བོད་མི་མང་ལ་༸པཎ་ཆེན་རིན་པོ་ཆེ་ངོ་སྤྲོད་ཐུབ་ན། ང་བྱ་བྲལ་གྱི་བསམ་པ་རྫོགས་པ་ཡིན།

གཙང་ཕྲུག་སྟོབས་ལགས། ས་རཱ་མཐོ་སློབ།

          ད་རེས་འདིར་བྱ་བྲལ་རིན་པོ་ཆེས་༸པཎ་ཆེན་རིན་པོ་ཆེའི་ཡང་སྲིད་ངོས་འཛིན་གནང་སྐབས། ༸གོང་ས་མཆོག་ལ་གསང་འབྲེལ་གནང་ཞིང་གསེར་བུམ་དཀྲུག་རྒྱུར་ངོ་རྒོལ་གནང་བའི་བཀའ་མོལ་འགའ་ཞིག་ངོ་སྤྲོད་ཞུ་རྒྱུ་ཡིན།  རྒྱ་ནག་གཞུང་གིས་༸པཎ་ཆེན་རིན་པོ་ཆེའི་ཡང་སྲིད་གསེར་བུམ་ལས་ངོས་འཛིན་ཞུ་རྒྱུའི་ངན་འཆར་གཏིང་འདུག་པ་མ་ཟད། ཡང་སྲིད་བཙལ་འཚོལ་ཚོགས་ཆུང་གི་ཚོགས་གཙོ་བྱ་བྲལ་རིན་པོ་ཆེར་གོ་མིང་དང་། གཟིམ་ཁང་གསར་པ། ཆིབས་འཁོར་གསར་ཉོ་སོགས་བྱས་ཏེ་གསེར་བུམ་དཀྲུག་རྒྱུར་རྒྱབ་སྐྱོར་ཡོང་ཐབས་བྱས་འདུག་པས། གནས་ཚུལ་དེ་ལ་བརྟེན་ནས་བོད་ཕྱི་ནང་གཉིས་ཀྱི་བོད་མི་འགས་བྱ་བྲལ་རིན་པོ་ཆེ་ནི་དམར་ཤེད་ཆེ་བའི་བླ་མ་ཞིག་ཡིན་ཚུལ་གྱི་གླེང་ཕྱོགས་ཀྱང་བྱུང་བ་མ་ཟད། དུས་རབས་ཉི་ཤུ་བའི་བཙན་བྱོལ་བོད་མིའི་ཁྲོད་ཀྱི་ཚགས་ཤོག་ཁག་ཏུ་ཡང་གནས་ཚུལ་དེ་འདྲ་རེ་ཟུང་ཐོན་འདུག

       དོན་དངོས་ཐོག་ “འབྲུག་མོ་ཧོར་དུ་ལུས་ཀྱང་། སེམས་པ་གླིང་དཀར་སྟོད” ཞེས་པའི་དཔེ་ལྟར། བྱ་བྲལ་རིན་པོ་ཆེས་༸པཎ་ཆེན་རིན་པོ་ཆེའི་ཡང་སྲིད་ངོས་འཛིན་གནང་ཕྱོགས་སྐོར་ལ། རྒྱ་ནག་གཞུང་གི་བཙན་བཀའ་བཞིན་སྲིད་བུམ་དཀྲུག་རྒྱུ་ལས་ལྡོག་སྟེ། འཆི་བ་སྲོག་ལ་ཐུག་ཀྱང་དད་ལྡན་བོད་མི་རྣམས་ཀྱི་ཐུགས་འདོད་དང་། ༸རྒྱལ་བ་ཡབ་སྲས་རྣམ་གཉིས་ཀྱི་ལོ་རྒྱུས་ལ་བརྩི་བཀུར་ཆེ་བཞེས་ཀྱིས། ༸གོང་ས་མཆོག་ལ་དངོས་ཤུགས་བརྒྱུད་གསུམ་ནས་འབྲེལ་བ་གནང་བ་མ་ཟད། རྣམ་རྒྱུན་བཀྲ་ཤིས་ལྷུན་པོའི་དགེ་འདུན་བརྒྱ་ཕྲག་འདུས་པའི་ཚོགས་དབུས་སུ་ཡང་། “བོད་མི་མང་ལ་༸པཎ་ཆེན་རིན་པོ་ཆེ་ངོ་སྤྲོད་ཐུབ་ན། ང་བྱ་བྲལ་གྱི་བསམ་པ་རྫོགས་པ་ཡིན།”ཞེས་གསུངས་འདུག་པ་བཞིན། ཁོང་གི་སྐུ་སྲོག་དེ་ལས་དོན་དེའི་ཆེད་ལེགས་སྐྱེས་སུ་ཕུལ་ཡོད།

