ད་ལོའི་ཕྱི་ཟླ་གཉིས་པར་ཉིན་གྲངས་བཅོ་ལྔའི་དུས་ཡུན་ལས་མེད་པའི་སྐྱབས་བཅོལ་ལག་འཁྱེར་ཞིག་བཟོས་ཡོད་རིགས་ཚོར། རྒྱ་གར་དབུས་གཞུང་གིས་ཕྱི་ལོ་ ༢༠༡༢ ཟླ་ ༦ ཚེས་ ༣༠ བར་དུས་ཚོད་འཕར་འགྱང་ཞུ་ཆོག་པའི་བཀའ་འཁྲོལ་ཞིག་བསྩལ་ཡོད་ཀྱང་། ཁྲིམས་གཞི་དེ་ཧི་མ་ཅཱལ་མངའ་སྡེ་གཞུང་སིམ་ལ་རུ་ལྷག་སྟེ་ད་དུང་ས་གནས་སུ་འབྱོར་མི་འདུག
ཟླ་སྔོན་མའི་ཚེས་ ༢༧ ཉིན་བཞུགས་སྒར་ཁུལ་གྱི་བོད་པ་སྐྱབས་བཅོལ་ལག་འཁྱེར་(RC)གྱི་དཀའ་ངལ་ཡོད་རིགས་བརྒྱ་སྐོར་ཞིག་མེག་གྷན་པདྨ་ཐང་དུ་འཛོམས་ཏེ། སྐྱབས་བཅོལ་ལག་འཁྱེར་གྱི་དཀའ་ངལ་སེལ་ཕྱོགས་སྐོར་ལ་གྲོས་བསྡུར་དང་། འདིའི་ཐོག་ལས་ཀ་བྱེད་མཁན་མི་མང་སྐུ་ཚབ་བསྐོ་བཞག བོད་མིའི་སྒྲིག་འཛུགས་དང་རྒྱ་གར་གཞུང་ལ་སྐྱབས་འཇུག་ཞུ་སྟངས་བཅས་ལ་ལས་རིམ་བསྒྲིགས་སོང་། ཁོང་ཅག་ནི་ ༢༠༠༣ ལོའི་རྗེས་སུ་བོད་ནས་འབྱོར་བ་དག་ཡིན་ཞིང་། བལ་ཡུལ་རྒྱ་གར་གཞུང་ཚབ་ཀྱིས་རྒྱ་གར་ནང་འཛུལ་ཞུགས་ཆོག་པའི་དམིགས་བསལ་དེབ་དཀར་པོ་ཞིག་སྤྲད་ཡོད་པའི་སྟེང་ “གནས་སྐོར” ཞེས་བཀོད་པ་དག་ཡིན་ཞིང་། འདི་ལོའི་ཕྱི་ཟླ་ ༢ པའི་ནང་ལག་དེབ་དཀར་པོ་དེ་བརྒྱུད་སྐྱབས་བཅོལ་ལག་འཁྱེར་( RC )ཞིག་བཟོས་ཡོད་ཀྱང་། ལག་འཁྱེར་དེ་དོ་བདག་སོ་སོར་འབྱོར་སྐབས་དུས་ཡུན་རྫོགས་རྒྱུར་ཉིན་ ༡༥ ལས་མེད་པ་དང་། བསྐྱར་དུ་དུས་ཚོད་འཕར་འགྱང་ཞུ་རྒྱུར་རྒྱ་གར་གཞུང་གིས་ཆོག་མཆན་ཐོབ་མེད།
གསར་འགོད་པས་ཉིན་དེར་གསར་དུ་བསྐོས་པའི་མང་ཚོགས་འཐུས་མི་ཚོར་སྐྱབས་བཅོལ་ལག་འཁྱེར་གྱི་དཀའ་ངལ་སེལ་ཕྱོགས་ལ་ཐབས་ཤེས་ག་རེ་བྱ་འཆར་ཡོད་མེད་དྲིས་པར། དང་པོ་བཀའ་ཤག་དང་བདེ་སྲུང་། སྐུ་སྒེར་སོགས་འབྲེལ་ཡོད་ལས་ཁུངས་ཁག་ལ་སྙན་གསེང་ཞུས་ཏེ་ཐོ་གཞུང་དུ་བཀོད་པའི་གནས་སྐོར་བཀོད་ཡོད་པ་དག་ལ་འགྱུར་བ་གཏོང་རྒྱུ་དང་། ཁོང་ཚོར་རྒྱ་གར་ནང་གི་བོད་མི་སྐྱབས་བཅོལ་པ་གཞན་དག་དང་གཅིག་མཚུངས་ཀྱི་སྐྱབས་བཅོལ་ལག་འཁྱེར་བཟོ་རྒྱུར་རེ་སྐུལ་ཞུ་འཆར་ཡོད་ཚུལ་བརྗོད་བྱུང་ལ། དེ་ལྟར་མ་བྱུང་ཚེ་བསྐྱར་དུ་མི་མང་དང་གྲོས་བསྡུར་ཐོག་ཐབས་ལམ་ག་རེ་ལ་བརྟེན་དགོས་པར་བལྟ་རྒྱུ་ཡིན་ཟེར།
