བཙན་བྱོལ་བོད་མིའི་འདས་པའི་ལོ་ངོ་ལྔ་བཅུའི་ཤུལ་ལམ་རིང་མོར་ཕྱིར་མིག་ཅིག་བལྟས་ན་ཐོབ་ཤོར་གྱི་གནས་ཚུལ་མང་དག་ཅིག་བྱུང་ཡོད་ཀྱང་། མི་རབས་རྒན་པ་དག་གི་ངག་ཏུ་ “ འཛམ་གླིང་ནང་སྐྱབས་བཅོལ་བ་མང་པ་ཡོད་ཀྱང་། ང་ཚོ་བོད་མི་སྐྱབས་བཅོལ་བ་ཚོ་འདྲ་འདྲའི་ནང་ནས་མ་འདྲ་བ་ཞིག་ཆགས་ཡོད ” ཅེས་མ་ཎྀ་བཞིན་བགྲང་གི་ཡོད་པ་ལྟར། བཙན་བྱོལ་ནང་དུ་བོད་ཡིག་ལ་བག་ཆགས་འཇོག་སའི་སློབ་གྲྭ་བརྒྱ་ཕྲག་ཅིག་དང་། ནང་བསྟན་བཀའ་པོད་ལྔ་ལ་འཆད་ཉན་བྱེད་སའི་ས་དགེ་བཀའ་རྙིང་བོན་དང་བཅས་པའི་དགོན་སྡེ་བརྒྱ་ཕྲག་འགའ། ངྷ་རམ་ས་ལར་དམངས་གཙོའི་ཕུགས་བསམ་འཆིང་པའི་སྒྲིག་འཛུགས་སོགས་ཁྲ་ལམ་མེར་འོད་ཆིལ་ལེར་ཡོད་པ་འདི་དགའ་འོས་པ་ཞིག་ལོས་ཡིན།
སྤྱི་ཚོགས་དང་མི་རིགས་གང་འདྲ་ཞིག་ཡིན་རུང་དེ་ལ་རང་རྐྱ་ཐུབ་པའི་སྐད་ཡིག་རིག་གཞུང་ཞིག་དང་། དེ་འཛིན་སྐྱོང་སྤེལ་གསུམ་བྱེད་མཁན་གྱི་མི་རིགས་དེའི་སྙིང་ལ་རིགས་ཞེན་གྱི་རུས་པ་མཁྲེགས་པོ་ཞིག་ཡོད་ན། དཀའ་ངལ་དང་གནས་སྟངས་གང་འདྲ་ཞིག་ཏུ་ཚུད་ཀྱང་འཛམ་གླིང་འདིའི་ཐོག་ནས་རྨེག་མེད་དུ་མི་འགྲོ་བའི་ཆ་རྐྱེན་ཚང་ཡོད་ལ། གོ་སྐབས་དང་རྒྱུ་རྐྱེན་འཕྲད་ན་འཛམ་གླིང་གི་སྔོན་ཐོན་མི་རིགས་གྲས་སུ་ཚུད་ཐུབ་པའི་རེ་བ་ཡང་ཡོད་སྲིད་པ། ལོ་ངོ་བརྒྱ་ཕྲག་རིང་མི་རིགས་དང་རྒྱལ་ཁབ་གཞན་པའི་བཙན་གནོན་དང་བརྙས་བཅོས་མྱངས་མཐར་རྒྱལ་ཁབ་བསྐྱར་འཛུགས་བྱས་ཟིན་པའི་མི་རིགས་དེ་ཚོའི་ལོ་རྒྱུས་ཀྱི་བསླབ་བྱ་ལས་རྟོགས་ཐུབ།
བོད་ནང་དུ་འདས་པའི་ལོ་ངོ་དྲུག་ཅུར་ཉེ་བའི་རིང་རྒྱ་གཞུང་གིས་རིག་གནས་གསར་བརྗེ་དང་རྒྱལ་གཅེས་ཆོས་གཅེས་སོགས་ཞི་དྲག་དང་མངོན་ལྐོག་གཉིས་ཐོག་ནས་བོད་པའི་སྐད་ཡིག་རིག་གཞུང་གཏོར་བཅོམ་བཏང་ཞིང་། བོད་པའི་བླ་སྤྲུལ་དགེ་བཤེས་དང་ལས་བྱེད་སློབ་ཕྲུག་མང་དག་ཅིག་བཙོན་ལ་བཅུག