སྐྱེ་དགུ་མདོའི་བྱིས་པ་ཚོས་གྲང་ལྟོགས་མྱོང་གིན་འདུག

དེ་རིང་ཕྱི་ཚེས་ ༢༣  ཉིན་རྒྱ་ནག་ལ་ལྟ་བ་ཞེས་པའི་དྲ་བའི་སྟེང་གནས་ཚུལ་སྤེལ་བ་ལྟར་ན། ཉེ་བའི་ཟླ་གཅིག་གི་སྔོན་ནས་བཟུང་ཁམས་སྐྱེ་དགུ་མདོའི་གནམ་གཤིས་དྲོད་གྲང་ཀླད་གོར་མན་གྱི་ཏུའུ་ ༡༠ ལ་སླེབས་ཏེ་ས་གཞི་འཁྱག་པས་བསྡམས་ཡོད་འདུག ཡིན་ནའང་། ཧ་ཅང་གྲང་ལྷག་ཆེ་བའི་དགུན་ཁའི་དུས་ཚིགས་འདིར་ཁམས་སྐྱེ་དགུ་མདོའི་གནོད་ཐེབས་ས་ཁུལ་ཁག་ཅིག་ཏུ། ཞིང་འབྲོག་ཁུལ་གྱི་སློབ་གྲྭ་ཁག་ནང་སྔར་བཞིན་སློབ་མའི་སྡོད་ཁང་གསར་རྒྱག་བྱེད་མ་ཐུབ་པར་སློབ་ཕྲུག་རྣམས་དྲོད་ཆས་ཀྱི་མཐུན་རྐྱེན་མེད་པའི་སྡོད་གུར་ནང་འདུག་དགོས་བྱུང་ཡོད་པར་མ་ཟད། དགུན་ཆས་གྱོན་གོས་དང་ཟ་མའི་ཐད་ལའང་མུ་མཐུད་དཀའ་ངལ་འཕྲད་བཞིན་ཡོད་འདུག 

ཉེ་ཆར་རྒྱ་ནང་གི་སྤྱི་ཚོགས་འབྲེལ་མཐུད་དྲ་རྒྱ་བའེ་པའོ་སོགས་སུ། ཁམས་སྐྱེ་དགུ་མདོའི་ས་ཁུལ་ཁག་ནང་སློབ་ཕྲུག་རྣམས་ལ་དགུན་ཆས་དང་ཟ་མའི་དཀའ་ངལ་འཕྲད་བཞིན་པའི་གནས་ཚུལ་དང་པར་རིས་སོགས་ཐོན་ཡོད་འདུག   དྲ་མིང་ལ་རྒྱ་སེའི་བུམ་པ་ཟེར་བའི་ཟིན་བྲིས་པ་ཞིག་གིས་རང་གི་བའེ་པའོ་ཐོག་གནས་ཚུལ་སྤེལ་པ་ལྟར་ན། ཉེ་སྔོན་ཕྱི་ཟླ་ ༩ པའི་ཟླ་མཇུག་ལ་རྒྱ་ནག་ཞིན་ཧྭ་གསར་ཁང་གི་གསར་འགོད་པ་ཞིག་ཁམས་སྐྱེ་དགུ་མདོའི་ར་ཕྱུག་ཞོལ་མ་གྲོང་རྡལ་དུ་བསྐྱོད་སྐབས།   ས་ཁུལ་དེར་སློབ་ཕྲུག་ ༡༥༥༡ ལ་ད་དུང་ཁང་པ་གསར་རྒྱག་བྱེད་མ་ཐུབ་པར་མུ་མཐུད་དྲོད་ཆས་མེད་པའི་སྡོད་གུར་ནང་གྲང་ལྷག་གི་འཚོ་བ་སྐྱེལ་བཞིན་པའི་གནས་སྟངས་བྱུང་ཡོད་པ་ངོས་ལེན་བྱས་ཡོད་པའི་སྐོར་དང་། དེ་མིན་ད་དུང་ས་ཡོམ་གནོད་འཚེ་ཐེབས་ཡུལ་ཞིང་འབྲོག་ཁུལ་གྱི་སློབ་གྲྭ་མང་པོ་ཞིག་ཏུ་དེ་མཚུངས་ཀྱི་དཀའ་ངལ་འཕྲད་བཞིན་ཡོད་པ་བཀོད་འདུག  

