བཀའ་ཁྲི་མཆོག་གིས་སུད་སི་དང་འཇར་མན་གྲོས་ཚོགས་འཐུས་མི་ཚོར་ཐུག་འཕྲད་དང་བོད་རིགས་མང་ཚོགས་ལ་གཏམ་བཤད་གནང་ཡོད་འདུག
ཉིན་འདི་འགར་བཀའ་བློན་ཁྲི་པ་བློ་བཟང་སེང་གེ་མཆོག་གིས་ཡུ་རོབ་རྒྱལ་ཁབ་ཁག་ཏུ་གཞུང་འབྲེལ་གཟིགས་སྐོར་གནང་བཞིན་ཡོད་པ་ལྟར། ཟླ་འདིའི་ཕྱི་ཚེས་ ༢༠ ཉིན་བཀའ་ཁྲི་མཆོག་སུད་སི་རི་ཀོན་དགོན་པའི་མཁན་པོ་དང་། དབུས་བོད་མིའི་སྒྲིག་འཛུགས་སྐུ་ཚབ་དོན་གཅོད་གཙོས་པའི་ས་གནས་བོད་རིགས་མང་ཚོགས་ཀྱི་ཕེབས་བསུའི་ཁྲོད་ཛིའུ་རིག་གནམ་ཐང་དུ་འབྱོར་འདུག་ལ། ཉིན་དེར་བཀའ་ཁྲི་མཆོག་གིས་ཡུལ་དེའི་ཨལ་ཊིར་བྷ་སི་ཞེས་པའི་ཚོགས་ཁང་དུ་བོད་རིགས་མི་དམངས་ ༦༠༠ ཙམ་ལ་གཏམ་བཤད་སྤེལ་ཏེ། “ འཛམ་གླིང་སྟེང་སྐྱབས་བཅོལ་བ་མང་པོ་ཡོད་པའི་ནང་བོད་པ་སྐྱབས་བཅོལ་པ་ཚགས་ཚུད་ཤོས་ཆགས་ཡོད་པ་དེ། གཙོ་བོ་༧གོང་ས་མཆོག་གི་ལམ་སྟོན་འོག་བོད་མི་ཚོས་ཆིག་སྒྲིལ་གྱི་ནུས་ཤུགས་བཏོན་པ་ཞིག་རེད། ཆིག་སྒྲིལ་ནི་བོད་དོན་འཐབ་རྩོད་ཀྱི་རྩ་བ་ཆགས་ཡོད་སྟབས། མ་འོངས་པར་བོད་པ་ཚོས་ཆོལ་ཁ་དང་ཆོས་ལུགས་དབྱེར་མེད། ཕོ་མོ་འདྲ་མཉམ་ཐོག་བོད་དོན་ཐོག་དམིགས་བསལ་ནུས་པ་འདོན་དགོས་ཀྱི་འདུག ” ཅེས་བརྗོད་འདུག ཕྱི་ཚེས་༢༡ཉིན་རྒྱལ་ས་བྷར་ཎའི་ནང་ཡུལ་དེའི་ཕྱི་སྲིད་ལྷན་ཁང་གི་ལས་བྱེད་རྒན་གྲས་ཤིག་དང་མཇལ་འཕྲད་བྱས་ཏེ། ད་ལྟའི་བོད་ནང་གི་ཛ་དྲག་གནས་སྟངས་སྐོར་གསལ་བཤད་དང་། སུད་སི་གཞུང་གིས་མུ་མཐུད་བོད་དོན་ཐོག་རྒྱབ་སྐྱོར་དགོས་པའི་འབོད་སྐུལ་ཞུས་ཡོད། སྐབས་དེར་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་ལྕམ་མཱ་ཡཱ་གྷབ་རབ་ལགས་ཀྱང་། “ སུད་སི་གཞུང་གིས་རྒྱ་ནག་དང་ཚོང་འབྲེལ་བྱེད་སྐབས་འགྲོ་བ་མིའི་ཐོབ་ཐང་དང་ཁོར་ཡུག་གནད་དོན་གཉིས་གལ་ཆེན་དུ་འཛིན་དགོས ” ཞེས་བརྗོད་འདུག
