རྒྱ་ནག་གཞུང་གི་གནོན་ཤུགས་ལ་མ་བལྟས་པར་ལྡི་ལིར་འཚོགས་བཞིན་པའི་འཛམ་གླིང་ནང་པའི་ལྷན་ཚོགས་ཐོག་༧གོང་ས་མཆོག་ཆིབས་སྒྱུར་གནང་གཏན་འཁེལ་ཡོད་པ་དེས། རྒྱ་ནག་གཞུང་ལ་ཁོང་ཁྲོ་ཆེན་པོ་བསླངས་ཏེ་ས་མཚམས་སྐོར་གྱི་གྲོས་མོལ་དེ་ཕྱིར་བསྡུ་བྱས་ཡོད་འདུག
ཁ་སང་གཟའ་ཉི་མའི་ཉིན་སྐུ་སྒེར་ཡིག་ཚང་གི་དྲ་རྒྱའི་སྟེང་། རྒྱལ་ས་ལྡི་ལིར་རྟེན་གཞི་བྱས་པའི་ཨ་ཤོ་ཀཱ་ཆོས་ལུགས་ལྷན་ཚོགས་ཀྱིས་སངས་རྒྱས་བཅོམ་ལྡན་འདས་སྐུ་མྱ་ངན་ལས་འདས་ཏེ་ལོ་ ༢༦༠༠ འཁོར་བའི་དུས་སྐབས་དང་བསྟུན་ཏེ། འཛམ་གླིང་ནང་པའི་རྒྱལ་ཁབ་ ༤༢ ལྷག་གི་སྐུ་ཚབ་ ༨༠༠ གདན་ཞུའི་ཐོག ཁ་སང་རེ་གཟའ་ཉི་མ་སྟེ་ཕྱི་ཚེས་ ༢༧ ཉིན་ནས་དབུ་འཛུགས་ཀྱིས་ཕྱི་ཚེས་ ༣༠ བར་གྱི་ཉིན་བཞིའི་རིང་རྒྱལ་ས་ལྡི་ལིར་འཛམ་གླིང་ནང་པའི་ལྷན་ཚོགས་ཀྱི་ཚོགས་འདུ་ཞིག་གོ་སྒྲིག་བྱས་ཡོད་པ་དང་། ཚོགས་འདུའི་མཇུག་བསྡོམས་ཐོག་༸གོང་ས་མཆོག་ཆིབས་བསྒྱུར་གྱིས་ཆོས་ལུགས་དབུ་ཁྲིད་དང་འཐུས་ཚབ། སྐུ་མགྲོན་རྣམ་པར་གསུང་བཤད་གནང་རྒྱུའི་མཛད་འཆར་ཡོད་པའི་གསལ་བསྒྲགས་བྱས་ཡོད་ཀྱང་། གནས་ཚུལ་གསལ་བསྒྲགས་བྱས་མ་ཐག་རྒྱ་ནག་གཞུང་གིས། རྒྱ་གར་གཞུང་ལ་ཐེངས་འདིའི་༸གོང་ས་མཆོག་གི་མཛད་འཆར་ཕྱིར་བསྡུ་བྱ་དགོས་པའི་གནོན་ཤུགས་སྤྲད་ཡོད་པ་མ་ཟད། ཕྱི་ཚེས་ ༢༨ ནས་ ༢༩ བར་གྱི་ཉིན་གཉིས་རིང་རྒྱལ་ས་ལྡི་ལིར་རྒྱ་དཀར་ནག་གཉིས་ཀྱི་གནད་ཡོད་དཔོན་རིགས་ཐུག་འཕྲད་ཐོག་དུས་ཡུན་རིང་པོ་ནས་རྩོད་གཞིར་གྱུར་བའི་རྒྱལ་ཁབ་གཉིས་ཀྱི་ས་མཚམས་རྙོག་གླེང་སྐོར་གྱི་གྲོས་མོལ་ཚོགས་འདུ་སྐོང་ཚོགས་གནང་འཆར་ཡོད་པ་དེ་ཡང་ཕྱིར་འཐེན་བྱས་འདུག