ལོ་སྔོན་མའི་ཕྱི་ཟླ་ ༧ ཚེས་ ༩ ཉིན་རྒྱ་གཞུང་འབྲེལ་ཡོད་སྡེ་ཁག་གིས་ཁམས་སྐྱེ་དགུ་མདོའི་གནོད་སེལ་རོགས་དངུལ་བསྡོམས་རྩིས་གསལ་བསྒྲགས་སྐབས།  ཁམས་སྐྱེ་དགུ་མདོའི་ས་ཡོམ་གནོད་འཚེ་ཐད་རྒྱ་གཞུང་གིས་རོགས་དངུལ་རྒྱ་སྒོར་དུང་ཕྱིར་ ༧༣་༠༢ བཏང་ཡོད་པ་དང་། མང་ཚོགས་ཀྱིས་ཞལ་འདེབས་སུ་ཕུལ་བའི་རོགས་དངུལ་རྒྱ་སྒོར་དུང་ཕྱུར་ ༡༠༦་༥༧ ལ་སླེབས་ཡོད་སྐོར་བསྒྲགས་ཡོད་པ་རེད། ཉེ་ཆར་བའེ་པའོ་དྲ་རྒྱུའི་སྟེང་བསམ་ཚུལ་སྤེལ་མཁན་མང་པོ་ཞིག་གིས་ཁམས་སྐྱེ་དགུའི་ས་ཡོམ་གནོད་སེལ་ཐད་ཁྱོན་བསྡོམས་རྒྱ་སྒོར་དུང་ཕྱིར་ ༡༧༩་༥༩ སྤྲོད་ཡོད་པ་དེ་དག་གིས། ས་ཁུལ་ཆུང་ཆུང་དེ་འདྲ་ཞིག་གི་སློབ་ཕྲུག་རྣམས་ལ་སྡོད་ཁང་གསར་བ་ཞིག་དང་དགུས་ཆས་དྲོན་མོ་ཞིག་གི་མཐུན་རྐྱེན་ཀྱང་བསྐྲུན་ཐུབ་མེད་པའི་རྒྱུ་རྐྱེན་གཙོ་བོ་ནི། རྒྱ་གཞུང་གི་འབྲེལ་ཡོད་སྡེ་ཁག་དག་གིས་མི་དམངས་ཀྱིས་ཕུལ་བའི་ཞལ་འདེབས་རྣམས་སྒེར་གཅོད་དང་། ས་གནས་དཔོན་རིགས་ཚོས་གཞུང་དངུལ་ལྐོག་ཟ་བྱས་པ་ལ་རྟེན་ནས་བྱུང་བ་ཞིག་ཡིན་སྐོར་བརྗོད་ཡོད་པ་རེད།

གཞན་ཡང་། ཕྱི་ཟླ་ ༡༡ ཚེས་ ༡ ཉིན་གྱི་དགོང་མོའི་ཆུ་ཚོད་ ༡༢ དང་སྐར་མ་ ༣ གྱི་སྟེང་། ཁམས་སྐྱེ་དགུ་མདོའི་གནོད་སེལ་སྡོད་གུར་མང་པོ་མཉམ་དུ་གོ་སྒྲིག་བྱས་ཡོད་པའི་ས་ཁུལ་ཞིག་གི་ཚོང་རར་མེ་ཤོར་ཏེ་དགོང་མོའི་ཆུ་ཚོད་ ༣ དང་ཕྱེད་ཀའི་བར་མེ་གསོད་ཐུབ་མེད་པ་རེད། དོན་རྐྱེན་དེའི་ཁྲོད་ས་ཁྱོན་རྨིད་གྲུ་བཞི་མ་ ༤༠༠༠ ལྷག་ལ་མེ་སྐྱོན་བྱུང་ཡོད་པ་དང་། ཤིང་ལེབ་དང་འགྱིག་གིས་བཟོས་པའི་སྡོད་ཁང་ ༢༠༠ དང་། སྡོད་གུར་ ༤༠ ལྷག་མེར་བསྲེགས་ཐེབས་ཡོད་འདུག