བོད་ཀྱི་དགུ་བཅུ་གསུམ་ལས་འགུལ་ཚོགས་པས་གནས་མཆོག་རྡོ་རྗེ་གདན་དུ་༼ བོད་ནང་གི་དངོས་བྱུང་གནས་སྟངས ༽ ཞེས་པའི་གཏམ་བརྗོད་ཅིག་མི་མང་ལ་འཁྲབ་སྟོན་གནང་སོང་།
མདང་ཆུ་ཚོད་ ༧།༣༠ ཐོག་རྡོ་རྗེ་གདན་མཆོད་རྟེན་ཉེ་འགྲམ་སོ་རྗ་ཊ་གསོལ་མགྲོན་ཁང་ ( HOTEL SUJATA VIHAR) གི་མདུན་ཐང་དུ་བོད་ཀྱི་དགུ་བཅུ་ལས་འགུལ་ཚོགས་པས་ ༼བོད་ནང་གི་དངོས་བྱུང་གནས་སྟངས༽ ཞེས་པའི་གཏམ་བརྗོད་ཅིག་འཁྲབ་སྟོན་གནང་ཡོད་ཅིང་། འཁྲབ་སྟོན་གྱི་སྐུ་མགྲོན་དུ་དགུ་བཅུ་གསུམ་ལས་འགུལ་ཚོགས་པའི་ཚོགས་གཞོན་གཙོས། བལ་ཡུལ་ནང་འགྲོ་བ་མིའི་ཐོབ་ཐང་ཐོག་རྒྱུན་རིང་ཕྱག་ལས་གནང་མྱོང་བའི་སྐུ་ཞབས་སོའུ་ཊར་པཱ་ངྷིར་ལགས་དང་རྒྱ་གར་བདེ་སྲུང་ནང་རྒྱུན་རིང་ཕྱག་ལས་གནང་མྱོང་བའི་སྐུ་ཞབས་བློ་བཟང་རབ་རྒྱས་ལགས་བཅས་ཕེབས་འདུག
གཏམ་བརྗོད་འཁྲབ་སྟོན་ཐོག་བོད་ཀྱི་དགུ་བཅུ་ལས་འགུལ་ཚོགས་པའི་ཚོགས་གཞོན་ཀླུ་མཁར་བྱམས་ལགས་ཀྱིས། བོད་ཀྱི་དགུ་བཅུ་གསུམ་ལས་འགུལ་ཚོགས་པ་ཐོག་མར་ཕྱི་ལོ་ ༡༩༩༡ ལོར་བོད་ནས་གསར་དུ་ཕེབས་པའི་ཆབ་སྲིད་བཙོན་པ་ཁག་ཅིག་གིས་ངྷ་རམ་ས་ལར་གསར་འཛུགས་གནང་རྗེས། བོད་ནས་ཕེབས་པའི་ཆབ་སྲིད་བཙོན་པ་རིམ་པར་སྣེ་ལེན་དང་བདག་སྐྱོང་། སློབ་སྦྱོང་གི་མཐུན་རྐྱེན་སོགས་བསྐྲུན་ཏེ། ད་ཆར་ཆབ་སྲིད་བཙོན་ཟུར་སོགས་རྣམ་གྲངས་མི་འདྲ་བའི་མི་ ༥༩༠ ཙམ་ཨ་རི་གཙོས་ཕྱི་རྒྱལ་ཁག་ཏུ་ཡོད་ཚུལ་ངོ་སྤྲོད་གནང་སོང་།
མདང་དགོང་གི་གཏམ་བརྗོད་ནང་དོན་གཙོ་བོ། རྒྱ་ནག་གཞུང་གིས་བོད་ནང་གི་ཆབ་སྲིད་བཙོན་པ་རྣམས་འཛིན་བཟུང་དང་འདྲི་གཅོད་བྱེད་སྟངས་དང་ནང་མི་ཐུག་འཕྲད་ཀྱི་དཀའ་ངལ། ཁྲིམས་གཅོད་ཀྱི་གོ་རིམ། ཕྱིར་སྤྱི་ཚོགས་ནང་བསླེབས་རྗེས་དཀའ་ངལ་སོགས་གཏམ་བརྗོད་ཀྱི་ལམ་ནས་འཁྲབ་སྟོན་གནང་སོང་ལ། སྐབས་དེར་ལྟད་མོ་མང་པོ་མིག་ཆུ་འདོན་པ་དང་ངུ་ངག་འདོན་བཞིན་པ་སོགས་མང་པོ་ཞིག་བྱུང་སོང་། སྐབས་དེར་གསར་འགོད་པས་ལྷོ་ཕྱོགས་སེ་ར་དགོན་པའི་ལྟད་མོ་བ་དགེ་བཤེས་བྱམས་པ་ངག་དབང་ལགས་སུ་གཏམ་བརྗོད་འཁྲབ་སྟོན་བརྒྱུད་ཁོང་ལ་ཚོར་སྣང་གང་འདྲ་བྱུང་ཡོད་མེད་དྲིས་པར། “ ཁོང་གིས་ངུ་ངག་དང་བཅས་བོད་ནང་གི་ཆབ་སྲིད་བཙོན་པའི་གནས་སྟངས་དེ་རིང་གི་གཏམ་བརྗོད་ནང་འཁྲབ་བཞིན་པ་དང་གཅིག་མཚུངས་ཆགས་ཡོད་པ་རེད། ང་རང་ལ་མཚོན་ན་ལྷ་སའི་བར་སྐོར་ནང་སྐད་འབོད་བྱས་མྱོང་མཁན་ཞིག་ཡིན་ལ། ངའི་སྤུན་ཆུང་བའང་ཉེ་ཆར་རང་ཆབ་སྲིད་ཀྱི་ནག་ཉེས་འོག་བཙོན་འཇུག་བྱས་ཏེ་ཟླ་ ༦ འགོར་འདུག དེ་རིང་གི་གཏམ་བརྗོད་འདིར་བལྟས་འོང་དུས་ངའི་སེམས་ནས་བཟོད་མི་ཐུབ་ཀྱི་མི་འདུག གཙོ་བོ། བོད་མི་ཡོངས་ཀྱིས་གཏམ་བརྗོད་འདི་བརྒྱུད་ཆབ་སྲིད་བཙོན་པའི་གནས་སྟངས་མཁྱེན་པར་བྱ་རྒྱུ་དང་། ཁོང་རྣམ་པར་དཀའ་ངལ་ལས་གྲོལ་ཐབས་བྱ་རྒྱུ་རེ་བ་ཡིན” ཞེས་བརྗོད་བྱུང་།
བོད་ཀྱི་དགུ་བཅུ་གསུམ་ལས་འགུལ་ཚོགས་པས། ཐེངས་འདིའི་དུས་དབང་སྐབས་རྒྱ་ནག་གཞུང་གིས་བོད་ནང་གི་ཆབ་སྲིད་བཙོན་པར་སྡུག་སྦྱོང་མནར་གཅོད་བཏང་བ་དང་བོད་བསྟན་སྲིད་ཀྱི་ཆེད་དུ་ལུས་སྲོག་བློས་གཏོང་བྱས་པའི་དཔའ་བོ་དཔའ་མོ་རྣམས་ཀྱི་སྐུ་པར་འགྲེམས་སྟོན་དང། ཆབ་སྲིད་བཙོན་པའི་ལོ་རྒྱུས་དཔེ་དེབ་འགྲེམས་སྤེལ་བཅས་གནང་བཞིན་པ་མ་ཟད། ཕྱི་ཚེས་ ༤ ཉིན་གྱི་དགོང་མོ་༼དབྱིངས་ལ་ཐིམ་པའི་བོད༽ ཅེས་པའི་གློག་བརྙན་གཟིགས་འབུལ། ཕྱི་ཚེས་ ༥ དང་ ༧ ། ཕྱི་ཚེས་ ༩ བཅས་སུ་གཏམ་བརྗོད་འཁྲབ་སྟོན་གནང་རྒྱུ་ཡིན་འདུག
གསར་འགོད་པ། དོན་གོ
ཕ་བཟང་གི་བུ།
དགུ་བཅུ་གསུམ་ཚོགས་པའི་འཁྲབ་སྟོན་ལ་བལྟས་རྗེས་བོད་ཀྱི་ཆབ་སྲིད་བཙོན་པ་ཚོར།
དྲིན་ཆེན་ཕ་ལོའི་སྙིང་གི་མར་ལོ་སེམས་ཀྱི་གཅེས་པའི་བུ་བཟང་ཁྱེད།།
