དེ་རིང་སྔ་དྲོར་བོད་ཀྱི་ཟློས་གར་ཚོགས་པས་གནས་མཆོག་རྡོ་རྗེ་གདན་དུ་ཆོས་ཞུ་བ་ཚོར་༼ སྣང་ས་འོད་འབུམ ༽གྱི་རྣམ་ཐར་འཁྲབ་སྟོན་བྱས་སོང་།
དེ་རིང་ཕྱི་ཚེས་ ༣༠ ཉིན་གྱི་སྔ་དྲོའི་ཆུ་ཚོད་ ༩།༣༠ སྟེང་བོད་ཀྱི་ཟློས་གར་ཚོགས་པས་རྡོར་གདན་གཏེར་སྒར་དགོན་པའི་ཉེ་འགྲམ་བཀའ་རྒྱུད་སྨོན་ལམ་ཚོགས་རྭའི་ནང་། ཐེངས་འདིའི་དུས་དབང་ལ་ཕེབས་པའི་ཆོས་ཞུ་བ་རྣམས་ལ་བོད་ཀྱི་རྣམ་ཐར་ཆེན་མོ་བརྒྱད་ཀྱི་ཡ་གྱལ་༼སྣང་ས་འོད་འབུམ།༽འཁྲབ་སྟོན་གཟིགས་འབུལ་གནང་སོང་ལ། འཁྲབ་སྟོན་དབུ་འབྱེད་ཀྱི་སྐུ་མགྲོན་དུ་དུས་འཁོར་དབང་ཆེན་གོ་སྒྲིག་ཚོགས་ཆུང་གི་ཚོགས་གཙོ་བླ་མ་ངག་དབང་ནོར་བུ་མཆོག་གཙོས། ཟློས་གར་ཚོགས་པའི་འགན་འཛིན་དང་འཁྲབ་སྟོན་པ། དེ་བཞིན་གཟིགས་མོ་བ་བཅས་མི་མང་ ༥༠༠ མ་ཟིན་ཙམ་ཕེབས་འདུག
འཁྲབ་སྟོན་གྱི་ཐོག་མར་ལྷ་མོའི་རོལ་དབྱངས་དང་བཅས་བོད་ཀྱི་ལྷ་མོའི་སྒྱུ་རྩལ་གསར་གཏོད་པ་གྲུབ་ཐོབ་ཐང་སྟོང་རྒྱལ་པོའི་སྐུ་བརྙན་གར་སྟེགས་སྟེང་གདན་ཞུ་དང་། སྐུ་མགྲོན་གཙོ་བོ་མཆོག་གིས་སྣང་གསལ་མར་མེ་ཞལ་འབྱེད་གནང་རྗེས་བོད་ནང་བསྟན་སྲིད་མི་རིགས་ཆེད་རང་ལུས་མེར་བསྲེགས་བཏང་སྟེ་འདས་གྲོངས་སུ་ཕྱིན་པའི་རྒྱལ་གཅེས་དཔའ་བོ་དཔའ་མོ་རྣམས་དང་། ཐེངས་འདིའི་དུས་འཁོར་དབང་ཆེན་གྱི་སྦྱིན་བདག་གཙོ་བོ་དམ་པ་རྡོ་རྗེ་མཁའ་འགྲོ་མཆོག་བཅས་ལ་སྐར་མ་གཅིག་རིང་ངག་བཅད་མྱ་ངན་གུས་འདུད་བཅས་གནང་སོང་།
དེ་ནས་སྐུ་མགྲོན་གཙོ་བོ་མཆོག་ནས་བོད་ཀྱི་ཟློས་གར་ཚོགས་པའི་ ༢༠༡༡ ལོའི་དབྱར་སྐྱིད་འོད་སྡེར་དབུ་འབྱེད་བཅས་གནང་རྗེས། བོད་ཀྱི་ཟློས་གར་ཚོགས་པའི་འགན་འཛིན་བསོད་ནམས་ཆོས་འཕེལ་ལགས་ཀྱིས་ ༡༩༥༩ ལོའི་ཕྱི་ཟླ་ ༨ པའི་ཚེས་ ༡༡ ཉིན་བོད་ཀྱི་ཟློས་གར་ཚོགས་པ་དབུ་བརྙེས་པའི་སྐོར་དང་། ཐོག་མའི་དམིགས་ཡུལ། ད་ལྟའི་བར་༸གོང་ས་མཆོག་གི་དགོངས་གཞི་ལྟར་བོད་ཀྱི་ཐུན་མིན་རིག་གཞུང་རྒྱུན་འཛིན་ཐོག་འབད་བརྩོན་གནང་བ་སོགས་ངོ་སྤྲོད་གནང་བྱུང་།
