གཟའ་ཟླ་བའི་ཉིན་རྒྱ་ནག་ཀོས་ཡཱང་ཁྲིམས་ཁང་གིས་གཞུང་དང་ལྟ་བ་ཐ་དད་འཛིན་མཁན་གྱི་འགྲོ་བ་མིའི་ཐོབ་ཐང་དོན་གཉེར་བ་ཁྲིན་ཞཱིས་ལ། “ རྒྱལ་ཁབ་ཀྱི་སྲིད་དབང་མགོ་རྟིང་སློག་མཁན ” གྱི་ཉེས་མིང་འོག་ལོ་ ༡༠ ཁྲིམས་འཇུག་བཙོན་ཐག་བཅད་འདུག
ཕྱི་ཟླ་ ༡༡ ཚེས་ ༢༩ ཉིན་རྒྱ་གཞུང་གིས་གཞུང་དང་ལྟ་བ་དད་འཛིན་མཁན་ཀོས་ཀྲུག་ས་ཁུལ་གྱི་འགྲོ་བ་མིའི་ཐོབ་ཐང་དོན་གཉེར་བ་ཁྲིན་ཞཱིས་བསྐྱར་དུ་འཛིན་བཟུང་བྱས་ཡོད་པ་དང་། ཟླ་འདིའི་ཚེས་ ༢༦ ཉིན་རྒྱ་ནག་ཀོས་ཡཱང་ཁྲིམས་ཁང་དུ་ཆུ་ཚོད་འགའི་རིང་སྐབས་འཕྲལ་གྱི་ཁྲིམས་ར་ཚོགས་ཏེ། རྒྱལ་ཁབ་ཀྱི་སྲིད་དབང་མགོ་རྟིང་སློག་མཁན་གྱི་ཉེས་མིང་འོག་ཁོང་ལ་ཡང་བསྐྱར་ལོ་༡༠བཙོན་འཇུག་ཁྲིམས་ཐག་བཅད་འདུག
འགྲོ་བ་མིའི་ཐོབ་ཐང་དོན་གཉེར་བ་ཁྲིན་ཞཱིས་ལགས་ནི་ད་ལྟ་ལོ་ ༥༧ ཡིན་པ་དང་།ཐེངས་འདིར་རྒྱ་གཞུང་གིས་ཁོང་འཛིན་བཟུང་བཙོན་འཇུག་བྱས་པའི་རྒྱུ་རྐྱེན་གཙོ་བོ་ནི། ཁོང་གིས་རྒྱ་ནག་གི་ཆབ་སྲིད་བཅོས་སྒྱུར་དང་རྒྱ་ནག་ནང་འགྲོ་བ་མིའི་ཐོབ་ཐང་ཡར་རྒྱས་གཏོང་དགོས་པའི་སྐོར་གྱི་རྩོམ་ཡིག་སྤེལ་བའི་རྐྱེན་གྱིས་ཡིན་འདུག ཁྲིན་ཞཱིས་ལགས་ནི་སྔ་ཕྱིར་ལོ་མང་རིང་རྒྱ་གཞུང་གི་བཙོན་འོག་ཏུ་བསྡད་མྱོང་ཡོད་པ་རེད། ༡༩༨༩ ལོར་རྒྱ་ནག་ཐེན་ཨཱན་མཱན་ཐང་ཆེན་དུ་དམངས་གཙོའི་ལས་འགུལ་བྱུང་སྐབས་རྒྱ་གཞུང་གིས་ཁོང་འཇུ་བཟུང་གིས་ལོ་ ༣ ཀྱི་བཙོན་འཇུག་ཁྲིམས་ཐག་བཅད་ཡོད། ཕྱི་ལོ་ ༡༩༩༥ ལོར་རྒྱལ་ཁབ་སྲིད་དབང་མགོ་རྟིང་སློག་མཁན་གྱི་ཉེས་མིང་འོག་ལོ་ ༡༠ ལ་བཙོན་འཇུག ད་ལོ་ཡང་བསྐྱར་ཉེས་མིང་དེའི་འོག་ལོ་ ༡༠ བཙོན་འཇུག་ཁྲིམས་ཐག་བཅད་འདུག
གཞན་ཡང་། འདི་ལོའི་ཟླ་ ༢ ཚེས་ ༢༠ ཉིན་རྒྱ་གཞུང་གིས་སི་ཁྲོན་གྱི་དམངས་གཙོ་དོན་གཉེར་བ་ཁྲིན་ཝེ་ལགས་འཇུ་བཟུང་བཀག་ཉར་བྱས་ཏེ། ཟླ་འདིའི་ཚེས་ ༢༣ ཉིན་རྒྱལ་ཁབ་ཀྱི་སྲིད་དབང་མགོ་རྟིང་སློག་མཁན་གྱི་ཉེས་མིང་འོག་ལོ་ ༩ བཙོན་འཇུག་ཁྲིམས་ཐག་བཅད་ཡོད་ལ། དེ་བཞིན། བཙོན་འཇུག་དུས་བཅད་རྫོགས་ལ་ཉེ་བའི་འགྲོ་བ་མིའི་ཐོབ་ཐང་དོན་གཉེར་མཁན་ཁྲིམས་རྩོད་པ་ཀོ་ཀྲི་ཧྲིན་ཡང་བཙོན་ཁང་དུ་ནང་མི་ལ་འབྲེལ་བ་བྱེད་མ་
