འོད་ཟེར་གྱིས་བརྩམས། ནགས་ཤོད་སད་མིས་བསྒྱུར།
ཧྥ་རན་སིའི་གསར་འགོད་པ་ཞིག་གིས་འཇམ་པོའི་ངང་ང་ལ་བཤད་དོན། ༼ བོད་མིས་རང་ལུས་མེར་བསྲེགས་པས་དོན་གོ་ཆོད་ཀྱི་མ་རེད། ཁྱོད་ཀྱིས་འདི་དོན་ག་རེ་བསམ་གྱི་ཡོད། ༽ ཟེར་དུས། ངའི་རུས་པའིགཏིང་ནས་ཟུག་བརྒྱབ་ནའང་། ཨུ་ཚུགས་བརྒྱབ་ནས་མིག་ཆུ་བཀག་སྟེ། ༼ ཕལ་ཆེར་དོན་གོ་མེད་པ་འདྲ། རེད་དེ་མི་ལ་ལ་རྒྱ་དང་དམ་ཚིག་ཡོད་དུས། རང་ལུས་མེར་བསྲེགས་པའི་བོད་མི་ཚོར་དགོས་པ་ནི་མི་རིགས་ཤིག་གི་ལ་རྒྱ་དང་དམ་ཚིག་རེད་ཅེས་བརྗོད། དང་ཐོག་སྨྱན་སྦྱོར་གསར་འགོད་པས་ང་ལ་སྐད་ཆ་འདྲི་སྐབས། ངའི་རྣམ་འགྱུར་ལ་ཚོད་འཛིན་བྱ་མ་ཐུབ། དེ་ཡང་ཡིན་འོས་ཏེ། གསར་འགོད་པ་ཞིག་ཡིན་དུས་འདི་ལྟར་རྒྱུ་མ་ཕུ་འདེད་བྱ་སྲིད་དང་སྲིད། ཡིན་ནའང་། གསར་འགོད་པ་ཞིག་གིས་ཀྱང་ཕྱི་ལོ་ ༡༩༦༣ ལོར་ཝེ་ཐེ་ནམ་ལྷོ་ཕྱོགས་ཤིས་ཀུང་དུ་ནང་པའི་བླ་ཆེན་ཞིག་གིས་ནང་ཆོས་དང་མི་དམངས་ཀྱི་ཁེ་དབང་སྲུང་སྐྱོབ་སླད་རང་ལུས་མེར་བསྲེགས་པ་དང་། དེའི་གཞུག་ནས་དགེ་འདུན་པ་མང་དག་ཅིག་གིས་ཀྱང་རང་ལུས་མེར་བསྲེགས་པའི་གནས་ཚུལ་ཡང་ཤེས་ཀྱི་མེད་དུས། དེ་རིང་བོད་ཀྱི་གྲྭ་བཙུན་ ༡༢ ཙམ་གྱིས་རང་ལུས་མེར་བསྲེགས་པ་དེར་ཁྱོན་ཡོངས་ཀྱི་རྒྱལ་སྤྱིའི་སྤྱི་ཚོགས་སམ་ཡང་ན། མི་དམངས་ནས་འདི་དོན་རྟོགས་པར་ང་ཚོས་ཇི་ལྟར་བྱས་ནས་རེ་བ་རྒྱག་དགོས་སམ། མ་ཟད། འདི་ལྟ་བུའི་རྒྱ་ཁྱབ་ཀྱི་གོ་མེད་ཚོར་མེད་འདིས། དངོས་གནས་མི་སེམས་བདེ་རུ་འབབ་ཐབས་བྲལ།
དོན་དངོས་ཐོག འདས་ཟིན་པའི་ལོ་རྒྱུས་ནང་དུ། ནང་པའམ་ཡང་ན་ཆོས་ལུགས་གཞན་པའི་རྗེས་འབྲང་པ་སུ་འདྲ་ཞིག་ཡིན་ཡང་རུང་སྟེ། བྱུར་དང་ཆག་སྒོ་མགོར་ལྷུང་བ་དེའི་ཚེ། ག་དུས་ཡིན་ནའང་མི་ལ་ལས་ཆོས་ལུགས་ཀྱི་སླད་དུ་རང་ཉིད་བློས་བཏང་སྟེ་འོང་། ད་ལྟའི་རྒྱ་ནག་འདི་ཚང་ཡང་རྣམ་པ་དེ་ལས་མ་འདས་ཏེ། དེ་སྔོན་ལྕགས་ཕག་གསར་བརྗེ་སྐབས་སུ་མན་ཇུའི་དམག་གིས་ཝུ་ཧན་ས་ཁུལ་ཀེ་ཡུང་དགོན་གཏོར་བར་བརྩམས་པ་ན། དགོན་པ་འདིའི་གྲྭ་པ་ཞིག་གིས་རང་ལུས་མེར་བསྲེགས་ཏེ་ངོ་རྒོལ་བྱས་པ་རེད། ཡང་རིག་གནས་གསར་བརྗེའི་དུས་མགོའི་སྐབས་སུ། ཤིས་ཨན་ཧྥ་མན་དགོན་པའི་དགེ་འདུན་པ་ཞིག་གིས་དམར་སྲུང་དམག་འགོག་རྒོལ་ཆེད་རང་ལུས་མེར་བསྲེགས་ཏེ་མཆོད་རྟེན་སྲུང་སྐྱོབ་བྱས་ཡོད།
གསར་འགོད་པས་ད་དུང་སྐད་ཆ་འདི་འདྲ་ཞིག་དྲིས་པ་སྟེ། ཅིའི་ཕྱིར་རང་ལུས་མེར་བསྲེགས་མཁན་བོད་མི་ཚོ་འདི་འདྲའི་ལོ་ན་གཞོན་པ་རྐྱང་རྐྱང་རེད་ཟེར། གསར་འགོད་པའི་དྲི་བ་འདི་ནི་མི་མང་པོ་ཞིག་གི་དོགས་འདྲི་ཡིན་པ་ངས་ཤེས་མོད། ངས་ད་དུང་བཤད་འདོད་པ་ནི། ག་རེ། ལོ་ཆུང་ཡིན་ན་ཧོད་རྒྱུག་དང་ལོང་མཆོངས་ཡིན་པ་མཚོན་པ་རེད་དམ། ད་དུང་བཤད་ན། ཧྥ་རན་སིའི་ལོ་རྒྱུས་ཐོག་གི་ལྷ་མོ་ཀྲིང་ཏེ་ཡང་ཧ་ཅང་ལོ་ཆུང་ཞིག་མ་རེད་དམ། ཞིང་པའི་གཞོན་ནུ་མ་དེས་ཧྥ་རན་སིའི་དམག་མི་ཁྲིད་དེ་དབྱིན་དམག་གི་བཙན་འཛུལ་ལ་འགོག་རྒོལ་བྱས་རྗེས། མཐའ་མ་དབྱིན་དམག་གིས་ཀྲིང་ཏེ་མེ་ཁྲིམས་བཅད་ནས་བཀྲོངས་པ་རེད། དུས་དེར་མོ་རང་དགུང་ལོ་ ༡༩ ལས་མེད་པ་རེད། ཡིན་ནའང་ཀྲིང་ཏེ་ཧྥ་རན་སིའི་མི་རྣམས་ཀྱི་སེམས་པའི་དབུས་སུ་ཇི་སྲིད་བར་ནུབ་པ་མེད་པའི་ ༼ རང་དབང་ལྷ་མོ ༽ རུ་གྱུར་པ་རེད།
མི་ཁ་ཤས་ཀྱིས་ཋེ་ཝུ་ཋེ་རུ་བཤད་དོན། ཨེ་ཇེབ་ཀྱི་སྲིད་དབང་སྒེར་སྡེམ་པ་མན་པཱ་ལ་ཁི་སྲིད་སྟེགས་ནས་ལྷུང་སྐབས། གསར་འགྱུར་མང་པོ་ཞིག་གི་ནང་ནས་ཆེས་སེམས་འགུལ་ཐེབས་ཤོས་ཞིག་ནི། ལོ་ན་ལྔ་བཅུ་དྲུག་ཅུ་ཁ་སྐོར་ཡིན་པའི་པཱ་ལགས་ཞིག་གི་སྐད་ཆ་དེ་རེད། ཁོས་གསུངས་དོན། ངའི་མི་ཐོག་འདིས་དམངས་གཙོ་ཟེར་བ་བསམ་ཕོད་ཀྱི་མེད་ལ་དེའི་ཆེད་དུ་ཅི་ཡང་བྱ་ཕོད་ཀྱི་མེད་དུས། ཚེ་འདིར་དམངས་གཙོ་ཟེར་བ་མཐོང་གི་མ་རེད་བསམས་ཡོད། ཡིན་ནའང་། ཕྲུ་གུ་ཚོས་འདི་ལྟར་དམངས་གཙོ་མདུན་དུ་བསུས་པ་རེད། ཕྲུ་གུ་འདི་ཚོས་ང་ལ་རེ་བ་དང་ཕུགས་བསམ་སྦྱིན་འོང་དུས། ང་ཡང་གཅིག་གསོན་ན་འདོད་བྱུང་ཟེར།
