ཕྱི་ལོ་ ༢༠༡༢ ཚེས་ ༡ ཉིན་རྒྱ་གར་གནས་མཆོག་རྡོ་རྗེ་གདན་དུ་༧གོང་ས་མཆོག་གིས་དུས་དབང་ཐེངས་ ༣༢ པ་གནང་བཞིན་པའི་སྐབས་འདིར། བོད་ཕྱི་ནང་གཉིས་དང་འཛམ་གླིང་ཡུལ་གྲུ་གང་ས་ནས་དུས་དབང་ཞུ་མཁན་འབུམ་ཕྲག་མང་པོ་འཛོམས་ཀྱིན་ཡོད་པ་ལྟར། བཙན་བྱོལ་བོད་མིའི་སྒྲིག་འཛུགས་ཀྱི་ལས་བྱེད་བརྒྱ་ཆ་ ༧༠ ཙམ་གྱིས་ཀྱང་སྒེར་དགོངས་ཐོག་དུས་དབང་ལ་ཕྱིན་ཡོད་སྟབས། ད་ལྟའི་ཆར་དབུས་བོད་མིའི་སྒྲིག་འཛུགས་ཀྱི་ལྟེ་གནས་གངས་ཅན་སྐྱིད་གཤོངས་ཀྱི་ལྷན་ཁང་དང་ལས་ཁུངས་ཁག་ཀྱང་སྟོང་པར་མ་ལྷག་ཙམ་ཆགས་འདུག
ཟླ་འདིའི་ཕྱི་ཚེས་ ༣ ཉིན་འདི་ག་གསར་འགོད་པ་གངས་སྐྱིད་དུ་ཡོད་པའི་བོད་མིའི་སྒྲིག་འཛུགས་ཀྱི་ལྷན་ཁང་ཁག་དང་ལས་ཁུངས་བཅས་སུ་བཅར་དེ། འབྲེལ་ཡོད་དྲུང་ཆེ་དང་ལས་བྱེད་ཁག་ལ་ཐུག་འཕྲད་ཀྱིས་གནས་ཚུལ་རྒྱུས་ལོན་བྱས་སྐབས། དབུས་འཕྲོད་བསྟེན་ལྷན་ཁང་ནང་ལས་བྱེད་ ༣༣ ཡོད་པ་ལས་ད་ལྟ་ ༡༠ ལས་ལྷག་མེད་པ་དང་། དེའི་ཁྲོད་ལས་བྱེད་༡༢ སྒེར་དགོངས་དང་ ༩ གཞུང་འབྲེལ་ཐོག་དུས་དབང་དུ་ཕྱིན་འདུག བདེ་སྲུང་ལས་ཁུངས་ཀྱི་ལས་བྱེད་ ༤ མ་གཏོགས་ཚང་མ་རྡོར་གདན་དུ་ཕྱིན་ཡོད་པ་དང་། ནང་སྲིད་ལས་ཁུངས་ལ་ལས་བྱེད་ ༤༦ ཡོད་ལས་བརྒྱ་ཆ་ ༥༠ ལྷག་སྒེར་དགོངས་ཐོག་དུས་དབང་ལ་ཕྱིན་འདུག ཤེས་རིག་ལས་ཁུངས་ལ་ལས་བྱེད་གྲངས་ ༥༥ ཡོད་པ་ལས། ལས་བྱེད་ ༢༧ སྒེར་དགོངས་ཐོག་དུས་དབང་ལ་ཕྱིན་འདུག དཔལ་འབྱོར་ལུས་ཁུངས་ལ་ལས་བྱེད་ ༢༩ ཡོད་པ་ལས་ ༡༨ སྒེར་དགོངས་ཐོག་དུས་དབང་ལ་ཕྱིན་ཡོད་ཅིང་། ལྷག་མ་ལས་བྱེད་གྲངས་ ༡༡ ལས་ཁུངས་སུ་རྒྱུན་ལྡན་ལྟར་ལས་ཞུགས་བྱེད་བཞིན་འདུག ཕྱི་དྲིལ་ལས་ཁུངས་ནང་ལས་བྱེད་ ༨༠ ཙམ་ཡོད་པ་ལས་ ༤༠ ཙམ་སྒེར་དགོངས་ཐོག་དུས་དབང་ལ་ཕྱིན་ཡོད་པ་དང་། ལས་བྱེད་ཁག་ཅིག་གཞུང་འབྲེལ་ཐོག་ཕྱིན་ཏེ་དུས་དབང་སྐབས་འགྲེམས་སྟོན་དང་གློག་བརྙན་གཟིགས་འབུལ་སོགས་བྱེད་ཀྱི་ཡོད་འདུག ཆོས་རིགས་ལྷན་ཁང་ལ་ལས་བྱེད་གྲངས་ ༡༥ ཡོད་པ་ལས་ ༢ མ་གཏོགས་ལྷག་མེད་པ་དང་། ལས་བྱེད་ ༨ སྒེར་དགོངས་དང་། ལས་བྱེད་ ༥ གཞུང་འབྲེལ་ཐོག་རྡོར་གདན་དུ་ཕྱིན་ཏེ་གཞུང་འབྲེལ་མཆོད་འབུལ་དང་དུས་དབང་ངོ་སྤྲོད། ༧གོང་ས་མཆོག་དགུང་གྲངས་ ༡༡༣ བཞུགས་རྒྱུའི་བཀའ་བཞེས་གནང་ཡོད་པ་ལྟར། ༼བོད་མི་ཡོངས་ཀྱི་བསྒྲུབ་བྱའི་ལས་འགན༽ཞེས་པའི་དེབ་ཆུང་འབུལ་གཅིག་པར་འགྲེམས་དང་། དུས་དབང་སྐབས་དམར་ཟས་སྤང་རྒྱུ་བཅས་ཀྱི་ལས་རིམ་ཡོད་འདུག དེ་ལྟར་ལྷན་ཁང་ཁག་གི་ལས་ཁུངས་སྡེ་ཚན་རེ་རེ་བཞིན་སྟོང་པ་མ་ལྷག་ཙམ་ཆགས་འདུག 
གོང་གསལ་གནས་སྟངས་འོག་ལས་ཁུངས་ཁག་གི་རྒྱུན་ལྡན་ལས་དོན་རྣམས་ལ་འཐུས་ཤོར་མི་འགྲོ་བའི་ཆེད། དགོངས་ཞུ་དང་ལས་ཁུངས་ཁག་གི་ལས་དོན་བསྒྲུབ་ཕྱོགས་ཐད་བཀའ་ཤག་གི་ངོས་ནས་ལམ་སྟོན་དང་གོ་སྒྲིག་གང་འདྲ་གནང་ཡོད་མེད་ཐད། བཀའ་དྲུང་མི་འགྱུར་རྡོ་རྗེ་ལགས་སུ་བཀའ་འདྲི་ཞུས་པར། ཁོང་གིས “ལས་ཁུངས་ཁག་གི་ལས་དོན་སྐོར་ནས། ཕྱི་དྲིལ་ལས་ཁུངས་ཀྱིས་དུས་དབང་སྐབས་འཛམ་གླིང་གང་ས་ནས་མི་མང་པོ་འཛོམས་བཞིན་པའི་སྐབས་དང་བསྟུན། ཕར་ཕྱིན་ཏེ་བོད་ཀྱི་གནས་སྟངས་དང་འབྲེལ་པའི་གནས་ཚུལ་མང་པོ་དྲིལ་བསྒྲགས་སོགས་ལས་དོན་རིགས་སྤེལ་བཞིན་པ་དང་། འཕྲོད་བསྟེན་ལས་ཁུངས་ཀྱིས་འཕྲོད་བསྟེན་ཞབས་ཞུ་དང་འཕྲོད་བསྟེན་ཐོག་གལ་ཆེའི་ལམ་སྟོན་བྱ་རྒྱུའི་ཆེད་འབྲེལ་ཡོད་ལས་བྱེད་གང་འཚམས