སུ་ཇཱ་བོད་ཁྱིམ་སློབ་གྲྭའི་སློབ་མ་སྐོར་ཞིག་གིས་རང་འགན་སློབ་སྦྱོང་གི་ཞོར་དུ་༼ སློབ་མའི་ཚགས་པར ༽ཞེས་པའི་སྣ་འཛོམས་རང་བཞིན་གྱི་སློབ་མའི་ཚགས་པར་ཞིག་ཉེར་གྱིན་ཡོད་འདུག་ལ། ཚགས་པར་འདིའི་འགྲོ་སོང་ཆ་ཚང་སོ་སོའི་ཨམ་ཕྲག་ལས་གཏོང་བཞིན་ཡོད་འདུག
ཕྱི་ཚེས་ ༡༣ ཉིན་གསར་འགོད་པས་པས་སློབ་མའི་ཚགས་པར་གྱི་རྩོམ་སྒྲིག་པ་ཚེ་དབང་རྣམ་རྒྱལ་དང་རྩོམ་སྒྲིག་ལས་རོགས་བཀྲ་ཤིས་དོན་འགྲུབ་གཉིས་སུ་གླེང་མོལ་གྱི་ཚུལ་དུ་ཚགས་པར་འདི་ཐོག་མར་མགོ་འཛུགས་བྱེད་སྟངས་དང་ད་ལྟའི་གནས་སྟངས་སྐོར་ལ་བཅར་འདྲི་ཞུས་ཡོད། ཁོང་གཉིས་ཀྱིས་ངོ་སྤྲོད་གནང་བ་ལྟར་ན། སློབ་མའི་ཚགས་པར་དེ་ནི། བོད་ནས་གསར་དུ་འབྱོར་ཞིང་ད་ལྟ་སུ་ཇཱ་སློབ་གྲྭའི་ནང་སློབ་གཉེར་བྱེད་ཀྱིན་པའི་སློབ་མ་ ༤ ཡིས་དང་བླངས་ཐོག་སློབ་གྲྭའི་འཛིན་སྐྱོང་གི་བཀའ་འཁྲོལ་འོག ༢༠༡༠ ལོའི་ཕྱི་ཟླ་ ༩ པའི་ཚེས་ ༥ ཉིན་༼ མྱི་རབས་གསར་པའི་ཡོ་ལང་། ༽ ཞེས་པའི་ཚོགས་ཆུང་ཞིག་བཙུགས་པ་དང་། ཚོགས་ཆུང་དེའི་མིང་ཐོག་ནས་སློབ་མའི་དུས་དེབ་ཅིག་འདོན་སྤེལ་གྱིས་ཐེངས་གཉིས་འདོན་སྤེལ་བྱས་ཀྱང་། དཔལ་འབྱོར་རོགས་རམ་དང་གློག་ཀླད་སོགས་ཀྱི་མཐུན་རྐྱེན་མེད་པའི་དཀའ་ངལ་འོག་མཚམས་འཇོག་བྱ་དགོས་བྱུང་ཞིང་། དེའི་རྗེས་ཤིང་བཟའ་རིན་པོ་ཆེ་མཆོག་གིས་ཧིན་སྒོར་ཁྲི་ ༡ དང་ཞི་ཆེན་རིན་པོ་ཆེ་མཆོག་གིས་ཧིན་སྒོར་ ༣༠༠༠ ། ལྷོ་ཕྱོགས་རྒྱུད་སྨད་གྲྭ་ཚང་གིས་ཧིན་སྒོར་ ༣༠༠༠ བཅས་ཀྱི་རོགས་རམ་དང་། རྒྱུད་སྨད་གྲྭ་ཚང་གི་གློག་ཀླད་མཐུན་འགྱུར་འོག འདི་ལོའི་ཕྱི་ཟླ་ ༡ པའི་ཚེས་ ༡ ཉིན་གངས་ཅན་རིག་གནས་སློབ་གྲྭའི་རྒན་དམ་ཆོས་ལགས་ཀྱིས་ཚགས་པར་དབུ་འབྱེད་གནང་སྟེ། ཐོག་མར་ ༨༠༠ དཔར་འགྲེམས་དང་། དེའི་རྗེས་ཟླ་རེར་ཚགས་པར་ ༡༠༠༠ པར་བསྐྲུན་གྱིས་བྷེལ་ཀོལ་དང་སེ་ལ་ཀོལ། ཅོང་ངྷི་ར། གྷོལ་པ་པུར། སུ་ཇཱ། ངྷ་སྟེང་། ངྷ་ཤོད། ས་རཱ་དང་ནོར་གླིང་མཐོ་སློབ། ཤེས་རབ་དགའ་ཚལ་སློབ་གླིང་བཅས་སུ་འགྲེམས་སྤེལ་གྱིས་ད་ཆར་དཔར་ཐེངས་ ༨ པ་དེ་ཆགས་ཡོད་འདུག
