བོད་མིའི་སྒྲིག་འཛུགས་ཀྱི་གཞུང་ཞབས་ཟུར་པ་ཀུན་གླིང་བསྟན་པ་བཟོད་པ་ལགས། བར་ལམ་ནས་ཕོ་སྐྲན་གྱི་ནད་གཞི་ཕོག་སྟེ་ལྡི་ལིར་ཡོད་པའི་གངྒ་རམ་སྨན་ཁང་ཆེན་མོའི་ནང་སྨན་བཅོས་སུ་ཕེབས་ཡོད་ཀྱང་། ཟླ་འདིའི་ཕྱི་ཚེས་ ༡༣ ཉིན་གྱི་ཞོགས་པའི་ཆུ་ཚོད་ ༥ པ་ཡས་མས་སུ་སྨན་བཅོས་དྲག་སྐྱེད་མ་བྱུང་བར་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་ཡོད།
ཀུན་གླིང་བསྟན་པ་བཟོད་པ་ལགས་ནི། ཕྱི་ལོ་ ༡༩༣༣ ལོར་སྟག་རྩེ་རྫོང་ཁོངས་ཕག་མོ་ཞོལ་སྒེར་སྒུར་མ་ཁང་གསར་ཞེས་པའི་ཁྱིམ་དུ་འཁྲུངས་ཤིང་། ཕྱིས་སུ་ས་གནས་ཀྱི་བོད་ཡིག་སློབ་གྲྭ་དང་གཞུང་གཉེར་རྩེ་སློབ་གྲྭ་བཅས་སུ་སློབ་གཉེར་གནང་བ་དང་། རང་ལོ་ ༡༩ ཐོག་བོད་གཞུང་དགའ་ལྡན་ཕོ་བྲང་ཆེན་པོའི་གཞུང་ཞབས་རྩེ་དྲུང་དང་བཀའ་ཤག་གིས་བཀའ་འབྲེལ་ལྟར་ཤར་ཕྱོགས་ལམ་བཟོའི་ཕོགས་རྒྱག ༸གོང་ས་མཆོག་རྒྱ་ནག་ཏུ་ཆིབས་སྒྱུར་སྐབས་ཕེབས་བསུ་བ་དང་ལེགས་བཅོས་སྤྱི་ཚོགས་ཀྱི་ལས་འགན་བཞེས་ཡོད་པ་དང་། ༸གོང་ས་མཆོག་རྒྱ་གར་དུ་གནས་གཟིགས་སུ་ཆིབས་སྒྱུར སྐབས་ཞབས་ཞུ་བ་སོགས་གནང་ཡོད་པ་དང་། དེ་བཞིན་༸གོང་ས་མཆོག་རྒྱ་ནག་པེ་ཅིང་དུ་ཆིབས་སྒྱུར་བསྐྱངས་སྐབས་ཕེབས་སྒྲིག་དོ་དམ་པ། ༡༩༥༩ ལོའི་ཟླ་ ༣ པར་རྒྱ་ནག་གིས་༸གོང་ས་མཆོག་གི་སྐུ་ཕྱྭར་བསྡོ་བའི་ཛ་དྲག་གི་གནས་ཚུལ་བྱུང་སྐབས་ཕོ་བྲང་གི་ལྕགས་རི་སེར་པོའི་སྒོ་སྲུང་བའི་ལས་འགན་བཅས་གནང་ཡོད་པ་དང་། ཕྱི་ཟླ་ ༣ ཚེས་ ༡༧ མཚན་མོ་༸གོང་ས་མཆོག་སྟོན་འཁོར་ནོར་གླིང་ཕོ་བྲང་ནས་ཆིབས་སྒྱུར་གྱིས་ར་མ་གྲུ་ཁ་ཐོན་ཏེ་སྣེའུ་རྫོང་དུ་བསླེབས་རྗེས། ཁོང་གིས་ཤག་ཚང་དགེ་རྒན་ཀུན་གླིང་ཛ་སག་འོད་ཟེར་རྒྱལ་མཚན་བཀའ་ལྟར། ཉེན་ཁར་མ་འཛེམས་པར་༸གོང་ས་མཆོག་གི་བཀའ་ཡིག་གལ་ཆེ་ཞིག་ནོར་གླིང་ཕོ་བྲང་དུ་ཡོད་པའི་དམག་དཔོན་བཀའ་བཀོད་ཁང་ལ་འབུལ་བར་ཕྱིན་ཡོད།