་ཤིག་ཕར་ཕྱིན་པ་རེད། བདེ་སྲུང་ལས་ཁུངས་ལ་མཚོན་ན། ༧གོང་ས་མཆོག་གི་སྐུ་ཕྱྭ་ལས་གལ་ཆེ་བ་ཞིག་བོད་གཞིས་བྱེས་གཉིས་ལ་མེད་སྟབས། ལས་བྱེད་མང་པོ་ཞིག་༧གོང་ས་མཆོག་གི་སྐུ་ཕྱྭའི་བདེ་སྲུང་དང་འབྲེལ་བའི་ལས་དོན་ཆེད་ཕར་ཕྱིན་པ་རེད། ཆོས་རིག་ལས་ཁུངས་ཀྱིས་དུས་དབང་སྐབས་༧གོང་ས་མཆོག་གཙོ་བོར་གྱུར་པའི་ཕྱོགས་མཐའ་ཁག་གི་བོད་ཀྱི་བླ་ཆེན་མང་པོ་ཞིག་ཆིབས་བསྒྱུར་གནང་གི་ཡོད་སྟབས་ཆོས་ཕྱོགས་ཀྱི་ལས་དོན་རིགས་དང་། ལྷག་པར་དུ་བཙན་བྱོལ་བོད་མིའི་སྒྲིག་འཛུགས་ཀྱི་ངོས་ནས་བོད་ནང་གི་ཛ་དྲག་གནས་བབ་ཆེད་དུས་དབང་སྐབས་རྡོ་རྗེ་གདན་དུ་མཆོད་འབུལ་རྒྱ་ཆེན་པོ་ཞིག་གནང་གཏན་འཁེལ་པར་བརྟེན། ལས་ཁུངས་ཀྱི་ལས་བྱེད་གང་འཚམས་ཤིག་འགྲོ་དགོས་ཆགས་ཡོད། མདོར་བསྡུས་ན་གོང་གི་ལྷན་ཁང་ཁག་གི་ལས་བྱེད་མང་པོ་ཞིག་གཞུང་འབྲེལ་ཆགས་ཡོད་པ་དང་། ལས་ཁུངས་ཨ་མ་ངྷ་སར་ཡོད་མེད་ལ་མ་བལྟས་པར་འཆར་གཞི་ལྡན་པའི་ཐོག་ལས་དོན་མཇུག་སྐྱོང་གནང་གི་ཡོད་སྟབས། ལྷན་ཁང་དེ་དག་གི་ལས་དོན་ལ་འཐུས་ཤོར་གང་ཡང་འགྲོ་རྒྱུ་མ་རེད།” ཅེས་བརྗོད་བྱུང་།དེ་བཞིན། ཁོང་གིས་ལས་བྱེད་ཚོར་དགོངས་པ་སྤྲོད་དགོས་པའི་སྐོར་ལ། ནང་སྲིད་དང་ཤེས་རིག དཔལ་འབྱོར་ལས་ཁུངས་གསུམ་ལ་གཞུང་འབྲེལ་ལས་གཞི་དམིགས་བསལ་མེད་ཀྱང་། ལས་བྱེད་མང་པོ་ཞིག་སོ་སོའི་ཐོབ་སེང་སྒྲིག་གཞི་ལྟར་སྒེར་དགོངས་ཐོག་ལས་ཁུངས་སོ་སོའི་འགན་འཛིན་རྣམ་པས་ཐག་གཅོད་བྱས་ཡོད་པ་དང་། གཅིག་ནས་༧གོང་ས་མཆོག་གིས་གནས་ཁྱད་པར་ཅན་རྡོ་རྗེ་གདན་དུ་དཔལ་དུས་འཁོར་ལོའི་དབང་ཆེན་གནང་བཞིན་པ་འདི་འདྲ་ཐོབ་རྒྱུ་ཧ་ཅང་དཀོན་པོ་ཡིན་སྟབས། ལས་བྱེད་རྣམ་