ཕྱི་ཚེས་ ༢༦ ཉིན་གྱི་རྒྱལ་སྤྱིའི་གསར་ལམ་ཁག་ཏུ་ཐོན་པའི་གནས་ཚུལ་ནང་། འདི་ལོ་བྷེན་ལཱ་ཊན་གཙོས་པའི་ཨོལ་ཁཱ་ཊའི་གཏེ་བོ་ཁག་ཅིག་པཱ་ཀི་སི་ཐན་དང་ཨབ་གྷན་ནང་དམར་གསོད་དང་འཛིན་བཟུང་བྱས་སྟབས། ད་ཆར་ཨབ་གྷན་དང་པཱ་ཀི་སི་ཐན་ནང་གི་ཨོལ་ཁཱ་ཊའི་འཇིགས་སྐུལ་པ་རྣམས་ཀྱི་སྟོབས་ཤུགས་ཉམ་ཉེས་སུ་གྱུར་ཏེ། དཀྱིལ་ཤར་ཡུལ་དང་བྱང་ཨ་ཧྥི་རི་ཀའི་ནང་གནས་སྤོར་བྱེད་ཀྱི་ཡོད་འདུག
དབྱིན་ཡུལ་གྱི་གྷར་ཌན་ (The Guardian) གསར་ཤོག་གིས་སྤེལ་པའི་གནས་ཚུལ་ཞིག་གི་ནང་། དབྱིན་ཇིའི་དཔོན་རིགས་ཚོས་ ༢༠༡༢ ལོར་པཱ་ཀི་སི་ཐན་ནང་ཡོད་པའི་ཨོལ་ཁཱ་ཊའི་འཇིགས་སྐུལ་རིང་ལུགས་ཀྱི་སྒྲིག་འཛུགས་རྩ་གཏོར་གཏོང་ཐུབ་པར་ཡིད་ཆེས་བྱེད་ཀྱི་ཡོད་པར་བཀོད་འདུག
དབྱིན་ཇིའི་གསང་བའི་ལས་ཁུངས་ཀྱི་མི་སྣ་ཞིག་གིས་བརྗོད་པའི་གནས་ཚུལ་ལྟར་ན། པཱ་ཀི་སི་ཐན་ནང་གི་ཨོལ་ཁཱ་ཊ་སྒྲིག་འཛུགས་ཀྱི་མཐོ་རིམ་གཏེ་བོ་གཉིས་ད་ཆར་ལེ་བྷེ་ཡའི་ནང་འཛུལ་ཟིན་པ་དང་། གཞན་ཁག་ཅིག་ཀྱང་ཨབ་གྷན་དང་པཱ་ཀི་སི་ཐན་ནས་ཐོན་ཟིན་ཀྱང་། ས་ཆ་གང་ཞིག་ཏུ་འགྲོ་འཆར་ཡིན་མིན་ཁ་གསལ་ཤེས་རྟོགས་ཐུབ་མེད་ལ། བྱང་ཨ་ཧྥི་རི་ཀའམ་དེའི་ཉེ་འཁོར་གྱི་དཀྱིལ་ཤར་ཡུལ་ཞིག་ཏུ་བསླེབས་ཡོད་པར་ཚོད་དཔག་བྱེད་ཀྱི་ཡོད་པ་མ་ཟད།བྱང་ཨ་ཧྥི་རི་ཀ་ནི་ཁ་ཆེ་འཇིགས་སྐུལ་རིང་ལུགས་པའི་རྟེན་གཞི་གསར་པ་ཞིག་ཆགས་རྒྱུའི་ཉེན་བརྡ་བཏང་ཡོད་འདུག
གསར་འགོད་པ། བནྡེ་སྐྱབས།