ཕྱི་ཚེས་༢༢ཉིན་བཀའ་ཁྲི་མཆོག་འཇར་མན་དུ་ཕེབས་ཏེ་ཡུལ་དེའི་གྲོས་ཚོགས་བོད་དོན་གླེང་མོལ་ཚོགས་ཆུང་དང་། ཕྱི་འབྲེལ་ལས་དོིན་ཚོགས་ཆུང་གི་གྲོས་ཚོགས་འཐུས་མི་སྐུ་ཞབས་ཧན་སི་ཨུལ་རིག་ཀོ་ལོ་སི་ (Hans-Ulrich Klose) ལགས་དང་། སྐུ་ཞབས་ཧ་རལ་ཌི་ལེབ་རི་ཆི་ (Mr.Harald Leibrecht) རྣམ་གཉིས་གཙོས་པའི་འཐུས་མི་༡༥ ཙམ་ལ་ཐུག་འཕྲད་ཀྱིས། ད་ལྟའི་བོད་ནང་གི་གནས་སྟངས་དང་། ༧གོང་ས་མཆོག་གིས་བོད་མིིའི་ཆབ་སྲིད་འགན་དབང་མང་ཚོགས་ཀྱིས་བདམས་པའི་མགོ་ཁྲིད་ཚོར་རྩིས་སྤྲོད་གནང་ཕྱོགས། བཙན་བྱོལ་བོད་མིའི་མང་གཙོ་ཡར་རྒྱས་སོགས་ངོ་སྤྲོད་དང་། འཇར་མན་གཞུང་དམངས་གཉིས་ཀྱིས་ད་བར་བོད་དོན་ཐོག་རྒྱབ་སྐྱོར་གནང་བར་བཀའ་དྲིན་ཞུས་ཡོད་འདུག ཕྱི་དྲོ་འཇར་མན་ལྗང་ཁུ་ཚོགས་པའི་ཚོགས་གཙོ་ལྕམ་སྐུ་ཀ་ལིའོ་ཌོ་རོ་ཐ་ (Mrs. Claudia Roth) ལགས་དང་ཐུག་འཕྲད་སྐབས། འཇར་མན་ལྗང་ཁུ་ཚོགས་པའི་འགྱུར་བ་མེད་པའི་རྒྱབ་སྐྱོར་ལ་བསྔགས་བརྗོད་དང་། འབྱུང་འགྱུར་བོད་དོན་ཐོག་སྔར་ལས་རྒྱབ་སྐྱོར་ཡོང་བའི་འབོད་སྐུལ་སོགས་ཞུས་འདུག དེའི་རྗེས་ AFP གསར་འགོད་པའི་བཅར་འདྲི་དང་ལེན་དང་། འཇར་མན་གནས་སྡོད་བོད་རིགས་ཚོར་ཆིག་སྒྲིལ་ནི་བོད་དོན་འཐབ་རྩོད་ཀྱི་ནུས་ཤུགས་ཡིན་སྐོར་གྱི་གཏམ་བཤད་བཅས་གནང་ཡོད། འཇར་མན་གྱི་གཟིགས་སྐོར་གྲུབ་རྗེས་བཀའ་ཁྲི་མཆོག་སུ་ཝེ་ཌིན། ནོར་ཝེ། ཧྥ་རན་སི། བྷེལ་ཇམ། དབྱིན་ཡུལ་བཅས་སུ་ཕེབས་རྒྱུ་ཡིན་འདུག
འདི་ནི་བཀའ་ཁྲི་མཆོག་ཡུ་རོབ་ཁུལ་དུ་གཞུང་འབྲེལ་གཟིགས་སྐོར་དུ་ཕེབས་པ་ཐོག་མ་ཆགས་ཡོད་འདུག
འཛིགས་མེད་ལགས་ཀྱི་སྐད་ཆ་དེ་ཚོ་དྲ་གྲོགས་དག་གིས་མ་ལྟོས་ན་ཡག་ས་རེད་ཆིག་སྒྲིལ་གཏོར་མཁན་སུ་ཡིན་གསར་པོ་རེད་་་་་་་་་་སྐད་ཆ་ཚོད་ཞིག་དགོས་བ་མ་རེད་དམ།
གྲོགས་པོ་རྒྱང་འཁྱམས་ལགས་དེ་འདྲ་མ་གསུངས་སྐད་ཆ་དེ་ཚོ་གཞན་ཀྱི་གོ་ན་ངོ་ཚ་རེད་བློ་ནང་དུ་ཁུག་ནས་བསམ་བློ་ཡག་པོ་བཏང་།
ཆིག་སྒྲིལ་མེད་པའི་མི་རིགས་དེ་མི་ལོ་ལྔ་བཅུ་ལས་མི་ལོ་ལྔ་བརྒྱ་ལ་འཐབ་རུང་རང་བཙན་མ་དགོས་རང་དབང་ཡང་ལོན་པར་མི་མཐོང་ངོ་།།
ཆིག་སྒྲིལ་དགོས་ན། བོད་ཀྱི་བཀའ་བློན་ལ་བོད་ཀྱི་ཕ་སྐད་མི་དགོས་པའི་བཀའ་མོལ་མ་གནང་།
