དེ་རིང་ཞོགས་པའི་ཆུ་ཚོད་ ༨ པའི་སྟེང་༧གོང་ས་མཆོག་གིས་ཕྱི་རྒྱལ་ཆོས་ཞུ་བ་ཚོར་དམིགས་ཏེ་གསུངས་དོན། “འཛམ་གླིང་འདིར་མི་འབོར་དུང་ཕྱུར་ ༧༠ ཙམ་ཡོད་པ་རེད། དེ་ཚོ་གཟུགས་པོའི་གྲུབ་སྟངས་དང་བསམ་བློ། ཚོར་བ་གང་ཐད་ནས་གཅིག་པ་ཆགས་ཡོད་པ་རེད། མིའི་རིགས་ཀྱི་སྐྱེ་ལུགས་དང་འཆི་ལུགས་ལ་ཤར་ལྷོ་ནུབ་བྱང་གི་ཁྱད་པར་ཡོད་པ་མ་རེད། མི་ཚང་མས་བདེ་སྐྱིད་འདོད་ཀྱི་ཡོད། མི་ཚང་མར་མི་ཚེ་བདེ་སྐྱིད་འཐོབ་རྒྱུ་དང་ལམ་འགྲོ་ཡོང་རྒྱུའི་ཐོབ་ཐང་ཡོད། འདི་ནི་མིའི་རིགས་ཀྱི་གཞི་རྩའི་མི་ཚེ་སྐྱེལ་སྟངས་ཆགས་ཡོད། དུས་རབས་ཉི་ཤུའི་ནང་ཕྱིའི་དངོས་པོ་ཡར་རྒྱས་ཕྱིན་པ་དང་མཉམ་དུ་སེམས་ཀྱི་དཀའ་ངལ་ཆེ་རུ་ཕྱིན་ཡོད་པ་རེད། དཀའ་ངལ་དེའི་རྐྱེན་གྱིས་ཨ་སྒོར་དུང་ཕྱུར་ཡོད་མཁན་ཚོ་ཡང་སེམས་མ་སྐྱིད་པར་སྡུག་བསྔལ་ནང་ལྷུང་ཡོད། དཀའ་ངལ་ཆེ་རུ་ཕྱིན་པ་དེས་མིའི་སེམས་དང་ཚོར་བའི་ཐོག་དོ་སྣང་གསར་པ་ཞིག་བསླེབས་ཡོད། ལྷག་པར་དུ་ཚན་རིག་པའི་ཁྲོད་སེམས་ཀྱི་རྣམ་གཞག་ཐོག་དོ་སྣང་བྱེད་མཁན་མང་དུ་ཕྱིན་ཡོད་པ་རེད་”ཅེས་གསུངས་བྱུང་།
དེ་རིང་གསུང་ཆོས་ཉིན་དང་པོར་བདག་ཉིད་ཆེན་པོའི་གྷན་ངྷི་ཚ་མོ་ཨེ་ལེ་གྷན་ངྷི་ (ELAGANGDHI) ལགས་ཀྱིས། ལྷོ་ཨ་ཧྥི་རི་ཁའི་གྷན་ངྷིའི་ཐེབས་རྩ་ཁང་གི་ཞི་བདེའི་གཟེངས་རྟགས་དེ། རྡོར་གདན་གསུང་ཆོས་ར་བའི་ནང་༧གོང་ས་མཆོག་ལ་ཕུལ་སོང་། སྐབས་དེར་༧གོང་ས་མཆོག་གིས་ལྕམ་ཨེ་ལེ་གྷན་ངྷི་ལགས་སུ་མཇལ་དར་ཞིག་དང་སྟོན་པའི་སྣང་བརྙན་ཞིག་གསོལ་རས་སུ་བསྩལ་ཏེ། “བཅོམ་ལྡན་འདས་སངས་རྒྱས་ཡུལ་གནས་མཆོག་རྡོ་རྗེ་གདན་དུ། རྒྱ་གར་གྱི་ལོ་ངོ་སྟོང་ཕྲག་ལྷག་གི་འཚེ་མེད་ཞི་བའི་ལྟ་གྲུབ་དེ། དུས་རབས་ཉི་ཤུའི་ནང་ཆབ་སྲིད་རང་དབང་རྩོད་ལེན་སྐབས། བདག་ཉིད་ཆེན་པོ་གྷན་ངྷིས་ཉམས་ལེན་གནང་བ་ཞིག་རེད། དེ་རིང་གྷན་ངྷི་མཆོག་གི་ཚ་མོས་གཟེངས་རྟགས་གནང་བ་དེར་ཧ་ཅང་དགའ་བོ་བྱུང་། ད་ལྟ་ང་རང་ལོ་ ༧༦ ལ་བསླེབས་ཚར་བ་རེད། མ་འོངས་པར་མི་ཚེ་ལྷག་མ་དེ་བྱམས་བརྩེ་རྩ་བར་གྱུར་བའི་འཚེ་མེད་ཞི་བའི་ལམ་དུ་བསྐྱོད་རྒྱུ་ཡིན་”ཞེས་གསུངས་སོང་། དེ་རིང་གསུང་ཆོས་ར་བར་ཆོས་ཞུ་བ་མ་ཤོང་བར་མི་བརྒྱ་ཕྲག་མང་པོ་ལམ་འགྲམ་དུ་བསྡད་དེ་གསུང་ཆོས་ཞུ་དགོས་བྱུང་སོང་།
ཕྱི་དྲོའི་ཆུ་ཚོད་ ༣།༣༠ སྟེང་ཆོས་རིག་ལས་ཁུངས་ཀྱི་གོ་སྒྲིག་འོག གསུང་ཆོས་གྲོལ་མཚམས་གསུང་ཆོས་ར་བར། ༧གོང་ས་མཆོག་དབུ་བཞུགས་ཐོག་རིས་མེད་སྨོན་ལམ་ཆེན་མོ་ཚོགས་ཡོད་ཅིང་། ཚོགས་ཆེན་སྟེང་དབུས་བོད་མིའི་སྒྲིག་འཛུགས་ཀྱི་བཀའ་ཁྲི་བློ་བཟང་སེང་གེ་མཆོག་གིས། ད་ལོར་བོད་ནང་རང་ལུས་མེར་བསྲེགས་བཏང་སྟེ། འདས་གྲོངས་སུ་ཕྱིན་པ་ཚོར་གསུང་སེམས་མཉམ་སྐྱེད་ཀྱི་གཏམ་བཤད་བཅས་སྤེལ་སོང་།
གསར་འགོད་པ། དཔལ་ལྡན་གྱིས་རྡོ་རྗེ་གདན་ནས།
དཔལ་ལྡན་སྲིད་སྐྱོང་བ་མཆོག་གི་བཀའ་སློབ་ཆ་ཚང་གང་མགྱོགས་བཀོད་དགོས་. གང་ཞེ་ན་ཕྱི་ནང་མི་མང་གིས་དཔྱིད་མ་རྒན་རྣ་བས་ཁུ་དབྱིག་ལ་བཞིན་སྒུག་ཡོད་པས་སོ
མ་འདྲིས་གཉེན་མཆོག་༸ཁྱེད་ཀྱི་བཀྲ་ཤིས་ཤོག །