བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཟུར་བ་དང་བོད་རང་བཙན་འཐབ་རྩོད་པ་རྒན་ལྷ་བཟང་ཚེ་རིང་ལགས་སུ། ཉིན་འདི་འགར་བོད་ནང་གཅིག་འཕྲོར་གཅིག་བསྟུད་ཀྱིས་རང་ལུས་མེར་བསྲེགས་གཏོང་བཞིན་པ་དག་དང་འབྲེལ་གནད་དོན་ཁག་ཅིག་གི་ཐད་བཅར་འདྲི་ཞུས་ཡོད།
དྲི་བ། སྐུ་ཉིད་ཀྱིས་དེང་སྐབས་བོད་ནང་གཅིག་རྗེས་གཉིས་མཐུད་དུ་རང་ལུས་མེར་བསྲེགས་གཏོང་གི་ཡོད་པ་དེ་དག་གི་མངོན་འདོད་དང་རེ་བ་གཙོ་བོ་གང་ཞིག་ལ་ངོས་འཛིན་གནང་གི་ཡོད།
ལན། མི་ཟེར་བ་འདི་འུ་ཐུག་ཐབས་ཟད་ཆགས་ན། ཡང་ན། གཞན་གྱི་སྲོག་ལ་བསྙབ་རྒྱུ་རེད། ཡང་ན་རང་གི་སྲོག་ལ་རྒོལ་རྒྱུ་རེད། བོད་ནང་རང་ལུས་མེར་བསྲེགས་གཏོང་མཁན་ཚོས་འགའ་རེས་༧གོང་ས་མཆོག་བོད་དུ་གདན་འདྲེན་ཞུ་དགོས་ཟེར་བ་དང་། འགའ་རེས་བོད་མིར་རང་དབང་དགོས་ཟེར་བ། ཡང་རེ་ཟུང་གིས་བོད་རང་བཙན་ཡིན་ཟེར་ནས་སྐད་རྒྱབ་པ་སོགས་ཐུག་ས་གཅིག་ལ་ཐུག་ཡོད་པ་རེད། རྒྱ་ནག་གི་གདུག་རྩུབ་འོག་སྡོད་ཐུབ་ཀྱི་མི་འདུག ང་ཚོར་རང་བཙན་དགོས་ཟེར་བ་འདི་རེད། རེ་བ་འདི་ལ་ང་ཚོ་བྱེས་བཞུགས་མི་མང་ཚོས་བདག་པོ་རྒྱག་དགོས་ཀྱི་འདུག ལྷག་པར་དུ་བཙན་བྱོལ་བོད་གཞུང་གིས་ངོས་ལེན་གནང་དགོས་ཀྱི་འདུག ཚེ་སྲོག་རྒྱལ་ཁབ་དང་མི་རིགས་ཀྱི་དོན་དུ་ཕུལ་ཟིན་པ་དག་ལ་བརྩི་བཀུར་ཞུ་དགོས་ཀྱི་འདུག
དྲི་བ། རང་ལུས་མེར་བསྲེགས་བཏང་བ་དེས་བོད་པའི་རྩ་དོན་ཐོག་འཕྲལ་ཕུགས་ཀྱི་ཕན་གནོད་གང་འདྲ་འབྱུང་བར་ངོས་འཛིན་གནང་གི་ཡོད་པ་དང་། ལས་འགུལ་གྱོ་ངོ་བོའི་ཐོག་གཟིགས་ཚུལ་གང་འདྲ་ཡོད་དམ།
ལན། རང་སྲོང་གཏོང་མཁན་རྒྱལ་གཅེས་དཔའ་བོ་དཔའ་མོ་རྣམ་པ་དང་། ཤུལ་ལུས་ནང་མི་གཉེན་འབྲེལ་སྒེར་ངོས་ནས་བཤད་ན་ཕལ་ཆེར་གྱོང་ཡིན་རྒྱུ་རེད། མི་ཚེའི་སྒྲུང་རྫོགས་ཚར་བ་རེད། འོན་ཀྱང་། རྒྱལ་ཁབ་དང་མི་རིགས་ལ་ཕན་པའི་བྱ་བ་ཞིག་ཏུ་ངོས་འཛིན་བྱེད་མིན་བོད་རྒྱ་ཆེའི་མི་མང་ལ་རག་ལས་ཡོད། མཛུབ་མོ་གཅིག་གིས་ཕར་ཕྱོགས་ལ་གཞུས་ན་གྱོང་རང་ལ་རག་གི་རེད། མཛུབ་མོ་ལྔ་འཆང་ཁུ་ཚུར་གྱིས་གཞུས་ན་གྱོང་ཕར་ཕྱོགས་ལ་སྤྲོད་ཐུབ་པ་རེད། སྤྱི་ཚོགས་ནང་ཐོབ་དང་གོ་ས་ཡོད་མཁན་རེ་ཟུང་གིས་ལས་འགུལ་དེ་འཚེ་བ་ཡིན་མིན་གྱི་སྐད་ཆ་བཤད་ཀྱི་ཡོད་པ་གོ་སོང་། ང་ཡིད་ཆད་ཀྱི་འདུག སེམས་སྐྱོ་ཡི་འདུག ལྷ་རྟེན་གཙུག་ལག་ཁང་སོགས་ལ་སྐོར་བར་འགྲོ་མཁན་ཚོས་ལམ་ན་འབུ་གསོད་ཀྱི་ཡོད་པ་རེད། དེ་ཡང་འཚེ་བ་རེད་དམ། ཁོང་ཚོའི་དམིགས་ཡུལ་ཆོས་རེད། རྒྱལ་ཁབ་དང་མི་རིགས། ཆོས་དང་རིག་གཞུང་སྲུང་སྐྱོབ་ཆེད་རང་སྲོག་བཏང་ན་འཚེ་བ་མ་རེད། འཚེ་བ་བྱེད་མཁན་ངོ་མ་དེ་ཕར་ཕྱོགས་བཙན་གནོན་བྱེད་མཁན་ཚོ་རེད། སུ་ཞིག་ལས་འགན་འདི་ལ་གཡོལ་བ་ཡིན་ན། དེ་ནི་རྩ་དོན་གྱི་ཐོག་ནས་འཚེ་བ་རེད། བྱ་བའི་ཐོག་ནས་གཡོ་སྒྱུ་རེད།