གོང་གསལ་གནས་ཚུལ་སྐོར་ལ་འདི་གའི་གསར་འགོད་པས་སྐུ་སྒེར་ཟུང་དྲུང་བསྟན་འཛིན་སྟག་ལྷ་ལགས་སུ་བཀའ་འདྲི་ཞུས་པར་ཁོང་གིས་གནས་ཚུལ་དེའི་སྐོར་ལ། སྐུ་སྒེར་དྲ་བའི་སྟེང་སྤེལ་ཡོད་པ་དེ་ལས་གཞན་ད་སྔ་ཞུ་རྒྱུ་གང་ཡང་མེད་ཅེས་བརྗོད་བྱུང་།
གནས་ཚུལ་འདིའི་ཐད་ཁ་སང་རྒྱ་གར་ཕྱི་སྲིད་ལྷན་ཁང་གིས་གནད་ཡོད་མི་སྣ་ཞིག་གིས་ཧྥ་རན་སི་གསར་ཁང་ལ། “ ཁ་སང་རྒྱ་ནག་གཞུང་གིས་ཕྱི་ཚེས་ ༢༨ དང་ ༢༩ བཅས་ཉིན་གཉིས་རིང་རྒྱ་ཁབ་གཉིས་ཀྱི་གནད་ཡོད་དཔོན་རིགས་ཐུགས་འཕྲད་ཀྱིས་རྒྱལ་ས་ལྡི་ལི་རུ་རྒྱ་དཀར་ནག་གཉིས་ཀྱི་ས་མཚམས་གནད་དོན་ཐོག་གྲོས་མོལ་གནང་རྒྱུ་ཕྱིར་འཐེན་བྱས་ཡོད་ཚུལ་དང་། དེ་ཡང་རྒྱུ་མཚན་གཙོ་བོ། ༸གོང་ས་ཏཱ་ལའི་བླ་མ་མཆོག་ལྡི་ལིར་ཚོགས་བཞིན་པའི་ནང་པའི་ཆོས་ལུགས་ལྷན་ཚོགས་ཀྱི་མཇུག་བསྡོམས་ཐོག་ཆིབས་བསྒྱུར་གྱིས་གསུང་བཤད་གནང་རྒྱུ་དང་ཚོགས་འདུ་གཉིས་དུས་གཅིག་ཏུ་འཁེལ་ཡོད་སྟབས། ཁོང་གི་མཛད་འཆར་ཕྱིར་བསྡུ་བྱ་དགོས་ཞེས་དགོས་འདུན་བཏོན་ཡོད་པ་དང་། རྒྱ་གར་གཞུང་གིས་རྒྱ་ནག་གི་རེ་འདུན་ཁས་ལེན་མ་བྱས་པའི་དབང་གིས་ས་མཚམས་གནད་དོན་ཐད་ཀྱི་གྲོལ་མོལ་ཚོགས་འདུ་ཕྱིར་འཐེན་བྱས་པ་རེད།” ཅེས་བརྗོད་ཡོད་འདུག་ལ། རྒྱ་གར་དང་རྒྱ་ནག་གཉིས་བར་ས་མཚམས་ཀྱི་གནད་དོན་ཐོག་ཕྱི་ལོ་ ༡༩༦༢ ལོ་ནས་བཟུང་སྔ་ཕྱི་ཐེངས་ ༡༤ ལ་གྲོས་མོལ་བྱས་ཡོད་ཀྱང་། ད་ལྟའི་བར་ཕྱོགས་གཉིས་ཀའི་གྲོས་མོལ་ལ་གྲུབ་འབྲས་གང་ཡང་བྱུང་མེད་པ་རེད།
