རྡོར་གདན་མཆོད་རྟེན་ཆེན་མོའི་མདུན་དུ་རྒྱལ་བ་ཇོ་ནང་པའི་སྨོན་ལམ་ཚོགས་ཆེན་ཐེངས་བཅུ་པ་དེ་ཚོགས་ཡོད་ཅིང་། ཚོགས་ཆེན་དེར་བོད་ཕྱི་ནང་གི་བླ་སྤྲུལ་ ༣༠ གཙོས་ཁྱོན་མི་ ༥༠༠༠ ལྷག་འདུ་འཛོམས་བྱུང་འདུག
ཟླ་འདིའི་ཕྱི་ཚེས་ ༢༧ ཉིན་ནས་དེ་རིང་ཕྱི་ཚེས་ ༢༩ ཉིན་བར་རྒྱ་གར་གནས་མཆོག་རྡོ་རྗེ་གདན་མཆོད་རྟེན་ཆེན་མོའི་མདུན་ཐང་དུ། དཔལ་རྒྱལ་བ་ཇོ་ནང་པའི་སྨོན་ལམ་ཆེན་མོ་ཐེངས་ ༡༠ དེ་ཚོགས་ཡོད་པ་དང་། སྨོན་ལམ་ཚོགས་ཆེན་སྟེང་བོད་ཕྱི་ནང་གི་ཇོ་ནང་པའི་བླ་སྤྲུལ་ ༣༠ གཙོས་པའི་ཆོས་རྒྱུད་རིས་མེད་ཀྱི་དགེ་འདུན་པ་དང་མང་ཚོགས་བཅས་ཁྱོན་མི་ ༥༠༠༠ ཙམ་འདུ་འཛོམས་བྱུང་འདུག
རྡོར་གདན་ཇོ་ནང་སྨོན་ལམ་གོ་སྒྲིག་ཚོགས་ཆུང་གི་ཚོགས་གཙོ་གྲྭ་ཀུན་དགའ་འཚམ་ཆུང་ལགས་ཀྱིས་བརྗོད་དོན་ལྟར་ན། གནས་མཆོག་རྡོ་རྗེ་གདན་དུ་རྒྱལ་བ་ཇོ་ནང་པའི་སྨོན་ལམ་ཚོགས་ཆེན་ཚོགས་དགོས་པའི་དམིགས་ཡུལ་གཙོ་བོ། འཛམ་གླིང་ཞི་བདེ་དང་ད་ལོར་བོད་ནང་རང་ལུས་མེར་བསྲེགས་བཏང་སྟེ། འདས་གྲོངས་སུ་ཕྱིན་པ་ཚོར་བསྔོ་སྨོན་མཆོད་འབུལ་གནང་ཆེད་ཡིན་འདུག་ལ། ཇོ་ནང་པའི་སྨོན་ལམ་ཚོགས་ཆེན་འདི་ཐོག་མར་ཕྱི་ལོ་ ༡༩༩༨ ལོར་གནས་མཆོག་རྡོ་རྗེ་གདན་དུ་དབུ་འཛུགས་གནང་བ་ནས་ལོ་ལྟར་རྒྱུན་ཆད་མེད་པར་འཚོགས་བཞིན་ཡོད་འདུག་ལ། ད་ལོའི་སྨོན་ལམ་ཆེན་མོའི་ཐོག་བོད་ནས་ཇོ་ནང་པའི་རྗེས་འཇུག་བླ་སྤྲུལ་ ༢༥ དང་། རྒྱ་གར་དང་བལ་ཡུལ་ནས་བླ་སྤྲུལ་ ༡༠ ཙམ་ཕེབས་ཡོད་འདུག