དྲི་བ། ད་ལྟའི་ཆར་བོད་དོན་འཐབ་རྩོད་ཀྱི་གནས་ཚད་དེ་གང་འདྲ་ཞིག་ཏུ་ངོས་འཛིན་གནང་གི་ཡོད་དམ།
ལན། གཞིས་བཞུགས་མི་མང་གི་ངོས་ནས་འཐབ་རྩོད་ཀྱི་གནས་ཚད་ཧ་ཅང་མཐོ་བོ་རེད། འོན་ཀྱང་ང་ཚོའི་གཞུང་གི་ངོས་ནས་འཐབ་རྩོད་རླུང་ལ་བསྐུར་བཞག་ཡོད་པ་རེད། མི་སྒེར་ཞིག་ཡིན་ན་འདྲ་ལ། མི་ཚང་གཅིག་ཡིན་ནའང་འདྲ། རྒྱལ་ཁབ་དང་མི་རིགས་སུ་འདྲ་ཞིག་ཡིན་རུང་རྩ་དོན་ཞིག་བསྒྲུབ་ན། དེ་ལ་ངེས་པར་དུ་ཆ་རྐྱེན་གསུམ་ཚང་དགོས་པ་རེད། དང་པོ། རྩ་དོན་འཐབ་རྩོད་ཀྱི་དམིགས་ཡུལ་གསལ་བོ། གཉིས་པ། དམིགས་ཡུལ་དེ་འགྲུབ་པའི་གདེང་ཚོད་ཆེན་པོ། གསུམ་པ། དམིགས་ཡུལ་ཐོག་ཐབས་ཇུས་ཡག་པོ་དགོས། ད་ལྟ་ང་ཚོའི་ལམ་དབུ་མར་བོད་རྒྱ་གཉིས་ཕན་ཟེར་བ་ཙམ་ལས་དམིགས་ཡུལ་གསལ་བོ་ཡོད་པ་མ་རེད། རྒྱ་ནག་སྟོབས་ཆེན་པོ་རེད་ཟེར་ནས་འཐབ་རྩོད་ལ་གདེང་ཚོད་ཡོད་པ་མ་རེད། ཁ་ནས་རྩ་དོན་ཟེར་བ་ལས་དོན་ལ་འཐབ་རྩོད་ཐོག་བསམ་བློ་གཏོང་མཁན་ཡོད་པ་མ་རེད།
དྲི་བ། བོད་ནང་གི་ཛ་དྲག་གནས་སྟངས་ཐོག་བཀའ་སྤྱི་གཉིས་ཀྱིས་གཞུང་འབྲེལ་ཐོག་ལས་འགུལ་སྤེལ་ཕྱོགས་ལ་འདོད་པ་ཁེངས་ཀྱི་ཡོད་དམ།
ལན། ངས་གོང་དུ་བཤད་པ་ལྟར་བཀའ་ཤག་གིས་མི་མང་གི་ཁ་གཅོད་ཐབས་ཙམ་ལས་རྩ་དོན་ཐོག་ལས་ཀ་གང་ཡང་བྱེད་ཀྱི་མེད་དུས་ང་ལ་འདོད་པ་ཁེངས་དང་མི་ཁེངས་ཀྱི་སྐད་ཆ་ལྷག་གི་ཡོད་པ་མ་རེད། ང་འདི་ལ་བློ་ཕམ་ནས་བསྡད་ཡོད། འུ་ཐུག་ནས་བསྡད་ཡོད། གཞུང་ཟེར་བ་དེ་མི་མང་གི་དབུ་འཁྲིད་རེད། དབུ་གང་དུ་འཁྲིད་དགོས་པ་རེད་ཟེར་ན་རྩ་དོན་འཐབ་རྩོད་ཐོག་འཁྲིད་དགོས་པ་རེད། ངྷ་རམ་ས་ལའི་བཙན་བྱོལ་བོད་གཞུང་འདིས་རྩ་དོན་བརྗེད་དེ་གཞུང་ངོ་མ་ཞིག་འཛིན་སྐྱོང་བྱེད་པའི་འདུ་ཤེས་འཁྱེར་གྱི་ཡོད་པ་འདྲ། དེ་ནོར་བ་རེད། ཁྱེད་ཅག་གི་རྐང་འོག་གི་ས་དང་མགོ་ཐོག་གི་ཁང་པ་གཞན་གྱི་རེད། ང་ཚོའི་མི་མང་གི་ངོས་ནས་ཀྱང་རྒྱ་ནག་དང་ཕན་ཚུན་གཉིས་མོས་ཀྱི་ཞི་མོལ་ཞིག་ཡོང་ཐབས་མེད་པ་ཧ་གོ་དགོས་ཀྱི་འདུག གལ་སྲིད་ཡོད་པའི་དབང་དུ་བྱས་ཀྱང་ང་ཚོར་སྒུག་ལོངས་མེད་པ་ཤེས་དགོས་པ་རེད། ངེད་གཉིས་ད་ལྟ་སྐད་ཆ་ཤོད་བཞིན་པའི་སྐད་ཅིག་མ་འདི་ལའང་རྒྱ་མི་སྟོང་ཕྲག་མང་པོ་བོད་ནང་འབྱོར་བཞིན་ཡོད།
དྲི་བ། བོད་ནང་གི་གནས་བབ་ལ་གཞིགས་ཏེ་བཙན་བྱོལ་སྤྱི་ཚོགས་ནང་མི་རེ་ངོ་རེས་འགན་འཁུར་དང་ལས་འགུལ་གང་འདྲ་སྤེལ་དགོས་པར་མཐོང་གི་ཡོད།