རྒྱ་ནག་ཏུ་ད་དུང་ཡང་དམངས་གཙོ་མེད་པས། བཙན་གནོན་ཕོག་པའི་བོད་མི་ཚོས་རབ་ཏུ་འབར་བའི་མེ་ལྕེའི་ཁྲོད་ནས ༼ བོད་ལ་རང་དབང་དགོས ༽ ༼ རྒྱལ་བ་རིན་པོ་ཆེ་བོད་ལ་གདན་འདྲེན་དགོས ༽ ཟེར་བ་སོགས་འབོད་ཀྱིན་ཡོད།
མི་མི་ཉུང་བ་ཞིག་གིས་བོད་མིའི་རང་ལུས་མེར་བསྲེགས་འདི་རང་ཤི་བརྒྱབ་པར་ངོས་འཛིན་བཞིན་འདུག འདི་ནི་རྦད་དེ་དམའ་འབེབས་ཀྱི་ལྟ་ཚུལ་ཞིག་རེད། ཆོས་ཉམས་སུ་བླངས་ཤིང་འབྲས་རྟགས་ཐོན་པའི་དགེ་བཤེས་བྱམས་པ་རྒྱ་མཚོ་ལགས་ཀྱིས་ཁ་གསལ་གཏིང་གསལ་ངང་གསུངས་དོན། བོད་མི་སྐྱ་སེར་ཚོས་རང་ལུས་མེར་བསྲེགས་པ་འདི་ནི། ནང་པའི་སྲོག་གཅོད་ཀྱི་བསླབ་བྱ་དང་གཏན་ནས་འགལ་མེད་ལ། ནང་ཆོས་ཀྱི་ལྟ་གྲུབ་ལ་ཡང་འགལ་མེད། དམ་སྡོམ་ལ་དེ་བས་ཀྱང་འགལ་མེད། གང་ཞེ་ན། བོད་མི་སྐྱ་སེར་འདི་ཚོས་རང་ལུས་མེར་བསྲེགས་པའི་དམིགས་འདུན་ནི་ནང་ཆོས་སྲུང་སྐྱོབ་དང་། བོད་མི་རིགས་ཀྱི་རང་དབང་དམངས་གཙོ། ཁེ་དབང་སོགས་ཀྱི་ཆེད་དུ་ཡིན་དུས། སྒེར་སོ་སོའི་ཁེ་ཕན་རེ་དམིགས་བཅས་ཀྱི་དྲི་མ་ཙམ་ཡང་མེད། ཚད་ངེས་ཅན་གྱི་ཐོག་ནས་བཤད་ན། གཞན་དོན་དུ་རང་ཉིད་བློས་བཏང་བའི་རྒྱལ་སྲས་སྤྱོད་པ་རེད།
ངས་ངེས་པར་དུ། རེད། ངེས་པར་དུ ༼ དྲུག་བཞིའི ༽ སྐབས་སློབ་ཕྲུག་ཚོའི་དབུ་ཁྲིད་ཨུ་འར་ཁེ་ཤིས་ལུང་འདྲེན་བྱེད་འདོད། བཙུན་མ་དཔལ་ལྡན་ཆོས་མཚོ་ལགས་རང་ལུས་མེར་བསྲེགས་ཀྱི་བརྙན་པར་འཛམ་གླིང་མིག་མདུན་དུ་བསྟར་བའི་དགོང་མོ་དེར། ངས་ཋེ་ཝུ་ཋེ་ནས་སྐད་ཆ་འདི་ཚོ་ལན་མང་བཤད་པ་སྟེ།