བྱམས་ལྡན་མ་ལོའི་དཔྲལ་བའི་མིག་ཟུང་ཡིད་ལ་འཇགས་པའི་སེམས་རྟེན་ཁྱེད།།
ཉི་ཟེར་མེད་ཀྱང་མུན་པ་མཐུག་པའི་བཙོན་ཁང་སྒོ་མེད་ནག་པོའི་ནང་།།
རྐང་པ་ལག་ཟུང་ལྕགས་ཀྱིས་བསྡམས་ཤིང་ལུས་གཅོང་ནད་ཀྱིས་གཟིར་ནས་ཡོད།།
ཤ་ཁྲག་རུས་གསུམ་ས་མཐོར་འཁྲུངས་པའི་དྲིན་ལྡན་ཕ་ལོའི་སྙིང་གི་བུ།།
སེམས་ཀྱི་བརྩེ་བ་སྙིང་ལ་འཁྱིལ་བའི་བྱམས་བརྩེའི་བདག་ཉིད་ཨ་མའི་བུ།།
གསེར་ནག་རིན་ཆེན་སྟོང་ལས་ལྷག་པའི་གཅེས་པའི་སྐུ་ལུས་རྩ་ཆེན་དེ།།
ཆོལ་གསུམ་སྤུན་ཟླའི་སྡུག་བསྔལ་སེལ་ལ་ཁྱེད་ཀྱིས་ཕང་མེད་བཏང་སོང་ཨང་།།
སྙིང་གི་དཀྱིལ་ན་ན་ཟུག་ལོས་ཡོད་ཚོར་ཤེས་ལྡན་པའི་གང་ཟག་ཅིག།།
ཡིད་ཀྱི་མཁའ་ན་ཕྱིར་དྲན་ལོས་ཡོད་དྲིན་གྱིས་བསྐྱངས་པའི་གཅེས་ཕྲུག་ཅིག།།
འོན་ཀྱང་བོད་མིའི་བདེ་སྡུག་སླད་དུ་ཁྱེད་ཀྱིས་ཚེ་སྲོག་རིན་ཆེན་ནོར།།
མུན་པ་ནག་པོའི་བཙན་ཁང་ནང་ན་ལོ་ཟླའི་ཆར་གྱིས་བཟས་སོང་ཨང་།།
ཉི་མའི་འོད་སྣང་མིག་གིས་མ་མཐོང་ལོ་ཟླའི་རྒྱུན་ཐག་ག་ཙམ་འདས།།
ཟླ་བའི་བསིལ་ཟེར་ལུས་ཀྱིས་མ་མྱངས་ཉིན་མཚན་མང་པོ་ག་ཙམ་བཞུད།།
གཉེན་བཤེས་བྲལ་བའི་མུན་ཁུངས་ཁྲོད་ན་བཟོད་མེད་གཅར་རྡུང་ག་ཙམ་བྱས།།
བརྩེ་མེད་ལས་ཀྱིས་ལུས་སེམས་གཉིས་ལ་སོས་མེད་རྨ་ཁ་ག་ཙམ་བསྐྲུན།།
སྐྱག་ཆུ་ཕོར་གང་བཙན་གྱི་བླུད་དུས་རྫ་ཆུ་བསིལ་མ་དྲན་སོང་ངམ།།
བཅུད་མེད་འབྲས་སྐམ་ཞལ་གྱིས་མྱོང་དུས་སྦྲང་དཀར་རྩམ་པ་དྲན་སོང་ངམ།།
དགུན་གྱི་གྲང་ངར་ལུས་ལ་ལྡང་དུས་སློག་པའི་དྲོད་ཁོལ་དྲན་སོང་ངམ།།
ཁྲོ་གཉེར་རྒྱ་གདོང་མིག་གིས་མཐོང་དུས་མ་ལོའི་མཛུམ་ཞལ་དྲན་སོང་ངམ།།
ཁྱེད་ཀྱི་དཔའ་དང་བློ་ཁོག་འདི་ཡིས་བོད་ཀྱི་དབུ་འཕང་མཐོ་སོང་ལོ།།
ཁྱེད་ཀྱི་བརྩེ་དང་ལྷག་བསམ་འདི་ཡིས་བོད་ལ་དྲོད་ཁོལ་བསྐྲུན་སོང་ལོ།།
ཁྱེད་ཀྱི་ཕང་མེད་བློས་བཏང་འདི་ཡིས་བོད་ལ་སྙིང་སྟོབས་བསྩལ་སོང་ལོ།།
