ཨེ་རག་ནང་འགས་གཏོར་བྱུང་འདུག

གཟའ་ཕུར་བུའི་ཉིན་ཨེ་རག་རྒྱལ་ས་པ་ཀི་ཏ་ནང་བསྟུད་མར་འགས་གཏོར་དོན་རྐྱེན་བྱུང་སྟེ། མི་ ༦༣ རྐྱེན་འདས་དང་མི་ ༡༨༠ ལྷག་ལ་རྨས་སྐྱོན་ཕོག་ཡོད་འདུག

ཕྱི་ཚེས་ ༢༢ ཉིན་ཨེ་རག་རྒྱལ་ས་པ་ཀི་ཏ་ནང་བསྟུད་མར་ས་གནས་ཁག་མ་འདྲ་བ་ ༡༣ ལ་འགས་གཏོར་དོན་རྐྱེན་བྱུང་སྟེ། མི་ ༦༣ རྐྱེན་འདས་དང་མི་ ༡༨༠ ལྷག་ལ་རྨས་སྐྱོན་ཕོག་ཡོད་འདུག   འགས་གཏོར་དོན་རྐྱེན་བྱུང་ཡུལ་གཙོ་བོ་ནི་ཞའེ་ཁྲའེ་མུ་སི་ལིམ་ (ShiiteMuslims) ཆོས་ལུགས་ཕྱོགས་གཏོགས་མི་མང་འདུས་སྡོད་ཀྱི་ས་གནས་ཁག་ཡིན་པ་རེད། འདི་ནི་ཉེ་ ཆར་ཨེ་རག་ནང་ནས་ཨ་རིའི་དམག་མི་ཕྱིར་འཐེན་བྱས་པའི་རྗེས་ཀྱི་འགས་གཏོར་དོན་ རྐྱེན་ཆེ་ཤོས་དེ་ཆགས་ཡོད་པ་དང་། ཐེངས་འདིའི་དོན་རྐྱེན་གྱིས་ཨེ་རག་གི་ཆབ་ སྲིད་གནས་སྟངས་ལ་མུ་མཐུད་དཀའ་ངལ་འཕྲད་རྒྱུ་ཡིན་པ་མངོན་ཡོད་པ་རེད། 

གསར་ལམ་ཁག་ཏུ་གནས་ཚུལ་ཐོན་པ་ལྟར་ན། ད་ལྟ་ཞའེ་ཁྲའེ་མུ་སི་ལིམ་ཆོས་ལུགས་ཕྱོགས་གཏོགས་མགོ་ཁྲིད་ཀྱི་དབང་འཛིན་འོག་ཡོད་པའི་ཨེ་རག་སྲིད་གཞུང་གིས། སན་ནེའུ་མུ་སི་ལིམ་ (SunniMuslims) ཆོས་ལུགས་ཕྱོགས་གཏོགས་ནས་ཡིན་པའི་སྲིད་བློན་གཞོན་པ་ཁྲའེ་རེ་ཁི་ (Tariq) ལ་སྲིད་གཞུང་གི་མགོ་ཁྲིད་གཞན་དག་ལྐོག་གསོད་ཀྱི་ངན་ཇུས་ཡོད་སྐོར་བརྗོད་དེ། ཉེ་ཆར་བདའ་འདེད་འཛིན་བཟུང་བྱེད་དགོས་པའི་བཀའ་རྒྱ་བཏང་ཡོད་པ་རེད། ཡིན་ནའང་། ཕྱི་ཚེས་ ༢༡ ཉིན་སྲིད་བློན་གཞོན་པ་ཁྲའེ་རེ་ཁི་ཡིས། “ཟླ་འདིའི་ནང་ཨ་རིའི་དམག་མི་ཨེ་རག་ནས་ཕྱིར་འཐེན་གྱི་གོ་སྐབས་དང་བསྟུན་ནས། སྲིད་བློན་མའེ་ལིས་ཁི་ (Nouri al-Maliki) ཡིས་རང་ཉིད་ཀྱི་དབང་ཤུགས་སྲ་བརྟན་བཟོ་ཆེད་རེད། ” ཅེས་བརྗོད་དེ། ཐེངས་འདིར་ཁོ་རང་འཇུ་བཟུང་གི་བཀའ་རྒྱ་བཏང་བ་དེ་ནི་ཆབ་སྲིད་ཀྱི་གཡོ་ཇུས་ཤིག་ཡིན་པ་དང་། ད་ལྟ་སྲིད་བློན་མའེ་ལིས་ཁི་ཡིས་བདེ་འཇགས་དམག་དཔུང་དང་གསང་བའི་བདེ་སྲུང་ལ་སྟངས་འཛིན་བྱས་ཡོད་པར་མ་ཟད། མི་མང་གིས་འོས་འདེམས་བྱས་པའི་མགོ་ཁྲིད་དག་ལ་འབྲེལ་འདྲིས་བྱེད་མི་མཆོག་པའི་དམ་དྲག་ཀྱང་བཟོས་ཡོད་ཚུལ་དང་། གཞན་ཡང་། ཨ་རི་གཞུང་གིས་ཨེ་རག་ནང་ཡང་དག་པའི་དམངས་གཙོའི་སྲིད་གཞུང་ཞིག་འཛུགས་ཐུབ་མེད་པ་དེས། ཨེ་རག་ནང་མ་འོངས་པར་ཨེ་རན་གྱི་ཤུགས་རྐྱེན་བསྐྱར་དུ་སླེབས་རྒྱུ་ཡིན་སྐོར་བརྗོད་ཡོད་པ་རེད།  

ད་ལྟ་ཨེ་རག་སྲིད་བློན་གཞོན་པ་ཁྲའེ་རེ་ཁི་ནི་ཆབ་སྲིད་ལམ་ལུགས་ཕྱེད་རང་སྐྱོང་འོག་ཡོད་པའི་ཨེ་རག་བྱང་ཕྱོགས་ས་ཁུལ་གྱི་མངའ་སྡེ་ཁོར་ཌེ་ཞི་ (Kurdish) ནང་བྲོས་བྱོལ་དུ་ཕྱིན་ཡོད་པ་རེད། ཕྱི་ཚེས་ ༢༡ ཉིན་གྱི་སྔ་དྲོ་ཨེ་རག་སྲིད་བློན་མའེ་ལིས་ཁི་ཡིས་རྒྱལ་ས་པ་ཀི་ཏར་གསར་འགོད་ལྷན་ཚོགས་ཤིག་གི་ཐོག   མངའ་སྡེ་ཁཱོར་ཌེ་ཞི་ཡིས་ཁྲའེ་རེ་ཁི་འཛིན་བཟུང་གིས་ཕྱིར་རྩིས་སྤྲོད་བྱེད་དགོས་པ་བརྗོད་འདུག   

གསར་འགོད་པ། ཚེ་རིང་རྒྱལ།