ཐེངས་འདིའི་རྒྱ་གར་གྱི་ཨ་ཤོ་ཀཱ་ཆོས་ལུགས་ལྷན་ཚོགས་ཀྱི་གོ་སྒྲིག་གནང་བའི་འཛམ་གླིང་ནང་པའི་དབུ་ཁྲིད་ཀྱི་ཚོགས་འདུ་དེ་ཟླ་འདིའི་ཕྱི་ཚེས་ ༢༧ ཉིན་རྒྱ་ས་ལྡི་ལིའི་མགྲོན་ཁང་ཞིག་ཏུ་དབུ་འཛུགས་གནང་ཡོད་ཅིང་། དེའི་སྟེང་རྒྱ་གར་དང་འབར་མ། ཤི་རི་ལིང་ཀཱ མཱ་ལེ་ཤི་ཡཱ། སོག་པོ། ཉི་ཧོང་། ཐེ་ཝན། ལྷོ་ཀོ་རི་ཡ། འབྲུག ལོའོ་སི། ཁཱན་པོ་ཊི་ཡཱ་བཅས་རྒྱལ་ཁབ་ ༤༢ ལྷག་གི་ནང་པའི་ཐེག་པ་ཆེ་ཆུང་གི་ཆོས་ལུགས་དབུ་འཁྲིད་དང་འཐུས་ཚབ། སྐུ་མགྲོན་བཅས་མི་ ༨༠༠ ལྷག་འདུ་འཛོམས་བྱུང་ཡོད་ཅིང་། ཚོགས་འདུ་དབུ་འཛུགས་ཀྱི་ཉིན་དང་པོར་ས་སྐྱ་བདག་ཁྲི་རིན་པོ་ཆེ་དང་ཡོངས་འཛིན་གླིང་རིན་པོ་ཆེ། དགའ་ལྡན་ཁྲི་པ། བཀའ་བློན་ཁྲི་ཟུར་ཟམ་གདོང་རིན་པོ་ཆེ། ཨ་ཀྱཱ་རིན་པོ་ཆེ། ཆོས་རིག་བཀའ་བློན་པདྨ་ཆོས་འབྱོར། ལྡི་ལི་དོན་སྐུ་ཚབ་དོན་གཅོད་བཀའ་ཟུར་བསྟན་པ་ཚེ་རིང་བཅས་ཀྱང་མཉམ་ཞུགས་གནང་ཡོད་པ་མ་ཟད། མཛད་སྒོའི་ཐོག་ས་སྐྱ་བདག་ཁྲི་རིན་པོ་ཆེ་མཆོག་གིས་གསུང་བཤད་ཀྱང་གནང་ཡོད་འདུག་ལ། ཐེངས་འདིའི་ལྷན་ཚོགས་ཐོག་ནང་པའི་ཆོས་ལུགས་དབུ་འཁྲིད་རྣམ་པས། ཆོས་ལུགས་ཕན་ཚུན་གྱི་མཐུན་སྒྲིལ་དང་སྤྱི་ཚོགས་ནང་ཞི་བདེ་དང་འཆམ་མཐུན་བསྐྲུན་ཐབས། འཛམ་གླིང་གི་ཁོར་ཡུག་བདག་གཅེས་གནང་ཕྱོགས། ནང་པ་དང་ནུབ་ཕྱོགས་ཚན་རིག་པའི་བར་བགྲོ་གླེང་ཚོགས་རྒྱུ་སོགས་ཀྱི་ཐད་བགྲོ་གླེང་དང་གྲོས་ཆོད་གཏན་འབེབ་གནང་འཆར་ཡོད་འདུག་ལ། ཚོགས་འདུའི་མཇུག་སྡོམ་ཉིན་ཏེ་ཕྱི་ཚེས་ ༣༠ ཉིན་༸གོང་ས་མཆོག་ཆིབས་སྒྱུར་གྱིས་ལམ་སྟོན་བཀའ་སློབ་གནང་རྒྱུ་ཡིན་འདུག
གསར་འགོད་པ། དོན་གོ