རང་ལུས་མེར་བསྲེགས་པའི་བོད་ཀྱི་གྲྭ་བཙུན་བཅུ་གཉིས་ལ་གདོང་གཏོད་པའི་སླད་དུ། ཁྱེད་ཀྱི་ལག་ཟུང་ཐལ་མོ་སྦྱོར་རོགས། བཀུར་སྟི་བྱ་རོགས། རང་སྐྱོན་རང་བརྟག་བྱ་རོགས། མི་ཆོས་ཀྱི་བསམ་བློ་ཡང་གཅིག་གསོས་ཤོག འདི་ནི་ང་ཚོས་གློག་ཀླད་འཆར་ངོས་མདུན་ནས་བྱེད་ཐུབ་པའི་རྣམ་འགྱུར་ཆུང་ཆུང་ཞིག་རེད། འདི་ལྟར་བྱས་པས། དཀའ་སྡུག་ངང་གཤེགས་སོང་བའི་རྣམ་ཤེས་འདི་ཚོར་གཏད་པའི་རྣམ་འགྱུར་བཟང་ཤོས་དེ་རེད།
བོད་ཀྱི་གྲྭ་བཙུན་ཚོའི་རང་ལུས་མེར་བསྲེགས་དོན་རྐྱེན་འདིས། མི་གང་མང་མང་ཞིག་ཧོན་འཐོར་དུ་བཅུག དེ་དང་མཉམ་དུ་ཁོང་ཁྲོའང་ལངས་མོད། ངས་འདི་ནས་ཚེ་སྲོག་ཤོར་ཟིན་པ་ཚོར་གུས་འདུད་དང་ཡིད་གདུང་གི་འབོད་པ་བྱེད་ཀྱིན་ཡོད། འདི་ནི་མི་གཤིས་ཤིག་རེད། འདི་ནི། ང་ཚོས་གུང་ཁྲན་ཏང་གི་རྒྱ་ནག་ནས་ག་ལེར་ག་ལེར་འཆོར་གྱིན་པའི་སྤྱོད་བཟང་དེ་རེད།
རང་ལུས་མེར་བསྲེགས་པའི་བོད་ཀྱི་གྲྭ་བཙུན་བཅུ་གཉིས་ལ་གདོང་གཏོད་པའི་སླད་དུ། ཡིད་གདུང་མེད་པ་དང་། རང་སྐྱོན་རང་བརྟག་མེད་པ་མ་ཟད། གུས་བཀུར་མེད་པ་སོགས་མཆིས་ན། མི་རིགས་དེའི་མི་སྤྱོད་ལ་ཚབས་ཆེའི་མར་རྒུད་དང་གཏོར་བརླག་ཐེབས་པ་རེད།
སྐུ་གཤེགས་པའི་གྲྭ་བཙུན་བཅུ་གཉིས་ལ་གདོང་གཏོད་སྐབས། དངོས་བདེན་དང་། ཞི་འཇམ། ཤེས་ཡོན་སོགས་ནི་སྙིང་རྗེ་མེད་པ་ལྟར་སྣང་། འོན་ཏེ་ཝུས་ཤིས་ཁེ་ཤིས་ཀྱི་དོགས་འདྲི་འདིས། གོ་དོན་གཞན་ཞིག་གི་སྒང་ནས་བོད་མིའི་རང་ལུས་མེར་བསྲེགས་འདིས་ཕན་ཐོགས་ཡོད་པ་མ་རེད་ཅེས་ལན་བཏབ་པ་འདྲ། གཞན་རྒྱ་གར་འདིས་སྟོབས་འབྱོར་ཆེ་བའི་དབྱིན་ཇི་བཙན་རྒྱལ་ལ་གདོང་གཏད་ནས་རང་བཙན་གྱི་ལས་འགུལ་ལ་རྒྱལ་ཁ་བླངས་པ་རེད། རྒྱུ་རྐྱེན་གཙོ་བོ་ཞིག་ནི་མ་ཧྭ་ཏཱ་མ་གྷན་ངྷིས་འཚེ་མེད་ཞི་བའི་སྣེ་ཁྲིད་པ་དང་། རྒོལ་ལན་མེད་པའི་ལས་འགུལ་འདིས་དབྱིན་ཇི་བའི་སེམས་བསྒུལ་བ་དང་། ཐ་ན། དབྱིན་ཇི་བས་སྤྱོད་བཟང་དུ་རློམ་པའི་ང་རྒྱལ་ཁེངས་དྲེགས་དག་ཀྱང་གཏོར་བཅོམ་ལ་བཏང་བ་རེད། མདོ་དོན་དུ། བོད་ཀྱི་གྲྭ་བཙུན་བཅུ་གཉིས་ཀྱིས་རང་ལུས་མེར་བསྲེགས་པས། རྒྱ་ནག་མི་དམངས་ཀྱི་བློ་སེམས་གཡོ་ཐུབ་བམ། གནད་འདིར། ང་དངོས་གནས་སྐད་ཆ་ཅི་ཡང་བཤད་རྒྱུ་མེད།