       བྱ་བྲལ་རིན་པོ་ཆེན་ནི་གཙང་དབེན་དགོན་གྱི་བླ་མ་ཞིག་རེད་ལ། ལོ་རབས་བརྒྱ་ཅུ་དང་དགུ་བཅུ་པའི་ནང་གདན་ས་བཀྲ་ཤིས་ལྷུན་པོའི་དམངས་གཙོ་བདག་གཉེར་ཨུ་ཡོན་ལྷན་ཁང་གི་ཀྲུའུ་རེན་དང་། ལྗོངས་ནང་བསྟན་མཐུན་ཚོགས་ཀྱི་ཨུ་ཡོན། ལྗོངས་སྲིད་གྲོས་ཀྱི་ཨུ་ཡོན། ༸པཎ་ཆེན་སྐུ་ཕྲེང་བཅུ་པའི་དབུ་འོག་དཔུང་འདེགས་གཙོ་གྲས། ༸པཎ་ཆེན་སྐུ་ཕྲེང་བཅུ་པ་ཆེན་པོའི་ཡང་སྲིད་བཙལ་འཚོལ་ཚོགས་ཆུང་གི་ཚོགས་གཙོ་སོགས་གནང་མྱོང་ཞིང་། ཕྱི་ལོ་ ༡༩༩༠ ཟླ་ ༡༠ ཚེས་ ༡༨ ཉིན། ༸པཎ་ཆེན་སྐུ་ཕྲེང་བཅུ་པའི་ཡོངས་འཛིན་རྒྱ་ཡག་རིན་པོ་ཆེ་དང་བྱ་བྲལ་རིན་པོ་ཆེ་བྱམས་པ་འཕྲིན་རྣམ་གཉིས། ༸པཎ་ཆེན་སྐུ་ཕྲེང་བཅུ་པ་ཆེན་པོའི་ཡང་སྲིད་བཙལ་འཚོལ་ཚོགས་ཆུང་གི་ཚོགས་གཙོར་བསྐོ་བཞག་གནང་བ་དང་སྦྲགས། ༸པཎ་ཆེན་སྐུ་ཕྲེང་བཅུ་པ་ཆེན་པོའི་ཡང་སྲིད་བཙལ་འཚོལ་གྱི་ལས་དོན་སྒྲུབ་མགོ་ཚུགས།

