ཉིས་སྟོང་བརྒྱད་ནས་ད་བར་རི་འཁྱམ་ལུང་ཉུལ་བྱས་བསྡད་ཡིན།

མདོ་སྨད་ཀན་ལྷོ་ཅོ་ནེ་རྫོང་ཆོས་དཔལ་ཞིང་བཀྲ་ཤིས་ཆོས་འཁོར་གླིང་དགོན་པའི་གྲྭ་སྐལ་བཟང་ཆོས་གྲགས་ལགས་རྒྱ་ནག་འཛིན་བཟུང་གི་བཀའ་རྒྱའི་འོག འདས་པའི་ལོ་ངོ་ ༣ ལྷག་གི་རིང་སི་ཁྲོན་དང་ཆབ་མདོ། ལྷ་ས་བཅས་ས་གནས་རིམ་པའི་ནང་ཉེན་ཡོལ་བྱས་མཐར་རྒྱ་གར་ནང་བཙན་བྱོལ་དུ་འབྱོར་འདུག ཟླ་འདིའི་ཕྱི་ཚེས་ ༣ ཉིན་འདི་གའི་གསར་འགོད་པས་ཁོང་ལ་བཅར་འདྲི་ཞུས་ཏེ། ས་བྱི་ཞི་རྒོལ་ཆེན་མོའི་སྐབས་མདོ་སྨད་ཅོ་ནེ་ཕྱོགས་ནས་ཡར་ལངས་རྒྱག་སྟངས་དང་། ཞི་རྒོལ་རྗེས་ཁོ་རང་ཉེན་ཡོལ་དུ་ཕྱིན་ཏེ་དཀའ་སྡུག་གི་འཚོ་བ་བསྐྱལ་བའི་སྐོར་རྒྱུས་ལོན་བྱས་ཡོད། 

གྲྭ་སྐལ་བཟང་ཆོས་གྲགས་ལགས་ཀྱིས་བརྗོད་པ་ལྟར་ན། ༢༠༠༨ ལོའི་ཕྱི་ཟླ་ ༣ པའི་ཚེས་ ༡༨ ཉིན་གྱི་སྔ་དྲོའི་ཆུ་ཚོད་ ༡༡ ཡས་མས་སུ་ཅོ་ནེ་རྫོང་ཆོས་དཔལ་ཞིང་བཀྲ་ཤིས་ཆོས་འཁོར་གླིང་དགོན་པའི་གྲྭ་བ་ ༥༠༠ ལྷག་དང་ས་གནས་བོད་མི་བཅས་ཀྱིས་དགོན་པའི་ནང་བསང་གསོལ་བཏང་རྗེས། ལག་ཏུ་བོད་ཀྱི་རྒྱལ་དར་འཕྱར་བ་དང་། ངག་ནས་“ ༧རྒྱལ་བ་རིན་པོ་ཆེ་བོད་ལ་ཕེབས་འཇུག་དགོས། ༸པཎ་ཆེན་ཆུང་སྲིད་རིན་པོ་ཆེ་ཀློད་གྲོལ་གཏོང་དགོས། བོད་ནང་འགྲོ་བ་མིའི་ཐོབ་ཐང་དགོས། དགོན་པའི་རང་ས་རང་དབང་དགོས། ” ཞེས་འབོད་ཚིག་སྒྲོག་བཞིན་མདོ་ཁོག་ཞང་མི་མང་སྲིད་གཞུང་དང་ཉེན་རྟོག་ལས་ཁུངས། ནགས་ལས་ཁང་བཅས་ཀྱི་སྒོ་ཁར་སྐོར་སྐྱོད་ཀྱིས་སྐད་འབོད་བྱས་ཤིང་། དེ་གའི་སློབ་ཆུང་སྒོ་རའི་ནང་གི་རྒྱ་ནག་གི་རྒྱལ་དར་ཕབ་སྟེ་བོད་ཀྱི་རྒྱལ་དར་བསྒྲེངས་འཛུགས་བྱས་ཡོད་པ་མ་ཟད། ཉེན་རྟོག་ལས་ཁུངས་ཀྱི་སྒོ་དང་སྒེའུ་ཁུང་བཅག་ཅིང་རླངས་འཁོར་མེར་བསྲེགས་བཏང་སྟེ། ཉིན་དེའི་ཕྱི་དྲོའི་ཆུ་ཚོད་ ༣ པའི་བར་ངོ་རྒོལ་བྱས་ཡོད་འདུག ཕྱི་དྲོར་རྒྱ་དམག་སྟོང་ཕྲག་གཅིག་ལྷག་འབྱོར་ཏེ་དགོན་པ་མཐའ་སྐོར་ཞིང་། ཀན་ལྷོ་ཁུལ་དང་ཅོ་ནེ་རྫོང་ཉེན་རྟོག་པ་དང་བདེ་འཇགས་མི་སྣས་གྲྭ་དམངས་ཚོས་མགོ་སྒུར་དགོས་པའི་བཙན་བཀའ་བཏང་ཡོད་ཀྱང་། དགོན་པའི་དགེ་འདུན་པ་ཚོས་མགོ་བསྒུར་འདོད་མ་བྱས་སྟབས་ཉིན་དེར་གྲྭ་བ་ ༣༠༠ དང་མི་སྐྱ་ཁ་ཤས་བཅས་འཛིན་བཟུང་བྱས་ཤིང་། བཀྲ་ཤིས་ཆོས་འཁོར་གླེང་དགོན་པ་བདུན་ཕྲག་གཉིས་རིང་སྒོ་བརྒྱབ་ཡོད་འདུག