སློབ་མའི་ཚགས་པར་འདིའི་ནང་།༼ རྩོམ་རིག་ལྡུམ་རྭ༽ དང་༼ བྱིས་སྒྲུང ༽འཛམ་གླིང་གི་གནས་རི་གྲཊ་ཆེན་ངོ་སྤྲོད་དང་མི་སྣ་གྲགས་ཅན་གྱི་གསུང་བཤད། ལེགས་བཤད་ཐོར་བུ། ཁེད། བསླབ་བྱ། དཔེ་དེབ་ངོ་སྤྲོད། སྲོག་ཆགས་རིགས་ངོ་སྤྲོད། བོད་ཕྱི་ནང་གཉིས་ཀྱི་གཞས་པ་གྲགས་ཅན་ཁག་གི་གཞས་ཚིག འཛམ་གླིང་སྟེང་གི་གསར་གཏོད་ཀྱི་རིགས་སོགས་ཀྱི་སྡེ་ཚན་ཡོད་པ་དང་། ཚགས་པར་འདིའི་དམིགས་ཡུལ་གཙོ་བོ་ནི། བཙན་བྱོལ་བོད་མིའི་གཞི་རིམ་སློབ་གྲྭ་ཁག་ཏུ་བོད་སྐད་ཡིག་གི་གནས་བབ་སྐྱོ་བོ་ཡིན་པ་ཇེ་ལེགས་སུ་གཏོང་ཆེད་དང་། ལྷག་པར་དུ་སུ་ཇཱ་དང་ཤེས་རབ་དགའ་ཚལ་སློབ་གླིང་བཅས་སུ་བོད་ནས་གསར་དུ་འབྱོར་མཁན་བོད་སྐད་ཡིག་གི་གནས་ཚད་མཐོ་བོ་ཡོད་པའི་སློབ་མ་ཚོར་རང་དབང་ཐོག་སོ་སོའི་བསམ་ཚུལ་འདོན་སའི་སྡིངས་ཆ་བསྐྲུན་རྒྱུ། སློབ་མ་ཚོར་བསམ་ཚུལ་བརྗོད་པ་དང་རྩོམ་འབྲིའི་སྤོབས་པ་སྐྱེད་བསྲིང་དང་། སྤྱི་ཚོགས་ཀྱི་དུས་དེབ་དང་ཚགས་ཤོག སློབ་གྲྭའི་དུས་དེབ་སོགས་སུ་མ་ཚུད་པར་སེམས་ཤུགས་ཆག་པ་དང་རྩོམ་འབྲིའི་འདུན་པ་བརླག་འགྲོ་བཞིན་པའི་རིགས་ལ་སྐུལ་མ་གཏོང་ཆེད་ཡིན།
གསར་འགོད་པས་ཁོང་གཉིས་ལ་ད་ལྟའི་བར་སློབ་གྲྭའི་འཛིན་སྐྱོང་གི་ངོས་ནས་རོགས་རམ་གནང་ཡོད་མེད་དྲིས་པར་བཀྲ་ཤིས་དོན་འགྲུབ་ཀྱིས་བརྗོད་དོན། “ སློབ་གྲྭའི་འཛིན་སྐྱོང་གིས་ཐོག་མ་མྱི་རབས་གསར་པའི་ཡོ་ལང་ཞེས་པའི་ཚོགས་པ་དེ་འཛུགས་སྐབས། ལས་ཀ་དེ་ཤེས་ཡོན་དང་འབྲེལ་བ་ཡོད་པ་ཞིག་ཡིན་སྟབས་དུས་དེབ་འདོན་སྤེལ་གྱི་ཆོག་མཆན་དང་གློག་ཀླད་ཀྱི་མཐུན་རྐྱེན་སྦྱར་སོང་། ཕྱིས་སུ་ཚགས་པར་གྱི་ངོ་བོར་བསྒྱུར་རྗེས་ང་ཚོའི་ངོས་ནས་སློབ་གྲྭར་ཞུ་མྱོང་མེད་ལ། སློབ་གྲྭའི་ངོས་ནས་ང་ཚོར་ཐོག་མར་སློབ་གྲྭ་ནང་ཁུལ་ནས་འདོན་དགོས་པའི་བསམ་ཚུལ་བཏོན་པ་ལས་དཔལ་འབྱོར་དང་གློག་ཀླད་སོགས་ཀྱི་མཐུན་རྐྱེན་སྦྱར་མ་སོང་། སློབ་གྲྭ་གཞན་པར་འགྲེམས་སྤེལ་ཐད་བཀག་འགོག་གནང་མ་སོང་སྟབས། ད་ཆར་ང་ཚོས་སུ་ཇཱ་གཅིག་པུ་མིན་པར་གཞི་རིམ་སློབ་གྲྭ་ཁག་དང་བོད་ཁྱིམ་ཁྱབ་ཁོངས་ཀྱི་སློབ་གྲྭ་ཁག་ཏུ་ཚོགས་མི་བསྡུ་རུབ་དང་ཚགས་པར་འགྲེམས་སྤེལ་བྱེད་བཞིན་ཡོད།” ཅེས་བརྗོད་བྱུང་།
ཡང་ཁོང་གཉིས་ལ་ཚགས་ཤོག་གི་ལས་ཀ་དང་འབྲེལ་ཏེ་རང་ཉིད་ཀྱི་སློབ་སྦྱོང་ལ་བར་ཆད་ཡོད་མེད་དང་ད་ལྟའི་ཆར་དཀའ་ངལ་ཆེ་ཤོས་ཅི་ཞིག་ཡིན་མིན་དྲིས་པར་ཚེ་དབང་རྣམ་རྒྱལ་གྱིས་བརྗོད་དོན། “ ད་ལྟའི་ཆར་ང་ཚོར་ཚོགས་མི་ ༢༠ མ་ཟིན་ཙམ་ཡོད་ཀྱང་། ཚགས་ཤོག་གི་ལས་ཀ་མང་ཆེ་བ་སུ་ཇཱ་བོད་ཁྱིམ་དུ་ཡོད་པའི་སློབ་མ་ཁག་ཅིག་གིས་སྒྲུབ་བཞིན་ཡོད། ང་ཚོ་མང་ཆེ་བ་འཛིན་རིམ་བདུན་པ་དང་བརྒྱད་པའི་སློབ་མ་ཡིན་སྟབས། ཕྱིའི་སྐད་ཡིག་གི་ཐོག་ནས་བོད་བསྒྱུར་བྱ་རྒྱུར་དཀའ་ངལ་ཅུང་ཙམ་འདུག རྩོམ་ཡིག་ལས་གཞན་པའི་སྡེ་ཚན་ཁག་སློབ་སྦྱོང་གི་ཞོར་ནས་བསྒྲུབ་དགོས་དུས། སློབ་སྦྱོང་ལ་བར་ཆད་ཡོང་གི་འདུག་ཀྱང་དེ་ང་ཚོས་དཀའ་ངལ་ཆེན་པོ་ཞིག་ཏུ་རྩི་ཡི་མེད། ད་ལྟའི་ཆར་ང་ཚོའི་དཀའ་ངལ་གཙོ་བོ་དཔལ་འབྱོར་ཐད་རེད། ང་ཚོས་ཚོགས་མི་ནང་ཁུལ་དུ་དངུལ་བསྡུ་རུབ་ཀྱིས་བོད་ནས་ཕ་མས་བཏང་བའི་དངུལ་གྱིས་ཚགས་པར་འདོན་སྤེལ་བྱེད་ཀྱི་ཡོད། ཉིན་འགའི་སྔོན་ང་ཚོ་མཉམ་དུ་འཛོམས་ཏེ་ཚགས་པར་གྱི་མ་དངུལ་འཚོལ་ཆེད་འདི་ལོའི་རྡོ་རྗེ་གདན་གྱི་དུས་དབང་སྐབས། ང་རང་གིས་ཧིན་སྒོར་ཁྲི་ ༡ ཡོད་པའི་བག་ལེབ་བཙོང་ས་ཞིག་ལ་ཐོ་བརྒྱབ་ཡོད། བཀྲ་ཤིས་དོན་འགྲུབ་ཀྱིས་ཧིན་སྒོར་ ༥༠༠༠ ཡོད་པའི་ལས་ཀ་བྱེད་ས་ཞིག་ཏུ་ཐོ་བརྒྱབ་སོང་། ད་དུང་ཚོགས་མི་གཞན་པ་ཚོས་ཀྱང་ལས་ཀ་འཚོལ་བཞིན་ཡོད་པ་རེད། ང་ཚོའི་ཚགས་པར་འདི་ལ་ད་ཆར་སློབ་མ་མང་པོ་ཞིག་གིས་དགའ་མོས་བྱེད་ཀྱི་ཡོད་སྟབས། དཔལ་འབྱོར་གྱི་དཀའ་ངལ་ཁོ་ནའི་འོག་མཚམས་བཞག་པ་ཡིན་ན། ང་ལ་མཚོན་ན་ངའི་མི་ཚེའི་ནང་གི་འགྱོད་པ་ཆེ་ཤོས་ཤིག་ཆགས་ས་རེད། དེར་བརྟེན། ང་རང་གི་ངོས་ནས་ཚགས་པར་འདི་རྒྱུན་མཐུད་ཐུབ་ཆེད་རང་ནུས་གང་ཡོད་འདོན་གྱི་རྒྱུ་ཡིན་ལ། ང་ཚོའི་ཚོགས་མི་དག་གིས་ཀྱང་མཐོ་སློབ་མ་འཐོན་བར་ལས་དོན་ཐོག་འགན་ལེན་དང་། མཐོ་སློབ་ཐོན་རྗེས་ཀྱང་དཔལ་འབྱོར་གྱི་རྒྱབ་སྐྱོར་མུ་མཐུད་གནང་སྟེ། ཚགས་པར་འདི་ནམ་ཞིག་ཉིན་རེ་ཚགས་པར་ཡོང་ཐུབ་པའི་རེ་བ་དང་ཆོད་སེམས་ཡོད། ” ཅེས་བརྗོད་བྱུང་།
སུ་ཇཱ་སློབ་གྲྭའི་སློབ་མ་ཚེ་དབང་རྒྱལ་མཚན་ལགས་ཀྱི་ཕ་ཡུལ་མགོ་ལོག་ནས་ཡིན་ཞིང་། ༢༠༠༦ ལོར་རྒྱ་གར་ནང་འབྱོར་ཏེ་བཙན་བྱོལ་ནང་གི་དུས་དེབ་དང་ཚགས་ཤོག་སོགས་སུ་རྩོམ་ཡིག་མང་པོ་སྤེལ་ཏེ། བཙན་བྱོལ་ན་ཆུང་ཚགས་པར་གྱིས་ཕུལ་བྱུང་རྩོམ་པ་པོའི་བྱ་དགའ་ཡང་ཐོབ་ཡོད་འདུག
སློབ་མ་བཀྲ་ཤིས་དོན་འགྲུབ་ལགས་ཀྱི་ཕ་ཡུལ་ཁམས་གོང་ཇོ་ནས་ཡིན་ཞིང་། རང་ལོ་བདུན་ནས་བཟུང་སློབ་གཉེར་མགོ་འཛུགས་གནང་ཡོད་པ་དང་ ༢༠༠༨ ལོར་རྒྱ་གར་ནང་འབྱོར་ཏེ། ད་ཆར་སུ་ཇ་སློབ་གྲྭའི་འཛིན་རིམ་ ༨ པའི་ནང་སློབ་གཉེར་གྱི་ཞོར་དུ་སློབ་མའི་ཚགས་པར་གྱི་རྩོམ་སྒྲིག་ལས་རོགས་ཀྱི་འགན་འཁུར་ཡོད་འདུག
གསར་འགོད་པ། དོན་གོ
༼ དུས་བབ་ཚགས་ཤོག་ལས་འདིར་བསྐྱར་འགོད་བྱས། ༽
སློབ་ཕྲུག་རྣམས་ལ་སྙིང་ནས་ཡི་རང་ཡོད། དེ་བཞིན་ཁོང་རྣམ་པ་གིས་ཁ་བྱང་ངམ་ཁ་པར་ཨང་གྲངས་ཞིག་ཡོད་ན་དྲ་ཐོག་བཞག་རོགས་གནང་།
ངའི་ཁོང་རྣམས་པས་ལས་དོན་ལ་རྒྱབ་སྐྱོར་ཆེད་ཚགས་པར་དེ་མ་ཆད་པར་མངག་ཉོ་བྱེད་གི་ཡིན་པས་། ཁོང་རྣམས་པས་འབྲེལ་འཐུད་བྱེད་ས་གང་རེད་། ཕྱི་རྒྱལ་ཁག་གཏོང་གི་ཡོད་དམ།