ལན། བོད་ཕྱི་ལོགས་ནས་གཞུང་འབྲེལ་མིན་པའི་ཚོགས་སྡེ་ཁག་དང་མི་མང་ཚོས་གང་ཐུབ་ཐུབ་གནང་གི་ཡོད་ཀྱང་། དེ་ལ་ཞེ་དྲག་ས་ཆོད་ཡོད་པ་མ་རེད། རྒྱལ་སྤྱིའི་སྡིངས་ཆའི་ཐོག་བསླེབ་ཐུབ་རྒྱུ་ཁག་པོ་རེད། མགོ་འཁྲིད་མཁན་དང་ལྡོག་རྩ་གཅིག་བསྒྲིལ་བཟོ་མཁན་མེད་ན། ས་སྟོང་ལུང་སྟོང་ཞིག་ཏུ་སོ་ཕག་ས་ཡ་གཅིག་བླུགས་བཞག་ན། དེས་ཁང་པ་ཡོང་གི་མ་རེད། མི་མང་པོ་ཞིག་གིས་༧རྒྱལ་བ་རིན་པོ་ཆེ་མཆོག་གིས་ཆབ་སྲིད་ཀྱི་སྐུ་དབང་མི་མང་ལ་གནང་བཞག་པ་ཡག་པོ་རེད་ཟེར་གྱི་འདུག་ཀྱང་། ངས་དེ་རྩ་བ་ཉིད་ནས་ཡག་པོ་ཞིག་ལ་མཐོང་གི་མེད། ལུག་རྫི་ཞིག་གིས་ལུག་རྣམས་རྩྭ་ཁ་ཡག་ས་ཞིག་ལ་འཁྲིད་རྒྱུ་ཡིན་ཟེར་ནས་ཡར་འདེད་མར་འདེད་བྱས་ཏེ་མཐར། རྩྭ་ཁ་ཡག་ས་མ་རག་ཐལ། ད་དབང་ཆ་ཚང་མ་ཁྱོད་ཚོར་ཡོད། ཟེར་ནས་ལུག་བྱེ་ཐང་ཞིག་ལ་བཀྲམས་ནས་ལུག་རྫི་འགྲོ་བཞག་ན། དེ་ལུག་རྫིའི་ལས་འགན་འགྲུབ་པ་རེད་དམ། དམངས་གཙོ་གལ་ཆེན་ཡིན་ཡང་དེ་རྒྱལ་ཁབ་ནང་ཁུལ་གྱི་དོན་དག་རེད། རྐང་པ་འཛུགས་སའི་ས་ཆ་མ་རག་གོང་ལ། ཁང་པའི་བཟོ་ལྟ་གང་འདྲ་བཟོ་མིན་དང་། མཚོན་མདོག་གང་འདྲ་བྱུག་མིན་ཐོག་ལ་བརྩད་བརྒྱབ་ནས་བསྡད་ན་དེ་ལ་དགོས་པ་འདུག་གམ།
དྲི་བ། བོད་ནང་རང་སྲོག་གཏོང་མཁན་མང་ཆེ་བ་གྲྭ་བཙུན་ཡིན་པ་དང་། བོད་པའི་རྩ་དོན་འཐབ་རྩོད་ཀྱང་ཆོས་རིག་ལ་ཐུག་ཡོད་སྐོར་བཤད་ཀྱི་ཡོད་དུས། བཙན་བྱོལ་ནང་གི་ཆོས་ལུགས་ཆོས་བརྒྱུད་ཁག་གི་བླ་སྤྲུལ་ཚོར་ལས་འགན་གང་འདྲ་ཡོད་པར་གཟིགས་ཀྱི་ཡོད་དམ།
ལན། བོད་ནང་ལ་ངས་བཤད་ཤེས་ཀྱི་མེད། བཙན་བྱོལ་ནང་མི་ཚང་མར་འདིའི་ཐད་བསམ་ཚུལ་ཏན་ཏན་ཡོད་པ་རེད། མི་ཁ་ཤས་ཀྱིས་དད་པ་དག་སྣང་གིས་བཤད་ཐུབ་ཀྱི་ཡོད་པ་མ་རེད། ཡང་ཁ་ཤས་ཀྱིས་སོ་སོས་ལས་འགུལ་སྤེལ་ཐུབ་དང་མ་ཐུབ་ཐོག་ནས་ཤོད་ཐུབ་ཀྱི་ཡོད་པ་མ་རེད། ང་རང་སྒེར་ལ་མཚོན་ན། སྔོན་མ་གཞོན་ནུའི་ནང་ཡོད་སྐབས་ལས་འགུལ་སྤེལ་བ་དང་མགོ་ཁྲིད་པ་སོགས་གང་ཐུབ་བྱས་ཡོད་བསམ་པ་ཞིག་ཡོད། ངས་བཤད་འདོད་པ་དེ་གང་ཡིན་ཟེར་ན། རྒྱལ་ཁབ་དང་མི་རིགས་ཀྱི་བདེ་བ་སྡུག་བསྔལ་ལས་ལྷག་པའི་ཆོས་ཞིག་བསྒྲུབ་རྒྱུ་ཡོད་ན། སྐུ་མཁྱེན། བོད་པའི་སྤྱི་ཚོགས་ནང་མ་བཞུགས་རོགས། སྤྱི་ཚོགས་ཀྱི་ཁེ་ཕན་མ་བཞེས་རོགས་ཞུ་རྒྱུ་ཡིན། རྒྱལ་ཁབ་དང་མི་རིགས་སྤངས་ཏེ་སོ་སོ་གཅིག་པུ་སངས་རྒྱས་རྒྱུ་དང་། སྐྱེ་བ་ཕྱི་མ་དང་ཕུགས་ཀྱི་དོན་དག་འདྲ་སྒྲུབ་ནས་སྡོད་མཁན་གྱི་ཆོས་པ་ཞིག་ངས་ངོས་ལེན་ཞུ་ཐུབ་ཀྱི་མི་འདུག དེ་འདྲའི་ཆོས་པ་ཞིག་ད་ལྟའི་དུས་ཚོད་འདི་ལ་བོད་མི་མང་ལའང་དགོས་མཁོ་མི་འདུག