       ཕྱི་ལོ་ ༡༩༩༣ ཟླ་ ༧ ནང་། ད་ལྟའི་བཀའ་བློན་ཁྲི་ཟུར་རྒྱ་ལོ་དོན་གྲུབ་དང་། བཀའ་བློན་ཁྲི་ཟུར་བསོད་ནམ་སྟོབས་རྒྱལ་རྣམ་གཉིས་རྒྱ་ནག་ཏུ་ཕེབས་སྐབས། བྱ་བྲལ་རིན་པོ་ཆེས་བཀའ་ཟུར་རྣམ་གཉིས་ཀྱི་སྐུ་མདུན་དུ་བཅར་ཏེ། འོས་སྤྲུལ་ཁྱེའུ་ཉེར་ལྔའི་སྐུ་པར་དང་། ལྷ་མོའི་བླ་མཚོ་དང་། རིན་སྤུངས་གཡུང་མཚོའི་མཚོ་ལྟས་སོགས་༸གོང་ས་མཆོག་ལ་འབུལ་རྒྱུ་བསྐུར་ཏེ། ༸གོང་ས་མཆོག་གིས་༸པཎ་ཆེན་རིན་པོ་ཆེའི་ཡང་སྲིད་ངོས་འཛིན་གནང་ཕྱོགས་སྐོར་ལ་ཐུགས་སྨོན་དང་རྒྱབ་སྐྱོར་གནང་བའི་སྐྱབས་འཇུག་བརྒྱུད་ཞུ་གནང་རོགས་ཞུས། ༸ གོང་ས་མཆོག་གིས་༸པཎ་ཆེན་ཡང་སྲིད་ངོས་འཛིན་སྐོར་ཁོང་ལ་འགན་འཁྲི་ཡོད་པའི་བཀའ་ལན་ཞིག་རྒྱ་གར་གྱི་རྒྱལ་ས་དྷི་ལིར་ཡོད་པའི་རྒྱ་ནག་གཞུང་ཚབ་བརྒྱུད་བཀའ་ལན་བསྩལ་འདུག་མོད། བློ་ཕམ་པ་ཞིག་ལ་བཀའ་ལན་དེ་རྒྱ་ནག་གཞུང་གིས་བྱ་བྲལ་རིན་པོ་ཆེར་རྩ་བ་ནས་ཕུལ་མི་འདུག

       ཕྱི་ལོ་ ༡༩༩༣ ཟླ་ ༧ ཚེས་ ༢༠ ཉིན། རྒྱ་ནག་གཞུང་གིས་གདན་ས་བཀྲ་ཤིས་ལྷུན་པོར། ༸པཎ་ཆེན་ཡང་སྲིད་བཙལ་འཚོལ་གྱི་ལས་དོན་ཚོགས་འདུག་ཐེངས་གཉིས་པ་ཟེར་བ་སྐོང་འཚོགས་བྱས་པ་དང་། ཚོགས་ཆེན་སྟེང་༸པཎ་ཆེན་ཡང་སྲིད་གསེར་བུམ་དཀྲུག་སྟེ་དགོས་པ་དང་། ཀྲུང་དབྱང་ལ་ཆོག་མཆན་ཞུ་རྒྱུར་སོགས་རྒྱུན་འཁྱོངས་དགོས་པའི་རྩ་དོན་ལྔ་ཞེས་པ་ཞིག་བཏོན། སྐབས་དེར་བྱ་བྲལ་རིན་པོ་ཆེས། ཚོགས་གཞུགས་བླ་སྤྲུལ་དང་རྒྱ་ནག་གཞུང་གི་འབྲེལ་ཡོད་དབུ་ཁྲིད་ཚོར་འབོད་སྐུལ་གྱི་བཀའ་སློབ་འདི་འདྲ་ཞིག་གནང་འདུག “བླ་སྤྲུལ་རྣམ་པར་ཐུགས་དམ་ཐུགས་སྨོན་ཡོང་བ་ཞུ་རྒྱུ་ནི། བཀྲ་ཤིས་ལྷུན་དགོན་གྱིས་བྱ་ཐབས་འོས་འཚམ་བརྒྱུད་ནས། ༸གོང་ས་མཆོག་ལ་ཡང་སྙན་སེང་ཞུས་ཡོད་ལ། དེ་ནི་དད་ལྡན་ས་ཡ་དུ་མས་རེ་འདུན་ཙམ་ཡིན་པ་མ་ཟད། ༸རྒྱལ་དབང་སྐུ་ཕྲེང་ལྔ་པ་དང་༸པཎ་ཆེན་སྐུ་ཕྲེང་བཞི་པ་ནས་བཟུང་། ཕན་ཚུན་ཡང་སྲིད་ངོས་འཛིན་གནང་རེས་ཀྱི་ལོ་རྒྱུས་ད་བར་ཡོད་པ་ཞིག་རེད། དེ་བཞིན་ང་རང་ཆོས་པ་ཞིག་ཡིན་པའི་ཆ་ནས། ཆོས་ཕྱོགས་ཀྱི་ལམ་སྲོལ་འགལ་མེད་ཐོག་བོད་མི་མང་གི་འདོད་འདུན་ལྟར་ཡང་སྲིད་འཚོལ་ཞིབ་དང་། གཏན་འཁེལ་ཡོང་ཐབས་བྱེད་རྒྱུ་ཡིན།