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ཐེངས་མང་ཚོགས་འདུ་ཚོགས་ཀྱང་གྲུབ་འབྲས་གང་ཡང་མ་ཐོན་པ་ནི་རྒྱ་གར་གྱིས་དངོས་ཡོད་མཁྱེན་གྱི་ཡོད་པས། ད་རེང་རྒྱ་གར་ཚོགས་འདུ་ཕྱིར་ཐེན་བྱས་པ་འདི་ལ་རྒྱུ་མཚན་ཕྱོགས་གཅིག་ལ་གོང་ས་ལ་གུས་རྩིས་ཡོད་པ་རེ་བ་དང་གཉིས་ལ་མ་འོངས་ཚོགས་འདུ་ལ་གནོན་ཤུགས་དང་གཏན་གཏན་ཁེས་ཕན་ཡོད་རེད་དྲན་གྱི་འདུག
༧གོང་ས་མཆོག་གིས་ཆོས་ལུགས་ཚང་མའི་དམིགས་ཡུལ་ནི་སེམས་པ་བཟང་པོ་བྱེད་རྒྱུ་དང་། ས་སྟེང་འགྲོ་བ་ཀུན་ལ་བདེ་སྐྱིད་བསྐྲུན་རྒྱུ་འདི་ཡིན་པས། ཆོས་ལུགས་སོ་སོའི་ཐ་སྙད་དང་། ཆོ་ག་ཕྱག་ལེན་ལ་ཁྱད་པར་ཡོད་ཀྱང་། མཐར་ཐུག་གི་དམིགས་ཡུལ་ནི་གཅིག་གྱུར་ཡིན།
རྒྱ་ནག་གིས་༸གོང་ས་མཆོག་གི་མཛད་འཆར་ལ་བཀག་འགོག་འདི་ལྟར་བྱས་པ་དེས་ང་ཚོ་བོད་པ་ཚོ་ལ་བརྡ་ཞིག་གཏོང་གིན་ཡོད། རྒྱ་གཞུང་གིས་༸གོང་ས་མཆོག་ཁ་བྲལ་གྱི་གཙོ་བདག་ཡིན་པར་སྨྲ་བ་དེས་ཀྱང་ང་ཚོར་བརྡ་ག་རེ་གཏོང་གིན་ཡོད་དམ་ཞུ་ན། ༸གོང་ས་མཆོག་ནི་ང་ཚོའི་བོད་ཀྱི་སྲོག་རྩ་ཉག་གཅིག་ཡིན་པ་དེ་ར་སྤྲོད་བྱེད་བཞིན་པ་རེད། ང་ཚོས་བོད་གཞིས་བྱེས་གཉིས་ཀྱིས་རྔ་ལ་བལྟས་ནས་འཆམས་རྒྱག་ཤེས་པ་དགོས་ལ། གསེར་བླུག་རུང་བྱེ་མ་བླུག་རུང་གོ་མེད་ཚོར་མེད་བྱེད་མི་རུང་། དེས་ན་ཟུར་བལྟས་ལེབ་མཐོང་དུ་གྱུར་པ་ནི། ༸གོང་ས་མཆོག་རྒྱལ་ན་བོད་རྒྱལ་ངེས་དང་། ༸གོང་ས་མཆོག་ཕམ་ན་བོད་ཕམ་ངེས་པ་ཡིན་པ་འདི་ཆན་སྲིད་ལ་ཤིན་ཏུ་མཁས་པའི་རྒྱ་གཞུང་གི་དབུ་འཁྲིད་ཚོས་ང་ཚོར་བརྡ་གཏོང་བཞིན་པ་དེ་གསལ་པོར་མཁྱེན་དགོས་སོ།
