རྒྱལ་ཚོགས་ཀྱི་ཐག་གཅོད་དེའི་རྗེས་སུ་དབྱིན་ཇིའི་ཕྱི་སྲིད་དྲུང་ཆེ་ཝེ་ལེམ་(William Hague) གྱིས། ཐག་གཅོད་དེ་ཡིས་ལེ་བྷེ་ཡའི་འཕོ་འགྱུར་ལ་ཕན་ནུས་གསར་པ་ཞིག་སླེབས་ཡོད་པར་བརྗོད་འདུག་ལ། དབྱིན་ཇིའི་དངུལ་ཁང་ནང་བཀག་བསྡོམས་བྱས་ཡོད་པའི་ལེ་བྷེ་ཡའི་ཕྱི་དངུལ་དབྱིན་སྒོར་ཐེར་འབུལ་ ༦་༥ ཡོད་པ་ཕྱིར་སྤྲོད་བྱ་རྒྱུ་ཡིན་པ་བསྒྲགས་འདུག དེ་བཞིན་ཨ་རིའི་གཞུང་གིས་ཀྱང་གསལ་བསྒྲགས་ཤིག་སྤེལ་ཏེ། ཨ་རིས་ལེ་བྷེ་ཡའི་མི་མང་ལ་རྒྱབ་སྐྱོར་བྱ་རྒྱུའི་ཆོད་སེམས་རྒྱུན་སྐྱོང་བཞིན་པ་ལྟར། ཨ་སྒོར་ཐེར་འབུམ་༣༠ཙམ་ལེ་བྷེ་ཡ་བསྐྱར་གསོའི་ཆེད་ཕྱིར་སྤྲོད་བྱ་རྒྱུ་ཡིན་པར་བརྗོད་འདུག
ཉེ་སྔོན་ལེ་བྷེ་ཡའི་གཞུང་གསར་པའི་འབོད་སྐུལ་ལྟར་རྒྱལ་ཚོགས་ཀྱིས་ཨ་རི་དང་དབྱིན་ཇི་ལ། ལེ་བྷེ་ཡའི་བཀག་དངུལ་གང་འཚམས་རེ་ཕྱིར་སྤྲོད་བྱ་རྒྱུར་རེ་སྐུལ་བྱས་ཡོད་ལ། ཐེངས་འདིར་ཨ་རི་དང་དབྱིན་ཇི་གཙོས་པའི་སྲིད་གཞུང་དང་རྒྱལ་སྤྱིའི་དངུལ་ཁང་སོགས་སུ་ལེ་བྷེ་ཡའི་བཀག་དངུལ་ཡོད་རིགས་ནས་རོགས་སྐྱོར་སླད་ཕྱིར་སྤྲོད་བྱ་དགོས་པའི་ཐག་གཅོད་བྱས་པ་ཞིག་ཡིན་འདུག་ལ། ལེ་བྷེ་ཡའི་རྡོ་སྣུམ་ཕྱིར་འཚོང་གི་ལམ་ཁ་ཡང་རིམ་བཞིན་རྒྱུན་ལྡན་དུ་གཏོང་རྒྱུ་ཡིན་འདུག
འདི་ལོའི་ལེ་བྷེ་ཡའི་ཟིང་འཁྲུག་བྱུང་རྗེས་རྒྱལ་ཚོགས་ཀྱིས་གྷ་ཌ་ཧྥེའི་གཞུང་གི་ཕྱི་འབྲེལ་ཐད་འགོག་རྐྱེན་གྱི་གྲོས་ཆོད་བཞག་སྟེ། ལེ་བྷེ་ཡའི་ཕྱིར་འཚོང་རྡོ་སྣུམ་ཉོ་མཚམས་བཞག་པ་དང་། རྒྱལ་སྤྱིའི་སྲིད་གཞུང་དང་དངུལ་ཁང་ཁག་ཏུ་ཡོད་པའི་ལེ་བྷེ་ཡའི་ཕྱི་དངུལ་བཀག་བསྡོམས་བྱས་ཡོད།
གསར་འགོད་པ། བནྡེ་སྐྱབས།