       ཡང་སྲིད་འཚོལ་ཞིབ་ནི་ཆོས་ལུགས་ཀྱི་བྱ་བ་ཞིག་ཡིན་པ་བརྟེན། མགོ་ཁྲིད་མཐོ་དམན་སུས་ཀྱང་འཚབ་འཚུབ་ངང་ཐག་གཅོད་བྱེད་ཐབས་མེད་པ་ཞིག་རེད། དོན་ནན་ཞིབ་ཚགས་དགོས་པ་དང་། གལ་སྲིད་གསེར་བུམ་དཀྲུག་དགོས་ཚེ་གཅིག་འབྱོན་ངེས་ཀྱང་། དེར་བོད་མི་མང་གི་ཡིད་ཆེས་ཐོབ་པ་ཞིག་ཡོང་ཐབས་སྟབས། བོད་མི་མང་ལ་༸པཎ་ཆེན་རིན་པོ་ཆེ་ངོ་མ་ངོ་སྤྲོད་གནང་ཐུབ་མཁན་དེ། ༸གོང་ས་མཆོག་ལས་གཞན་སུ་ཡང་མེད།” ཅེས་གསུངས།  བྱ་བྲལ་རིན་པོ་ཆེའི་གསུང་བཤད་དེ་རྒྱ་ནག་གཞུང་གི་༸པཎ་ཆེན་རིན་པོ་ཆེའི་ཡང་སྲིད་བཙལ་འཚོལ་སྐོར་གྱི་རྒྱུན་འཁྱོངས་དགོས་པའི་དོན་ཚན་ལྔ་དང་རྦད་དེ་ཁ་གཏད་ཀྱི་གསུང་བཤད་ཅིག་ཡིན་པར་བརྟེན། རྒྱ་ནག་གཞུང་གིས་བྱ་བྲལ་རིན་པོ་ཆེ་ཡང་སྲིད་ཚོགས་ཆུང་གི་ཚོགས་གཙོ་ལས་གནས་ཕབ་སྟེ། སེང་ཆེན་བློ་བཟང་རྒྱལ་མཚན་བསྐོ་རྒྱུའི་ངན་འཆར་ཡང་སྒྲིག་འདུག

       རྒྱ་ནག་གཞུང་གིས་ཕྱི་ལོ་ ༡༩༩༤ ཙམ་ནས་བྱ་བྲལ་རིན་པོ་ཆེར། ༸པཎ་ཆེན་རིན་པོ་ཆེའི་ཡང་སྲིད་བཙལ་འཚོལ་དང་ངོས་འཛིན་ཞུས་ཏེ། རྒྱལ་སྲིད་སྤྱི་ཁྱབ་ཁང་ལ་ཆོག་མཆན་འགོད་རྒྱུ་འབུལ་དགོས་པའི་བཙན་བཀའ་ཡང་ཡང་ བཏང་འདུག་པ་མ་ཟད། ཕྱི་ལོ་ ༡༩༩༤ ཟླ་ ༤ ནས་ལས་དོན་དེའི་འགན་དབང་ཡོངས་རྫོགས་བོད་རང་སྐྱོང་ལྗོངས་ལ་སྤྲད་དེ། བོད་རང་སྐྱོང་ལྗོངས་ཀྱིས་བཀྲ་ཤིས་ལྷུན་པོ་དགོན་པར་ཚོགས་འདུ་རིམ་པར་འཚོགས་པ་དང་། ཕྱི་ལོ་ ༡༩༩༥ ལོ་སྟོད་ནས་༸པཎ་ཆེན་རིན་པོ་ཆེའི་ཡང་སྲིད་གསེར་བུམ་ལས་ངོས་འཛིན་ཞུས་ཏེ། རྒྱ་ནག་དབུས་གཞུང་ལ་ཆོག་མཆན་སྙན་སེང་ཞུ་དགོས་པའི་བཙན་འདེད་གཏོང་སྐབས།  བྱ་བྲལ་རིན་པོ་ཆེས་“ངས་འདེམས་ཐུབ་པ་མི་འདུག ང་ལ་བྱིས་པ་སུ་ཞིག་ཡང་སྲིད་ཡིན་པ་ངོས་འཛིན་བྱེད་པའི་རྟོག་པ་དང་འཇོན་ཐང་གང་ཡང་མེད། ཁྱེད་ཚོས་ཐེ་ཇུས་གནང་མི་དགོས། ང་རང་ཉིད་ཀྱིས་ཀྲུང་དབྱང་ལ་སྙན་སེང་ཞུ་གི་ཡིན། གལ་སྲིད་ཀྲུང་དབྱང་གིས་ཉེས་ཆད་བཏང་ན་ང་རང་ལ་གཏོང་གི་རེད།” ཅེས་གསུངས་ཏེ་ཞལ་བཞེས་རྩ་བ་ནས་གནང་མི་འདུག

