ལོ་ལྟར་བོད་གཞུང་བདེ་ལེགས་སྨན་ཁང་གི་མཐུན་འགྱུར་འོག ཉི་ཧོང་གི་མིག་ནད་ཆེད་ལས་སྨན་པའི་ལྷན་ཚོགས་(AOCA)ཀྱིས་བཙན་བྱོལ་བོད་པའི་སྤྱི་ཚོགས་ནང་རིན་མེད་ཐོག་མིག་གཤགས་བཅོས་ཀྱི་ཞབས་ཞུ་ལས་གཞི་ཞིག་འགྲོ་བཞིན་པ་ལྟར། འདི་ལོ་ཁྱོན་བསྡོམས་མི་ ༤༠༠ ལྷག་ལ་མིག་ནད་བརྟག་དཔྱད་དང་། མི་ ༧༠ ཙམ་ལ་མིག་གཤགས་བཅོས་བྱས་འདུག
བོད་གཞུང་བདེ་ལེགས་སྨན་ཁང་གིས་མཐུན་འགྱུར་རོགས་འདེགས་འོག ཉི་ཧོང་གི་མིག་ནད་ཆེད་ལས་སྨན་པའི་ལྷན་ཚོགས་(AOCA)ཀྱིས་ལོ་ལྟར་ཡུ་ཤིའི་འཁྲུངས་སྐར་དང་ལོ་གསར་གྱི་གུང་གསེང་གཉིས་ལ་སྐབས་བསྟུན་ནས། བཙན་བྱོལ་བོད་མིའི་སྤྱི་ཚོགས་ནང་མིག་ལྕིབས་ལིང་ཏོག་ཅན་གྱི་ནད་པ་རྣམས་ལ་རིན་མེད་ཐོག་མིག་གཤགས་བཅོས་ཀྱི་ཞབས་ཞུའི་ལས་གཞི་ཞིག་འགྲོ་བཞིན་པ་ལྟར། ཕྱི་ལོ་ ༢༠༡༡ ཟླ་ ༡༢ ཚེས་ ༢༨ ནས་བདུན་ཕྲག་གཅིག་ཙམ་གྱི་རིང་བོད་གཞུང་བདེ་ལེགས་སྨན་ཁང་དུ། འདི་ལོའི་མིག་ལྕིབས་ལིང་ཏོག་གཤགས་བཅོས་ཀྱི་སྨན་ཞབས་ལས་གཞི་དེ་མགོ་བརྩམས་འདུག ཐེངས་འདིར་ཉི་ཧོང་ནས་སྨན་པ་ ༨ དང་སྨན་ཞབས་ ༤ ཡིས་སོ་སོ་རང་ངོས་ནས་འགྲོ་སོང་བཏང་སྟེ་ཕེབས་ཡོད་པ་རེད། འདི་ལོ་མིག་ནད་བརྟག་དཔྱད་བྱེད་མཁན་ནད་པ་ ༤༠༠ ལྷག་སླེབས་ཡོད་པ་དང་། དེའི་ཁྲོད་མིག་ལྕིབས་ལིང་ཏོག་སྨིན་ཚད་ལྟར་དངོས་སུ་མིག་གཤགས་བཅོས་དགོས་པའི་ནད་པ་ ༧༠ ཙམ་ཡོད་འདུག་ལ། རྒན་གསོ་ཁང་ནང་ཡོད་པའི་བོད་པ་རྒན་རྒོན་རྣམས་གཙོས་བོད་མི་ ༥༠ ཙམ་མ་གཏོགས་གཞན་ནད་པ་ཕལ་ཆེ་བ་དྷ་རམ་ས་ལའི་ཉེ་འདབས་ཁུལ་གྱི་རྒྱ་གར་ཡུལ་མི་ཡིན་འདུག
༢༠༠༠ ལོ་ནས་བཟུང་མིག་ལྕིབས་ལིང་ཏོག་གཤགས་བཅོས་ཀྱི་ཞབས་ཞུའི་ལས་གཞི་འདི་མགོ་བཙུགས་ནས་ད་ལྟའི་བར་ལོ་ ༡༡ ཕྱིན་ཡོད་པ་དང་། འདས་པའི་ལོ་དེ་དག་གི་རིང་མིག་གཤགས་བཅོས་ཀྱི་འཕྲུལ་ཆས་དང་སྨན་པ་དག་གི་ལམ་གྲོན་དང་། སྡོད་ཁང་། ཟ་མ་སོགས་ཀྱི་འགྲོ་གྲོན་སོགས། ཉི་ཧོང་གི་མིག་ནད་ཆེད་ལས་སྨན་པའི་ལྷན་ཚོགས་(AOCA) ཀྱི་སྨན་པ་དག་གིས་རང་ངོས་ནས་དང་དུ་བླངས་ཏེ། ཉི་ཧོང་ནང་ཚོགས་པ་ཁག་གི་རྒྱབ་སྐྱོར་འཚོལ་བ་དང་མང་ཚོགས་ཁྲོད་ཞལ་འདེབས་སློང་བ། མཚམས་རེར་སྨན་པ་རང་ངོས་ནས་འགྲོ་སོང་བཏང་སྟེ་ཕེབས་བཞིན་ཡོད་པ་དང་། དེ་བཞིན། འདི་གར་གཤགས་བཅོས་སྐབས་བརྟག་དཔྱད་ཡོ་ཆས་ཕྲ་མཐོང་ཆེ་ཤེལ་དང་། ནད་པའི་སྡོད་ཁང་། ནད་པ་རེ་རེའི་གཟུགས་པོ་དང་ཁྲག་ཤེད་བརྟག་དཔྱད། ཞག་སྡོད་ནད་པའི་སྔ་དགོང་ཁ་ལག་སོགས་ཀྱི་འགྲོ་གྲོན་བདེ་ལེགས་སྨན་ཁང་གིས་གཏོང་བཞིན་པ་བཅས་ལ་བརྟེན་ནས། ད་ལྟའི་བར་རྒྱུན་མ་ཆད་པར་རིན་མེད་ཐོག་མིག་གཤགས་བཅོས་ཀྱི་ལས་གཞི་འདི་མུ་མཐུད་འགྲོ་བཞིན་ཡོད་འདུག
རིན་མེད་ཐོག་མིག་གཤགས་བཅོས་གནང་བཞིན་པའི་ཞབས་ཞུའི་ལས་གཞི་འདིའི་སྒྲུབ་སྟངས་ཐད། བོད་གཞུང་བདེ་ལེགས་སྨན་ཁང་གི་འགན་འཛིན་ཟླ་བ་ཕུན་སྐྱིད་ལགས་སུ་བཀའ་འདྲི་གནང་བར། ཁོང་གིས་ “ དང་ཐོག་མིག་གཤགས་མགོ་བཙུགས་སྐབས་རྒྱུན་རིང་མིག་ན་བཞིན་ལྷག་བསྡད་པའི་བོད་པ་མང་པོ་ཡོད་པ་དང་། རྗེས་ནས་རིམ་གྱིས་བོད་པ་ཉུང་དུ་ཕྱིན་སྟབས། རྒྱ་གར་ཡུལ་མི་ལའང་སྨན་བཅོས་ཀྱི་གོ་སྐབས་འདི་ཕུལ་བ་ཡིན། ད་ལྟའི་ཆར་བོད་པ་ལས་རྒྱ་གར་ཡུལ་མིར་ཕན་ཐོགས་ཡོད་པ་ཞིག་ཆགས་བསྡད་འདུག ང་ཚོ་བོད་པའི་སྨན་ཁང་འདིས་བོད་པ་ཙམ་མ་ཡིན་པར་གཞན་པ་ཚང་མར་ཕན་ཐོགས་པ་ཞིག་བྱུང་ན་དེ་དགེ་མཚན་ཞིག་ཡིན་སྟབས། བོད་པ་ཉུང་ཉུང་ལས་མེད་ནའང་། ལས་གཞི་འདི་མུ་མཐུད་ནས་སྤེལ་ཏེ་འགྲོ་བསྡད་ཡོད། ད་ལོ་ནི་ལོ་ ༡༡ པ་དེ་ཆགས་བསྡད་ཡོད་པ་རེད།” ཅེས་བརྗོད་དེ། རྒྱ་གར་ཡུལ་མིའི་ནང་བོད་པ་ཚོར་སྒོར་མོ་མང་པོ་འདུག་བསམ་པ་དང་། བོད་པས་རང་ཉིད་གཅིག་པུ་མ་གཏོགས་ཁོ་ཚོར་རོགས་རམ་བྱེད་ཀྱི་མི་འདུག་བསམ་པའི་འདུ་ཤེས་འཛིན་མཁན་ཡོད་སྲིད་པས། ང་ཚོ་བོད་པར་ཡོད་པ་དེ་སོ་སོ་གཅིག་པུས་ཉར་འདོད་མ་ཡིན་པར་རྒྱ་གར་ཡུལ་མི་ལའང་རོགས་པ་བྱེད་འདོད་ཡོད་པ་