༢༠༡༡ ༡༡ ༢༣ ལ།
ལྟུང་བ་བྱུང་བ་སྟངས་དང་། སྡིག་པ་ཡོད་མེད་དང་ཆེ་ཆུང་གི་གནས་ལུགས་དེ་ཚོ་ང་ཚོས་གཞན་ཞིག་ནས་བགྲོ་གླེང་བྱས་ན་ཇི་འདྲ་འདུག འདི་ནས་འཚམ་པོ་དེ་ཙམ་མི་འདུག
བསམ་བློས་ཕྱུག་པའི་དོན་དམ་པའི་ཤེས་ཡོན་པ་ཞེས་པ་དེ་འདི་འདྲ་ཞིག་དགོས། བཙན་བྱོལ་ཁྲོད་ཀྱི་ཤེས་ཡོན་པའི་མིང་འཛིན་པའི་ཡ་མ་བརླ་དེ་ཚོ་ལ་བསམ་བློའི་རྒྱག་ཕྱེ་ཞིག་སྩལ་འདུག
༼རང་ལུས་མེར་བསྲེགས་པའི་བོད་ཀྱི་གྲྭ་བཙུན་བཅུ་གཉིས་ལ་གདོང་གཏོད་པའི་སླད་དུ། ཡིད་གདུང་མེད་པ་དང་། རང་སྐྱོན་རང་བརྟག་མེད་པ་མ་ཟད། གུས་བཀུར་མེད་པ་སོགས་མཆིས་ན། མི་རིགས་དེའི་མི་སྤྱོད་ལ་ཚབས་ཆེའི་མར་རྒུད་དང་གཏོར་བརླག་ཐེབས་པ་རེད། ༽ཚིག་འདི་ནི་བསྟན་འཛིན་ཤེས་རབ་ཅེས་པའི་ཀླད་མེད་དེ་ལ་ཤིན་ཏུ་འཚམས།
ངའི་ཚོར་སྣང་ལ་ཁོང་ཚོ་ནི་མི་རིགས་དང་མིའི་རིགས་ཀྱི་ཕུལ་བྱུང་དཔའ་བོ་རེད་སྙམ། རྒྱུ་མཚན་ནི་ཁོང་ཚོའི་རེ་སྨོན་དེ་མི་རིགས་ཙམ་དུ་མ་ཟད་མིའི་རིགས་ཀྱི་ཁེ་ཕན་ཆགས་ཡོད་པས་སོ།
དེ་བས་སྡིག་ལྟུང་ཡོད་ཀྱང་དགེ་བའི་སྟོབས་ནི་དེ་ལས་ཀྱང་ཆེས་ཆེ་བར་འདོད། འོན་ཀྱང་ནང་གི་འཇིག་རྟེན་དེ་དག་ང་ཚོས་དངོས་སུ་མི་མཐོང་ཕྱིར་ན་ཁ་ཚོན་སུས་ཀྱང་གཅོད་དཀའ་འོ།
ཕྱོགས་གཞན་ཞིག་ནས་ཡིད་བཞིན་ནོར་བུས་གཙོས་སྐྱེས་ཆེན་དམ་པ་དང་དད་ལྡན་སྐྱེ་འགྲོ་མང་པོས་ཁོང་ཅག་ལ་གསོལ་བ་སྨོན་ལམ་འདེབས་པར་ཡང་བྱིན་རླབས་ཤིག་ཡོད་ངེས། གཅིག་བྱས་ན་གཤེགས་སྟངས་དེ་ནི་རང་གཞན་ཀུན་དགེའི་ལམ་ཞིག་ཀྱང་ཡིན་པ་རེད།