གྲྭ་སྐལ་བཟང་ཆོས་གྲགས་ལགས་ཀྱིས་བརྗོད་དོན། “ ༢༠༠༨ ལོའི་ཕྱི་ཟླ་ ༣ པའི་ཚེས་ ༡༨ ཉིན་གྱི་ཕྱི་དྲོར་རྒྱ་དམག་སྟོང་ཕྲག་ལྷག་གིས་དགོན་པའི་མཐའ་བསྐོར་བ་དང་། ཉེན་རྟོག་པ་དང་སྲིད་གཞུང་གི་ལས་བྱེད་མང་པོ་ཞིག་དགོན་པའི་ནང་ཡོང་སྟེ་ཛ་དྲག་གི་ཚོགས་འདུ་སྐོང་སོང་། ཚོགས་འདུའི་ཐོག་ང་དང་གྲྭ་བ་གཞན་གསུམ་ལས་འགུལ་སྣེ་འཁྲིད་པ་དང་རྒྱལ་དར་སྒྲེང་མཁན་ཡིན་པའི་མིང་འདོན་བྱས་འདུག ང་ཚོས་མགོ་བཏགས་བྱས་ཀྱང་རྗེས་སུ་ཉེས་ཆད་ལྕི་མོ་ཡོད་པ་བཤད་མ་དགོས་པ་ཡིན་སྟབས། ངེད་ཅག་གྲྭ་བ་ ༤ དགོན་པའི་རྒྱབ་རིའི་ནགས་གསེབ་བརྒྱུད་རི་བྱོལ་དུ་ཕྱིན་པ་ཡིན། ཉིན་ ༡༥ ཙམ་ལ་དགོན་པ་དང་བར་ཐག་རིང་བའི་རི་ཁུག་ཅིག་ཏུ་བསྡད་པ་ཡིན། ཉིན་ཞིག་ང་ཚོའི་རྩམ་པ་ཚར་སོང་བས། ངའི་རོགས་པ་བསྟན་འཛིན་རྒྱ་མཚོ་ཆེ་ཆུང་གཉིས་གསང་སྟབས་ཀྱིས་ཡུལ་ལ་རྩམ་པ་ལེན་དུ་ཕྱིན་སྐབས། བསྟན་འཛིན་རྒྱ་མཚོ་ཆེ་བའི་སྤུན་མཆེད་ཀྱི་བུ་གཉིས་རྒྱ་གཞུང་གིས་འཛིན་བཟུང་བྱས་ཡོད་འདུག སྐབས་དེར་སྤུན་མཆེད་ཀྱིས་ཀྱང་རྒྱ་ནག་གི་ལག་འོག་ནས་བྲོས་ཀྱང་མཐར་ཐབས་མེད་པ་དང་། མི་གཅིག་གི་ཆེད་དུ་མི་གཉིས་ལ་ཁྲིམས་ཆད་ཕོག་ན་ཡག་པོ་མེད་ཚུལ་བཤད་འདུག་ལ། ཁོང་གཉིས་མགོ་བཏགས་པ་ཡིན་ན། དགོན་པའི་བླ་མ་ཞིག་གིས་རོགས་རམ་འོག་སྒོར་མོའི་ཆད་པ་ལས་བཙོན་འཇུག་ཁྲིམས་ཆད་མི་གཅོད་པའི་སྐོར་སོགས་བཤད་འདུག ཁོང་གཉིས་ཚུར་ཡོང་ནས་ང་ཚོར་གནས་ཚུལ་དེ་དག་བཤད་རྗེས་རྒྱ་གཞུང་ལ་མགོ་འདོག་ཞུ་རུ་ཕྱིན་སོང” ཞེས་ངོ་སྤྲོད་གནང་བྱུང་།