རྒྱལ་ས་ལྡི་ལིར་རྟེན་གཞི་བྱས་པའི་ཨ་ཤོ་ཀཱ་ཆོས་ལུགས་ལྷན་ཚོགས་ཀྱིས་སངས་རྒྱས་བཅོམ་ལྡན་འདས་སངས་རྒྱས་ཏེ་ལོ་ ༢༦༠༠ འཁོར་བའི་དུས་སྐབས་ལ་རྒྱ་ནག་ནས་ནང་པའི་འཐུས་མི་གཅིག་ཀྱང་གཏོང་མ་ཐུབ་འདིས། ད་ལྟའི་རྒྱ་གཞུང་ནི། ངོ་ཚ་དང་ཁྲེལ་མེད་པ། ཡ་རབས་དང་སྤྱོད་བཟང་མེད་པ། རིག་གཞུང་ངམ་ལེགས་གཞུང་མེད་པའི་ཀླ་ཀློའི་སྤྱི་ཚོགས་གཅིག་གིས་གཞུང་འཛིན་བཞིན་ཡིན་པ་གཞུང་རང་ཉིད་ཀྱིས་འཛམ་གླིང་མི་མངས་ལ་གསལ་སྟོན་བྱས་པ་མ་རེད་དམ། ད་དུང་ད་དུང་་་་་་་་་
འཛམ་གླིང་ནང་པའི་ཆོས་ལུགས་ཀྱི་ཚོགས་ཆེན་འཇུག་བསྡོམས་གསུངས་བཤད་སླད་༸ བོད་ཀྱི་བླ་ན་མེད་པའི་སྤྱི་ནོར་༸ གོང་ས་སྐྱབས་མགོན་ཡིད་བཞིན་ནོར་བུ་ཆེད་དུ་རྒྱ་གར་གྱིས་གདན་ཞུ་གནང་ཐུབ་པ་འདིས་རྒྱ་གར་དམངས་གཙའོི་རྒྱལ་ཁབ་ཀྱི་གཟི་བརྗིད་གཅིག་དང་། ཚོགས་ཆེན་འདི་དོན་སྙིང་ལྡན་པ་ཞིག་ཆགས་ཡོད།
རྒྱ་ནག་གཞུང་གིས་གང་བཤད་ལ་རྟག་པར་ཉན་དགོས་པ་དང་། བརྩི་དགོསཔ། ཆ་འཇོག་བྱེད་དགོས་པ་ཞིག་ཆགས་ཀྱིན་མེད། དེར་བརྟེན་ད་རེས་རྒྱ་གར་ཕྱོགས་ནས་བསམ་གཞིགས་དོན་སྙིང་ལྡན་པ་ཞིག་བཏང་བ་དེ་རྒྱ་གར་རྒྱལ་ཁབ་ཆེན་པོའི་གཟི་བརྗིད་དང་རྒྱ་བོད་གཉིས་ཀྱི་འབྲེལ་ལམ་དེ་མུ་མཐུད་སྔར་ལྟར་མཛའ་གྲོགས་ཡོང་རྒྱུ་ཡིན།
རྒྱ་ནག་གི་བྱེད་སྟངས་དེས་རྒྱ་ནག་ནང་གི་ཆོས་དད་རང་དབང་གི་མདོག་སྟན་པ་རེད. རྒྱ་ནག་གི་འགྲོ་བ་མིའི་ཐོབ་ཐང་ཙམ་གླེང་ཚེ་. ནང་སྲིད་ལ་ཐེ་གཏོག་ཟེར་ནས་སྡུག་ཅག་ཡིན་པར་གཤེ. ད་ཆ་རྒྱལ་ཁབ་གཞན་པའི་ནང་དུ་ཆོས་ལུགས་ཀྱི་ཚོགས་འདུ་འཚོག་པར་སྐྱག་ཇུས་ཐེ་གཏོག་བྱེད་པ་ཅི. སྔོན་ཆད་རྒྱ་ནག་སྲིད་གཞུང་སྨྱོས་མོད. ་དེ་སང་ཡང་སྨྱོ་བཞིན་ཡོད་པ་འདྲ.