དྲི་བ། ༧གོང་ས་མཆོག་གིས་བོད་པའི་ཆབ་སྲིད་ཀྱི་ཐུགས་འགན་མཚམས་འཇོག་གནང་རྗེས། བོད་པས་ལས་འགུལ་སྤེལ་སྟངས་དང་ངོ་བོའི་ཐོག་ཁྱད་པར་འགྲོ་སྲིད་དམ།
ལན། ༧རྒྱལ་བ་རིན་པོ་ཆེ་བོད་པའི་ཆོས་སྲིད་ཀྱི་དབུ་འཁྲིད་ཟེར་བ་འདི་ལོ་ངོ་བརྒྱ་ཕྲག་མང་པོའི་སྐད་ཆ་ཞིག་རེད། ཉི་མ་གཅིག་གཉིས་ནང་ལ་འགྱུར་བ་གཏོང་རྒྱུ་ཕར་ཞོག མི་རབས་ཁ་ཤས་ནང་དུ་ཡང་འགྱུར་བ་གཏོང་ཐུབ་མིན་ངས་བཤད་ཤེས་ཀྱི་མེད། ཤོག་བུའི་སྟེང་ལ་༧རྒྱལ་བ་རིན་པོ་ཆེའི་ཆབ་སྲིད་ཀྱི་ཐུགས་འགན་མཚམས་འཇོག་གནང་བ་ཡིན་ཞེས་བཀོད་ཡོད་ཀྱང་། བོད་མིའི་སེམས་པའི་ནང་ལ་ཆོས་སྲིད་གཉིས་ཀྱི་བླ་ན་མེད་པའི་དབུ་འཁྲིད་དེ་༧རྒྱལ་བ་རིན་པོ་ཆེ་ཁོ་ན་ཆགས་ཡོད། ངའི་ལུས་སེམས་གཉིས་ཀ་ཁ་ཁ་བྱས་ཤིང་། ཤ་ཁྲག་གཉིས་ཀ་སོ་སོར་འཐོར་ནས་འགྲོ་དུས་ཀྱང་རྣམ་ཤེས་ཀྱིས་༧རྒྱལ་བ་རིན་པོ་ཆེ་དབུ་འཁྲིད་དུ་ཉར་ནས་འགྲོ་རྒྱུ་རེད། ( སྐབས་འདིར་རྒན་ལགས་ཀྱི་བཀའ་མོལ་མཚམས་ཆད་དེ་མིག་ཆུ་ཤར་ཤར་དུ་བཞུར་བྱུང་ ) ངས་༧རྒྱལ་བ་རིན་པོ་ཆེ་ལ་བསྐྱར་དུ་སྐྱབས་འཇུག་ཞུ་རྒྱུ་ལ། ད་ལྟ་ང་ཚོའི་འཐབ་རྩོད་དེ་ཤི་དང་གསོན་གྱི་མཚམས་ལ་བསླེབས་ཡོད་དུས་སྐུ་དབང་མཚམས་འཇོག་མ་གནང་རོགས། བོད་མི་མང་གིས་གྱོན་པ་བརྗེ་བོ་རྒྱག་རྒྱུ་ཡོད་པ་རེད་དེ། ཁོག་པའི་ནང་གི་སྙིང་ཇི་ལྟར་བརྗེ་བོ་རྒྱག་དགོས་པ་རེད།
དྲི་བ། བོད་པའི་རྩ་དོན་འཐབ་རྩོད་ཀྱི་སྲིད་བྱུས་ལངས་ཕྱོགས་དེ་རིམ་གྱིས་རང་བཙན་ཐོག་བསྐྱོད་རྒྱུར་རེ་བ་མཐོང་གི་ཡོད་དམ།
ལན། ང་ནམ་རྒྱུན་རེ་བ་སྟོང་པ་རྒྱག་མཁན་ཞིག་མིན། དངོས་ཡོད་གནས་ཚུལ་ཐོག་ལ་བསམ་ཚུལ་ཡོད་དམ་ཟེར་ན་ཡོད། ཐོག་མ་ཕྱི་ལོ་ ༡༩༨༧ ཟླ་ ༦ ཚེས་ ༡༥ ཉིན་༧གོང་ས་མཆོག་གིས་དབུ་མའི་ལམ་གྱི་སྐོར་ལ་བཀའ་གནང་སྐབས་འགྲིག་གི་མི་འདུག་ཟེར་མཁན་དང་ཤོས་དེ་ང་ཡིན། སྐབས་དེར་ང་གསོད་རྒྱུ་ཡིན་ཟེར་མཁན་བྱུང་ལ། ངའི་ཕྲུ་གུར་སློབ་གྲྭ་ནས་གནོན་ཤུགས་དང་དཀའ་ངལ་སྣ་ཚོགས་འཕྲད་སོང་། ང་ད་ལྟ་ད་དུང་ཡང་འགྱུར་བ་སྤུ་ཙམ་མེད། ང་དངོས་ཡོད་གནས་ཚུལ་དང་བདེན་པ་ཁས་ལེན་བྱེད་མཁན་ཞིག་ཡིན་མ་གཏོགས། རང་གི་ཁེ་ཕན་ཐོག་ལ་བསམ་བློ་གཏོང་མཁན་ཞིག་མིན། བཙན་བྱོལ་བོད་གཞུང་གི་ལམ་ཁ་ཐོག་མ་ནས་ནོར་བསྡད་ཡོད་པ་རེད། ལམ་ཁ་ནོར་བའི་སྒང་ལ་འགྲོ་བཞིན་པའི་རླངས་འཁོར་དེའི་ཁ་ལོ་བ་ཅི་ཙམ་བརྗེ་བོ་བརྒྱབ་ཀྱང་ཕན་ཐོགས་ཡོད་པ་མ་རེད། ཨང་དང་པོ་ལམ་ཁ་བརྗེ་བོ་རྒྱག་དགོས་པ་རེད།