དེ་བསྟན་རྒྱུ་གལ་ཆེན་པོ་ཡིན་སྟབས། ལོ་ལྟར་མིག་གཤགས་བཅོས་ཀྱི་ལས་གཞི་འདིའི་དབུ་འབྱེད་སྐབས་སུའང་། བོད་གཞུང་གི་མཛད་གཙོ་རྣམ་གདན་འདྲེན་མ་ཞུས་པར། ས་གནས་རྒྱ་གར་གྱི་འཛིན་སྐྱོང་དཔོན་རིགས་མཐོ་གྲས་ཁག་སྐད་བཏང་སྟེ། སྨན་བཅོས་ཙམ་ཁོ་ན་མ་ཡིན་པར་གོ་སྐབས་འདི་བརྒྱུད་དེ་བོད་པ་བཙན་བྱོལ་བ་དང་རྒྱ་གར་ཡུལ་མི་གཉིས་བར་གྱི་དོགས་གཞི་རྣམས་སེལ་ཐབས་གནང་གི་ཡོད་པའི་སྐོར་བརྗོད་སོང་།
ཉི་ཧོང་བ་ཨོ་བྷ་ཝ་ (Ogawa) ནི་བོད་གཞུང་སྨན་རྩིས་ཁང་གི་སྐབས་བཅུ་གསུམ་པའི་སྨན་སློབ་མཐར་སློབ་མའི་གྲས་ཡིན་པ་དང་། ཁོང་གིས་ལོ་ལྟར་འདིར་ཕེབས་མཁན་གྱི་ཉི་ཧོང་གི་སྨན་པ་དག་ལ་སྐད་སྒྱུར་དང་ཕན་ཚུན་འབྲེལ་མཐུད་སོགས་ཀྱི་དང་བླངས་ཞབས་ཞུ་སྒྲུབ་བཞིན་ཡོད་འདུག ཁོང་ལ་བཙན་བྱོལ་བོད་མིའི་སྤྱི་ཚོགས་སུ་ཞབས་ཞུའི་ལས་གཞི་མགོ་ཚུགས་སྟངས་དང་སྨན་པ་དག་གིས་ཐོག་མའི་དམིགས་ཡུལ་གང་འདྲ་ཞིག་བཅངས་ཡོད་མེད་སྐོར་ཁོང་ལ་བཀའ་འདྲི་ཞུས་པར། ཁོང་གིས་ “ དེ་སྔོན་ཉི་ཧོང་གི་ཆེད་ལས་མིག་ནད་སྨན་པའི་ལྷན་ཚོགས་(AOCA)ཀྱི་ཞབས་ཞུ་དེ་བལ་ཡུལ་ནང་བཙུགས་པ་རེད། རྗེས་སུ་བོད་དོན་ཐད་རྒྱབ་སྐྱོར་གནང་མཁན་ཧ་མའོ་རོ་ཚོགས་པས་མཚམས་སྦྱོར་དང་རེ་སྐུལ་བྱས་པ་ལ་བརྟེན་ནས། དྷ་རམ་ས་ལར་ལས་གཞི་འདི་ཐོག་མར་མགོ་བཙུགས་པ་རེད། སྨན་པ་ཁོང་ཚོའི་ཐོག་མར་བོད་ནས་འབྱོར་མཁན་གསར་འབྱོར་རྒན་རྒོན་ཚོ་རྒྱ་གར་གྱི་སྨན་ཁང་ལ་འགྲོ་རྒྱུར་སྐད་བརྡ་མ་འཕྲོད་པ་དང་འགྲོ་སོང་གང་ཐད་ནས་དཀའ་ངལ་ཆེན་པོ་ཡོད་སྟབས། ཁོང་ཚོར་ཞབས་ཞུ་སྒྲུབ་རྒྱུ་དམིགས་ཡུལ་དུ་བཟུང་སྟེ་ལས་གཞི་འདི་མགོ་བཙུགས་པ་ཞིག་རེད། དེ་ནས་ལོ་གསུམ་བཞི་ཕྱིན་པའི་རྗེས་སུ་བོད་པ་ཉུང་རུ་ཕྱིན་པ་དང་རྒྱ་གར་མང་དུ་ཕྱིན་སོང་། རྗེས་སུ་ཨེམ་ཆི་ཚེ་བརྟན་དང་འགན་འཛིན་ཟླ་བ། ཉི་ཧོང་གི་སྨན་པ་རྣམས་ཀྱིས་གྲོས་སྡུར་བྱས་ཏེ། རྒྱ་གར་ཡུལ་མི་ཚོར་ཕན་ཐོགས་པ་ཡིན་ན། དེ་བརྒྱུད་ནས་བོད་པའི་སྤྱི་ཚོགས་ལ་ཕན་ཐོགས་ཡོད་པ་བཅས་ལ་དམིགས་ནས། ལས་གཞི་འདི་མུ་མཐུད་ནས་ད་ལྟའི་བར་ཡོང་བསྡད་ཡོད་པ་རེད།” ཅེས་བརྗོད་བྱུང་།
