ད་ནངས་དབུས་བོད་མིའི་སྒྲིག་འཛུགས་བཀའ་ཁྲི་བློ་བཟང་སེང་གེ་མཆོག་དང་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་རྣམ་གཉིས་ཀྱིས། རྒྱ་གར་དང་ཕྱི་རྒྱལ་གསར་འགོད་པ་ ༥༠ ཙམ་ལ་དུས་དབང་སྐོར་གསལ་བསྒྲགས་དང་གསར་འགོད་པའི་དྲི་བར་ལན་འདེབས་གནང་སོང་།
དེ་རིང་ཕྱི་ཚེིས་ ༥ ཉིན་གྱི་སྔ་དྲོའི་ཆུ་ཚོད་ ༡༠ དང་ཕྱེད་ཀའི་སྟེང་དབུས་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་དང་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་རྣམ་གཉིས་ཀྱིས། རྡོར་གདན་བུད་མེད་ལྷན་ཚོགས་ཀྱི་ཚོགས་ཁང་ཞིག་ཏུ། རྒྱ་གར་དང་ཕྱི་རྒྱལ་ཡུལ་གྲུ་ཁག་གི་གསར་འགོད་པ་ ༥༠ ཙམ་ལ་དུས་དབང་སྐོར་གྱི་གསལ་བསྒྲགས་དང་གསར་འགོད་པའི་དྲི་བར་ལན་འདེབས་བཅས་གནང་སོང་།
གསར་འགོད་ལྷན་ཚོགས་ཐོག་དབུས་བོད་མིའི་སྒྲིག་འཛུགས་ཀྱི་བཀའ་ཁྲི་བློ་བཟང་སེང་གེ་མཆོག་གིས། ཁོང་ཐེངས་འདིར་གནས་མཆོག་རྡོ་རྗེ་གདན་དུ་ཡོང་དོན་གཙོ་བོ་༧གོང་ས་མཆོག་གི་མདུན་ནས་དུས་དབང་ཞུ་རྒྱུ་དང་། ལས་འགུལ་ཁག་ལ་མཉམ་ཞུགས་བྱེད་དུ་ཡོང་བ་ཡིན་སྐོར་དང་། བོད་ནས་དུས་འཁོར་དབང་ཆེན་ལ་ཕེབས་མཁན་མི་ ༨༠༠༠ དང་། རྒྱ་ནག་སྐམ་ས་ནས་མི་ ༡༢༠༠། ཕྱིའི་རྒྱལ་ཁབ་ཁག་ཏུ་མི་ ༨༠༠༠ བཅས་ཁྱོན་མི་ ༡༥༠༠༠༠ ལྷག་ཕེབས་ཐུབ་པ་དེ། ༧གོང་ས་མཆོག་ལ་དད་པ་དམ་ཚིག་ཡོད་པའི་སྟབས་ཀྱིས་ཡིན་སྐོར་བརྗོད་དེ། “ད་ལོར་བོད་ནས་ཆོས་ཞུ་བ་ ༨༠༠༠ ཙམ་ཕེབས་པ་ལོ་སྔོན་མ་དང་བསྡུར་ན་མང་ཤོས་ཆགས་ཡོད། གལ་སྲིད་རྒྱ་གཞུང་གིས་ལག་འཁྱེར་སྤྲད་པ་ཡིན་ན་༧གོང་ས་མཆོག་གི་དུས་དབང་ལ་བོད་མི་ས་ཡ་གཅིག་ཡོང་སྲིད་ཀྱི་རེད་ལ། གཅིག་བྱས་ན་ས་ཡ་ ༦ ཆ་ཚང་ཡོང་ཡང་སྲིད་པ་རེད། དེ་བཞིན། རྒྱ་ནག་སྐམ་ས་ནས་མི་ ༡༢༠༠ ཙམ་འབྱོར་ཡོད་ལ། འདི་དག་རྒྱ་ནག་ནང་༧གོང་ས་མཆོག་ལ་དད་པ་ཆེ་རུ་འགྲོ་བཞིན་པ་གསལ་པོ་རེད་”ཅེས་བརྗོད་བྱུང་།