ཁྱེད་ཀྱི་བཙན་པོའི་གོ་ཆ་འདི་ཡིས་ང་ཚོ་ཚང་མ་སྲུང་སོང་ལོ།།
ཁྱེད་ཚོས་མྱངས་པའི་ལུས་ཀྱི་ན་ཟུག་ང་ཚོའི་སེམས་ལ་འཛུལ་ཏེ་འོང་།།
ཁྱེད་ཚོའི་ལུས་ཀྱི་ཟུངས་ཁྲག་བཞུར་རྒྱུན་ང་ཚོའི་མིག་ནས་འབབ་སྟེ་འོང་།།
ཁྱེད་ཚོ་གཅར་བའི་ན་ཟུག་འཁུན་སྒྲས་ང་ཚོས་མགྲིན་པ་རྣང་སྟེ་འོང་།།
ཁྱེད་ཚོའི་ལུས་སེམས་དཀའ་སྡུག་བསམ་ན་ང་ཚོའི་སེམས་པ་སྡུག་སྟེ་འོང་།
འདོན་སྤེལ།: ༢༠༡༡/༡༡/༠༤
པ
ཀླུ་བྱམས་འདི་དམངས་གཙོའི་ལམ་ལ་ཨུ་ཚུགས་ཀྱི་འགྲོ་མི་ཞིག་རེད་འདུག་།བོད་ཀྱི་རྒྱལ་དར་དེ་བོད་ཀྱི་ཚེ་སྲོག་དབུགས་གསུམ་ཡིན་པར་ཧ་གོ་མི་ཞིག་ཡིན་འདུག་།བོད་ནང་གི་དཀའ་ངལ་དེ་དཀའ་ངལ་ངོ་མ་ཡིན་པ་ཧ་གོ་མི་རེད་འདུག་།ཡིནའང་ང་ཚོའི་སྤྱི་ཚོགས་འདིས་ཁྱོད་ལ་མཐོང་ཚུལ་ག་འདྲ་ཡོད་འདུག་།
སྐུ་མགྲོན་གཞན་པ་གཉིས་ཀྱིས་་གཏམ་བཤད་གནང་མེད་པ་ཡིན་ནམ
ཀླུ་མཁར་བྱམས་ལ་སོགས་ཀྱིས། བོད་ཀྱི་དགུ་བཅུ་གསུམ་ལས་འགུལ་ཚོགས་པས་གནས་མཆོག་རྡོ་རྗེ་གདན་དུ་༼ བོད་ནང་གི་དངོས་བྱུང་གནས་སྟངས ༽ ཞེས་པའི་གཏམ་བརྗོད་ཅིག་མི་མང་ལ་འཁྲབ་སྟོན་གནང་བར་སྤཡི་དོན་འབད་སྟངས་ཐབས་ཤེས་བཟང་ལ་རང་གཞན་གཉིས་ཕན་གྱི་ལས་འགུལ་ལ་རྒྱབ་སྐྱབ་སྐྱོར་དང་། དགའ་བསུ་ཞུ། བོད་རིགས་ཀྱི་བདེན་པ་མྱུར་དུ་རྒྱལ་འགྱུར་ཅིག །
བོད་ཀྱི་དགུ་བཅུ་ལས་འགུལ་ཚོགས་པའི་ཚོགས་གཅོ་ཀླུ་མཁར་བྱམས་ལགས་ནི།
ལྷག་བསམ་དང་བློ་གྲོས་ལྡན་པའི་བོད་ཀྱི་ན་གཞོན་སྙིང་སྟོབས་ཅན་ཞིག་ཡིན་པ་གོ་མྱོང་།
དེས་ན་ད་སྐབས་ཁོང་གི་ཕྱག་ལས་གནང་བཞིན་པ་འདི་དག་ལ་བསྒྲིགས་འཛུགས་དང་དངོས་དོན་རྗེས་དྲན་གྱི་ཁུངས་ལུང་ཡོད་པའི་འཁྲབ་སྟོན་ཡག་པོ་ཞིག་བྱེད་བཞིན་པའི་ཡིད་ཆེས་ཐོག
ཁོང་གི་མཛད་བཞིན་པས་ལས་འགུལ་འདི་བརྒྱུད་ནས་རྒྱ་ཆེའི་མི་མང་ལ་དངོས་དོན་བདེན་འཚོལ་གྱི་གོ་རྟོགས་གསར་པ་སྤེལ་ཐུབ་རྒྱུའི་རེ་བ་ཟབ་མོ་ཡོད།