ཁོང་གིས་མུ་མཐུད་དུ་བརྗོད་དོན། “ ཕྱིས་སུ་རྒྱ་ནག་གཞུང་གིས་མི་སུ་ཞིག་གིས་ང་དང་སྐལ་བཟང་ཕྱོགས་གླང་གཉིས་རྩིས་སྤྲོད་བྱས་ན་རྒྱ་སྒོར་ཁྲི་ ༡ སྤྲོད་རྒྱུའི་གསལ་བསྒྲགས་བཀྲམས་འདུག དེ་ནས་ངེད་གཉིས་རི་སྒང་དང་གྲོག་རོང་། ནགས་ཚལ་སོགས་སུ་ཟླ་ ༥ ཙམ་ལ་ཡིབ་སྡོད་བྱས་པ་ཡིན་ལ། ཉིན་ཞིག་ལྟོ་སློང་དུ་ཕྱིན་ཏེ་ངེད་གཉིས་ཁ་འཐོར་སོང་། དེ་ནི་ཀན་སུའུ་དང་སི་ཁྲོན་གྱི་ས་མཚམས་ཤིག་རེད། དེ་ནས་ང་རང་གཅིག་པུ་སི་ཁྲོན་མཛོ་དགེ་དང་ཁྲོ་ཆུ་བཅས་འབྲོག་ཁུལ་དུ་སློང་མོ་རྒྱག་བཞིན་ ༢༠༡༠ ལོར་དཀར་མཛེས་བྲག་མགོ་འབྲོག་ཁུལ་དུ་འབྱོར་སོང་། དེ་གའི་ཁྱིམ་ཚང་ཞིག་ནས་ང་རང་གིས་ཉིན་རེར་རྒྱ་སྒོར་ ༡༠ ཡི་གླ་བྱས་ཏེ་ཟླ་ཁ་ཤས་བསྡད་པ་ཡིན། དེའི་རྗེས་ཆབ་མདོ་དང་ཀོང་པོ་སོགས་བརྒྱུད་དེ་སློང་མོ་བྱེད་བཞིན་ལྷ་སར་བསླེབས་སོང་། ལྷ་ས་ནས་ཐབས་ཤེས་འདྲ་མིན་བྱས་ཏེ་ལམ་འཁྲིད་པ་ཞིག་ལ་རྒྱ་སྒོར་ ༢༥༠༠༠ སྤྲད་དེ་གོམ་པ་བརྒྱབ་ནས་རྒྱ་གར་ལ་ཡོང་བ་ཡིན” ཅེས་དང་། ཁོང་གིས་མུ་མཐུད་དུ། “ ཕྱིས་སུ་ང་རང་ལྷ་སར་ཐོན་སྟེ་ཕྱིར་གྲོགས་པོ་ཞིག་ལ་འབྲེལ་བ་བྱས་སྐབས་བསྟན་འཛིན་རྒྱ་མཚོ་ཆེ་ཆུང་གཉིས་ལ་ཁྲིམས་ཐག་བཅད་ཡོད་པ་ལས། སྐལ་བཟང་ཕྱོགས་གླང་གར་ཡོད་ཤེས་མ་སོང་ལ། ངའི་ནང་མི་ཚོར་འཇིགས་སྐུལ་བྱས་ཏེ། ངེད་གཉིས་རྩིས་སྤྲོད་བྱེད་དགོས་ཚུལ་བརྗོད་ཡོད་པ་མ་ཟད། གལ་སྲིད། ངེས་གཉིས་རྩིས་སྤྲོད་མ་བྱས་ཚེ་ངའི་སྤུན་མཆེད་ལས་ཁུངས་ནས་གནས་དབྱུང་གཏོང་རྒྱུ་ཡིན་ཚུལ་ཡང་བརྗོད་འདུག ད་ཆར་ང་ཡོང་སའི་དགོན་པའི་ནང་གཏན་འཇགས་གྲྭ་བ་ ༣༠༠ ལས་ལྷག་བསྡད་མི་ཆོག་པའི་བཀའ་རྒྱ་བཏང་འདུག” ཅེས་བརྗོད་བྱུང་།

གསར་འགོད་པ། དོན་གོ

༼ བོད་ཀྱི་དུས་བབ་ཚགས་པར་ལས་འདིར་བཀོད། ༽