གཟའ་ལྷག་པའི་མཚན་མོར་ཡུ་གུར་ངོ་རྒོལ་བ་དང་རྒྱ་དམག་བར་འཁྲུག་འཛིང་ཤོར་ཏེ། ཡུར་གུར་བ་མི་ ༧ དམར་གསོད་དང་ཉེན་རྟོག་པ་མི་ ༡ རྐྱེན་འདས་སུ་བཏང་འདུག
ཕྱི་ཚེས་ ༢༨ ཉིན་གྱི་མཚན་མོའི་ཆུ་ཚོད་ ༡༡ ཙམ་ལ། ཤིན་ཅང་ཕིས་ཧྲན་རྫོང་དུ་རྒྱ་གཞུང་དྲག་ཆས་ཉེན་རྟོག་པ་དང་ཡུ་གུར་ངོ་རྒོལ་བའི་བར་འཁྲུག་འཛིང་ཤོར་ཏེ། ཡུ་གུར་ངོ་རྒོལ་བ་མི་ ༧ དམར་གསོད་དང་། མི་ ༤ ལ་རྨས་སྐྱོན་དང་མི་ ༤ འཛིན་བཟུང་བྱས་ཡོད་པ་དང་། འཁྲུག་འཛིང་སྐབས་ཉེན་རྟོག་པ་མི་ ༡ རྐྱེན་འདས་དང་མི་ ༡ ལ་རྨས་སྐྱོན་བཅས་ཕོག་ཡོད་འདུག
ཕྱི་ཚེས་ ༢༩ ཉིན་རྒྱ་གཞུང་གིས་དྲ་རྒྱའི་གནས་ཚུལ་སྤེལ་ཏེ། འཁྲུག་འཛིང་དོན་རྐྱེན་དེ་ནི་ཤིན་ཅང་ཕིས་ཧྲན་རྫོང་དུ་གསང་ཡུབ་བྱས་ཡོད་པའི་དྲག་སྤྱོད་ཤོག་ཁག་ཅིག་གིས་མི་གཏའ་མར་འཇུ་བཟུང་བྱས་པའི་གནས་ཚུལ་གྱི་རྐྱེན་པས། ཉེན་རྟོག་པས་གཏའ་མར་བཟུང་བའི་མི་དེ་དག་སྐྱོབ་ཆེད་ཕན་ཚུན་བར་དམར་འཛིང་དོན་རྐྱེན་བྱུང་བ་ཞིག་ཡིན་པ་དང་། གཏའ་མར་བཟུང་བའི་མི་ ༢ སྐྱོབ་ཐུབ་ཡོད་སྐོར་བསྒྲགས་འདུག ཡིན་ནའང་། གཏའ་མར་བཟུང་བའི་མི་དེ་གཉིས་ཀྱི་མིང་དང་། ས་གནས་ཡུ་གུར་བ་ཡིན་མིན་སོགས་གསལ་ཁ་བཏོན་མི་འདུག རྒྱལ་སྤྱིའི་དྲག་སྤྱོད་པའི་ཁ་གཏད་ཉམས་ཞིབ་པ་དག་གིས་ས་ཁུལ་དེར་རྩ་འཛུགས་ལྡན་པའི་དྲག་སྤྱོད་རིང་ལུགས་ཀྱི་ཤོག་ཁག་ཡོད་མི་སྲིད་པའི་ངོས་འཛིན་བྱས་ཡོད་པ་རེད།
འཛམ་གླིང་ཡུ་གུར་འཐུས་ཚབ་ཚོགས་པའི་མགྲིན་ཚབ་པ་ཏིས་ལིས་ཞཱ་ཡིས་གསར་ལམ་ཁག་ཏུ། “ཉེ་ཆར་རྒྱ་གཞུང་གིས་ས་ཁུལ་དེར་དྲག་གནོན་གྱི་སྲིད་ཇུས་གསར་བ་ཞིག་ལག་བསྟར་བྱེད་མགོ་བརྩམས་ཏེ། ཡུ་གུར་བ་མང་པོ་འཇུ་བཟུང་བཀག་ཉར་གྱིས་གར་སོང་ཆ་མེད་དུ་གྱུར་པ་མ་ཟད། རྒྱ་གཞུང་ཉེན་རྟོག་པས་གནས་ཚུལ་དེའི་ཐད་ས་གནས་མང་ཚོགས་ལ་གསལ་བཤད་གང་ཡང་བྱས་མི་འདུག ” ཅེས་བརྗོད་དེ། ད་སྐབས་རྒྱ་གཞུང་གིས་ཡུ་གུར་མི་མང་གི་ཐོག་ལ་ཕྱོགས་ཡོངས་ནས་མངོན་སེམས་འཛེམས་མེད་ཐོག་དྲག་གནོན་སྲིད་ཇུས་སྤེལ་ཤུགས་ཆེ་རུ་བཏང་བར་བརྟེན། ས་གནས་ཡུ་གུར་མི་མང་རྣམས་ཐབས་ཟད་འུ་ཐུག་ཏུ་གྱུར་ཏེ། ཕན་ཚུན་རྒོལ་འཛིང་གི་ཐབས་ལམ་འདི་འདྲ་ལ་བརྟེན་ནས་ངོ་རྒོལ་གྱི་རྣམ་འགྱུར་མི་སྟོན་མཐུ་མེད་གྱི་གནས་སྟངས་འོག་ལྷུང་ཡོད་པ་དང་། ཐེངས་འདིའི་འཁྲུག་འཛིང་དོན་རྐྱེན་ཡང་རྒྱ་གཞུང་གི་དྲག་གནོན་མ་བཟོད་པར། ས་གནས་མི་མང་དང་དྲག་ཆས་ཉེན་རྟོག་པའི་བར་འཁྲུག་འཛིང་ཤོར་བ་ཞིག་ཡིན་པ་གསལ་བརྗོད་བྱས་ཡོད་པ་རེད།
ཉེ་ཆར་སྟོན་པ་ཡུ་ཤིའི་འཁྲུངས་སྐར་དུས་ཆེན་སླེབས་ལ་ཉེ་བའི་སྐབས་དང་བསྟུན་ནས། རྒྱ་གཞུང་གིས་ཝུ་རུ་མུའུ་ཆི་གྲོང་ཁྱེར་དང་། ཤིན་ཅང་ལྷོ་ཕྱོགས་ཨ་ཁི་སུའུ་ས་ཁུལ་དུ་ཁྲིམས་མཐུན་མིན་པའི་ཆོས་ལུགས་དངོས་རྫས་རིགས་བསྔོག་བཤེར་བཀག་སྡོམ་བྱེད་དགོས་པའི་ལས་འགུལ་ཞིག་སྤེལ་ཡོད་འདུག ཕྱི་ཟླ་ ༡༢ ཚེས་ ༢༠ ཉིན་གྱི་ཞོགས་པར་ཨ་ཁི་སུའུ་ས་ཁུལ་གྱི་ཧྲ་ཡ་རྫོང་ཡཱན་ཐ་ཁི་སུ་ཧེར་ཞིང་དུ་དྲག་ཆས་ཉེན་རྟོག་པ་ ༦༠ ལྷག་ཡོང་སྟེ། ས་གནས་ཡུ་གུར་ཁྱིམ་ཚང་ ༢༠༠ ལྷག་གི་ནང་ལ་སྔོག་གཤེར་འདྲི་གཅོད་བྱས་ཡོད་པ་དང་། སྐབས་དེར་ཁྱིམ་ཚང་མང་པོའི་ནང་ཡུ་གུར་བའི་དབུ་ཁྲིད་ལྕམ་རེ་བྷེ་ཡ་དང་ཨ་རིའི་སྲིད་འཛིན་ལྷན་བཞུགས་ཀྱི་འདྲ་པར་སོགས་ཐོན་པ་ལ་བརྟེན་ནས། ཡུ་གུར་བ་མི་ ༢༠ ལྷག་ལ་ཁྲིམས་མཐུན་མིན་པའི་ཆོས་ལུགས་དངོས་རྫས་བསྡུ་ཉར་བྱས་ཉེས་མིང་འོག་འཇུ་བཟུང་དང་། མི་མང་པོར་གཅར་རྡུང་འཇིགས་སྐུལ་སོགས་བྱས་ཡོད་འདུག
ཐེངས་འདིའི་འཁྲུག་འཛིང་དོན་རྐྱེན་དེ་ནི་ཤིན་ཅང་ཕིས་ཧྲན་རྫོང་གི་ལྷོ་ཁུལ་དུ་བྱུང་ཡོད་པ་དང་། ས་ཁུལ་དེ་ནི་དཀྱིལ་ཤར་ཨེ་ཤ་ཡའི་རྒྱལ་ཁབ་འགའི་མཐའ་འབྲེལ་ཆགས་ཡོད་ལ། ཤིན་ཅང་ཊ་ཁི་ལ་མ་ཀན་(Taklamakan)བྱེ་ཐང་ཆེན་མོའི་བརྒལ་སའི་འགག་སྒོ་ལྟ་བུ་ཡིན། ས་གནས་མི་མང་ཕལ་ཆེ་བ་ནི་མུའུ་སི་ལམ་(Muslim)ཡིན་པ་རེད། འདས་པའི་ལོ་མང་རིང་ས་ཁུལ་འདིར་སྔ་རྗེས་སུ་རྒྱ་ནག་གཞུང་ལ་ངོ་རྒོལ་གྱི་ལས་འགུལ་མང་པོ་བྱུང་ཡོད་ལ། དམག་མི་དང་ས་གནས་མང་ཚོགས་བར་འཁྲུག་འཛིང་ཡང་ཐེངས་མང་ཤོར་མྱོང་འདུག
ནམ་རྒྱུན་རྒྱ་གཞུང་གིས་ཤིན་ཅང་ནང་བདེ་འཇགས་མེད་པའི་གནས་སྟངས་དེ་ནི། ཁ་བྲལ་བའི་སྟོབས་ཤུགས་དང་ཆོས་ལུགས་ཐལ་སྤྱོད་པའི་སྟོབས་ཤུགས། དྲག་སྤྱོད་རྩ་འཛུགས་ཀྱི་སྟོབས་ཤུགས་གསུམ་གྱིས་ཡིན་ཚུལ་རྒྱལ་སྤྱིའི་སྒང་དྲིལ་བསྒྲགས་བྱེད་བཞིན་པ་མ་ཟད། ཤིན་ཅང་ནང་དམག་དཔུང་གི་རྟེན་གཞི་རྒྱ་སྐྱེད་བྱས་ཏེ། དམག་ཤུགས་ཀྱི་དྲག་གནོན་སྲིད་ཇུས་ཁོ་ནར་བརྟེན་ནས་ཡུ་གུར་མི་མང་ལ་དབང་སྒྱུར་བཙན་གནོན་བྱེད་བཞིན་ཡོད།
གསར་འགོད་པ། ཚེ་རིང་རྒྱལ།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
བོད་ནང་བོད་པས་༸གོང་མཆོག་གི་སྐུ་དཔར་ཉར་མི་ཆོག་པ་དང་། དེ་ནས་ཀརྨ་པའི་སྐུ་པར་འཇོག་མི་ཆོག་བཟོས་པ་དང་། དེང་སང་ལྕམ་རེ་བྷེ་དང་ཨ་རིའི་སྲིད་འ།ིན་འདྲ་པར་སྒང་ལ་སླེབས་ཡོད་ན་རྒྱ་ནག་ནང་མའོའི་དཔར་ཉར་མི་ཆོག་དུས་ཚོད་དེ་ག་དུས་ཤར་ཐུབ་བམ།
སྐབས་དེར་ཁྱིམ་ཚང་མང་པོའི་ནང་ཡུ་གུར་བའི་དབུ་ཁྲིད་ལྕམ་རེ་བྷེ་ཡ་དང་ཨ་རིའི་སྲིད་འཛིན་ལྷན་བཞུགས་ཀྱི་འདྲ་པར་སོགས་ཐོན་པ་ལ་བརྟེན་ནས། ཡུ་གུར་བ་མི་ ༢༠ ལྷག་ལ་ཁྲིམས་མཐུན་མིན་པའི་ཆོས་ལུགས་དངོས་རྫས་བསྡུ་ཉར་བྱས་ཉེས་མིང་འོག་འཇུ་བཟུང་དང་། མི་མང་པོར་གཅར་རྡུང་འཇིགས་སྐུལ་སོགས་བྱས་ཡོད་འདུག ཟེར་ན།
བོད་ནང་བོད་པས་༸གོང་མཆོག་གི་སྐུ་དཔར་ཉར་མི་ཆོག་པ་དང་། དེ་ནས་ཀརྨ་པའི་སྐུ་པར་འཇོག་མི་ཆོག་བཟོས་པ་དང་། དེང་སང་ལྕམ་རེ་བྷེ་དང་ཨ་རིའི་སྲིད་འཛིན་འདྲ་པར་སྒང་ལ་སླེབས་ཡོད་ན་རྒྱ་ནག་ནང་མའོའི་དཔར་ཉར་མི་ཆོག་དུས་ཚོད་དེ་ག་དུས་ཤར་ཐུབ་བམ།
ཡུ་གུར་མི་དམངས་ལ། གདུང་སེམས་མཉམ་སྐྱེད་ཡོད། ཁྱེད་རྣམས་ཀྱིས་ཞི་དྲགས་གི་ལས་འགུལ་ཅི་ཞིག་སྤེལ་ན་དེ་འོས་པ་ཡིན།སུས་ཀྱང་ཁྱེད་ཀྱི་ཡོད་ཚད་འཕྲོག་བཅོམ་བྱེད་དུས། ཞི་བའི་སྐད་ཆ་ལ་མ་ཉན་ན། འུ་ཐུག་ཐབས་ཟད་ཀྱི་དྲགས་པོའི་ཡ་ལན་སློག་ན། ཁྱེད་ལ་འཇིགས་སྐུལ་ཞེས་འབོད་མི་རུང་། མི་སྒེར་དང་ཚོགས་སྡེ་ཡང་ན་རྒྱལ་ཁབ། སུ་ཞིག་ཡིན་རུང་རང་ཉིད་ཀྱིས་རང་ཉིད་སྲུང་སྐྱོབ་བྱེད་པའི་དབང་ཚད་ཡོད།
འཇིགས་སྐུལ་རིང་ལུགས་དངོས་དེ་ཁྱེད་ཀྱི་ཡོད་ཚད། འཕྲོག་བཞིན་པ་དེ་ཡིན། མི་སྒེར་ཞིག་དང་ཡང་ན་ཚོགས་ཁག གཞུང་བཅས་སུ་ཡིན་རུང་གཞན་ལ་བརྩན་གནོན་གཏོང་མཁན་ཚང་མ་རྒྱལ་སྤྱིའི་ཁྲིམས་འགལ་གྱི་འཇིགས་སྐུལ་ངོ་མ་དེ་རེད།