མི་རིགས་ལ་དུངས་ཞེན་ཡོད་མཁན་ཡི་ཤེས་བསྟན་འཛིན་ལགས་ཀྱིས་རྩོམ་བསྒྱུར་ཡག་པོ་ཞིག་གནང་འདུག་པས་ཡི་རང་ཡོད། ད་དུང་གང་མང་བསྒྱུར་བས་རེ་བ་ཡོད། བོད་མི་རིགས་ཀྱི་དཀའ་སྡུག་སྐོར་སེམས་གཏམ་ཞིག་བརྗོད་པ་ཡིན་དུས་ངོ་མ་སྐྱོ་གནང་དང་སེམས་ཚོར་གྱི་བཟི་སོང་།
སྲོག་གཅོད་ནི་སྲོག་གཅོད་རང་རེད། དེ་ལ་རང་སྲོག་དང་གཞན་སྲོག་གི་ཁྱད་པར་ཅང་ཡོད་ནི་མ་རེད། སྲོག་གཅོད་ཀྱི་ལས་ལ་སྡིག་པ་ཡོད་མེད་དང་ཆེ་ཆུང་གི་ཁྱད་པར་ཞིག་ཡོད་པ་མ་གཏོགས་ལྟུང་བ་འབྱུང་མིན་ལ་ཁྱད་པར་ཅང་ཡོད་པ་མ་རེད། ཉེས་པའི་ཆ་ནས་ཀྱང་། གསུངས་རྒྱུན་ལ་ལ་ལྟར་ན། གཞན་སྲོག་ལས་ཀྱང་རང་སྲོག་བཅད་ན་ཉེས་པ་ཆེ་ཚུལ་འདུག འོན་ཀྱང་གསལ་བོ་མི་ཤེས།
གལ་ཏེ། བོད་མི་རིགས་ཧྲིལ་པོའི་སླད་དུ་སྐུ་སྲོག་མེ་ལྕེ་ལ་ཕུལ་ཡང་། རྒྱལ་སྲས་ཀྱི་སྤྱོད་པར་འགྲོ་གི་མེད་ན། དེ་ནས། སྟོན་པའི་སྐྱེས་རབས་སོགས་ལ་འཁྲུགས་ཆེན་པོ་ཞིག་ཐེབས་གི་རེད།
སྟན་འཛིན་ཤེསརབ་ལགས། བྱང་སེམས་ལ་མ་གཏོག་སྲོག་གཅོད་ཀྱི་ལས་མ་གནང་ཞེས་པའི་གོ་དོན་ཙམ་ཡང་མི་ཤེས་ན་ཁ་རོགས་སྡོད་མི་ཐུབ་པ་ཅི། སྲོག་གཅོད་ཀྱི་རྩ་སྡོམ་ལྟུང་བ་ལ།་རང་དང་ཐ་དད་པའི་མི་ཡི་སྲོག་གཅོད་དགོས་པ་མ་ཡིན་ནམ། ད་རུང་གལ་སྲིད་གྲྭ་བ་ཞིག་གིས་མི་ཞིག་གསོད་སེམས་ཀྱིས་ཤི་ངེས་ཤིག་རྨས་ཟིན་ཡང། ཁོ་མ་ཤི་བའི་སྔོན་ལ་གྲྭ་བ་རང་ཉིད་རྐྱེན་གང་རུང་ཞིག་གིས་ཤི་སོང་ན། གྲྭ་བ་དེར་སྲོག་གཅོད་ཀྱི་རྩ་ལྟུང་བྱུང་མེད་པ་མ་ཡིན་ནམ།
མ་ཟད། འདི་ལྟ་བུའི་རྒྱ་ཁྱབ་ཀྱི་གོ་མེད་ཚོར་མེད་འདིས། དངོས་གནས་མི་སེམས་བདེ་རུ་འབབ་ཐབས་བྲལ། >>
འོད་ཟེར་ལགས་ཀྱི་རྩོམ་ཡིག་འདིས་སྤྱིར་བཏང་ནས་འགྲོ་བ་མིའི་གཤིས་ཀར་དྲི་བ་ནན་མོ་ཞིག་བཏང་ཡོད་པ་དང་། ལྷག་པར་དུ་ང་ཚོ་སྟེ་བོད་མི་ཚོར་སྙིང་རྩ་འདར་བའི་དྲི་བ་བཏང་ཡོད་རེད། ད་ཅི་བྱེད་ཀྱི་ཡོད་ན་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་བྱེད་ཅི་དགོས་ན་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་དངོས་གནས་བྱ་ཐབས་ཟད་པ་ཨེ་རེད། དུས་འཁོར་དབང་ཆེན་ལ་གྲ་སྒྲིག་བྱོས།་ གཞོན་ནུ་ཚོགས་པ།