པ་ཚོ་མང་པོ་ཞིག་གིས་དུས་དབང་ཆེད་དགོངས་ཞུ་གནང་གི་ཡོད་སྟབས། གོང་རིམ་ནས་ཀྱང་དགོངས་ཞུ་བཀག་འགོག་བྱེད་རྒྱུ་ཅུང་ཁག་པོ་ཆགས་ཡོད་ཀྱང་། དགོངས་པ་གནང་མཁན་འབྲེལ་ཡོད་དྲུང་ཆེ་རྣམ་པ་ཚོས་ལས་ཁུངས་ཀྱི་ཉིན་རེའི་ལས་དོན་འཐུས་ཤོར་མི་འགྲོ་བའི་ཕྱོགས་ལ་དགོངས་པ་བཞེས་ཡོད་སྐོར་གསལ་བཤད་དང་སྦྲགས། བཀའ་དྲུང་ལགས་ཀྱིས་ “ དུས་དབང་སྐབས་ཀྱི་བདུན་ཕྲག་གཉིས་རིང་གསར་གཏོད་ཀྱི་ལས་ཀ་ཡོང་ཐབས་མེད་པ་མ་གཏོགས་རྒྱུན་ལྡན་གྱི་ལས་དོན་ལ་འཐུས་ཤོར་འགྲོ་ཡི་མ་རེད། དེང་སྐབས་དེ་སྔ་དང་མ་འདྲ་བར་འབྲེལ་མཐུད་བརྒྱུད་ལམ་ཡག་པོ་ཡོད་སྟབས། སྐབས་ཐོག་སོ་སོར་ཕན་ཚུན་འབྲེལ་བ་བྱེད་དགོས་པ་དང་ལམ་སྟོན་ཞུ་དགོས་རིགས་ཁ་པར་སོགས་བརྒྱུད་དེ་གནང་ཆོག་ཆོག་རེད། ཧོབ་ཏུ་བལྟས་ཡོང་དུས་ལས་བྱེད་མང་པོ་ཞིག་ཕེབས་ཡོད་སྟབས། དུས་རྒྱུན་བཙན་བྱོལ་སྒྲིག་འཛུགས་དང་མང་ཚོགས་ཀྱི་བདེ་དོན་ཐད་ཐུགས་ཁུར་ཡོད་མཁན་ཚོར་སེམས་འཚབ་ཡོང་སྲིད་མོད། དེ་ལྟར་འཐུས་ཤོར་འགྲོ་དགོས་པ་ཞིག་ཆགས་མེད་པས་སེམས་འཚབ་གནང་དགོས་པ་མ་རེད་ཞུ་འདོད་བྱུང་། ” ཞེས་བརྗོད་སོང་།
གསར་འགོད་པ། བནྡེ་སྐྱབས།
![AfD party members celebrate victory in Saxony-Anhalt on Sunday [Matthias Schrader/AP]](https://tibettimes.net/wp-content/uploads/2026/09/WhatsApp-Image-2026-09-11-at-4.20.04-PM-360x180.jpeg)