སློབ་མ་ཁྱོད་གཉིས་དང་རྒྱབ་སྐྱོར་བ་རྣམས་ལ་བཀྲིས་བདེ་ལེགས་སྙིང་དབུས་ནས་སྔགས་བརྗོད་ཡོད། དམིགས་ཡུལ་འདི་འགྲུབ་པའི་མཐུན་འགྱུར་རོགས་ཕན་གུས་པས་ཀྱང་ཞུ་མཆོག
ཤེས་ཡོན་དང་འབྲེལ་བའི་ལས་དོན་ཆེ་ཕྲ་ཆུང་གསུམ་ལ་དཔལ་འབྱོར་གྱི་འགལ་རྐྱེན་དང་དཀའ་ངལ་མི་ཉུང་བ་ཞིག་འཕྲད་བཞིན་པ་འདི་རིགས་ཀྱང་། ཤེས་ཡོན་འཐུས་ཤོར་གྱི་སྣེ་མོ་གཅིག་རེད་སྙམ་གྱིན་ཡོད།
གང་ལྟར། དུས་དེབ་དང་གསར་ཤོག་གི་རིགས་”ཨ་གསར་རྟ་ལས་མགྱོགས། །མཇུག་མ་ལུག་ལས་ཐུང་། །”བའི་དཔེ་ལྟར་སོང་བ་མང་པོ་ཞིག་བྱུང་ཟིན་པས། ལས་འགོ་བཙུགས་ཏེ་མཇུག་སྐྱོང་ཐུབ་པ་ཞིག་དགོས་གལ་ཆེའོ།།
སློབ་མ་རྣམས་ལ་ཡི་རང་བསྔགས་བརྗོད་བཅས།
སྙིང་ཐག་པ་ནས་དགའ་སུ་ཡོད་་་ཅེས་ཕྲུག་ཚོ་ཁྱེད་ཅག་གི་འབད་རྩོལ་དེར་ཡི་རང་ཡོད་ལ་རྒྱབ་སྐྱོར་ཡང་ཡོད།
ཚོ་དུས་བབ་རྩོམ་སྒྲིག་པ་ལགས ངའི་གློག་འཕྲིན་ཁ་བྱང་འདི་ཁོ་ཚོར་སྤྲོད་ནས་ང་ལ་འབྲེལ་བ་ཞིག་གནང་རོགས་ shamtenzin@yahoo.com or shampatenzin@hotmail.com ,QQ 994602858
དུས་བབ་རྩོམ་སྒྲིག་པ་ལགས ངའི་གློག་འཕྲིན་ཁ་བྱང་འདི་ཁོ་ཚོར་སྤྲོད་ནས་ང་ལ་འབྲེལ་བ་ཞིག་གནང་རོགས་snws2010@gmail.com
ངས་ཕྲུ་གུ་འདི་ཚོའི་སེམས་ཤུགས་དེ་དང་མཉམ་ལས་ཞིག་བྱེད་འདོད་འདུག གཅིག་བྱས་ན་ཕན་ཐོག་ཆེན་པོ་ཞིག་ཡོང་སྲིད།
སྤྱིར་བཏང་བོད་ནས་གསར་དུ་འབྱོར་བ་རྣམས་དཔལ་འབྱོར་གྱི་གནས་སྟངས་ཐད་སྐྱོ་བོ་ཞིག་ཁྱོན་ནས་མ་རེད། དཔལ་འབྱོར་གྱི་གནས་སྟངས་ཧ་ལས་པའི་ཡག་པོ་ཡོད། འོན་ཀྱང་སློབ་ཕྲུག་གི་གནས་སྐབས་སུ་ཡང་དངུལ་དེ་རྣམས་རླབས་ཆེན་གྱི་བྱ་བ་འདི་འདྲའི་ཐོག་ལ་འགྲོ་སོང་གཏོང་བ་ནི་ཆེས་བསྔགས་བརྗོད་འོས་པ་ཞིག་ཏུ་ངོས་འཛིན་བཞིན་ཡོད།
