བོད་
ད་ལོ་ནི་འཛམ་གླིང་གོ་ལ་རིལ་མོ་འདིར་ཞི་བདེ་གཟེངས་རྟགས་དར་ནས་མི་ལོ་ ༡༡༠ འཁོར་ཞིང་། གངས་ཅན་ཁ་བའི་སྒང་ལ་ཞི་བདེ་གཟེངས་བསྟོད་ཐོབ་ནས་མི་ལོ་ ༢༢ འཁོར་བའི་ལོ་དེ་ཡིན། མི་ལོ་ཉེར་གཉིས་ལ་སོན་པའི་ཞི་བདེ་རྒན་པོའི་ཚ་བོ་ཚ་མོ་ཁ་བ་གངས་ཅན་པ་ཚོས་ཀྱང་། འདས་པའི་ལོ་རྒྱུས་ཀྱི་རླུང་འཚུབ་ཆེན་པོའི་ཁྲོད་ཐལ་རྡུལ་གྱིས་མིག་གི་འོད་མདངས་མ་ཡལ་ཞིང་། འཁྲུག་ཆ་དོད་པོའི་རྒྱུ་འབྱོར་གྱིས་གོམ་པའི་འདེགས་འགྲོས་མ་འཁྱོར་པར། སྡུག་པོའི་བཙོན་འོག་དང་བཙན་པོའི་རྐང་འོག་རེ་རེ་ནས་རང་དབང་དང་དམངས་གཙོའི་འབོད་སྒྲ་གྱེར་བཞིན། ཡུལ་མཐའ་འཁོབ་ཀྱི་ལུང་ཁུག་རེ་རེ་ནས་འཚེ་མེད་ཞི་བདེ་ཡི་སྙིང་སྟོབས་སྒོམ་བཞིན། འགྲོ་བ་མིའི་རིགས་ཀྱི་མ་འོངས་པའི་བདེ་སྐྱིད་བཙལ་ནས་ཡོང་བའི་ཞི་བདེ་རྒན་པོ་འདིའི་རྐང་རྗེས་དག་ཅིས་ཀྱང་གླེང་དགོས།
མ་གཞི་ཆེ་མཐོང་ངོ་བསྟོད་ལ་དགའ་བ་འདི་འགྲོ་བ་མིའི་རིགས་སྤྱི་ལ་ཁྱབ་པའི་ལྷན་སྐྱེས་ཀྱི་གཤིས་ཀ་ཞིག་ཏུ་བགྲང་དཀའ་ཡང་། མིའི་རིགས་ཀྱིས་དབང་དུ་མཛད་པའི་གོ་ལ་རིལ་མོ་འདིའི་བར་སྣང་ཐམ་ཅད་ངོ་བསྟོད་སྒྲ་དབྱངས་ཀྱིས་ཁྱབ་ཡོད་ལ། ས་གཞི་ཡོངས་སུ་ཆེ་བསྟོད་གཟུགས་བཟོས་ཀྱིས་ཁེངས་ཡོད། ལ་ལ་ཞིག་དབང་ཤུགས་ཀྱི་དཔུང་པ་དང་བསྡེབས་ནས་འཛུམ་ཤིག་ཤིག་གིས་བླང་ཆོག་ལ། ལ་ལ་ཞིག་རྒྱུ་འབྱོར་གྱི་ཁྲི་སྟེང་བརྒྱུད་ནས་བདེ་འཇམ་འཇམ་ངང་ཕུལ་ཡོང་། ཐ་ན། མི་སྲོག་གཅོད་མཁན་ལ་དམག་མི་དཔའ་བོའི་གཟེངས་རྟགས་དང་། རྡུལ་མཚོན་སྒྲིག་མཁན་ལ་གསར་གཏོད་མཁས་པའི་གཟེངས་རྟགས་ཀྱང་ཕུལ་མྱོང་མོད། མི་སེར་དཀྱུས་མའི་དཀའ་སྡུག་གི་མིག་ཆུ་དང་འདྲེས་ཤིང་། མགོན་མེད་སྐྱབས་མེད་ཚོའི་ཁེར་རྐྱང་གི་གྲིབ་གཟུགས་དང་འགྲོགས་ཏེ། བཙོན་དུ་འཛུལ་མཁན་དང་བཀྲེས་ལྟོགས་མྱོང་མཁན་དེ། ད་ལྟའི་བར་མིའི་ལྷན་སྐྱེས་ཀྱི་བྱམས་བརྩེ་དང་བྲལ་མ་མྱོང་བའི་ཞི་བདེ་རྒན་པོ་འདི་གཅིག་པུ་ཡིན།