ཁོང་ཅག་གིས་ད་ལོའི་ཕྱི་ཟླ་ ༩ པར་སྤྱི་འཐུས་གྲོས་ཚོགས་འཚོགས་བཞིན་པའི་སྐབས་དང་བསྟུན་ཏེ། བཀའ་ཤག་དང་སྤྱི་འཐུས། སྤྱི་འཐུས་སྒེར་རེ་རེ་བཅས་སུ་ཞུ་ཡིག་ཕུལ་ཡོད་འདུག ཉེ་ཆར་བོད་མི་མང་སྤྱི་འཐུས་ཚོགས་དྲུང་ལས་ཁུངས་ཀྱིས་ ༢༠༡༡ ཟླ་ ༡༡ ཚེས་ ༡༥ བཀོད་པའི་ཡི་གེ་ཞིག་འབྱོར་བའི་ནང་། ཕྱི་ཟླ་ ༩ པའི་ཚེས་ ༧ འཁོད་པའི་ཞུ་ཡིག་དེ་འཛིན་སྐྱོང་ལ་ཡར་ཞུ་བྱས་པའི་བཀའ་ལན་འབྱོར་པར། ད་ཆར་བཀའ་ཤག་དང་བདེ་སྲུང་ལས་ཁུངས། ལྡི་ལི་སྐུ་ཚབ་དོན་གཅོད་བཅས་ཀྱིས་རྒྱ་གར་དབུས་གཞུང་ལ་ཡིག་ངག་གཉིས་ཐོག་ནས་ཞུ་སྐུལ་ཐབས་ཤེས་གནང་དང་གནང་མུས་ཡིན་པའི་བཀའ་ལན་འབྱོར་ཡོད་པར་གསལ་འདུག
ཚོགས་དྲུང་ལས་ཁུངས་ཀྱི་བཀའ་ལན་དེ་དང་འབྲེལ་ཏེ་གསར་འགོད་པས་ཚོགས་དྲུང་དང་བཀའ་དྲུང་བཅས་སུ་ཆེད་བཅར་གྱིས་རྒྱ་གར་དབུས་གཞུང་ལ་སྐྱབས་བཅོལ་ལག་འཁྱེར་གྱི་དཀའ་ངལ་དེ་སེལ་མ་ཐུབ་པའི་འགག་རྩ་གང་ལ་ཐུག་ཡོད་མེད་བཅས་བཀའ་འདྲི་ཞུས་པར། གནས་སྐབས་རིང་དམིགས་བསམ་བཀའ་ལན་གང་ཡང་མེད། མི་མང་གི་དཀའ་ངལ་དེ་དངོས་ཡོད་ཡིན་པ་ལྟར། ཐབས་ཤེས་དང་ཡར་ཞུ་བྱེད་མུས་ཡིན་པ་ལས། བཙན་བྱོལ་བོད་མིའི་སྒྲིག་འཛུགས་ཀྱི་ངོས་ནས་རྒྱ་གར་གཞུང་ལ་འབོད་སྐུལ་ཞུ་རྒྱུ་ལས་བཀའ་གཏོང་ཐབས་མེད་པ་མང་ཚོགས་ཀྱིས་ཤེས་དགོས་པ་རེད་ཟེར།
བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག་ལ་བཅར་འདྲི་ཞུས་པར། ཁོང་གིས་ “ད་ལྟའི་ཆར་ལག་འཁྱེར་དུས་འགྱང་མེད་པའི་གནད་དོན་དེའི་ཐད་རྒྱ་གར་དབུས་གཞུང་གི་ཐག་གཅོད་ཡི་གེ་ཞིག་ཧི་མཱ་ཅལ་མངའ་སྡེ་གཞུང་(Shimla) ལ་བཏང་འདུག ང་ཚོས་མངའ་སྡེ་གཞུང་ལ་གང་མགྱོངས་ས་གནས་སུ་གཏོང་གནང་པའི་འབོད་སྐུལ་ཞུས་ཡོད། ཐག་གཅོད་དེ་ནི་གནས་སྐོར་པའི་ཐོ་གཞུང་ནང་ཐེབས་མཁན་ཚོར་སྐྱབས་བཅོལ་ལག་འཁྱེར་ཞིག་བཟོས་ཡོད་པ་ ༢༠༡༡ ཟླ་ ༣ ཚེས་ ༣༡ ནས་དུས་ཡུན་རྫོགས་ཏེ་བསྐྱར་དུ་དུས་ཡུན་འཕར་འགྱང་བྱས་མེད་རིགས་ ༢༠༡༢ ཟླ་ ༦ ཚེས་ ༣༠ པར་དུས་འགྱང་ཆོག་མཆན་ཐོབ་ཡོད་པ་ཞིག་རེད།” ཅེས་དང་། ད་སྔ་རྒྱ་གར་གཞུང་ལ་ཡར་ཞུ་བྱས་པའི་བཙན་བྱོལ་བོད་མིའི་དཀའ་ངལ་རིགས་ཡ་མེད་བཏང་མྱོང་མེད་སྟབས། སྔ་ཕྱི་ཙམ་མ་གཏོགས་དཀའ་ངལ་འདི་སེལ་ཐུབ་ངེས་ཡིན་པར་གསུངས་སོང་།
ཕྱི་ལོ་ ༢༠༠༣ ཟླ་ ༥ ཚེས་ ༣༠ རྗེས་སུ་རྒྱ་གར་ནང་འབྱོར་རིགས་ལ་བལ་ཡུལ་རྒྱ་གར་གཞུང་ཚབ་ཀྱིས་ལག་དེབ་དཀར་པོ་ཞིག་སྤྲད་ཡོད་པའི་སྟེང་། སྐྱབས་བཅོལ་དང་གནས་སྐོར། ཤེས་ཡོན། གཞན་ཞེས་སྡེ་ཚན་ ༤ རུ་དབྱེ་སྟེ་ཐོ་འགོད་བྱས་ཡོད་ལ། བར་སྐབས་ཤིག་ནས་བོད་ནས་འབྱོར་བ་མང་ཆེ་བར་གནས་སྐོར་སྡེ་ཚན་ནང་ཐོ་འགོད་བྱས་ཡོད་པ་མ་ཟད། སློབ་ཕྲུག་དང་ཆབ་སྲིད་བཙོན་ཟུར་དག་གི་ལག་དེབ་སྟེང་དུའང་གནས་སྐོར་ཞེས་བཀོད་ཡོད་འདུག སྔ་ལོར་བཞུགས་སྒར་ཁུལ་གྱི་གནས་སྐོར་པའི་ཐོ་གཞུང་ནང་མིང་ཐོ་ཐེབས་ཡོད་པའི་མི་གྲངས་ ༥༠༠ ལྷག་འདུ་འཛོམས་ཀྱིས་བཀའ་ཤག་དང་། སྤྱི་འཐུས་ལྷན་ཁང་། བདེ་སྲུང་སོགས་སུ་བཅར་ཏེ་སྐྱབས་བཅོལ་ལག་འཁྱེར་རག་ཐབས་ལ་འབད་བརྩོན་རིམ་པར་བྱས་མཐར། འདི་ལོའི་ཕྱི་ཟླ་ ༢ པའི་ནང་གློ་བུར་དུ་གསལ་བརྡ་ཞིག་འབྱོར་ཏེ། མི་འགྱང་བར་བཟོ་རྒྱུ་ཡིན་ཚུལ་དང་། པར་དང་མཛུབ་ཐེལ། སྣེ་ལེན་ཁང་གི་འབྱོར་ཐོ་སོགས་གྲ་སྒྲིག་དགོས་པའི་གནས་ཚུལ་ཐོན་ཞིང་། ལག་འཁྱེར་དེ་བཟོ་མགོ་བརྩམས་ཏེ་ཟླ་གཅིག་ལས་མ་འགོར་བར་དོ་བདག་སོ་སོའི་ལག་ཏུ་རག་སྐབས། དུས་ཡུན་རྫོགས་རྒྱུར་ཉིན་ ༡༥ ལས་མེད་པ་མ་ཟད། དེ་མ་ཐག་རྒྱ་གར་འབྲེལ་ཡོད་ལས་ཁུངས་སུ་བཅར་པར་དུས་ཡུན་ཕར་འགྱང་གི་ཆོག་མཆན་ཡང་སྤྲད་མེད།
གསར་འགོད་པ། བནྡེ་སྐྱབས།
༼བོད་ཀྱི་དུས་བབ་ཚགས་པར་ལས་འདིར་བཀོད།༽
