བོད་མི་ ༡༠ ལྷག་འཛིན་བཟུང་།

ཉེ་བའི་ལོ་གཅིག་རིང་ནས་བཟུང་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་དར་མདོ་རྫོང་མི་ཉག་ར་རྔ་ཁ་གྲོང་རྡལ་གྱི་འབྲོག་ཁྱིམ་ཁག་ཅིག་ཏུ། སྔ་ཕྱི་འབྲོག་པའི་ཁྱིམ་ཚང་ཁག་གི་འབྲི་གཡག་མང་པོ་ཞིག་བོར་བརླག་ཏུ་ཕྱིན་པའི་གནས་ཚུལ་བསྟུད་མར་བྱུང་ཡོད་པ་དང་། ཉེ་ཆར་ཕྱུགས་བདག་ཚོས་དུས་ཡུན་གང་འཚམ་རིང་བཙལ་རྗེས། ཟླ་འདིའི་ཕྱི་ཚེས་ ༢༩ ཉིན་འབྲི་གཡག་རྣམས་ལོ་སྔོན་མར་རྒྱ་མི་ཞིག་གིས་གྲོང་རྡལ་དུ་བཤས་རྭ་ཆེན་པོ་ཞིག་གཉེར་ཡོད་པའི་ནང་རྙེད་སོན་བྱུང་འདུག   ཕྱིས་སུ་བཤས་རྭའི་བདག་པོ་དང་ཕྱུགས་བདག་ཚོའི་བར་འཁྲུག་རྩོད་ཤོར་སྟབས། བཤས་རྭའི་བདག་པོས་ཉེན་རྟོག་པ་སྐད་བཏང་སྟེ་ཉིན་དེར་བོད་མི་ ༡༠ ལྷག་འཛིན་བཟུང་བྱས་ཡོད་སྐོར་མིང་བརྗོད་འདོད་མེད་པའི་བོད་མི་ཞིག་གིས་གསར་ལམ་དུ་གནས་ཚུལ་མཁོ་སྤྲོད་བྱས་འདུག  

ཡང་གནས་ཚུལ་མཁོ་སྤྲོད་པས་བརྗོད་པ་ལྟར་ན། འདི་ལོ་སྔ་ཕྱི་འབྲི་གཡག་མང་པོ་བོར་བརླག་གི་གནས་ཚུལ་བྱུང་རྗེས་ས་གནས་བོད་མི་ཚོས་མཚན་མོར་ས་གནས་ཁག་བགོས་ཀྱིས་མྱུལ་ཞིབ་བརྒྱུད། རྒྱ་མི་ཞིག་གིས་འབྲི་གཡག་རླངས་འཁོར་ནས་བཅུག་ཏེ་བཤས་རྭར་རྐུ་འཁྱེར་བྱེད་བཞིན་པ་དངོས་སུ་མཐོང་བ་དང་། བོད་མི་ཚོས་རྗེས་འདེད་བྱས་པ་བརྒྱུད་བསད་ཚར་བའི་འབྲི་གཡག་རྣམས་ཀྱི་མགོ་རྙེད་པ་སོགས་ལས་བདེན་དཔང་གསལ་བོ་རྙེད་ཡོད་འདུག ཡིན་ནའང་། བཤས་རྭའི་བདག་པོས་ཉེན་རྟོག་པ་སྐད་བཏང་བ་ལྟར། ཉེན་རྟོག་པ་བཤས་རྭར་ཡོང་སྐབས་བོད་མི་ཚོས་བཤས་རྭ་སྒོ་རྒྱག་དགོས་པའི་དགོས་འདུན་བཏོན་ཡོད་ཀྱང་། ཉེན་རྟོག་པས་གནས་ཚུལ་ཅི་ཡིན་བརྟག་དཔྱད་ཅི་ཡང་མེད་པར་བོད་མི་ཞིག་ལ་འགྲམ་ལྕག་གཞུས་སྟབས། བོད་མི་དང་ཉེན་རྟོག་པའི་བར་འཁྲུག་འཛིང་ཤོར་ཏེ་ཉེན་རྟོག་པ་ཁག་ཅིག་ལ་རྨས་སྐྱོན་བཟོས་ཡོད་པ་མ་ཟད། མི་མང་གིས་ཉེན་རྟོག་པས་རླངས་འཁོར་བཅག་པ་དང་མེ་མདའ་ཕྲོགས་ཏེ་གད་སྙིག་ཏུ་གཡུག་པའི་གནས་ཚུལ་བྱུང་ཡོད་འདུག་ལ།   ཕྱི་ཚེས་ ༣༠ ཉིན་མུ་མཐུད་གནས་ཚུལ་ཛ་དྲག་ཏུ་ཕྱིན་སྟབས། དར་མདོ་རྫོང་ནས་དམག་མི་མང་པོ་ཡོང་སྟེ་ས་གནས་བོད་མི་ ༡༠ ལྷག་འཛིན་བཟུང་དང་དམ་དྲག་བྱེད་ཀྱི་ཡོད་འདུག