ཞི་བདེ་རྒན་པོ་འདི་ཁོ་ནས་ཧྥ་ཤི་སིའི་དྲག་དམག་དང་ན་ཙི་སྒེར་གཅོད་པའི་གདོང་ལྤགས་རལ་ཏེ་ཡུ་རུབ་གླིང་དུ་དམངས་གཙོའི་དབྱར་གཞུང་བསུས་ཤིང་། ཨུ་རུ་སུའི་དམར་ཤོག་རིང་ལུགས་ཀྱི་བཙན་རྫོང་གཏོར་ཏེ་ཨེ་ཤ་ཡའི་སྤྱི་གཙུག་ནས་དམངས་གཙོའི་མེ་ཁ་གསོས་མྱོང་ལ། ལྷོ་ཨ་ཧྥི་རི་ཀའི་མི་རིགས་དབྱེ་འབྱེད་ཀྱི་གྲལ་རིམ་ལྕགས་སྒྲོག་བཅད་དེ་འཛམ་གླིང་མི་ནག་གི་སྤོབས་པའི་དབུ་འཕངས་དགུང་དུ་གཏད་པར་མ་ཟད། ལྷོ་བྱང་ཀོ་རི་ཡའི་དམག་འཁྲུག་གི་དུད་སྤྲིན་འཇགས་སུ་བཅུག་ཅིང་། དྲག་དམག་སྒེར་གཅོད་འོག་གི་འབར་མའི་མི་མང་ལ་དམངས་གཙོའི་འོས་ཤོག་སྦྱིན་ཡོད། དེ་ལྟར་རྒད་པོ་འདིས་རྐང་རྗེས་བཞག་སར་དམངས་གཙོ་དང་རང་དབང་གི་དབྱངས་རྟ་འཁྲུང་བཞིན་ཡོད་ལ། རྒན་པོ་འདི་ཁོ་ནས་དེང་གི་འཛམ་གླིང་ལ་སྒེར་ཚིགས་ཤིག་དང་། འགྲོ་བ་མིའི་རིགས་ལ་ལ་སྒལ་ཚིགས་ཤིག་བསྐྲུན་ཡོད།
ཞི་བདེ་རྒན་པོ་འདིས་བོད་མི་ས་ཡ་དྲུག་གི་བདེན་པའི་གནས་ལུགས་ཁྱེར་ནས། ལོ་ངོ་ ༢༢ ལ་འཛམ་གླིང་རིལ་མོ་འདིར་དཔུང་རོགས་དང་མགོན་སྐྱབས་ཡོང་བའི་ཐལ་མོལ་སྦྱར་བཞིན་ཡོད་ལ། དྲང་བདེན་གྱི་སྨྱུ་གུ་བཟུང་སྟེ་ཁྲི་མུན་བཙོན་དུ་རྒྱ་མི་དུང་ཕྱུར་བཅུ་གསུམ་གྱི་བདེ་སྡུག་གླེང་བཞིན་ཡོད། ཡེ་མེན་དང་ལི་བྷི་ཡའི་མ་ཡུམ་ཚོའི་བརྩེ་སེམས་བསྣམས་ཏེ་དཀྱིལ་ཤར་ཡུལ་གྲུར་དམངས་གཙོའི་དཔྱིད་དཔལ་བསུ་བའི་སྟ་གོན་བྱས་ཡོད། འོན་ཀྱང་ཕྱོགས་རིས་མེད་པའི་རྒན་པོ་འདིས་རེ་སྨོན་གཏོང་སྔ་ཤོས་དང་རྨི་ལམ་འགྲུབ་ཁག་ཤོས་དེ་རི་ཁ་བ་ཅན་གྱི་མི་རིགས་འདི་ཆགས་ཡོད་ལ། དེ་བས་ལས་ལ་བརྩོན་ཞིང་དཔའ་ངར་ལྡན་པར་ཁས་ཆེ་བའི་འུ་ཅག་གདོང་དམར་བ་རྣམས་ཀྱིས་ཀྱང་། ལས་དང་སྨོན་ལམ་མ་ལོག་པ་ཞིག་གནང་དགོས་པ་ནི་ཞི་བདེ་གཟེངས་རྟགས་བཞེས་མཁན་གྱི་རི་བ་ཅན་གྱི་རྒན་པོ་དང་། རི་ཁ་བ་ཅན་ལ་སྨོན་ལམ་ཐེབས་པའི་ཞི་བདེ་རྒན་པོ་འདི་གཉིས་ཀྱིས་ཡུན་རིང་ཡིད་ལ་བརྣག་པའི་རྨི་ལམ་དེ་ཡིན།