སྲིད་མ་གཏོགས་ཆོས་ཕྱོགས་ཀྱི་ཐད་རང་དབང་ཡོད་ཅེས་རྒྱ་གར་གཞུང་གིས་རྒྱ་ནག་གཞུང་ལ་སྔ་ས་ནས་ལན་སྤྲད་ཚར་བ་རེད།
འཛམ་གླིང་ཆོས་ལུགས་ཁག་གི་ཚོགས་འདུར་ཕེབས་པའི་དགེ་འདུན་པ་དག་སྙིང་ཐག་པ་ནས་ཐུགས་རྗེ་ཞུ་རྒྱུ་ཡིན།
ནང་པའི་རྒྱལ་ཁབ་ཞེ་གཉིས་ཀྱི་ནང་པའི་སྐུ་ཚབ་ལྷན་འཛོམས་ཀྱི་ཚོགས་ཆེན་འདི་འདྲ་ནང་པ་ཡོངས་ཀྱི་ཆ་ནས་ཧ་ཅང་གལ་འགངས་ཅན་རེད། དེ་བས་ཐེངས་འདིར་རྒྱ་ནག་གིས་སྐད་ངན་ཤོར་བ་རེད་ལ། དེ་ལ་རྒྱ་གར་གྱིས་སྣང་མེད་བཏང་བ་ཡང་ལོས་ཡིན། བདེན་པ་ཉིད་འདི་ལྟར་རྣམ་པར་རྒྱལ་ངེས་ཡིན།
སངས་རྒྱས་ཆོས་ལུགས་འགྲོ་ཀུན་ལམ་མཆོག་སྟེ།
ཡིད་བཞིན་ནོར་བུ་འགྲོ་བའི་ལམ་མཁན་མཆོག
ནག་ཕྱོགས་དགྲ་སྡེའི་རྒོལ་བ་མ་ལུས་ཀུན།
རྟེན་འབྱུང་བདེན་མཐུས་རྣམ་པར་གནོན་པར་སྨོན།
རྒྱ་གར་གཞུང་གིས་རྒྱ་དམར་གྱིས་དགོས་འདུན་དང་པོ་དེ་ལ་ཉེན་འཇོག་མ་བྱས་ནས་༧སྐྱབས་མགོན་རིན་པོ་ཆེ་ནང་པའི་ཚོགས་ཆེན་སྟེང་ཕེབས་ཐུབ་པ་དེ་ཆེས་དགའ་དགོས་པ་ཞིག་ཡིན་ནའང་། ཐོག་མར་མཛད་སྒོའི་སྟེང་རྒྱ་གར་གྱི་སྲིད་འཛིན་དང་། སྲིད་བློན་ལྷན་རྒྱས་ཕེབས་ཏེ་གསུང་བཤད་གནང་འཆར་ཡིན་ནའང་རྒྱ་དམར་གྱིས་གནོན་ཤུག་འོག་ཕྱིར་འཐེན་བྱས་པ་དེས་རྒྱ་གར་རང་ཉིད་ཀྱི་ལུང་པ་ནས་ཐོན་ཏེ་དར་རྒྱས་བྱུང་བའི་ནང་པའི་ལྟ་གྲུབ་འཛམ་གླིང་རྒྱལ་ཁབ་དང་། མི་མང་ཚོས་ཆེས་བཀུར་བར་འོས་པ་དེ་ལ་མཐོང་ཆུང་ཞིག་བྱེད་པ་མ་ཡིན་ནམ་སོམས་དང་དྲྭ་གྲོགས་ཚོ། ཞིབ་ཕྲ་རྒྱ་གར་གྱི་དུས་བབས་གསར་ཤོག་སྟེང་གཟིགས་རོགས།
རྒྱ་ནག་གཞུང་གི་སྨྱོ་ཧམ་ལ་ཚད་ཅིག་མི་འདུག ནང་པའི་ཚོགས་ཆེན་སྟེང་ནང་པའི་དབུ་ཁྲིད་གདན་ཞུ་མི་ཆོག་ཟེར་ན་སུས་རྣ་བ་ལ་འགྲོ་ཡི་རེད། མ་གཞི་ནས་རྒྱ་དཀར་ནག་གི་ས་མཚམས་ཞེས་པ་ཞིག་མེད་པས་དེའི་དོན་དུ་གྲོས་མོལ་བྱེད་པ་ནི་དོན་མེད་རེད།