དུག་གིས་བཀྲོངས། མེ་མདས་བསད་པ་སོགས་ཉི་མ་དེ་རིང་ལ་ཐུག་གི་བར་དུ་སྲིད་བྱུས་གཏིང་ནག་དེ་མཚམས་མ་བཞག་བར་མ་ཆད་པར་སྤེལ་ཡོད་ཀྱང་། ཅི་ཙམ་མནན་ན་དེ་ཙམ་འཕར་བ་ཆོས་ཉིད་ལྟར། གཏོར་བཤིག་དང་གསར་བསྐྲུན་གྱི་འཐབ་རྩོད་བར་ནས། བོད་སྐད་བོད་ཡིག་གི་གྲ་མ་ཉམ་གྲུ་མ་ཞིག་པར་གནས་ཡོད་ལ། ལྟོས་ས་ལྟོས་འཇོག་གིས་འཕེལ་རྒྱས་ཀྱང་ཆེན་པོ་ཕྱིན་ཡོད།
༸གོང་ས་མཆོག་གིས་ཉིས་སྟོང་བརྒྱད་ལོར་ངྷ་སྟེང་བོད་ཕྲུག་ཁྱིམ་སྡེའི་མཛད་སྒོའི་ཐོག ང་ཚོ་བཙན་བྱོལ་དུ་ཐོག་མ་འབྱོར་བ་ནས་བཟུང་ཤེས་ཡོན་ཐོག་ཤུགས་བརྒྱབ་ཡོད་ལ། རྒྱ་གར་གཞུང་གིས་ཀྱང་དེ་མཚུངས་ཀྱིས་རྒྱབ་རོགས་བྱས་པ་རེད། ལོ་ངོ་སུམ་བཅུའི་རིང་ང་ཚོས་ཤེས་ཡོན་ཐོག་ཏན་ཏན་འཐུས་ཤོར་ཆེན་པོ་བཏང་འདུག་ཅེས་ཐུགས་ཕམ་མཛད་ཡོད་ལ། བཀའ་ཤག་སྐབས་བཅུ་གཉིས་དང་བཅུ་གསུམ་པས་ཀྱང་གསར་གཏོད་ཀྱི་ལས་གཞི་མང་པོ་ཞིག་བརྩམས་ཡོད་པ་ལས་ཤེས་ཡོན་སྲིད་བྱུས་གསར་པའི་ཐོག་ནུས་ཤུགས་གཅིག་ཏུ་བསྒྲིལ་ཏེ་རེ་བ་བཟང་ས་དང་གྲ་སྒྲིག་སྡུག་ས་ནས་གནང་ཡོད།
ད་ཆར་བཀའ་ཤག་སྐབས་བཅུ་བཞི་བས་ལྷན་ཁང་བདུན་ལས་ཤེས་རིག་ལས་ཁུངས་གལ་ཆེན་དུ་བརྩིས་ཤིང་། ལས་དོན་ཁག་ལས་ཤེས་ཡོན་ལས་དོན་འགངས་ཆེན་དུ་བཞག་སྟེ། བཀའ་བློན་ཁྲི་པ་རང་ཉིད་ཀྱིས་ཤེས་རིག་བཀའ་བློན་གྱི་ཐུགས་འགན་བཞེས་ཡོད་ལ། རིགས་གཅིག་རྐང་འཛིན་དང་ཆེད་མཁས་པ་ཁྲི་དང་འབུམ་གྱི་བཀའ་མོལ་གནང་གི་ཡོད་ཀྱང་། དེ་དག་ཁྲོད་བོད་སྐད་བོད་ཡིག་ཐོག་ཆེད་མཁས་པ་ག་ཚོད་གསོ་སྐྱོང་བྱ་འཆར་ཡོད་མེད་ཤིན་ཏུ་ནས་ལྐོག་གྱུར་རེད་ལ། བཀའ་ཤག་གསར་པའི་ལས་དོན་མགོ་འཛུགས་གནང་རྗེས། གངས་ཅན་སྐྱིད་གཤོང་གི་ཡིག་འབྲེལ་དང་གནས་འཕྲིན་ཁག་ཏུ་བོད་ཡིག་བོར་གྱིན་པ་འདིས་སླར་ཡང་བཙན་བྱོལ་སྤྱི་ཚོགས་ཁྲོད། བོད་ཡིག་བོད་སྐད་ཀྱི་མདུན་ལམ་ལ་བློ་འཚབ་དང་དོགས་པ་ཟ་དགོས་པ་ཞིག་ཆགས་ཡོད།