གྲྭ་ཀུན་དགའ་འཚམ་ཆུང་ལགས་ཀྱིས་བརྗོད་དོན། “སྤྱིར་ཇོ་ནང་སྨོན་ལམ་ཆེན་མོ་འདི་ཉིན་གྲངས་བདུན་རིང་འཚོགས་དགོས་ཀྱང་། ཕྱི་ཚེས་ ༣༠ ཉིན་ནས་བཟུང་མཆོད་རྟེན་མདུན་ཐང་དུ་༧གོང་ས་མཆོག་དབུ་བཞུགས་ཐོག་རིས་མེད་སྨོན་ལམ་ཆེན་མོ་འཚོགས་རྒྱུ་ཡིན་སྟབས། སྨོན་ལམ་ཉིན་གསུམ་ལས་ཚོགས་ཐུབ་ཡོད་པ་མ་རེད། ཡིན་ནའང་དེ་རིང་སྐུ་འགྱེད་སྐབས་གྲྭ་བ་ ༤༠༠༠ ཙམ་ཕེབས་འདུག་པས་ཧ་ཅང་ཡག་པོ་བྱུང་། གོ་སྒྲིག་ཚོགས་ཆུང་གི་ངོས་ནས་འདས་པའི་ཉིན་གསུམ་རིང་གྲྭ་བ་རེར་ཉིན་ལྟར་སྐུ་འགྱེད་ཧིན་སྒོར་ ༣༣༠ རེ་ཕུལ་ཡོད་ལ། དེ་ལྟར་བྱས་ན་ཉིན་རེའི་འགྲོ་སོང་ཧིན་སྒོར་འབུམ་ ༣ ལྷག་འགྲོ་ཡི་འདུག་ ” ཅེས་བརྗོད་བྱུང་།
གསར་འགོད་པས་ཁོང་ལ་འདི་ལོར་བོད་པའི་ཆོས་བརྒྱུད་ཁག་གི་བླ་ཆེན་ཚོས་ཇོ་ནང་བའི་ཆོས་བརྒྱུད་ལའང་ཆོས་བརྒྱུད་རང་སྐྱ་བ་ཞིག་ཏུ་ངོས་འཛིན་ཐོབ་པ་དེས་དམིགས་བསལ་འགྱུར་བ་གང་འདྲ་སོང་ཡོད་མེད་དྲིས་པར། “ ང་དགུ་ལོར་བོད་ཀྱི་བླ་ཆེན་ཚོ་རྒྱ་གར་དུ་སྐྱབས་བཅོལ་ལ་ཕེབས་སྐབས་ཇོ་ནང་པའི་བླ་ཆེན་ཚོ་ཕེབས་ཐུབ་མེད་སྟབས། རྒྱལ་བ་ཇོ་ནང་པ་དེ་ཆོས་བརྒྱུད་ཆེན་པོ་བཞིའི་ཁོངས་སུ་འཇོག་ཐུབ་ཡོད་པ་མ་རེད། ལོ་རྒྱུས་ཀྱི་ཐོག་ནས་ཇོ་ནང་པ་ནི་སྒྲུབ་རྒྱུད་ཤིང་རྟ་ཆེན་པོ་བརྒྱད་ཀྱི་ཁོངས་གཏོགས་ཆགས་ཡོད་པ་རེད། ད་ལོར་ཆོས་རྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱིས་ཇོ་ནང་པར་ཆོས་རྒྱུད་ཐོབ་ཐང་སྤྲོད་རྒྱུར་མོས་མཐུན་གནང་ཡོད་པ་རེད། ཆོས་རྒྱུད་ཐོབ་ཐང་སྤྲད་པ་དེར་བོད་ནང་གི་དགོན་པ་ ༦༤ ཙམ་གྱིས་དགེ་འདུན་པ་ ༡༠༠༠༠ ལྷག་དགའ་སྤྲོ་ཆེན་པོ་སྐྱེས་ཡོད་པ་རེད། ད་ལྟ་འཆར་ལོའི་སྤྱི་འཐུས་གྲོས་ཚོགས་ནང་གྲོས་ཆོད་ག་རེ་ཡོང་གི་ཡོད་མེད་ཐོག་སེམས་ཁུར་བྱེད་ཀྱི་ཡོད་ ” ཅེས་བརྗོད་བྱུང་།