གྲོགས་པོ་རྣམས་པས་གཟིགས་དང་བཙན་བྱོལ་སྤྱི་ཚོགས་ནང་བོད་གཞུང་གི་ལས་གནས་ཡོད་མཁན་ཚོའི་བོད་སྤྱི་པའི་དོན་དུ་ཕྱག་ལས་ཇི་ཙམ་བྱེད་གི་ཡོད་པ་གསལ་པོ་མ་རེད་དམ། བོད་གཞུང་གི་ཞབས་སྟེགས་སྒང་སྡད་ནས་རང་དོན་སྒྲུབ་གི་ཡོད་དམ་བོད་སྤྱི་པའི་དོན་སྒྲུབ་གི་ཡོད་མེད་དེ་རིང་ལྟོས་ན་གསལ་པོ་རེད། ལས་དྱེད་པ་བརྒྱ་ཆ་བདུན་བཅུའི་སྒེར་དགོངས་ཞུས་པ་རེད་ཟེར་དུས་ཧང་སང་བ་རེད། དེངས་སངས་གངས་སྐྱིད་ཁུལ་དུ་ལས་བྱེད་པས་སྟོང་ནས་ བཀའ་དྲུང་ཁོང་ཡང་ཞབས་སྟེགས་སྒང་གཉིད་ཁུག་ནས་བཞུགས་ཡོད་པ་འདྲ། གསར་འགོད་པ་ཕེབས་དུས་ཁོང་ད་དུང་དྲང་ཚུགས་བཞུགས་ཐུབ་མི་འདུག
དབུས་གཞུང་གི་ལས་བྱེད་བརྒྱ་ཆ་བདུན་ཅུ་སྒེར་གྱིས་དགོང་ཞུས་ཐོག་དུས་དབང་ལ་བསྐྱོད་རྒྱུ་དེ་དགོད་བྲོ་ཡག་རང་རེད། དེང་བར་ཁོང་རྣམ་པར་དུས་དབང་མ་ཐོབ་པ་ཞིག་ཡིན་ན་ནི་དམིགས་བསམ་རེད་ཡིད་དང་ཡིན། མ་གཏོགས་ཁོང་ཚོའི་ལས་དོན་དང་དོ་སྣང་བྱེད་རྒྱུ་དེ་ཆོས་ཕྱོསས་སུ་རྩ་བ་ཉིད་ནས་མ་རེད། གལ་ཏེ་ཆོས་ཕྱོགས་སུ་དོད་སྣང་གལ་སྲིད་བྱས་པ་དེ་ཙམ་གྱིས་སྲིད་ཕྱོགས་སུ་ཕྱི་བཤོལ་འགྲོ་བ་ནི་སྨོན་མེད་རེད། རྒྱུ་མཚན་གང་ཡིན་ན་ཅེ་ན། དཔེར་ན་ཆོས་ནི་གཞན་ཕན་དང་། སྲིད་ནི་རང་རྒྱལ་རེད། མེ་དང་ཆུ་གཉིས་ནམ་ཡང་སྣོད་གཅིག་གི་ནང་ཡོང་རྒྱུ་མ་རེད། སོང་གཙང་བོད་ནི་ད་དུང་རྨོངས་དད་དང་རྗེས་ལུས་ཁོ་ནའི་ངང་དུ་འགྲོ་རྒྱུའི་མངོན་བརྡ་དང་གོམ་སྟབས་ཀྱང་བསྒྱུར་བ་འདིས་སྐྱོ་བ་ལ་ཨང་།
བཀའ་འདྲི་འདིའི་རིགས་ངོ་མ་གནང་དགོས་པ་ཞིག་རེད། གསར་འགོད་པ་བཎྡེ་སྐྱབས་ལ་བཀའ་དྲིན་ཆེ། དེ་མིན་གསར་འགོད་པར་ཞུ་རྒྱུ་གཞན་ཞིག་ཡོད་པ་ནི། དུས་དབང་སྐབས་ཀྱི་རྡ་སའི་གནས་སྟངས་དང་། དེ་མིན་རྡ་ས་ནས་དུས་དབང་ལ་འགྲོ་མ་ཐུབ་མཁན་གྱི་གསར་འབྱོར་བ་དང་བོད་མི་ཚོའི་སེམས་ཚོར་དང་དཀའ་ངལ་སྐོར་ནས་གསར་འགྱུར་རེ་སྤེལ་ཐུབ་ན་བཟང་ས་རེད་ལགས།