ཐོག་མར་མགོ་བཙུགས་པ་ནས་ད་ལྟའི་བར་རྒྱུན་མ་ཆད་པར་ཡོང་མཁན་ཨེམ་ཆི་ཁཱ་ཞེ་ཝ་སའེ་(Kashiwase) ལགས་སུ། འདས་པའི་ལོ་མང་རིང་ཞབས་ཞུ་གནང་བའི་བརྒྱུད་རིམ་ཁྲོད་སེམས་ཚོར་ག་རེ་བྱུང་ཡོད་མེད་དང་། ད་ལྟ་གཤགས་བཅོས་མཐུན་རྐྱེན་ཐད་དཀའ་ངལ་ག་རེ་ཡོད་མེད་བཀའ་འདྲི་གནང་བར། ཁོང་གིས་ “ ནད་པ་ཚོར་ཕན་ཐོགས་ལྡན་པའི་ཞབས་ཞུ་སྒྲུབ་ཐུབ་པ་བྱུང་སྐབས་སེམས་ཧ་ཅང་སྐྱིད་པོ་འདུག ང་ཚོ་ལོ་བཅུ་ལྷག་གི་རིང་མུ་མཐུད་ཡོང་སྟེ་སྨན་བཅོས་བྱས་པར་བརྟེན། ད་ལྟ་ཅུང་ཙམ་གོམས་ཏེ་དཀའ་ངལ་ཆེན་པོ་འཕྲད་ཀྱི་མི་འདུག ཡིན་ནའང་། ད་ལྟ་གློག་ཆད་སོང་བ་འདིའང་དཀའ་ངལ་གཅིག་རེད། ང་ཚོའི་སྨན་བཅོས་ཞབས་ཞུ་འདི་མུ་མཐུད་དགོས་མཁོ་ཡོད་ཚེ། མ་འོངས་པར་གང་ཐུབ་ཐུབ་དང་སྟབས་འགྲིག་འགྲིག་བྱས་ཏེ་ཡོང་རྒྱུའི་སེམས་ཤུགས་ཡོད། རྗེས་མ་ང་རང་རྒས་འཁོགས་ཆགས་ཏེ་ཡོང་མ་ཐུབ་པར་ལྷག་པ་ཡིན་ན་དགོངས་དག་ཞུ་རྒྱུ་ཡིན།”ཅེས་བརྗོད་སོང་།
ད་ལྟའི་ཆར་བོད་གཞུང་བདེ་ལེགས་སྨན་ཁང་གིས་རྒྱ་གར་གྱི་ཚོགས་པ་ཞིག་དང་མཉམ་འབྲེལ་ཐོག ས་གནས་རྒྱ་གར་ཡུལ་མི་ཚོར་ཁྱབ་བསྒྲགས་དང་འབྲེལ་གཏུགས་བྱས་ཏེ། རིན་མེད་ཐོག་མིག་གཤགས་བཅོས་ཀྱི་མཐུན་རྐྱེན་འདི་བོད་དང་སྤྱི་མཚུངས་སུ་སྤྲོད་བཞིན་ཡོད་པ་དང་། ཧི་མ་ལ་ཡའི་རི་རྒྱུད་ཁུལ་གྱི་བོད་པ་རྣམས་ལ་ལམ་གྲོན་ཀྱང་གཏོང་བཞིན་ཡོད་འདུག རྒྱུས་ལོན་བྱུང་བ་ལྟར་ན་མི་སྒེར་རང་ངོས་ནས་རྒྱ་གར་སྨན་ཁང་དུ་ཕྱིན་ཏེ་མིག་ལྕིབས་ལིང་ཏོག་གཤགས་བྱེད་དགོས་བྱུང་ཚེ། དམའ་མཐར་ཡང་ཧིན་སྒོར་སྟོང་ཕྲག་ ༡༥ ནས་ ༢༠ གྱི་འགྲོ་སོང་གཏོང་དགོས་ཀྱི་ཡོད་འདུག
རིན་མེད་ཐོག་མིག་གཤེགས་བཅོས་ལས། གཤོག་བཅོས་སམ་གཤགས་བཅོས་འདི་དག་ག་མི་འདུག་གམ།