       ཕྱི་ལོ་ ༡༩༩༥ ཟླ་ ༢ ཚེས་ ༦ ཉིན། བྱ་བྲལ་རིན་པོ་ཆེར་༸གོང་ས་མཆོག་གིས་ཕྱི་ལོ་ ༡༩༩༥ ཟླ་ ༡ ཚེས་ ༢༧ ཉིན་གཟན་སྒྲིལ་ལས་༸པཎ་ཆེན་ཡང་སྲིད་དགེ་འདུན་ཆོས་ཀྱི་ཉི་མ་ཐོན་པའི་གསང་འཕྲིན་བསྩལ་བ་ཕྱག་སོན་བྱུང་བས། ཕྱི་ལོ་ ༡༩༩༥ ཟླ་ ༢ ཚེས་ ༡༠ དང་ ༡༡ ཉིན། བྱ་བྲལ་རིན་པོ་ཆེས་བོད་རང་སྐྱོང་ལྗོངས་ཀྱི་འབྲེལ་ཡོད་དབུ་འཁྲིད་ཚོར།  “གཟན་བརྟག་སྒྲིལ་བ་ལས་དགེ་འདུན་ཆོས་ཀྱི་ཉི་མ་མཆོག་༸པཎ་ཆེན་རིན་པོ་ཆེའི་ཡང་སྲིད་འཁྲུལ་བྲལ་རེད་འདུག་པས། གང་མགྱོགས་ཀྲུང་དབྱང་ལ་སྙན་སེང་ཞུ་རོགས།” ཞེས་གསུངས་འདུག མཐར་༸པཎ་ཆེན་རིན་པོ་ཆེའི་ཡང་སྲིད་ངོས་འཛིན་གནང་ཕྱོགས་སྐོར་ལ་བོད་གཞུང་དང་རྒྱ་ནག་གཞུང་བར་ལྟ་སྟངས་མི་མཐུན་པའི་རྩོད་པ་ཤུགས་ཆེན་བྱུང་ཞིང་། ཕྱི་ལོ་ ༡༩༩༥ ཟླ་ ༥ ཚེས་ ༡༥ ཉིན་རྒྱ་གར་ངྷ་རམ་ས་ལ་ནས་༸གོང་ས་མཆོག་གིས་༸པཎ་ཆེན་སྐུ་ཕྲེང་བཅུ་པའི་ཡང་སྲིད་དགེ་འདུན་ཆོས་ཉི་མ་མཆོག་ཡིན་པའི་འཁྲུལ་བྲལ་ངོས་འཛིན་དང་ལུགས་མཐུན་གྱི་བསྒྲགས་ གཏམ་སྤེལ་བའི་ཉིན་གསུམ་གྱི་རྗེས་ཏེ། ཕྱི་ལོ་ ༡༩༩༥ ཟླ་ ༥ ཚེས་ ༡༨ ཉིན། བྱ་བྲལ་རིན་པོ་ཆེ་སྐབས་བརྒྱད་པའི་རྒྱལ་ཡོངས་སྲིད་གྲོས་ཀྱི་ཚོགས་འདུ་ཐེངས་ ༣ པར་འཚོགས་གཞུགས་དང་། རྒྱ་ནག་དབུས་གཞུང་ལ་༸པཎ་ཆེན་རིན་པོ་ཆེའི་ཡང་སྲིད་ངོས་འཛིན་གྱི་མཐའ་མའི་ཐག་གཅོད། ༸གོང་ས་མཆོག་ནས་གནང་དགོས་པའི་དགོངས་སྐོར་ཞུ་གཏུགས་གནང་སྟེ་ཕྱིར་བོད་དུ་ཆིབས་སྒྱུར་གནང་སྐབས། ཁྲིན་ཏུའུ་གནམ་ཐང་ནས་འཛིན་བཟུང་དོ་དམ་བྱས་ཡོད།  

