ཐེག་མཆོག་དབུ་མ་ཆེན་པོའི་བགྲོ་གླེང།

དེ་རིང་ཕྱི་ཚེས་ ༢༠ ཉིན་གྱི་ཞོགས་པའི་དུས་ཚོད་ ༩ པའི་སྟེང་འཕགས་ཡུལ་ཇོ་ནང་འགྲོ་ཕན་ལྷན་ཚོགས་ཀྱིས་གོ་སྒྲིག་འོག་གནས་མཆོག་རྡོ་རྗེ་གདན་དུ་རྒྱལ་བ་ཀུན་གྱི་ངེས་གསང་ཐེག་མཆོག་དབུ་མ་ཆེན་པོའི་བགྲོ་གླེང་སྐབས་དང་པོའི་མཛད་སྒོ་དངོས་སུ་དབུ་འཛུགས་གནང་ཡོད་ཅིང་། ཐེངས་འདིའི་བགྲོ་གླེང་སྟེང་འཕགས་ཡུལ་སིམ་ལ་ཇོ་ནང་མ་དགོན་གྱི་རྡོ་རྗེ་སློབ་དཔོན་མཁན་ཟུར་ཨ་ལགས་ཆོས་ཀྱི་སྣང་བ་མཆོག་གཙོས། སིམ་ལ་མ་དགོན་གྱི་མཁན་རིན་པོ་ཆེ་ཀུན་དགའ་རིན་ཆེན་ལགས་དང་། བོད་ནས་གསར་དུ་ཕེབས་པའི་ཇོ་ནང་པའི་དགོན་སྡེ་ཁག་ཅིག་གི་མཁན་པོ་དང་བླ་སྤྲུལ་བཅས་དང་། གཞན། ལྷོ་ཕྱོགས་གདན་ས་ཁག་ཏུ་ཡོད་པའི་ཇོ་ནང་པའི་གྲྭ་རྒྱུན་ཡིན་པའི་བགྲོ་གླེང་བ་ ༡༢ དང་། སིམ་ལ་ཇོ་ནང་མ་དགོན་གྱི་བགྲོ་གླེང་བ་ ༡༡ ། བལ་ཡུལ་ཇོ་ནང་དགོན་ནས་ཕེབས་པའི་བགྲོ་གླེང་བ་ ༡༡ བཅས་བསྡོམས་མི་ ༡༠༠ ལྷག་འདུ་འཛོམས་བྱུང་ཡོད།

དེ་རིང་གི་མཛད་སྒོའི་ཐོག་མར་སྐུ་མགྲོན་དང་བགྲོ་གླེང་བ་རྣམ་པ་ཚོགས་ཁང་དུ་ཞབས་སོར་འཁོད་པ་དང་། སྐུ་པར མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་དང་འབྲས་སིལ་འདེགས་འབུལ། འཕགས་ཡུལ་ཇོ་ནང་འགྲོ་ཕན་ལྷན་ཚོགས་ཀྱི་སྐབས་དང་པོའི་དབུས་རྒྱུན་ཚོགས་གཙོ་ཚངས་དབྱངས་རྒྱ་མཚོ་ལགས་ཀྱིས་བགྲོ་གླེང་གི་བྱུང་རིམ་དང་འཚོགས་སྟངས་སྐོར་ངོ་སྤྲོད་གནང་རྗེས། འཕགས་ཡུལ་སིམ་ལ་ཇོ་ནང་མ་དགོན་གྱི་མཁན་རིན་པོ་ཆེ་ཀུན་དགའ་རིན་ཆེན་ལགས་ཀྱིས། དཔལ་རྒྱལ་བ་ཇོ་ནང་པའི་བསྟན་པ་འདི་ཉིད་ལུང་རྟོགས་ཀྱི་སྒོ་ནས་འཛིན་རྒྱུ་དང་། གཞན་བགྲོ་གླེང་སྐབས་གཞུང་ཆེན་ཁག་གི་འགལ་མཚམས་ནས་ཟབ་དཔྱད་བྱ་དགོས་ཚུལ་གྱི་བཀའ་སློབ་ལམ་སྟོན་གནང་ཡོད་པ་མ་ཟད། འཕགས་ཡུལ་ཇོ་ནང་མ་དགོན་གྱི་རྡོ་རྗེ་སློབ་དཔོན་མཁན་ཟུར་ཨ་ལགས་ཆོས་ཀྱི་སྣང་བ་མཆོག་གིས། དཔལ་རྒྱལ་བ་ཇོ་ནང་པའི་དབུ་མ་གཞན་སྟོང་གི་བརྒྱུད་རིམ་དང་། ད་ལྟའི་གཞན་སྟོང་གི་དར་རིམ་སོགས་ངོ་སྤྲོད་དང་། བགྲོ་གླེང་ཇི་ལྟར་བྱ་ཕྱོགས་ཀྱི་སྐོར་ལ་ལམ་སྟོན་བཀའ་སློབ་བཅས་གནང་ཡོད།

ཐེངས་འདིའི་ཇོ་ནང་འགྲོ་ཕན་ལྷན་ཚོགས་ཀྱི་གོ་སྒྲིག་གནང་བཞིན་པའི་ཐེག་མཆོག་དབུ་མ་ཆེན་པོའི་བགྲོ་གླེང་སྐབས་དང་པོ་དེ་རིང་ནས་ཉིན་གསུམ་རིང་ཚོགས་འཆར་ཡོད་ཅིང་། དེ་ཡང་བགྲོ་གླེང་གི་ཉིན་དང་པོར་ཨ་ལགས་ཆོས་ཀྱི་སྣང་བ་མཆོག་དང་རྒན་མེད་འོད་ཟེར་རྣམ་གཉིས་ཀྱིས་གཙོ་སྐྱོང་འོག་རབ་བྱེད་དང་པོའི་འགལ་མཚམས་དག་ལ་བགྲོ་གླེང་དང་དྲི་བ་དྲིས་ལན་གནང་རྒྱུ་ཡིན་པ་དང་། གཉིས་པར་མཁན་པོ་ཀུན་དགའ་རིན་ཆེན་གྱིས་གཙོ་སྐྱོང་འོག་རབ་བྱེད་གཉིས་པའི་སྐོར་བགྲོ་གླེང་གནང་རྒྱུ། ཉིན་མཐའ་མར་མཁན་པོ་རིན་ཆེན་རྒྱ་མཚོ་དང་རྒན་ཀུན་དགའ་འཚམས་ཆུང་གཉིས་ཀྱིས་གཙོ་སྐྱོང་འོག་རབ་བྱེད་གསུམ་པ་བགྲོ་གླེང་གནང་རྒྱུ་ཡིན་པ་མ་ཟད། ཉིན་གསུམ་གྱི་དགོང་དྲོའི་ཆུ་ཚོད་ ༦།༣༠ ནས་ ༨ བར་རྩོད་པ་བཅས་གོ་སྒྲིག་གནང་རྒྱུ་ཡིན་འདུག

གསར་འགོད་པ། དོན་གོ