། སྐབས་ཤིག་ཨ་མ་གཅིག་གིས་འཚོ་བའི་དཀའ་ངལ་ལ་བརྟེན་ནས་རང་གི་ཕྲུ་གུ་རྒྱུག་ཆུའི་འགྲམ་དུ་གཡུགས་པ་སོགས་ཀྱི་གནས་ཚུལ་གོ་ཐོས་བྱུང་བར་ང་ལ་སེམས་ཚོར་ཆེན་པོ་སྐྱེས་བྱུང་། ངས་ནམ་རྒྱུན་ང་ཚོ་ཚང་མ་འགྲོ་བ་མི་ཡིན་པའི་གཞི་རྩའི་གནས་སྟངས་ཀྱི་ཐོག་ནས་འཛམ་གླིང་གི་མི་འབོར་ཐེར་འབུམ་ ༧ ཡོད་པ་ཚང་མ། ཐོག་མར་མའི་མངལ་ནས་སྐྱེས་སྟངས་དང་ཐ་མར་འཆི་སྟངས་གཅིག་མཚུངས་ཆགས་ཡོད། འོན་ཀྱང་། ཆོས་ལུགས་དང་རྒྱལ་ཁབ་མ་འདྲ་བ་དང་། ཆོས་ཁས་ལེན་མིན། ཤེས་ཡོན་ཡོད་མེད། རིགས་རུས་ཐ་དད་ཡིན་པ། དབུལ་ཕྱུག་གི་ཁྱད་པར་ཡོད་པ་དེ་དག་ནི་རིམ་པ་གཉིས་པ་ཆགས་ཡོད་ཅེས་བཤད་ཀྱི་ཡོད” ཅེས་དང་།

ཁོང་གིས་མུ་མཐུད་དུ། ” གལ་ཆེ་ཤོས་ང་ཚོ་ཚང་མ་འགྲོ་བ་མི་ཡིན་པ་གཅིག་གྱུར་ཡིན། ངོས་རང་བདེ་བ་འདོད་པ་དང་སྡུག་བསྔལ་མི་འདོད་པ་འགྲོ་བ་མི་ཐེར་འབུམ་ ༧ ཡོད་པ་ཚང་མར་ཚོར་བ་དེ་གཅིག་མཚུངས་ཡོད། དེར་བརྟེན། མི་ཚང་མར་དཀའ་ངལ་ལས་རྒྱག་རྒྱུའི་ཐོབ་ཐང་ཆ་ཚང་ཡོད། ང་ཚོ་སྤྱི་ཚོགས་ལ་བརྟེན་པའི་སེམས་ཅན་ཞིག་ཡིན་སྟབས། ཕན་ཚུན་དཀའ་ངལ་འཕྲད་སྐབས་གཅིག་ཕན་གཅིག་གྲོགས་བྱ་རྒྱུ་དེ་ང་ཚོའི་བཟང་སྤྱོད་ཀྱི་འགན་ཆགས་ཡོད། དེ་ལས་ལྡོག་ན་དབུལ་ཕྱུག་བར་གྱི་སྟོང་ཆ་དེ་བཟང་སྤྱོད་དང་འགལ་བ་ཙམ་མ་ཟད། རྙོག་དྲའི་འབྱུང་གཞི་གཙོ་བོ་ཞིག་ཀྱང་ཆགས་ཡོད། ང་ཚོས་སྟོང་ཆ་དེ་ཇི་ལྟར་སེལ་དགོས་མིན་ལ་བསམ་ཞིབ་བྱ་དགོས། དེ་ལྟར་ཡོང་བར་དབུལ་ཕྱུག་གཉིས་ཀར་འགན་ཡོད། འབྱོར་བ་ཡོད་མཁན་ཚོས་ཤེས་ཡོན་དང་མཁོ་ཆས་ཀྱི་མཐུན་འགྱུར་ཞུ་རྒྱུ་དང་། ཉམ་ཐག་ཚོར་བློ་སྤོབས་བསྐྲུན་རྒྱུ་དེ་ཡིན། ཉམ་ཐག་ཚོས་ཀྱང་རང་ཉིད་ལ་གདེང་སྤོབས་སྐྱེས་བའི་ཐོག་དཀའ་ལས་རྒྱག་ཐུབ་དགོས།  ” ཞེས་དང་བཀའ་སློབ་གནང་བྱུང་ལ། ༧གོང་ས་མཆོག་གིས་དེ་སྔ་ཚོགས་པ་འདིར་ཁོང་གི་ཐེབས་རྩ་ནས་རོགས་རམ་གནང་ཡོད་པ་ལྟར། མ་འོངས་པར་མུ་མཐུད་གནང་འཆར་ཡོད་ཚུལ་ཡང་གསུངས་བྱུང་།  

གཏོང་ལེན་ཚོགས་པ་ནི་ཕྱི་ལོ་ ༢༠༠༤ ལོར་རྒྱ་གར་གྱི་དབུལ་ཕོངས་བྱིས་པ་རྣམས་ལ་བདག་སྐྱོང་དང་སློབ་སྦྱོང་སྤྲོད་ཆེད་དུ་བཙུགས་པ་ཞིག་ཡིན་ཞིང་། ཚོགས་པ་འདིས་ད་ལྟའི་བར་ཤེས་ཡོན་དང་འཕྲོད་བསྟེན། ཁོར་ཡུག་བཅས་སྡེ་ཚན་གསུམ་ཡོད་ཅིང་། ཤེས་ཡོན་སྡེ་ཚན་དུ་ཕྲུ་གུ་ ༤༠ ལྷག་དང་འཕྲོད་བསྟེན་སྡེ་ཚན་དུ་ཕྲུ་གུ་ ༡༥༠ ལྷག་བཅས་ཁྱོན་ཕྲུ་གུ་ ༢༠༠ ལྷག་ལ་བདག་སྐྱོང་བྱས་ཡོད་པ་དང་། ༢༠༠༩ ལོར་སྐུ་སྒེར་ཡིག་ཚང་གཙོས་ཕྱི་རྒྱལ་གྱི་ཚོགས་པ་དང་མི་སྣས་རོགས་རམ་ལ་བརྟེན་ནས་ཐེངས་འདིར་ཕྲུ་གུའི་ཉལ་ཁང་དངཟ་ཁང་། སློབ་ཁང་། གློག་ཀླད་སྦྱོང་བརྡར་ཁང་། ཡིག་ཚང་བཅས་གསར་རྒྱག་ལེགས་འགྲུབ་བྱུང་ཡོད་འདུག་ལ། ད་ལྟའི་ཆར་རྒྱ་གར་ཡུལ་མིའི་ཕྲུ་གུ་ ༦༠ དང་ལས་བྱེད་ ༢༤ བཅས་བསྡོམས་མི་༨༠ ཡོད་པ་དང་། ཟླ་རྗེས་མའི་ནང་ཕྲུ་གུ་ ༣༠ ལྷག་གསར་དུ་བསྡུ་རུབ་ཀྱི་འཆར་གཞི་ཡོད་འདུག

གསར་འགོད་པ། དོན་གོ