ཕྱི་ལོ་ ༡༩༥༩ ལོར་རྒྱ་མིའི་བཙོན་འོག་ཚུད་དེ་རྒྱ་ནག་ཅེའུ་ཇན་ཞེས་པའི་ས་ཁུལ་དུ་ངལ་རྩོལ་བསྒྱུར་བཀོད་དུ་བཏང་བ་མ་ཟད། དུས་བཀག་བཙོན་འཇུག་མི་ལོ་ ༢༠ ཉེས་ཆད་བཏང་། ཕྱི་ལོ་ ༡༩༧༩ ལོར་བཙོན་གྲོལ་ཐོབ་རྗེས་བོད་གཞིས་བྱེས་གཉེན་འཕྲད་ཀྱི་གོ་སྐབས་དང་བསྟུན་ནས་རྒྱ་གར་དུ་ཕེབས་ཏེ་༸ གོང་ས་མཆོག་ལ་མཇལ་ཁ་ཞུས། ༡༩༨༡ ལོའི་ཟླ་ ༦ ཚེས་ ༡ ནས་བདེ་སྲུང་ལས་ཁུངས་སུ་རྒན་དྲུང་གི་གནས་རིམ་ཐོག་ཞབས་ཞུ་གནང་ཡོད་པ་དང་། ༡༩༨༩ ལོར་གནས་རིམ་བདུན་པར་གནས་སྤོར་གྱིས་མོན་གྷོ་འདོད་རྒུ་གླིང་གི་གཞིས་མགོར་གནས་སྤོས་རྗེས། བགྲེས་ཡོལ་འཕར་འགྱངས་གནང་སྟེ་དྲུང་ཆེ་གཞོན་པའི་གནས་རིམ་ཐོག་ཞབས་ཞུ་གནང་། རྗེས་སུ་ནང་སྲིད་ལས་ཁུངས་སུ་གནས་སྤོར་བྱས་པ་ལྟར་ལོ་ ༡༤ རིང་ཕྱག་ལས་གནང་བ་དང་། ༡༩༩༥ ལོར་བགྲེས་ཡོལ་བཀའ་འཁྲོལ་སྩལ་ཐོབ་མ་བྱུང་བར་གཞུང་མང་སྲི་ཞུའི་ཞབས་འདེགས་ཞུ་སྒོ་གང་ཅིར་ལྷག་བསམ་དོ་ཁུར་ཆེ་བསྐྱེད་ཞུས་ཡོད་པ་མ་ཟད། ད་བར་སྐུ་སྒེར་ཡིག་ཚང་དུ་ཞབས་ཞུ་གནང་སྟེ་སྐུ་ཚེ་གང་བོར་བོད་བསྟན་སྲིད་ཀྱི་དོན་དུ་ཞབས་འདེགས་བླ་མེད་བསྒྲུབས་ཡོད་པ་རེད།
གསར་འགོད་པ། དོན་གོ
ཨ་ཁ་མཐོང་མྱོང་ངོ་ཤེས་གཅིག་གཤིན་རྗེས་འཁྲིད་ཚར་འདུག ར་བསད་ལུག་འདར་ཙམ་ཡང་མི་ཤེས་པའི་རྨོངས་པ་ང་འཆི་བ་མི་རྟག་པའི་དྲན་ཤེས་ཅིག་ག་དུས་ཡོང་ངམ། འདས་པོ་དལ་འགྲོའི་རྟེན་བཟང་གི་གོ་འཕང་མྱུར་དུ་ཐོབ་པར་ཤོག །
ཨོ་རྒྱན་ཡུལ་གྱི་ནུབ་བྱང་ན། བདེ་བ་ཅན་གྱི་ཉེ་འགྲམ་ན། ཨ་རི་ཡུལ་གྱི་ཞིང་ཁམས་ན། ཀུན་གླེང་བསྟན་བཟོད་སྐྱེ་བར་ཤོག