ལོ་གསུམ་གྱི་ཁྲིམས་ཆད།

ལྷོ་ཕྱོགས་སེ་ར་ཚ་བ་ཁང་ཚན་གྱི་གྲྭ་བློ་བཟང་ཆོས་འཕེལ་ལགས་ཀྱིས་གསར་ལམ་དུ་གནས་ཚུལ་མཁོ་སྤྲོད་གནང་བ་ལྟར་ན། རྒྱ་ནག་གཞུང་གིས། འདི་ལོའི་ཕྱི་ཟླ་ ༦ པའི་ཚེས་ ༡༧ ཉིན་ཁམས་ཆབ་མདོ་ཁུལ་དཔལ་ཤོད་རྫོང་གྲོང་ཚ་ཤང་མགོ་ར་གྲོང་ཚོའི་རང་ལོ་ ༢༣ ཡིན་པའི་སློབ་མ་བསོད་ནམས་རྣམ་རྒྱལ་འབོད་པ་འཛིན་བཟུང་བཀག་ཉར་བྱས་ཡོད་པ་མ་ཟད། ཉེ་ཆར་དཔའ་ཤོད་རྫོང་འབྲིང་རིམ་མི་མང་ཁྲིམས་ཁང་གིས་རྒྱལ་ཁབ་ཀྱི་ངོ་ལོག་པ་ཡིན་པའི་ཉེས་མིང་འོག་ལོ་ ༣ གྱི་དུས་བཀག་བཙོན་འཇུག་གི་ཁྲིམས་ཐག་བཅད་འདུག

གནས་ཚུལ་མཁོ་སྤྲོད་པས་བརྗོད་པ་ལྟར་ན། ཁོང་འཛིན་བཟུང་བྱེད་དོན་གཙོ་བོ། སྔར་ལོ་ཁོང་གིས་གྲོང་ཚ་ཞང་གི་སློབ་གྲྭའི་ནང་བསྒྲེངས་འཛུགས་བྱས་ཡོད་པའི་རྒྱ་ནག་གི་རྒྱལ་དར་མར་ཕབ་སྟེ། རྡོ་ཆེན་པོ་ཞིག་གི་འོག་སྤས་བ་སོགས་ཀྱིས་རྒྱ་ནག་གཞུང་ལ་མི་འདོད་པའི་རྣམ་འགྱུར་བསྟན་ཡོད་པ་དང་། སྐབས་དེར་ས་གནས་ཉེན་རྟོག་མི་སྣས་བརྩད་གཅོད་རིམ་པར་བྱས་ཀྱང་ཤེས་རྟོགས་བྱུང་མེད་ནའང་།  འདི་ལོ་ཁོང་གིས་ཕ་ཡུལ་གྱི་ས་གནས་སུ་དབྱར་རྩྭ་རྒུན་འབུ་བརྐོ་བཞིན་པའི་སྐབས། མི་སེར་དཀྱུས་མའི་ལྭ་བ་གོན་པའི་ཉེན་རྟོག་པ་གཉིས་ཡོང་སྟེ་ཁོང་ལྷ་སར་འགྲོ་དགོས་སྐོར་སོགས་བཤད་དེ་བཙན་འཁྲིད་ཀྱིས་ཉིན་ ༣ རིང་ས་གནས་ཀྱི་ཉེན་རྟོག་དོ་དམ་ཁང་དུ་བཀག་ཉར་འདྲི་བརྩད་བྱས་ཡོད་འདུག་ལ། རྗེས་སུ་དཔལ་ཤོད་རྫོང་ཉེན་རྟོག་པར་རྩིས་སྤྲོད་ཀྱིས་རྫོང་གི་བཙོན་ཁང་དུ་ཟླ་ ༤ མ་ཟིན་ཙམ་ལ་བཙོན་འཇུག་བཀག་ཉར་དང་ཉེས་རྡུང་ཚབས་ཆེན་བཏང་ཡོད་པ་མ་ཟད། རྒྱལ་ཁབ་ཀྱི་ངོ་ལོག་པ་ཡིན་པའི་ཉེས་མིང་འོག་བཙོན་འཇུག་ཁྲིམས་ཐག་བཅད་འདུག

ཉེ་ཆར་ཁོང་གི་ནང་མིས་བཙོན་གྲོགས་ཤིག་བརྒྱུད་དེ། རྒྱ་ནག་གཞུང་གིས་ཁོང་འཛིན་བཟུང་སྐབས་གཅར་རྡུང་མནར་གཅོད་བཏང་སྟེ། ཁོང་གི་རྣ་གཉིས་འོན་པར་གྱུར་ཡོད་པ་དང་གཟུགས་པོའི་གནས་སྟངས་སྐྱོ་བོ་ཡིན་པའི་གནས་ཚུལ་ཤེས་ཡོད་པ་ལས།  ད་ལྟའི་ཆར་གར་ཡོད་ཅི་བྱུང་གི་གནས་ཚུལ་ཅི་ཡང་ཤེས་མེད་པར་ལྷག་ཡོད་འདུག   

གསར་འགོད་པ། དོན་གོ