ཁོང་གིས་མུ་མཐུད་དུ་ཐེངས་འདིའི་འཁྲབ་སྟོན་དེ་ནི་དཔལ་འབྱོར་བསྡུ་རུབ་ཀྱི་དམིགས་ཡུལ་མིན་པར། ཐེངས་འདིའི་དུས་འཁོར་དབང་ཆེན་སྐབས་བོད་ཕྱི་ནང་ཙམ་དུ་མ་ཟད། འཛམ་གླིང་གི་ཡུལ་ལུང་མང་པོའི་མི་གྲངས་ཁྲི་ཕྲག་མང་པོ་འཛོམས་ཡོད་པའི་གོ་སྐབས་དང་བསྟུན་ཏེ། བོད་ཀྱི་ལྷ་མོའི་སྒྱུ་རྩལ་གཙོས་བོད་མི་རིགས་ཀྱི་གཞས་སྣ་ཁག བོད་དང་བོད་ཀྱི་རིག་གཞུང་། ལྷག་པར་དུ་བོད་ཀྱི་སྲོལ་རྒྱུན་རིག་གཞུང་དང་ལོ་རྒྱུས་ཁག་འཁྲབ་སྟོན་གཟིགས་འབུལ་ཞུ་རྒྱུ་ཡིན་སྐོར་དང་། འཁྲབ་སྟོན་འདི་བརྒྱུད་དེ་འཛམ་གླིང་ཡུལ་གྲུ་ཁག་གི་ཆོས་ཞུ་བ་རྣམས་ཀྱི་བོད་ཀྱི་རིག་གཞུང་ཁོ་ན་མིན་པར། ད་ལྟའི་བོད་ཀྱི་ཆབ་སྲིད་གནས་སྟངས་ལ་རྒྱུས་ལོན་དང་ཤེས་རྟོགས་ཡོང་རྒྱུར་ཕན་ནུས་ཆེན་པོ་ཡོད་ཚུལ་སོགས་བརྗོད་བྱུང་།
ཐེངས་འདིའི་དུས་དབང་སྐབས་བོད་ཀྱི་ཟློས་གར་ཚོགས་པས་དེ་རིང་ཕྱི་ཚེས་ ༣༠ ཉིན་གྱི་སྔ་དྲོའི་ཆུ་ཚོད་ ༩།༣༠ ནས་ཕྱི་དྲོའི་ཆུ་ཚོད་ ༤།༣༠ བར་ཆོས་ཞུ་བ་རྣམས་ལ་༼སྣང་ས་འོད་འབུམ་གྱི་རྣམ་ཐར༽གཟིགས་འབུལ་གནང་སོང་བར་མ་ཟད། སང་ཉིན་ཕྱི་ཚེས་ ༣༡ ཉིན་དང་། ཕྱི་ཟླ་དང་པོའི་ཚེས་ ༡ ནས་ ༦ བར་ཀྱི་དགོང་དྲོའི་ཆུ་ཚོད་ ༦ པ་ནས་༼ འཛམ་གླིང་ཡང་རྩེའི་བྲོ་གཞས ༽ དང་བོད་ཀྱི་ཡུལ་གྲུ་ཁག་གི་སྲོལ་རྒྱུན་གཞས་སྣ་འཁྲབ་སྟོན་གནང་རྒྱུ་ཡིན་འདུག ཕྱི་ཟླ་ ༡ པོའི་ཚེས་ ༢ དང་ ༣ བཅས་ཉིན་གཉིས་རིང་དམིགས་བསལ་བོད་ནས་ཕེབས་པའི་ཆོས་ཞུ་བ་རྣམས་ལ་འཁྲབ་སྟོན་གཟིགས་འབུལ་གནང་རྒྱུ་ཡིན་འདུག
རྡོར་གདན་གསར་འགོད་པ། དོན་གོ
སྲོལ་རྒྱུན་རིག་གཞུང་ངོ་སྤྲོད་ཆེད་ཡིན་ན་དགའ་བ་ལ། རྒྱུ་ནོར་ཆེད་དུ་འབད་བརྩོན་ཁོ་ན་ཡིན་ན་སྐྱོ་བ་ལ། ཁྱད་པར་ཆོ་ཁའི་བར་དང་གསར་སྙིང་བར་ལ་ཕྱོགས་ལྷོང་བྱེད་ན་སྐྱོ་བ་ལ།
བོད་གཞུང་ཟློས་གར་ཚོགས་པ་འདི་མི་དྲང་དང་། ཕྱོགས་ལྷུང་ཅན། དངུལ་འབའ་ཞིག་དོན་དུ་གཉེར་མཁན་གྱི་དངུལ་སྡུད་ཚོགས་པ་ཞིག་རེད། བོད་ནས་ཡོང་བའི་གདངས་སྙན་པོ་ཡོད་མཁན་ཚོ། ཟློས་གར་ནང་ཚུད་ཁག་པོ་རེད། གལ་སྲིད་ཚུད་ནའང་ཡུན་རིང་མ་འགོར་པར་ཕྱིར་ཕུད་གཏོང་གི་འདུག གདངས་སྙན་པོ་ཡོད་ན་ཕྲག་དོག་བྱེད་དེ་རྒྱའི་སྐད་གདངས་འདྲེས་པར་སྙད་འདོགས་ཀྱིན་ཡོད། ཁོང་ཚོས་དབྱིན་སྐད་ཀྱི་གདངས་དང་། ཧིན་སྐད་འདྲེས་མའི་དབྱངས་ཆེད་མངགས་བསླབས་ཏེ། རྒྱུན་ལྡན་དུ་གཏོང་བཞིན་ཡོད།
ད་དུང་ཡང་སྟོད་གཞས་མ་གཏོགས་ཆོལ་སུམ་གྱི་གཞས་སྣ་ཕུན་སུམ་ཚོགས་པར་སློབ་ཀྱི་མེད། ཟློས་གར་འདིར་རྒྱུས་ཡོད་ཚོས། དཔལ་འབྱོར་འདུ་འགོད་ཙམ་ལས། རིག་གཞུང་ཡར་རྒྱས་གཏོང་བའི་རེ་ཐག་གཏན་ཆད་དུ་སོང་འདུག་ཅེས་མཇུག་སྡོམ་གནང་བཞིན་ཡོད་དོ།