བཅུགས་པར་གནས་ཚུལ་གང་ཡང་ཤེས་རྟོག་མེད་པར་བདུན་ཕྲག་འགར་གར་སོང་ཆ་མེད་དུ་གྱུར་རྗེས། ཕྱི་ཟླ་ ༡༢ ཚེས་ ༡༦ ཉིན་རྒྱལ་ཁབ་ཀྱི་སྒྲིག་ཁྲིམས་ལ་ངོ་ལོག་བྱས་པའི་ཉེས་མིང་འོག་བསྐྱར་དུ་ལོ་ ༣ བཙོན་འཇུག་ཁྲིམས་ཐག་བཅད་དེ་གློད་བཀྲོལ་དུས་ཡུན་འཕར་འགྱངས་བྱས་ཡོད། དེ་མིན། འདི་ལོ་ཕྱི་ཟླ་ ༦ ཚེས་ ༢༨ ཉིན་དམངས་གཙོ་དང་འགྲོ་བ་མིའི་ཐོབ་སྐོར་ལ་རྩོམ་ཡིག་སྤེལ་མཁན་ལུའོ་ཞཱན་ཝུ་ལ་ལོ་ ༡༠ རིང་ཉེན་རྟོག་པའི་ལྟ་རྟོག་འོག་འདུག་དགོས་པའི་ཁྲིམས་གཅོད་བྱས་ཏེ་རང་དབང་འགུལ་སྐྱོད་ཀྱི་ཁེ་དབང་འཕྲོག་ཡོད་པ་རེད།
གཟའ་ཟླ་བའི་ཉིན་ཇའེ་ནའེ་ཝ་ (Geneva ) རུ་མཉམ་འབྲེལ་རྒྱལ་ཚོགས་ཀྱི་འགྲོ་མ་མིའི་ཐོབ་ཐང་ལས་དོན་གྱི་ཆེས་མཐོའི་དྲུང་ཆེ་ལྕམ་ཕའེ་ལའེ་ (Pillay)ལགས་ཀྱིས་གསལ་བསྒྲགས་ཅིག་སྤེལ་བའི་ནང་། ཉེ་ཆར་རྒྱ་གཞུང་གིས་རྒྱལ་ཁབ་ཀྱི་སྲིད་དབང་མགོ་རྟིང་སློག་མཁན་གྱི་ཉེས་མིང་འོག་བཙོན་འཇུག་ཁྲིམས་ཐག་བཅད་པའི་འགྲོ་བ་མིའི་ཐོབ་ཐང་དོན་གཉེར་བ་ཁྲིན་ཞཱིས་དང་ཁྲིན་ཝེ། ཁྲིམས་རྩོད་པ་ཀོ་ཀྲི་ཧྲིན་གསུམ་དམིགས་བསལ་མིང་འདོན་བྱས་ཏེ་རྒྱ་གཞུང་ལ་སྐྱོན་བརྗོད་བྱས་ཡོད་པ་མ་ཟད། ཁོ་མོས་ “ རྒྱལ་ཁབ་ཀྱི་སྲིད་དབང་མགོ་རྟིང་སློག་མཁན་གྱི་ཉེས་མིང་ཁྲིམས་གཅོད་བྱེད་བཞིན་པ་དེ་ནི། རྒྱ་གཞུང་གིས་འགྲོ་བ་མིའི་ཐོབ་ཐང་རྡོག་རོལ་བཏང་བ་ཞིག་ཡིན་པ་མ་ཟད། རྒྱ་ནག་ནང་ཉིན་རེ་བཞིན་འགྲོ་བ་མིའི་ཐོབ་ཐང་དོན་གཉེར་བ་རྣམས་ཀྱི་ཐོག་ལ་དྲག་གནོན་གདུག་རྩུབ་བྱེད་ཤུགས་ཆེ་རུ་གཏོང་བཞིན་པའི་བདེན་དཔང་ཞིག་ཡིན། ” ཅེས་བརྗོད་འདུག
རྒྱ་གཞུང་གིས་ནམ་རྒྱུན་རྒྱལ་ཁབ་ཀྱི་སྲིད་དབང་མགོ་རྟིང་སློག་མཁན་གྱི་ཉེས་མིང་སྤྱད་དེ། རྒྱ་གཞུང་དམར་ཤོག་མགོ་ཁྲིད་ཚོའི་ནག་ཉེས་ཀྱི་བྱ་སྤྱོད་ཐེར་འདོན་བྱེད་མཁན་རྣམས་ཁྲིམས་ལ་སྦྱོར་བཞིན་ཡོད།
གསར་འགོད་པ། ཚེ་རིང་རྒྱལ།
རྒྱ་མི་ཚང་མ་མའོ། ཅའོ་དང་ཧུའོ་ནང་བཞིན་གདུག་རྩུབ་ཅན་མིན་པར་བློ་རྒྱ་ཡངས་པའི་མི་རིགས་འགའ་ཤས་མདུན་ཐོན་གནང་ཐུབ་པར་དགའ་བསུ་ཞུ་འོས་སུ་མཐོང་ལགས།