དྲི་བ། གལ་སྲིད་བོད་པས་རང་བཙན་བརྩད་པ་ཡིན་ན་རྒྱ་ནག་དང་འབྲེལ་ལམ་མཐུད་ཐུབ་རྒྱུ་ཁག་པོ་རེད་ལ། རྒྱལ་སྤྱིའི་རྒྱབ་སྐྱོར་ཡང་རག་གི་མ་རེད་ཟེར་མཁན་ཡོད་པའི་ཐོག་དགོངས་ཚུལ་གང་འདྲ་ཡོད་དམ།
ལན། དེ་ལྐུག་པའི་སྐད་ཆ་རེད། ཆབ་སྲིད་ཀྱི་གནས་ཚུལ་མ་མཁྱེན་པ་རེད། རྒྱལ་ཁབ་ཀྱི་ཆབ་སྲིད་ཟེར་བ་དེ་སོ་སོའི་ཁེ་ཕན་གྱི་ཐོག་ནས་སྒྲུབ་ཀྱི་ཡོད་པ་རེད་མ་གཏོགས། གཞན་གྱི་ཁེ་ཕན་ཆེད་རང་གི་ཁེ་ཕན་བློས་བཏང་བའི་ཕྱི་འབྲེལ་སྲིད་བྱུས་འཛིན་མཁན་ཞིག་ཡོད་པ་མ་རེད། ང་དགུ་ལོ་ནས་དྲུག་ཅུ་རེ་གྲངས་དང་། རེ་ལྔ་སོགས་སུ་མཉམ་འབྲེལ་རྒྱལ་ཚོགས་ནང་བོད་པར་རང་ཐག་རང་གཅོད་ཀྱི་ཐོབ་ཐང་ཡོད་པའི་གྲོས་ཆོད་བཞག་པ་དེ་རང་བཙན་རྩོད་ཀྱིན་པའི་སྐབས་སུ་བྱུང་བ་རེད། འོན་ཀྱང་སྐབས་དེར་ཨུ་རུ་སུ་སོགས་སུ་དམར་པོའི་རིང་ལུགས་ཤུགས་ཆེན་པོ་ཆགས་ཏེ། ཨ་རི་དང་ནུབ་ཕྱོགས་རྒྱལ་ཁབ་ཁག་གིས་དམར་པོའི་རིང་ལུགས་ཁ་གཏོར་གཏོང་རྒྱུར་ཤུགས་བརྒྱབ་སྟེ། ང་ཚོའི་གནས་ཚུལ་དེ་ཆུང་ཆུང་ཆགས་པ་རེད་མ་གཏོགས། ང་ཚོས་རང་བཙན་བློས་བཏང་རྗེས་ཡིག་ཐོག་ནས་དོན་དག་ཡོད་པའི་རྒྱབ་སྐྱོར་བྱེད་མཁན་རྒྱལ་ཁབ་གཅིག་ཀྱང་བྱུང་ཡོད་པ་མ་རེད། ད་ཆར་རྒྱ་ནག་སྟོབས་ཆེན་པོ་ཆགས་ཀྱི་ཡོད་དུས། རྒྱལ་ཁབ་མང་པོ་ཞིག་གི་ཁེ་ཕན་ལ་གནོད་ཀྱི་ཡོད་པ་རེད། བོད་པར་དགའ་དྲགས་པ་མ་རེད་དེ། ཁོ་ཚོའི་ཁེ་ཕན་ཆེད་ང་ཚོས་འགུལ་དཀྱོག་ཅིག་རྒྱག་ཐུབ་པ་ཡིན་ན། བོད་པར་རྒྱབ་སྐྱོར་བརྒྱ་ཆའི་བརྒྱ་ཡོང་གི་རེད། སོ་སོའི་ཕྲུ་གུ་སློབ་གྲྭར་མ་བཏང་བར། ངའི་ཕྲུ་གུ་ལ་སྦྱིན་བདག་རག་ས་མ་རེད་ལབ་ན་དེ་ལྐུག་པ་རེད།
དྲི་བ། རྒན་ལགས་ཀྱིས་བོད་ནང་གི་བོད་མི་ཚོ་དང་། ལྷག་པར་དུ་རང་སྲོག་བློས་གཏོང་བྱེད་བཞིན་པ་དག་ལ་འབོད་སྐུལ་དང་རེ་བ་གང་འདྲ་ཞུ་རྒྱུ་ཡོད།
ལན། ངས་ཐོག་མ། པུས་མོ་ས་ལ་བཙུགས་ཏེ་དཔའ་བོ་དཔའ་མོ་དེ་དག་ལ་ཕྱག་འཚལ་རྒྱུ་ཡིན། ད་ལྟའི་ཛ་དྲག་གཉན་འཕྲང་གི་དུས་ཚོད་འདི་ལ། མུ་མཐུད་དུ་ཨུ་ཐུག་ཐབས་ཟད་ཀྱི་གྲ་སྒྲིག་ཅིག་དགོས་ཀྱི་འདུག རྒན་འཁོགས་ང་ལ་མཚོན་ན་ཡང་སྔོན་མ་ནས་གྲ་སྒྲིག་ཡོད། ང་ཚོ་ཚང་མ་སྐྱིད་ན་མཉམ་སྐྱིད་དང་སྡུག་ན་མཉམ་སྡུག་བྱ་དགོས། ངའི་དཔེ་ཁང་ཐབས་ཆག་འདི་དང་དངུལ་བྱང་སོགས་སྐྱེས་དམན་གྱི་མིང་ཐོག་ན་ཡོད། འོན་ཀྱང་། ཚེ་སྲོག་གཅིག་རེ་གཅིག་རེ་ཤོར་ན་ཕན་ཐོགས་དང་མ་ཐོགས་ཟེར་བ་དེ་བཙན་བྱོལ་བོད་གཞུང་དང་བྱེས་འཁོད་ལས་ཀྱི་སྣེ་མོ་བ་ཚོར་ཐུག་ཡོད། བོད་ནང་གི་གནས་སྟངས་ཛ་དྲག་ཏུ་མཐོང་གི་ཡོད་པ་ངོ་མ་ཡིན་ན། རང་ལུས་མཆོད་འབུལ་བྱས་ཟིན་པ་ཚོར་གདུང་སེམས་མཉམ་སྐྱེད་ཡོད་པ་བདེན་པ་ཡིན་ན། དམིགས་ཡུལ་དང་འཆར་གཞི་ལྡན་པའི་འཐབ་རྩོད་ཅིག་དབུ་འཛུགས་གནང་རོགས་ཟེར་ནས་ཞུ་བ་བྱེད་བཞིན་ཡོད། གལ་སྲིད་གཞུང་གིས་འགུལ་དཀྱོག་རྒྱག་རྒྱུ་མིན་ན། མང་ཚོགས་ཀྱིས་རྒྱ་ནག་གཞུང་ཚབ་མདུན་དུ་སྐད་བརྒྱབ་པས་ཕན་ཐོགས་གང་ཡང་ཡོད་པ་མ་རེད། སྐད་འབོད་དང་པོ་ང་ཚོའི་གཞུང་གི་མདུན་ནས་རྒྱག་དགོས་པ་རེད།
གསར་འགོད་པ། དོན་འགྲུབ་བཀྲ་ཤིས།
༼ བོད་ཀྱི་དུས་བབ་ཚགས་ཤོག་ལས་འདིར་བཀོད། ༽
བོད་པ་ཚོས་ལྷ་སྒྲུང་བཤད་ནས་ཡུན་རིང་འགོར་སོང་བས་ལོ་རྒྱུས་དང་ཆབ་སྲིད་རིག་གནས་ཡོད་ཚད་ལྷ་སྒྲུང་དུ་འགྱུར་སོང་བ་རེད་ད་མི་སྐད་གོ་དུས་མི་འཚམ་པ་ཞིག་རེད་འདུག རྒན་ལྷ་བཟང་ལགས་མུ་མཐུད་མི་སྐད་གསོན་པོ་བཤད་རོགས་མི་དོན་ནལ་མ་གླེང་རོགས་ཐུགས་རྗེ་ཆེ། རྒན་ལགས་ཀྱི་སྐུ་གཟུགས་ལ་བདག་སྐྱོང་གནང་རོགས་ཁྱེད་ལྟ་བུ་དངོས་གནས་ང་ཚོ་བོད་ལ་མཁོ།
“ངའི་དཔེ་ཁང་ཐབས་ཆག་འདི་དང་དངུལ་བྱང་སོགས་སྐྱེས་དམན་གྱི་མིང་ཐོག་ན་ཡོད། འོན་ཀྱང་། ཚེ་སྲོག་གཅིག་རེ་གཅིག་རེ་ཤོར་ན་” དང་”སྐད་འབོད་དང་པོ་ང་ཚོའི་གཞུང་གི་མདུན་ནས་རྒྱག་དགོས་པ་རེད།” ཅེས་པའི་ཚིག་དུམ་གཉིས་ལས་ལྷག་བསམ་ལགས་ཀྱང་རང་ལུས་མེར་བསྲེག་ལ་གྲ་སྒྲིག་ཡོད་པ་དང་། དེ་ཡང་བོད་རང་བཙན་ཆེད་དུ་དྷ་ས་གངས་སྐྱིད་དེ་ས་ཆ་ཡག་ཤོས་སུ་བརྩིས་པ་ལྟར་སྣང་བས་་་་་་་་་་
དུས་གསུམ་སྐྱབས་གནས་མ་ལུས་འདུས་པའི་སྐུ།། བོད་མི་རིགས་ཀྱི་སྐུ་ཚབ།
སྣ་ཚོགས་ཆོས་ཀྱི་དབྱངས་སྙན་སྒྲོགས་པའི་གསུང་།།བོད་མི་རིཊ་ཀྱི་གསུང་ཚབ།
མཁྱེན་བརྩེ་ནུས་པའི་ཡོན་ཏན་རབ་རྫོགས་ཐུགས།། བོད་མི་རིཊ་ཀྱི་ཐུཊ་ཚབ།
བསྟན་འཛིན་རྒྱ་མཚོ་མགོན་དེ་རྒྱལ་རྒྱུར་ཅིག ། བོད་མི་རིགས་རྒྱལ་རྒྱུར་ཅིག།
༸གོང་ས་མཆོག་ལ་སྙན་ངག་གི་ཚིགས་སུ་བཅད་པའི་བསྟོད་དབྱངས་འདི་ལྷག་བསམ་ཚེ་རིང་ལགས་སུ་གསལ་བཤད་ཀྱི་ཚུལ་དུ་ཕུལ།།
མྱི་ནག་ཚང་། ལྷ་བཟང་ཚེ་རིང་དང་འཇམ་དབྱངས་ནོར་བུ། ཀླུ་མཁར་བྱམས་སོགས་ཀྱི་འགོར་རྡོ་དང་དབྱུག་པ་ཕོག་གྲབ་བྱས་པའི་རྒྱུ་རྐྱེན་དེ་རང་བཙན་དང་དབུ་མའི་ལམ་གྱི་ལྟ་གྲུབ་དང་འབྲེལ་བ་རྩ་བ་ཉིད་ནས་ཡོད་པ་རེད་མི་བསམ་གི།
ངས་བསམ་ཚུལ་ལ་དོན་རྐྱེན་དེ་ནི་ཁོང་ཚོས་རྒྱ་ཆེའི་མང་ཚོགས་ཀྱི་སྐྱབས་ཡུལ་དམ་པ་གོང་ས་སྐྱབས་མགོན་ཆེན་པོ་མཆོག་ལ་ཚད་བཟུང་མེད་པའི་སྐྱོན་བརྗོད་དང་ཟུར་ཟ་བྱས་པ་དང་། མང་ཚོགས་ཀྱི་དད་མོས་རང་དབང་ལ་བརྩི་བཀུར་མ་གནང་བའི་ལན་པ་རེད་འདོད་ཀི། འདི་འདྲའི་དབྱེ་ཞིབ་ཙམ་ཡང་མ་གནང་བར་། དབུ་མ་བས་ང་བཙན་པའི་མགོར་རྡོ་དང་དབྱུག་པས་རྡུང་གྲབ་བྱས་པ་རེད་ཟེར་ན་འགན་ཁུར་མེད་པའི་གཏམ་ཁོ་ན་རེད། བསམ་བློ་ཞིག་ཐོང་དང་རང་བཙན་མི་འདོད་པའི་བོད་མི་སུ་ཞིག་ཡོད་པ་རེད།