སང་ཉིན་ནས་རྡོར་གདན་མཆོད་རྟེན་ཆེན་མོའི་མདུན་དུ་ཆོས་རྒྱུད་རིས་མེད་ཀྱི་སྨོན་ལམ་ཆེན་མོ་དབུ་འཛུགས་གནང་རྒྱུ་ཡིན་འདུག
རྡོར་གདན་གསར་འགོད་པ། དཔལ་ལྡན།
དགའ་འོས་པ་ཞིག་ནི. ཚོགས་གཙོས་ཁྲིམས་དང་སྒྲིག་གཞིར་འགྱུར་བ་གཏོང་བར་དུས་ཚོད་མ་བྱུང་བ་མ་གཏོག བོད་རྒྱུད་ནང་སྟན་གྱི་ཆོས་རྒྱུད་ཆེན་པ་ལྔ་དང་གཡང་དྲུང་བོན་དང་བཅས་པ་ཞེས་ལབ་ཆོག་པའི་གནས་སྟངས་ཤིག་ཆགས་སྡད་ཡོད་རེད་ཅེས་གསུང་འདུག
བཀའ་དྲིན་ཆེའོ། འཛམ་གླིང་ཞི་བདེ་ཡོང་བར་སྨོན། རྗེས་སུ་ཡི་རངས་དང་བཅས།
རྨོག་གིས་གྲོས་ར་ནས་གྲོས་གཞི་བཏོན་ན་ཞེ་ནས་ཡིན་ནོ།།
དུས་བབ་ཀྱིས་ཞེ་ཆེན་ལྡུམ་རའི་ཚོགས་གཚོའི་གསུང་བཤད་བཀོད་ཡོད་ཀྱང དེའི་སྔོན་དེ་མ་ཐག་གི་ཇོ་ནང་ལྷན་ཚོགས་དང་ དེར་ཚོགས་གཙོ་ཕེབ་ཚུལ་གང་ཡང་མེད་དོནཅི. དོན་གནས་ཐད་ནས་བཤད་ན. རྡོར་གདན་དུ་བོད་ཕྱི་ནང་གཉིས་ཀྱི་ཇོ་ནང་བའི་བླ་སྤྲུལ་གང་མང་ལྷན་འཛོམས་གྱི་ཚོགས་འདུ་འདི་འདྲ་ཐེང་དང་བོ་ལེ་ཡིནབསམ་མོ. གསར་འགོད་པ་ཚོར་སྨྲས་ཅི ཆོས་སྲིད་གཉིས་ཐད་ནས་གལ་ཆེན་ཞིག་ཏུ་འདོད་དོ
དཔལ་རྒྱལ་བ་ཇོ་ནང་བའི་སྨོན་ལམ་ཆེན་མོར་མཉམ་ཞུགས་མཛད་པའི་བླ་སྤྲུལ་དགེ་འདུན་འདུས་མང་ཡོང་དང་། མི་མང་ཚང་མར་འཚམས་འདྲི་གྲངས་མེད་ཞུ་རྒྱུ་དང་། ༸གོང་ས་སྐྱབས་མགོན་ཆེན་པོ་མཆོག་གི་དབུས་པའི་བོད་གངས་ཅན་ལྗོངས་ཀྱི་རིས་སུ་མ་མཆིས་པའི་བསྟན་འཛིན་གྱི་སྐྱེས་བུ་དམ་པ་རྣམ་སྐུ་ཚེ་བརྟན་ཅིང་མཛད་འཕྲིན་རྒྱས་པ་དང་། བསྟན་པ་དར་ཞིང་རྒྱས་བ་སོགས་འཇིག་རྟེན་གྱི་ཁམས་ཀུན་ཏུ་ཆོས་ལུགས་ཀྱི་བླ་ན་ཞབས་འདེབས་བཟང་པོ་གོང་མཐོར་ཡོང་བའི་སྨོན་འདུན་གྲངས་མེད་ཞུ་རྒྱུ་ཡིན།