       རྒྱ་ནག་གཞུང་གིས་བྱ་བྲལ་རིན་པོ་ཆེ་ཆ་རྐྱེན་གསུམ་བཏོན་ཡོད་པ་ནི། ༸གོང་ས་མཆོག་གིས་༸པཎ་ཆེན་རིན་པོ་ཆེའི་ཡང་སྲིད་ངོས་འཛིན་གནང་བ་དེ་ཁྲིམས་དང་འགལ་བ། ནུས་པ་མེད་པ། ༸པཎ་ཆེན་ཡང་སྲིད་གསེར་བུམ་ལས་ངོས་འཛིན་ཞུ་རྒྱུ་ཡིན་པའི་དོན་ཚན་གསུམ་གསལ་བསྒྲགས་སྤེལ་དགོས་པའི་བཙན་བཀའ་བཏང་རུང་། བྱ་བྲལ་རིན་པོ་ཆེས་དེ་དག་ཞལ་བཞེས་རྩ་བ་ནས་མ་གནང་བས། ཐོག་མའི་འཆར་འཇམ་བསླུ་བློ་འགུག་གི་སྲིད་ཇུས་ལས། ཁྲིམས་གཅོད་གང་ཡང་གནང་མི་འདུག་མོད། མཐར་བློ་འགུག་མ་ཐུབ་རྐྱེན་༸པཎ་ཆེན་རིན་པོ་ཆེའི་ཡང་སྲིད་ངོས་འཛིན་ཞུ་བའི་དུས་ཚོད་ཕྱིར་འགྱངས་བཏང་བ་དང་། གསེར་འབུམ་ལས་ཡང་སྲིད་ངོས་འཛིན་ཞུ་རྒྱུར་ངོ་རྒོལ་བྱེད་མཁན། ཏཱ་ལ་དང་ལྐོག་ཏུ་གསང་འབྲེལ་གྱིས་རྒྱལ་ཁབ་ཀྱི་གསང་བ་ཕྱི་ལ་བསྐྱལ་བའི་ཉེས་མིང་དོན་ཚན་གསུམ་བཀལ་ཏེ། ལོ་ངོ་དྲུག་རིང་བཙོན་འཇུག་བྱ་རྒྱུའི་བཅད་ཁྲ་བཏང་སོང་། དུས་དེ་ནས་ང་ཚོ་དང་རྦད་དེ་ཞལ་བྲལ་དུ་ཕྱིན་པ་རེད། །

(གོང་གསལ་བྱ་བྲལ་རིན་པོ་ཆེའི་གསུང་བཤད་དེ་དག་ཕྱི་ལོ་ ༡༩༩༣ ལོའི་ཀྲུང་གོའི་བོད་ལྗོངས་འདོན་ཐེངས་བཞི་པ་དང་། དེ་རྗེས་༸པཎ་ཆེན་རིན་པོ་ཆེའི་ཡང་སྲིད་སྐོར་གྱི་རྒྱ་བོད་ཡིག་ཆ་ཁག་ཏུ་གསལ།)