དུས་འཁོར་དབང་ཆེན་ངོ་སྤྲོད་གནང་།

མཚན་ཉིད་གྲྭ་ཚང་གི་དགེ་བཤེས་བློ་བཟང་ཟླ་བ་ལགས་ཀྱིས་རྡོར་གདན་མཆོད་རྟེན་ཆེན་མོའི་ནང་ཆོས་ཞུ་བ་ཚོར་དུས་འཁོར་དབང་ཆེན་སྐོར་ངོ་སྤྲོད་སོང་།

ངྷ་རམ་ས་ལའི་མཚན་ཉིད་གྲྭ་ཚང་གི་དགེ་བཤེས་བློ་བཟང་ཟླ་བ་ལགས་ཀྱིས་ཟླ་འདིའི་ཚེས་ ༢༨ ནས་ ༣༠ བར་གྱི་ཉིན་གསུམ་རིང་། ཐེངས་འདིའི་དུས་དབང་ལ་ཆེད་དུ་ཕེབས་པའི་སེར་སྐྱ་མི་མང་ལ་དུས་འཁོར་དབང་ཆེན་སྐོར་ངོ་སྤྲོད་གནང་ཡོད་ཅིང་། ཁ་སང་ཕྱི་ཚེས་ ༣༠ ཉིན་གྱི་ཕྱི་དྲོར་མཇུག་བསྒྲིལ་བའི་མཛད་སྒོའི་ཐོག་བོད་མིའི་སྒྲིག་འཛུགས་ཆོས་རིག་བཀའ་བློན་པད་མ་ཆོས་འབྱོར་མཆོག་ཕེབས་ཏེ། དགེ་བཤེས་ལགས་སུ་ཐུགས་རྗེ་ཆེ་ཞུས་པ་དང་སྦྲགས། ཐེངས་འདིའི་དུས་འཁོར་དབང་ཆེན་གྱི་གལ་ཆེའི་རང་བཞིན་སྐོར་ངོ་སྤྲོད་གནང་དོན། “ལྟ་བོད་ནས་ཕེབས་པའི་ཆོས་ཞུ་བ་གཙོ་བོར་གྱུར་བའི་འཛམ་གླིང་ཡུལ་གྲུ་ཁག་གི་དད་ལྡན་ཆོས་ཞུ་བ་ཁྲི་ཕྲག་མང་པོ་གནས་རྩ་ཆེན་རྡོ་རྗེ་གདན་ལ་འབྱོར་ཡོད་པ་དང་། མི་འགྱང་བར་བླ་མ་རྩ་ཆེན་བསྟན་འཛིན་རྒྱལ་མཚོའི་མདུན་དུ། དབང་རྩ་ཆེན་དུས་འཁོར་དབང་ཆེན་འཐོབ་རྒྱུ་ཡིན་སྟབས། མི་ཚེའི་ནང་སྐལ་བ་བཟང་པོ་བྱུང་ཡོད་པ་རེད” ཅེས་བརྗོད་བྱུང་།

བཀའ་བློན་མཆོག་གིས་མུ་མཐུད་དུ་གསུངས་རྒྱུར། ལྷ་བླ་མའི་ལུང་བསྟན་གནང་བ་ལྟར་༧གོང་ས་མཆོག་གིས་ཁོང་ཉིད་དགུང་གྲངས་ ༡༡༣ ལ་བཞུགས་རྒྱུའི་ཞལ་བཞེས་གནང་ཡོད་ཀྱང་། གཙོ་བོ་མང་ཚོགས་ཀྱི་དད་པ་དམ་ཚིག་ལ་ཐུག་ཡོད་ཚུལ་དང་། ༧རྒྱལ་དབང་ལྔ་པ་དང་བཅུ་གསུམ་པ་གཉིས་སྐུ་ཚེ་ཡུན་རིང་བཞུགས་རྒྱུའི་ལུང་བསྟན་ཡོད་ཀྱང་། མང་ཚོགས་ཀྱི་དད་པ་དམ་ཚིག་ལ་ལྷད་ཞུགས་པའི་རྐྱེན་གྱིས་ཡུན་རིང་བཞུགས་ཐུབ་མེད་པ། ཐེངས་འདིར་མང་ཚོགས་ལ་གོ་བརྡ་གསལ་པོ་འཕྲོད་རྒྱུ་དང་ལག་ལེན་དོན་འཁྱོལ་ཡོང་ཆེད་ཆོས་རིག་ལས་ཁུངས་ཀྱིས་ཡིག་ཆ་ ༡༠༠༠༠༠ ཙམ་འགྲེམས་སྤེལ་བྱེད་ཀྱིན་ཡོད་སྐོར་སོགས་གསུངས་སོང་།