བོད་མི་རིགས་ཀྱི་སེམས་སུ་འཛུལ་ནས་སེམས་གཏམ་སྨྲ་ཚུལ་འདིས་ངོ་མ་སེམས་འགུལ་ཐེབས་པ་འདུག སེམས་ཚོར་དང་གནས་ལུགས། གནས་སྟངས་དང་སེམས་ཚོར། མིག་ཆུ་དང་སྡང་མིག་དག་ལྷན་དུ་བསྡེབས་པའི་ཁྱེད་རང་དང་ཁྱེད་ཀྱི་རྩོམ་ཡིག་ལ་ཧ་ཅང་དགའ།
ཡིག་བསྒྱུར་ལེགས་པོ་བྱུང་མི་འདུག ཀློག་བདེ་པོ་མེད་ཅིང་རབ་རིབ་སབ་སིབ་མང་ངོ་།།
བདེན་པ་ཤོད་ས་མེད་པའི་མྱི་ཡུལ་འདིར།།
བདེན་པའི་ལས་དེར་རྫུན་པའི་ངོ་བོར་ལྟ།།
བདེན་པར་འགལ་བའི་རྫུན་པར་ཚད་མ་འཛིན།།
བདེན་རྫུན་དབྱེར་མཐའ་མ་ཤེས་སྙིང་རེ་རྗེ།།
བཟང་ངན་འགོ་ལྟག་ལོག་པའི་དུས་ངན་འདིར།།
བཟང་པའི་སྤྱོད་པར་ངན་པའི་དོན་ཏུ་གཞིགས།།
བཟང་པོར་རྫོབ་པའི་ངན་པར་ལག་ཆ་འཛིན།།
བཟང་ངན་དབྱེར་མཐའ་མ་ཆོད་སྙིང་རེ་རྗེ།།
འབྱུང་བཞིའི་གྲུབ་ཆ་རྒོལ་བའི་དེང་དུས་སུ།།
རྡུལ་མཚོན་འཕྲུལ་འཁོར་ཞི་བདེའི་ལམ་དུ་ལྟ།།
འཚེ་མེད་སྤྱོད་པར་དགོས་མེད་ལྟག་ཁ་ཕུད།།
མ་རིག་མུན་པས་བསྟིམས་པས་སྙིང་རེ་རྗེ།།
ན་གཞོན་ལོ་ཙཱ་བ་གྲོགས་སད་མིའམ་ཡེ་ཤེས་བསྟན་འཛིན་ལགས་ཀྱིས་བསྒྱུར་རྩོམ་ཡག་པོ་ཞིག་སྤེལ་འདུག ད་དུང་ཡང་། མུ་མཐུད་དུ་དུས་དང་མཐུན་པའི་རྩོམ་གང་མང་བསྒྱུར་རོགས། དེ་བཞིན་དྲན་སྐུལ་ཞུ་རྒྱུ་ཞིག་ལ། གྲོགས་ཏྲེ་ཧོར་ཐུབ་བསྟན་ལགས་ཀྱིས་ཀྱང་དུས་བབ་དྲ་ཐོག་ཏུ་སྤྱི་ཚོགས་ལ་ཕན་པའི་རྩོམ་ཡིག་གང་མང་བསྒྱུར་ན་རང་གཞན་ཀུན་ལ་ཕན་ཐོགས་ཆེ། ཐུགས་རྗེ་ཆེ།
ངས་ཀྱང་མདང་དགོང་ཟིན་བྲིས་ཤིག་བྲིས་ཡོད། ནང་དོན་ཡང་འདི་དང་ཧ་ཅང་འབྲེལ་ཆེ། དྲ་གནས་འདི་ཡིན།
https://tibettimes.net/wordpress/blogs.php?id=265&post_id=18441