རྒྱ་གར་གཞུང་ལ་སྙིང་ཁུང་རུས་པའི་སྟེང་ནས་བཀའ་དྲིན་ཆེ་ཞུ།སློབ་དཔོན་གྱི་བཀའ་དྲིན་དེ་སློབ་མའི་ཤ་དང་རུས་པའི་སྟེང་དུ་འཐིམ་ཡོད།།
འཕགས་ཡུལ་གནས་མཆོག་དམ་པ།།
ཞི་བདེ་གནས་མཆོག་དམ་པ།།
གནས་པའི་ཕ་ཡུལ་གཉིས་པ།།
བདེན་པའི་གཏམ་ཞིག་སྨྲས་སོང་།།
སེམས་པ་སྐྱིད་སྐྱིད་བྱུང་སོང་།།
རྒྱ་གར་གཞུང་གིས་གདོང་ལེན་གནང་སྟངས་འདི་ངོ་མ་དགའ་འོས་པའི་གནས་ཚུལ་བཟང་པོ་ཞིག་ཡིན་པས་བོད་མི་ཚོས་དུས་རྟག་ཏུ་རྒྱ་གར་གཞུང་མང་གཉིས་ཀྱི་བཀའ་དྲིན་བསམ་ཤེས་གནང་རྒྱུ་གལ་གནད་དུ་མཐོང་།
༧ བོད་མི་རིགས་ཀྱི་བླ་སྲོག་སླར་གསོ་མཛད་མཁན་༧མགོན་པོ་གང་ཉིད་ཀྱི་མཛད་འཕྲིན་རྣམས་མུ་མཐུད་དེ་རྒྱས་པའི་སྨོན་འདུན་གྲངས་མེད་ཞུ།
འདི་རྒྱ་གར་གཞིང་གིས་གནང་སྟངས་འགྲིག་བསྡད་འདུག བཀའ་དྲིན་ཆེ་ཞུ་འདོད་བྱུང་།
༧གོང་ས་༧སྐྱབས་མགོན་ཆེན་པོ་མཆོག་གི་མཛད་འཕྲིན་ཉི་ཟླ་བཞིན་འཛམ་གླིང་གི་ཞི་བདེའི་དེད་དཔོན་ཞིག་ཏུ་གྱུར་བཞིན་ཡོད་འདི་རྒྱ་ནག་དམར་གཞུང་མ་དགའ་བས་དབང་གི་རྒྱ་གར་ལ་གནོད་ཤུགས་སྤྲོད་ཀྱི་ཡོད་པ་རེད། རྒྱ་གར་དང་བོད་མི་རིགས་གཉིས་ལ་ལོ་ངོ་སྟོང་ཕྲག་གོང་ནས་འབྲེལ་བ་ཡོད་མཁན་ཞིག་ཡིན་དུས་རྒྱ་ནག་གིས་ཇི་ལྟར་གནོད་ཤུགས་སྤྲད་ཀྱང་དེ་ལ་འགྱུར་བ་གཏོང་མི་སྲིད་པ་ཞིག་རེད། མ་ཟད་༧སྐྱབས་མགོན་ཡི་བཞིན་ནོར་བུ་ཚང་ཁོང་གི་མཛད་པ་འཕྲིན་ལས་ནི་དབྱར་གྱི་ཆུ་བོ་བཞིན་རྒྱས་བཞིན་ཡོད་དུས་དེ་འཛམ་གླིང་གི་དབུ་ཁྲིད་ཡིན་པ་དངོས་ལེན་གནང་བཞིན་ཡོད་པ་འདི་རྒྱ་ནག་དམར་གཞུང་གཅིག་བུ་མ་དགའ་བ་ཡིན་ཡང་ནུས་པ་ཐོན་མི་སྲིད་པ་ཞིག་ཡིན་པ་གསལ་བར་ངེས།
ཉི་མ་རི་རྩེ་ནས་ཤར་ན།།
ཉི་འོད་ས་གཞི་ལ་འཕོས་པ།།
ཆོས་ཉིད་རྣལ་མ་ཞིག་ཡིན་པས།།
སོར་མོའི་འདུ་བྱེད་དེས་མི་ཁོག།