ཡིན་ནའང་འཇམ་ནོར་གྱི་བཤད་བཞིན་པའི་རང་བཙན་དེའི་ནང་ལ་མདོ་སྟོད་སྨད་གཉིས་འདུས་མེད་པ་འཇམ་ནོར་རང་གིས་ང་ལ་གསུང་སོང་། ལྷ་ཚེའི་རང་བཙན་དེའི་ཁྱབ་ཚད་དེ་ག་འདྲ་ཞིག་ཡིན་མིན་ངས་མི་ཤེས། ཡིན་ནའང་ཐབས་ལམ་དེ་བོད་ནང་གི་བོད་ཁྱིམ་རེ་རེ་ནས་མི་རེ་རེ་འཆི་ཐུབ་ན་རང་བཙན་ལོན་པའི་སྐད་ཆ་ཞིག་ཚོགས་ཐོག་ཞིག་ཏུ་གསུང་སོང་།
སྐུ་ཞབས་ལྷ་བཟང་ཚེ་རིང་ལགས། ཁྱེད་ཀྱིས་མཆན་བུ་འདི་དག་ལ་གཟིགས་ཀྱིན་ཡོད་དམ། གལ་ཏེ་ཁྱེད་ཀྱིས་རང་གིས་གསུངས་པ་དེས་སྤྱི་ཚོགས་ཁྲོད་ལ་ཕན་གནོད་དང་ནུས་པ་ཅི་ཞིག་ཐོན་གྱིན་པ་ཤེས་འདོད་ལཔོས་ཡོད། རང་གིས་གང་གསུངས་དང་གང་གནང་ཚང་མར་རང་གིས་འགན་ཆ་ཚང་ཡང་འཁུར་འདོད་ལོས་ཡོད། དེ་བས་ཁྱེད་དྲ་ངོས་འདིར་ཕེབས་ནས་བགྲོ་གླེང་ལ་ཞུགས་རོགས། འདི་ནི་མཆན་འདེབས་པ་ཁ་ཤས་ཤིག་གི་ཆེད་དུ་མིན་པར་ཀློག་མཁན་མང་པོ་ཞིག་ལ་ཐུགས་ཕན་སོས་ཆེད་ཡིན། ང་ཚོ་ཁ་ཐག་རིང་ན་ཡང་སེམས་ཐག་ཉེ་བོའི་ཐོག་ནས་དྲ་ལམ་འདིར་བསམ་ཚུལ་བརྗེ་རེས་ཡག་པོ་ཞིག་གནང་ན་ཅིས་མི་དགའ། ཐུགས་བསམ་ཞིག་བཞེས་རོགས་གནང།
གུས་པར་བཀུར་བའི་སྐུ་ཞབས་རོ་ལངས་ལགས། ངས་བསམ་གཞིགས་གང་ཙམ་བྱས་རྗེས་སུ་བཤད་པ་ལས་འཚོ་བ་རྣོ་པོ་ཤ་སྟག་གིས་ཐོག་ནས་གཏམ་བརྗོད་པའི་གཟིས་ཀ་དེ་ང་ལ་མེད།
ཡིན་ནའང་ངས་རང་ཉིད་བོད་རིགས་ཤིག་ཡིན་པའི་ངོས་ནས་བཤད་ན་བོད་གངས་ཅན་གྱི་ལྗོངས་འདིར་བསྟན་དང་། འགྲོ་བའི་བདེ་སྡུག ཆབ་དཔལ་རིག་གསུམ་སོགས་ཕྱོགས་སར་ནམ་ཡང་བཀའ་དྲིན་གཞལ་དུ་མེད་པའི་བོད་མིའི་བལྟ་བའི་མིག་དང་ཁོག་པའི་སྙིང་ལྟ་བུའི་༸ གོང་ས་ཡིད་བཞིན་ནོར་བུ་མཚན་སྨད་དང་། བཀུར་འདེབས། འཁྱོགས་བཤད་སོགས་དེ་འདྲ་རྩ་བ་ནས་བྱེད་མི་ཐུབ།
ད་དུང་བཀའ་དྲིན་ལ་བསམ་གཞིགས་མེད་པར་དྲིན་ལན་ལོག་པར་འཇལ་བའི་བོད་རིགས་སུ་དང་སུ་ཞིག་སྤྱི་ཚོགས་ཐོག་ཐོན་ནའང་ངས་དེར་ནམ་ཡང་བརྒྱབ་བསྐྱོར་བྱེད་མི་ཐུབ།
གནའ་སྔ་མོའི་བོད་ཀྱི་དམངས་འཁྲོད་དུ་ཡོད་གཏམ་ཞིག་དྲན་སོང་བ་དེ་རོ་ལངས་ཁྱེད་ལ་འབུལ་འདོད་བྱུང་། མི་ལ་རེ་བའི་ཇ་ཆང་ལོངས་སྤྱོད་ལས། །རང་གི་རྩ་རྐྱང་ཆུ་རྐྱང་བྲོ་བ་ཞིམ། །ཟེར་བ་ལྟར་བསྟན་དགྲ་རྒྱ་དམར་གྱི་ཇ་ཆང་དང་ལོངས་སྤྱོད་སོགས་ལ་རོལ་བ་ལས་རང་གི་རྩ་རྐྱང་ཆུ་རྐྱང་གི་བོད་པའི་སྤྱི་ཚོགས་ནང་དུ་བོད་མི་རིགས་ཀྱི་ད་ལྟ་དང་འབྱུང་འགྱུར་མི་རབས་རྣམས་ཀྱི་ཕུགས་བསམ་རྡོ་ལ་བྲིས་མོ་ཞིག་ལས་འབྲི་མ་ཐུབ་ནའང་དེ་ནི་ཆེས་བསྐལ་བ་བཟང་སྙམ།