འདི་ནི་སྐད་ཡིག་སྲུང་སྐྱོབ་ཀྱི་ལས་འགུལ་ཧ་ཅང་གི་གལ་ཆེ་ཞིང་ནུས་པ་ལྡན་པ་ཞིག་ཡིན་པས་དྲ་གྲོགས་ཚང་མས་དཔའ་འབྱོར་གྱི་རྒྱབ་སྐྱོར་གནང་རྒྱུུའི་འབོད་སྐུལ་ཞུ་རྒྱུ་ཡིན།
ན་གཞོན་ཚོའི་རིགས་ཞེན་དང་སྙིང་སྟོབས་ལ་སེམས་འགུལ་ཚད་མེད་ཐེབ་སོང་། ཁྱེད་ཚོས་ཡག་པོ་བྱས་འདུག་ཅེས་ཁ་ཡག་རེ་བཤད་སྡད་པས་ཕན་ཐོག་གང་ཡང་མེད་པ་རེད། དེ་ལས་སོ་སོའི་བློས་ཐོང་ཚོད་ཀྱི་ཞལ་བདེབས་རེ་འབུལ་རྒྱུ་གལ་ཆེ། ཁོང་གཉིས་ཀྱི་འབྲེལ་གཏུག་བྱེད་སའི་ཁ་བྱང་འདིར་ཞོག་དང་ང་རང་གི་ངོས་ནས་ནུས་ཚོད་ཀྱི་ཞལ་འདེབས་རེ་འབུལ་ངེས་ཡིན།
སློབ་མའི་ཚགས་པར་འདི་བདག་གིས་བཀླགས་མྱོང། སེམས་ནང་ལ་དགའ་ཚོར་སྐྱེས་མྱོང། གཙོ་བོ་མཇུག་སྐྱོང་རྒྱུ་དེ་གནད་འགག་ཡིན། དེ་ལ་གཅིག་ནས་རྩོམ་སྒྲིག་པ་ཚོས་སྒྲིག་གཞི་དང་འཆར་གཞི་ལྡན་པའི་འགན་འཁུར་མ་ལྷོད་པ་ཞིག་དགོས་ལ། དེ་ལ་སློབ་གྲྭ་དང་དགེ་རྒན་རྣམ་པས་མཐུན་འགྱུར་ཡང་གང་ལེགས་གནང་དགོས། ཆ་རྐྱེན་འདི་གཉིས་ཚང་སོང་ན་སློབ་མའི་ཚགས་པར་གྱི་སྐུ་ཚེ་རིང་ཞིང་འཕྲིན་ལས་རྒྱས་ངེས། དེ་མིན་རོགས་ཚོགས་ཤིག་གམ་སྦཡིན་བདག་འགའ་ཞིག་ལ་རེ་བ་ཙམ་གྱིས་མཐའ་འཁྱོངས་དཀའ། འདི་ད་བར་ང་ཚོས་སྤེལ་དང་སྤེལ་བཞིན་པའི་དུས་དེབ་སོགས་ཀྱི་ལས་རྙེད་པའི་ངའི་ཉམས་མྱོང་གི་སྡོམ་ཚིག་ཡིན།
དེ་བས་སླར་ཡང། ཁྱེད་ཅག་གི་རྩོམ་སྒྲིག་པའི་འོས་འགན་དང་སློབ་གྲྭའི་མཐུན་འགྱུར་གཉིས་ལ་བརྟེན་ནས་སློབ་མའི་ཚགས་པར་དེ་ཉིད་ཀྱི་རླུང་རྟ་མཁའ་ལ་འཕུར་བའི་རེ་སྨོན་ཞུ།
གསར་འགོད་པ་ལགས། ཉིད་ནས་འདོན་སྤེལ་གནང་བ་ཐུགས་རྗེ་ཆེ། ཡིན་ཡང་གསར་འགྱུར་འདོ་འདྲ་ཞིག་འདོན་སྐབས་འདིའི་སྔ་གཞུག་ལ་བསམ་ཞིབ་གནང་དགོས་པ་འདུག་ལ། ལྷག་དོན་འདིའི་བྱུང་རིམ་ལ་གསལ་གསལ་དང་བདེན་བདེན་དགོས་པ་དེ་བས་དཀའ་ཆེ། དེ་མིན་བཀོད་པ་ཙམ་གྱི་མི་འགྲིག་པར་འདིའི་རྒྱབ་མདུན་གང་རུང་ལ་དེ་བས་ཀྱང་འགན་ཁུར་དང་རྒྱབ་བརྟེན་དགོསན། དེ་མིན་འདི་ལྟར་བསྒྲགས་པས་ཉིན་ནས་སློབ་མའི་ཚགས་པར་འདི་མཇུག་རྫོགས་ཀྱང་སྲིད། སྐད་ཆ་འདི་ལ་ཞེད་སྣང་མེད་ཀྱང་འདིའི་མཇུག་འབྲས་ཧ་ཅང་ཉག་ཕྲ།