དུས་འཁོར་དབང་ཆེན་གྱི་གལ་ཆེའི་རང་བཞིན་སྐོར་ལ། “བོད་པའི་གཤིས་ཀའི་ནང་དབང་དང་གསུང་ཆོས་ཞུས་ཚར་རྗེས་ལས་འགན་ཚང་མ་འགྲུབ་སོང་སྙམ་གྱི་ཡོད། ནང་དོན་དང་སྲུང་བྱ་ཡག་པོ་ཞིག་མ་ཤེས་ཀྱང་འགྲིག་གི་ཡོད་པའི་ལྟ་ཚུལ་འཛིན་གྱི་ཡོད་པ་རེད། སྣོད་ཀྱི་སྐྱོན་གསུམ་ཟེར་གྱི་ཡོད་པ་ལྟར་སྣོད་ཁ་སྦུབ་དང་སྣོད་ཞབས་བརྡོལ་བ། སྣོད་དྲི་མ་ཅན་གྱི་དབང་དུ་སོང་ན་འགྲིག་གི་མེད་པས། དབང་ཞུས་ཏེ་བོད་དུ་ཕྱིར་ལོག་སྐབས་བསམ་བློའི་ནང་འགྱུར་བ་ཞིག་ཐེབས་དགོས་པ་རེད་ ” ཅེས་གསུངས་སོང་།

གསར་འགོད་པས་བོད་ནས་ཕེབས་པའི་ཆོས་ཞུ་བ་ཞིག་ལ་དུས་དབང་ངོ་སྤྲོད་ཀྱི་མྱོང་ཚོར་དྲིས་པར། “ང་རང་དུས་དབང་ངོ་སྤྲོད་ལ་ཡོང་བ་དེ་རིང་དང་པོ་ཡིན། དགེ་བཤེས་ལགས་ཀྱིས་གསུངས་པར་ཉན་ན། དབང་ཞུས་ན་བླ་མ་ཚད་ལྡན་ཡིན་དགོས་པ་མ་ཟད། སློབ་མ་ཡང་སྣོད་ལྡན་ཞིག་ཡིན་དགོས་ཀྱི་འདུག དབང་གི་ཐོག་མཐའ་བར་གསུམ་དུ་དམ་བཅའ་དང་ཁས་ལེན་གནང་དགོས་པ་མང་པོ་འདུག དུས་དབང་འདི་བརྒྱུད་ང་ལྟ་བུའི་ཆོས་ཞུ་བ་མང་པོ་ཞིག་ལམ་ཁ་ཡག་པོ་ཞིག་ཏུ་འཁྲིད་ཐུབ་རྒྱུར་ཕན་ཐོགས་ཆེན་པོ་འདུག ༧གོང་ས་མཆོག་གི་མདུན་དུ་དབང་མ་ཞུས་སྔོན་ལ། འདི་ནས་དུས་དབང་སྐོར་ངོ་སྤྲོད་གནང་སྟེ་གོ་བ་རགས་རིམ་ཞིག་ལེན་ཐུབ་པ་ཟོས་པ་འདི་ཡག་པོ་ཞིག་ཏུ་མཐོང་སོང་ ” ཞེས་བརྗོད་བྱུང་།

ཕྱི་ཚེས་ ༣༡ ཉིན་༧གོང་ས་མཆོག་རྡོར་གདན་དུ་ཆིབས་བསྒྱུར་བསྐྱང་རྒྱུ་ཡིན་པ་དང་། ཟླ་རྗེས་མའི་ཕྱི་ཚེས་ ༤ ཉིན་ཏེ་༧གོང་ས་མཆོག་གི་སྐུའི་བླ་གཟའི་ཉིན། ཆོས་རིག་ལས་ཁུངས་ཀྱིས་ཆོས་ཞུ་བ་རེར་ཞལ་འདེབས་སྒོར་ ༡ རེ་བསྡུས་ཏེ་རིས་མེད་སྨོན་ལམ་ཆེན་མོ་འཚོགས་རྒྱུ་དང་། ཕྱི་ཚེས་ ༧ ཉིན་ནས་ ༩ བར་དུས་དབང་དངོས་གཞི། ཕྱི་ཚེས་ ༡༠ ཉིན་ཆོས་བརྒྱུད་རིས་མེད་ཀྱི་བླ་ཆེན་ཚོས་༧གོང་ས་མཆོག་ལ་བརྟན་བཞུགས་རྒྱས་པ་ཞིག་འབུལ་རྒྱུ་ཡིན་པ་མ་ཟད། སྐབས་དེར་ཆོས་ལུགས་རིས་མེད་ཀྱི་མཚན་ཐོག་ནས་གཟེངས་རྟགས་ཤིག་ཀྱང་འབུལ་འཆར་ཡོད་འདུག