བོད་རྒྱའི་རོལ་མོའི་འདུ་འཛོམས།

དོ་ནུབ་ཨ་རིའི་ཨེ་མོ་རེ་གཙུག་ལག་སློབ་གྲྭར་བོད་རྒྱའི་རོལ་མོའི་འདུ་འཛོམས་ཤིག་ཚོགས་ཏེ། བོད་ཀྱི་གཞས་པ་བཀྲས་ཆུང་ལགས་དང་རྒྱའི་རོལ་མོ་བ་གྲགས་ཆེན་ཝང་ལགས་གཉིས་མཉམ་ཞུགས་བྱས་ཡོད།

ཨ་རིའི་ནང་གི་དེ་རིང་ཕྱི་དྲོའི་ཆུ་ཚོད་ ༧ དང་སྐར་མ་ ༣༠ ཐོག་ཨེ་མོ་རི་གཙུག་ལག་སློབ་གཉེར་ཁང་དུ་བོད་རྒྱ་མཉམ་འཛོམས་ཀྱི་རོལ་མོའི་འདུ་འཛོམས་ཤིག་ཚོགས་ཡོད་པ་དང་།  ལྟད་མོ་བ་བརྒྱ་ཕྲག་ཁ་ཤས་འདུ་འཛོམས་ཀྱིས་བོད་ཀྱི་རྒྱལ་གཅེས་དཔའ་བོ་དཔའ་མོ་སྤྱི་དང་། ཁྱད་པར་དུ་བོད་ཕྱི་ནང་གཉིས་སུ་བསྟན་སྲིད་མི་རིགས་སླད་རང་ལུས་མེ་ལ་སྒྲོན་མཁན་འདས་གསོན་དག་ལ་གདུང་སེམས་མཉམ་སྐྱེད་དང་མྱ་ངན་གུས་འདུད་ཞུས་སོང་།

ཨ་རིར་བརྟན་གཞི་བྱས་པའི་(Shelley and Donald Rubin)ཞེས་པའི་ཐེབས་རྩ་ཚོགས་པས་སྦྱིན་བདག་བྱས་ཤིང་། ཨེ་མོ་རི་གཙུག་ལག་སློབ་གཉེར་ཁང་གི་ཆོས་ལུགས་སྡེ་ཚན་གྱི་སློབ་དཔོན་ཆེན་མོ་ཏཱ་ར་ཌོཡེལ་(Dr. Tara Doyle)དང་། སེ་རཱ་མཱེཁི་ལེན་ཊོཀ་(Dr. Sarah Mclintock)གཉིས་ཀྱི་གོ་སྒྲིག་འོག  ཁཱར་ལོསི་འགྲེམ་སྟོན་ཁང་དུ་བཙན་བྱོལ་དུ་འཚར་ལོངས་བྱུང་ཞིང་ཨ་རིར་གནས་བཞུགས་བོད་ཀྱི་གཞས་པ་གྲགས་ཅན་བཀྲས་ཆུང་ལགས་ཀྱི་རོལ་མོའི་འདུ་འཛོམས་ཤིག་སྐོང་ཚོགས་གནང་ཡོད་པ་དང་།  ཁོང་དང་མཉམ་དུ་རྒྱ་རིགས་རོལ་མོ་བ་གྲགས་ཅན་ཝང་(Guang Wang)ལགས་མཉམ་ཞུགས་བྱས་ཡོད་པ་རེད།

རོལ་མོའི་འདུ་འཛོམས་ཐོག་སྐུ་ཞབས་བཀྲས་ཆུང་གིས་རང་ལུས་མེ་ལ་བསྒྲོན་པའི་རྒྱལ་གཅེས་དཔའ་བོ་དཔའ་མོ་བཅུ་གསུམ་པོར་རྗེས་དྲན་གྱི་མཆོད་མེ་སྒྲོན་པ་དང་། རྩོམ་པ་པོ་ཆབ་བྲག་ལྷ་མོ་སྐྱབས་ཀྱིས་ཚིག་བརྩམས་པའི་གཞས་ཤིག་ཀྱང་ལྟད་མོ་བ་དག་ལ་སྙན་སྒྲོན་ཞུས་རྗེས། སློབ་དཔོན་ཏཱ་ར་ལགས་ཀྱིས་འཛམ་གླིང་ཁྱོན་དུ་གནས་པའི་བོད་རིགས་ཚོས་གདུང་སེམས་མཉམ་སྐྱེད་ཀྱི་རྣམ་པ་མཚོན་ཆེད་རང་རང་གི་ངོ་དེབ་ཀྱི་པར་རིས་ཚབ་ཏུ་མཆོད་མེའི་པར་རེ་འཇོག་གི་ཡོད་པ་ལྟར་ལས་འགུལ་དེར་མཉམ་ཞུགས་གནང་དགོས་པའི་འབོད་སྐུལ་ཞུས་སོང་ལ། ཐེངས་འདིར་བོད་ཀྱི་གཞས་པ་བཀྲས་ཆུང་དང་རྒྱ་རིགས་རོལ་མོ་བ་སྐུ་ཞབས་ཝང་གཉིས་མཉམ་རུབ་ཐོག་རོལ་མོའི་འདུ་འཛོམས་འདི་འདྲ་ཞིག་ཚོགས་གནང་ཐུབ་པ་འདིས། མི་རིགས་འདི་གཉིས་བར་མཐུན་ལམ་དང་མ་འོངས་པར་མདུན་སྐྱོད་ཐོག་སྐུལ་འདེད་ཅིག་ཡིན་ཚུལ་བཅས་བརྗོད་བྱུང་།  