རོ་ལངས་ཁྱེད་ཉིད་ཐུགས་འཁྲལ་མ་གནང་འཇིག་རྟེན་འདིར་དར་རྒུད་ཟེར་བ་དེ་ཆོས་ཉིད་ཅིག་ཡིན་སྟབས། བོད་ཉམས་ཀྱང་དར་བའི་དུས་ཤིག་འབྱུང་བར་འགྱུར་བ་ངས་ཡིད་ཆེས་བྱེད།
བོད་ཀྱི་བླ་ན་མེད་པའི་དབུ་འཁྲིད་༸ གོང་རྒྱལ་བ་རིན་པོ་ཆེ་སྐུ་ཚེ་ཁྲི་ལོར་བརྟན་པར་ཤོག རླབས་ཆེན་གྱི་བོད་མི་རིགས་ཁྲི་ལོར་བརྟན་པར་ཤོག
ཅེས་པ་འདི་ང་འཇིག་རྟེན་འདིར་སྐྱེས་ནས་ཐ་མ་ཤི་བའི་བར་གྱི་སྨོན་འདུན་དེ་རང་ཡིན། ངས་དེའི་དེ་གཉིས་ཀྱི་ཆེད་དུ་རང་ཉིད་འཚོ་སྡོད་བྱེད། དེ་གཉིས་ཀྱི་ཆེད་དུ་ལས་ལ་གང་ཐུབ་བརྩོན་ངེས་ཡིན། བོད་རྒྱལོ།
ང་ནི་ཧི་མ་ལྰ་ཡི་བོད་རིགས་ནང་པ་ཚོ་རྒྱ་གར་དང་མཉམ་དུ་བསྡད་ཡོད་པ་ལས། རྒྱ་གར་གྱི་མངའ་འོག་ཏུ་བསྡད་ཡོད་པ་ངས་མི་འདོད་པ་བཞིན། ང་ཚོ་བོད་རིགས་སྤྱི་ཡོངས་ཚོ་ཡང་རྒྱ་ནག་དང་མཉམ་དུ་སྡོད་དགོས་པ་ལས་རྒྱ་ཡི་མངའ་འོག་ཏུ་སྡོད་དགོས་ཟེར་མཁན་སུ་འདུག་གམ།
ད་ལྟའི་དུས་སུ་རྒྱ་བོད་མཉམ་གནས་མེད་པར་གཅིག་གིས་གཅིག་འོག་ཏུ་བཅུག་པ་ལྟ་བུའི་དྲང་བདེན་མེད་པར་ཡང་ངས་འདོད་ལགས། དེས་ལམ་དབུ་མ་ནི། ཐབས་ལམ་ཙམ་མིན་པར་འབྲས་བུ་ཡང་ཁ་ཞེ་གཉིས་མེད་གཉིས་སྨན་མཉམ་མཐུན་ལ་བརྩོན་དགོས་པ་མིན་ནམ། དགེ་བར་འགྱུར་ཅིག །
ཤར་ཕྱོགས་ཁུག་རྟ་ཟེར་བ་དེ་དད་ཞེན་གྱིས་བཟི་བསྡད་ཡོད་ས་རེད་གནས་ལུགས་མེད་རྒྱུ་ཤ་སྟག་བཤད་འདུག བོད་མིའི་སྲོག་སྐྱོབ་མཁན་དེ་སུ་ཡིན་ད་དུང་ལྟ་རྒྱུ་རེད་འཆི་ཉེན་ལ་ད་གཞི་ནས་སླེབས་ཀྱི་ཡོད་པ་རེད།།
ལྷ་བཟང་ཚེ་རིང་གིས་སྐད་ཆ་མ་མཐའ་ཡང་འདི་འདྲ་ཞིག་བཤད་ཡོད་རྒྱུ་ན་དྲན་བྱུང་། དཔེར་ན། <གལ་སྲིད་གཞུང་གིས་འགུལ་དཀྱོག་རྒྱག་རྒྱུ་མིན་ན།> ང་རང་གིས་<རྒྱ་ནག་གཞུང་ཚབ་མདུན་དུ་སྐད་བརྒྱབ་>ནས<་ཕན་ཐོགས་གང་>ཡོང་ཞིག་བྱེད་རྒྱུ་ཡིན། གཞན་ང་ཚོས་རང་གི་གཞུང་ལ་ཁ་བཏང་བསྡད་པ་ལས< སྐད་འབོད་དང་པོ་ང་ཚོའི་>དགྲ་བོ་དམར་བོའི་སྲིད <གཞུང་གི་མདུན་ནས་རྒྱག་དགོས་པ་རེད།>
མྱི་ནག་ཚང་དང་གནས་ཚང་གཉིས་ཀྱིས་གསུང་བ་མྱི་སྐད་རེད།དེ་མིན་ཕལ་ཆེ་བ་ཁྱི་སྐད་ཟུག་པ་མ་གཏོགས་གོ་བ་ལོན་གྱི་མི་འདུག
རྒན་ལྷ་བཟང་ནས་གསུངས་ཟིན་པ་གནས་ལུགས་ཡོདམེད་་དེ་སྦལ་བ་ན་སྐུང་ལྟ་བུ་དག་གིས་གོ་དོན་རྟོགས་རྒྱུ་ཁག་པོ་རེད།
དངོས་གནས་ཡག་པོ་གསུང་འདུག བཙན་བྱོལ་སྤྱི་ཚོགས་ནང་མི་སྐད་གསོན་པོ་བཤད་ཐུབ་མཁན་ཁོང་གཅིག་བུ་མ་གཏོགས་མི་འདུག རྒན་ལྷ་བཟང་ཚེ་རིང་ལགས་ཐུགས་རྗེ་ཆེ།