སློབ་མ་ཁྱེད་ཅག་གི་འབད་རྩོལ་དེར་ཡི་རང་ཡོད་ལ་རྒྱབ་སྐྱོར་ཡང་ཡོད།
གསར་འགོད་པ་ལགས། སློབ་མ་དེ་དག་གི་འབྲེལ་གཏུགས་ཁ་བྱང་མེད་སོང་བ་རེད་དམ་གནས་འདིར་འགོད་མི་ཆོག་པ་རེད།
གལ་ཆོག་ན། གལ་ཏེ་ཡོད་ན་གནས་འདིར་ད་ལྟ་རང་འགོད་རོགས། །
སློབ་གྲོགས་ཚེ་དབང་རྒྱལ་མཚན་དང་བཀྲ་ཤིས་དོན་འགྲུབ་གཉིས་གཙོ་བྱས་པའི་ལས་དོན་དེའི་ཐད་ལ་རྒྱབ་སྐྱོར་བྱེད་མཁན་ཡོངས་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་ མ་ཟད་གནས་དོན་དེ་རིགས་ལ་ང་ཚོའི་སྤྱི་ཚོགས་ཧྲིལ་པོ་ནས་མཐུན་རྐྱེན་སྐྲུན་ཐབས་བྱ་རྒྱུ་གལ་ཆེན་པོ་མཐོང་གི་འདུག ཁྱེད་རྣམ་པས་ལས་དོན་དེ་རིགས་ཀྱི་ཆེད་དུ་ཞལ་འདེབས་བསྡུ་རུབ་ཀྱི་ཐེབ་རྩ་ཞིག་འཛུགས་ཐུབ་ན་དེ་བས་ཡག་པོ་ཡོད་རེད།
སློབ་མ་འདི་དག་གི་མི་རིགས་དང་སྐད་ཡིག་ལ་དུང་བ་ཆེ་བ་ནི་བརྗོད་མེད་རེད། སྙིང་ཐག་པ་ནས་ཐུགས་རྗེ་ཆེ་ཞུ་བ་དང་ལྷན་ཏུ་ལས་བྱ་ལམ་འགྲོ་ཡོངས་པ་དང་བསམ་དོན་གྲུབ་པར་སྙིང་ནས་གསོལ་འདེབས་ཞུ།
རྡ་ལི་དང་དཀྲིས་མོག་གིས་་་ལུས་སྟོབས་ཡག་པོ་གསོ་ཐུབ་ཀྱི་མེད་ནའང་རང་གི་ཁ་ཟས་ཀྱི་དངུལ་སྒོར
བུ་ཁྱོད་ཚོ་འདྲ་པོ་བརྒྱ་སྐྱེ་བ་ཤོག་་་་་སྟོང་ལང་བར་ཤོག་་་ཁྲི་དར་བ་ཤོག
སློབ་ཕྲུག་འདི་ཚོ་ངོ་མ་གཟི་བརྗིད་ཆེ་ཀི་ཡ། རང་གི་ཁ་ཟས་ཀྱི་འགྲོ་གྲོན་ཚགས་པར་ལ་བརྗེ་བོ་རྒྱབ་པ་འདི་ཞེ་དྲག་གི་མིག་དཔེར་བལྟ་ས་ཞིག་ཆགས་འདུག
སློབ་གྲོགས་ཚེ་དབང་རྒྱལ་མཚན་དང་བཀྲ་ཤིས་དོན་འགྲུབ་གཉིས་གཙོ་བྱས་པའི་ལས་དོན་དེའི་ཐད་ལ་རྒྱབ་སྐྱོར་བྱེད་མཁན་ཡོངས་ལ་སྙིང་ཐག་པ་ནས་ཐུགས་རྗེ་ཆེ་ཞུ་བ་དང་ལྷན་ཏུ་ཁོང་གཉིས་ཀྱི་བསམ་དོན་ལྷུན་གྱིས་གྲུབ་པར་སྨོན།