 བཀྲས་ཆུང་ལགས་ད་ཆ་ཨེ་མོ་རི་གཙུག་ལག་སློབ་གཉེར་ཁང་དུ་བོད་ཀྱི་རོལ་མོ་སློབ་ཀྱིན་ཡོད་པ་དང་། རྒྱ་རིགས་རོལ་མོ་བ་གྲགས་ཅན་ཝང་ལགས་ཀྱང་སློབ་གཉེར་ཁང་འདིར་རོལ་མོ་ཁྲིད་ནས་ད་བར་ལོ་ངོ་དྲུག་ཙམ་ཕྱིན་ཡོད་འདུག གསར་འགོད་པས་རོལ་མོ་བ་གྲགས་ཅན་སྐུ་ཞབས་ཝང་ལ་ཐེངས་འདིར་བོད་མི་དང་མཉམ་དུ་རོལ་མོ་འདུ་འཛོམས་འདིར་ཞུགས་པའི་མྱོང་ཚོར་དྲིས་དུས། ཁོང་གིས་ “ང་རང་རྒྱ་ནག་ཏུ་སྐྱེས་ཤིང་། དམར་པོའི་སློབ་གསོའི་ལམ་ལུགས་འོག་ཏུ་འཚར་ལོངས་བྱུང་པ་ཞིག་ཡིན་རུང་། རྩ་བའི་ཆ་ནས་ང་རང་སྒྱུ་རྩལ་པ་ཞིག་ཡིན། ཆབ་སྲིད་ཀྱི་ཐད་ནས་ང་ལ་འཆར་སྒོ་ཅི་ཡང་མེད། ང་རང་ཨ་རིར་འབྱོར་ནས་ད་བར་དུ་ལོ་ངོ་བཅུ་དྲུག་ལྷག་འགོར་འདུག་པས།  ངས་བོད་མིའི་སྐྱིད་སྡུག་ཤེས་ཀྱི་ཡོད་སྟབས། དེ་རིང་འདིར་མཉམ་ཞུགས་བྱས་པ་ཡིན། གང་ཡིན་ཟེར་ན། རོལ་དབྱངས་ཟེར་བ་འདི་ང་ལ་མཚོན་ན་རྒྱལ་སྤྱིའི་རང་བཞིན་གྱི་སྐད་ཡིག་ཅིག་རེད། མི་དང་མིའི་སེམས་པ་མཐུད་བྱེད་ཅིག་རེད། ” ཟེར།

ཨེ་མོ་རི་གཙུག་ལག་སློབ་གཉེར་ཁང་ནི་ལོ་ངོ་ ༡༧༥ གོང་དུ་ཡི་ཤུའི་ཆོས་ལུགས་པའི་སྡེ་ཞིག་གིས་བཙུགས་ཤིང་ད་ལྟ་ལོ་ན་༡༧༥ ཟིན་ཡོད་པ་དང་།  སྤྱི་ལོ་ ༢༠༠༧ ལོར་ཇི་ལྟར་གསོལ་བ་བཏབ་པ་ལྟར་༧གོང་ས་མཆོག་གིས་སློབ་གཉེར་ཁང་འདིའི་ཁྱད་འཕགས་གཙུག་ལག་སློབ་དཔོན་ཆེན་མོའི་མཚན་གནས་བཞེས་ཡོད་པ་རེད།

ས་གནས་གསར་འགོད་པ། སངས་རྒྱས་བཀྲ་ཤིས།