ཆིག་སྒྲིལ་དགོས་ན། ཆོལ་ཁུངས་རིས་མེད་ཀྱི་བཀའ་བློན་འདེམས་རྒྱུའི་དམ་བཅའ་ཞིག་རུལ་ཆགས་པར་དགོངས་སེལ་ཞུ་དགོས།
ཆིག་སྒྲིལ་དགོས་ན། གསར་འབྱོར་བ་ཚོས་ཨིན་ཡིག་མི་ཤེས་པས་བཀའ་བློན་དུ་མ་འདེམས་གསུངས་པར་དགོངས་སེལ་ཞུ་དགོས།
ཆིག་སྒྲིལ་དགོས་ན། བཀའ་ཁྲི་ཟམ་གདོང་ལྟར་རང་གི་མཁས་ཚད་ལྷག་བསམ་གྱིས་མི་རྣམས་ཁུ་སིམ་པོར་ཞོག་ཅིག
ཆིག་སྒྲིལ་དགོས་ན། པཱ་པཱ་ཅུག་ཅུག་ཅུག་གི་སྐད་ཆ་བཤད་པ་དེ་ལ་དགོངས་སེལ་ཞུ་དགོས།
ཆིག་སྒྲིལ་དགོས་ན། དགའ་ཉེ་འཁོར་དུ་བསྡུ་བའི་ལས་དོན་བྱེད་ཕྱོགས་ལ་གསལ་བཤད་གནང་དགོས།
ཆིག་སྒྲིལ་དགོས་ན། རང་ཉིད་ཡ་རབས་བཟང་སྤྱོད་དང་བདེན་པའི་རྣམ་པར་རྒྱལ་ཏེ་བཀའ་ཁྲི་ཐོབ་ཚུལ་གྱི་གཏམ་བཤད་ལ་དགོངས་སེལ་ཞུ་དགོས།
བཀའ་ཁྲི་མཆོག་ཡོ་རོབ་ནང་དུ་གཟིགས་སྐོར་དང་འབྲེལ་བོད་ཀྱི་གནས་དོན་ཐོག་མང་ཚོགས་ལ་གཏམ་བཤད་གནང་བ་གུས་བོད་མི་ཞིག་ཡིན་པས་ཆ་ནས་ཐུགས་རྗེ་ཆེ་ཞུ་རྒྱུ།
ཁ་ཡོད་ཚད་ཀྱིས་བཅར་འདྲི་བྱེད་སྲིད་པས་བཅར་འདྲི་ཡོད་ཚད་དེང་ལེན་བྱེད་མི་དགོས་ཞེས་ང་རང་ཆབ་འབང་ཞིག་ཡིན་པས་གནང་བ་ཡོད་དོ།།
སྒེར་ལས་སྤྱི་བ་གལ་ཆེ. སྤྱི་བ་ལས་རྩ་དོན་གལ་ཆེ. བཀའ་ཁྲིས་གསུང་བའི་ཆིག་སྒ྄ིལ་ཐད་ཀྱི་རིག་པའི་གཞུང་ལུགས་རེད་. ང་ཚོས་སེམས་སུ་བཅིངས་ནས་རྩ་དོན་ལ་འབོད་ཅིག་གུ
ཆིག་སྒྲིལ་དགོས་ན་མི་མང་དང་མཉམ་དུ་ལྷུག་ལྷུག་གིས་བཀའ་མོལ་གནང་རོགས། མི་མང་གི་དྲི་བར་ཞེད་སྣང་མ་གནང་བར་ལན་གནོང་། ལྷག་བསམ་རྣམ་དག་གིས་འགན་ཁུར་བྱས་ན་ད་གཟོད་ཆིག་སྒྲིལ་ཡོང་གི་རེད། ཁ་སང་VOA བཅའ་འདྲི་བཀག་པ། ཡོ་རོབ་ནང་དུ་བོད་མི་རེ་ཤོས་ཀྱི་དྲི་བར་ལན་མ་བཏབ་པ་སོགས་ནི་བྱ་སྤྱོད་ཡག་པོ་མ་རེད་ལགས།
ཨ་རོ། བློ་སེང་ཡ་བློ་སེང་། ཆིག་སྒྲིལ་ད་གལ་ཆེ་གདའ་ཆེ། ཡིན་ཡང་མགོ་ནས་ཆིག་སྒྲིལ་གཏོར་མཁན་གྱི་རྒད་པོ་བཀའ་བློན་དུ་ཉར། རང་གིས་ཆིག་སྒྲིལ་གཏོར་མགོ་བརྩམས་ན་ད་སུས་ཆིག་སྒྲིལ་ཆིག་སྒྲིལ་ཟེར་ནས་འདུག་གྱི་རེད་དམ།