བཀའ་ཁྲི་མཆོག་གིས་བོད་རྒྱ་འབྲེལ་མོལ་སྐོར་ངོ་སྤྲོད་དང་ཁོང་གིས་དབུ་ཁྲིད་པའི་བཀའ་ཤག་གིས་ལམ་དབུ་མའི་སྲིད་བྱུས་རྒྱུན་འཁྱོངས་བྱ་རྒྱུ་ཡིན་སྐོར་གསུངས་དོན། “ང་ཚོས་ད་བར་འབྲེལ་མོལ་ཐེངས་དགུ་བྱས་ཀྱང་དོན་འབྲས་གང་ཡང་བྱུང་མེད། དཀའ་ངལ་ཆེ་ཤོས་དེ་རྒྱ་གཞུང་གིས་འབྲེལ་མོལ་ལ་བརྡ་ལན་སྤྲོད་ཀྱི་མེད་པ་དེ་རེད། གཞི་རྩའི་བོད་རྒྱའི་འབྲེལ་མོལ་༧གོང་ས་མཆོག་གི་མཚན་ཐོག་ནས་གནང་བསྡད་པ་ཞིག་རེད། རྒྱ་གཞུང་ལ་འབྲེལ་མོལ་གྱི་འདོད་པ་ཡོད་ན་ང་ཚོར་དུས་ཚོད་དང་ས་གནས་གང་རུང་དུ་འབྲེལ་མོལ་གནང་རྒྱུར་གྲ་སྒྲིག་ཡོད། རྒྱ་གཞུང་ལ་ཆབ་སྲིད་ཐོག་རང་སྐྱོང་སྤྲོད་རྒྱུའི་འདོད་པ་མེད་པ་མ་རེད། རྒྱ་གཞུང་གིས་ཧོང་ཀོང་དང་ཨོ་མིན་གཉིས་ལ་རང་སྐྱོང་སྤྲད་ཡོད་ལ། ཐའེ་ཝན་ལའང་རང་སྐྱོང་སྤྲོད་ལབ་ཀྱི་ཡོད། ཡིོན་ནའང་བོད་པར་རང་སྐྱོང་སྤྲོད་ཀྱི་ཡོད་པ་མ་རེད། དེ་ནི་རྒྱ་ནག་གི་རྩ་ཁྲིམས་ཀྱི་དཀའ་ངལ་དེ་འདྲ་མ་རེད། ཧོང་ཀོང་དང་ཨོ་མིན་གཉིས་ལ་རྩ་ཁྲིམས་གཞིར་བཟུང་སྟེ་རང་སྐྱོང་སྤྲད་པ་རེད། ཐའེ་ཝན་ལའང་རྩ་ཁྲིམས་ཐོག་རང་སྐྱོང་སྤྲོད་ལབ་ཀྱི་ཡོད། བོད་པར་རང་སྐྱོང་སྤྲོད་ཀྱི་ཡོད་པ་མ་རེད། བོད་པར་རང་སྐྱོང་མི་སྤྲོད་དོན་ནི་བོད་དེ་རྒྱ་ནག་དང་ལོགས་སུ་ཆགས་ཡོད་པ་སྟོན་གྱི་ཡོད་”ཅེས་བརྗོད་སོང་།
བོད་པའི་ཁོར་ཡུག་གནས་སྟངས་ཐད་ལན་འདེབས་བྱས་དོན། “ཁོར་ཡུག་གི་གནས་སྟངས་ཐོག་བཤད་ན་བོད་ནི་ཨེ་ཤ་ཡའི་ནང་ཆུ་བོ་མང་ཤོས་ཀྱི་འབྱུང་ཁུངས་ཆགས་ཡོད་ལ། རྨ་ཆུ་དང་འབྲི་ཆུ། ཆུ་བོ་གངྒ་སོགས་བོད་ཀྱི་ཆུ་ཆེན་དག་རྒྱ་དཀར་ནག་གཙོས་བོད་ཀྱི་འདབས་འབྲེལ་རྒྱལ་ཁབ་ཁག་ཏུ་བཞུར་གྱིན་ཡོད་པ་རེད། ཆུ་བོ་དེ་དག་གིས་མི་ས་ཡ་མང་པོར་ཕན་ཐོགས་ཀྱི་ཡོད། རྒྱ་གར་གྱི་ནུབ་བྷང་གྷིལ་དུ་ཆུ་ལོག་གི་གནོད་སྐྱོན་ཡང་ཡང་ཡོང་གི་ཡོད་པ་དེ་རྒྱ་གཞུང་གིས་བོད་ཀྱི་ཤིང་ནགས་གཅོད་འབྲེག་ཚོད་མེད་བྱས་པས་རེད། དེ་བཞིན། དེང་སང་ཁོར་ཡུག་བཙོག་བཟོའི་རྐྱེན་པས་རྒྱ་གར་གཙོས་འཛམ་གླིང་ས་ཆ་གང་སར་ཆུ་ལ་རིན་པ་སྤྲོད་དགོས་པ་ཆགས་ཡོད། ང་ཚོ་བོད་པས་ཆུ་རིན་མེད་དུ་སྤྲད་ཆོག་གི་ཡོད་སྟབས། འཛམ་གླིང་གང་ས་ནས་བོད་ཀྱི་ཁོར་ཡུག་ལ་ངོས་འཛིན་བྱས་ཏེ་རྒྱབ་སྐྱོར་གནང་རོགས་”ཞེས་འབོད་སྐུལ་ཞུས་སོང་།
བོད་མིའི་ཆབ་སྲིད་ཀྱི་འཕོ་འགྱུར་སྐོར་ལ་ལན་འདེབས་གནང་དོན། “མི་མང་པོ་ཞིག་གིས་༧གོང་ས་མཆོག་གིས་བོད་མིའི་ཆབ་སྲིད་འགན་དབང་མང་ཚོགས་ལ་རྩིས་སྤྲོད་གནང་བ་དེ། བོད་མིའི་ཆབ་སྲིད་ཀྱི་ལེའུ་ཞིག་མཇུག་རྫོགས་ཏེ་ལེའུ་གསར་པ་ཞིག་མགོ་བཙུགས་པར་ངོས་འཛིན་གནང་གི་ཡོད། དོན་དངོས་ཐོག་བོད་མིའི་ཆབ་སྲིད་འཛིན་སྐྱོང་༧གོང་ས་ལྔ་པའི་སྐབས་ཀྱི་འགྲོ་སྟངས་རྒྱུན་མཐུད་པ་ཞིག་རེད་མ་གཏོགས་དེར་འགྱུར་བ་བཏང་བ་མ་རེད། ༧གོང་ས་མཆོག་གིས་བཀའ་ཁྲིའི་དམ་འབུམ་མཛད་སྒོའི་སྟེང་ “ངོས་ཀྱིས་བོད་ཀྱི་ཆབ་སྲིད་ཀྱི་འགན་དབང་སྲིད་སྐྱོང་སྟག་བྲག་རིན་པོ་ཆེའི་མདུན་ནས་བླངས་པ་ཡིན། དེ་རིང་མང་ཚོགས་ཀྱིས་བདམས་པའི་ཆབ་སྲིད་མགོ་ཁྲིད་ལ་རྩིས་སྤྲད་པ་ཡིན་”ཞེས་གསུངས་ཡོད་སྟབས། དབུས་བོད་མིའི་སྒྲིག་འཛུགས་དེ་སྔོན་མའི་གཞུང་གི་རྒྱུན་མཐུད་པ་ཞིག་ཆགས་ཡོད་”ཅེས་བརྗོད་བྱུང་།
མཐར་བཀའ་ཁྲི་མཆོག་གིས་༧གོང་ས་མཆོག་གིས་གནས་མཆོག་རྡོ་རྗེ་གདན་དུ་བཀའ་ཆོས་ཡང་ཡང་གསུངས་བ་དེས། ས་གནས་ཡུལ་མི་ཚོའི་དཔལ་འབྱོར་དང་འཛུགས་བསྐྲུན་ཡར་རྒྱས་ཕྱིན་ཡོད་པ་དང་། དེ་ནི་རྒྱ་གར་གཞུང་དམངས་གཉིས་ཀྱིས་ཐོག་མཐའ་བར་དུ་རོགས་རམ་གནང་བ་ལས་བྱུང་བ་ཞིག་ཡིན་སྐོར་ཡང་གསུངས་བྱུང་།
དེ་རིང་ཕྱི་དྲིལ་ལས་ཁུངས་ནས་གནས་ཚུལ་མཁོ་སྤྲོད་གནང་བ་ལྟར་ན། ད་ཆར་རྡོ་རྗེ་གདན་དུ་ཆོས་ཞུ་བ་ ༡༨༠༠༠༠ ལྷག་འཛོམས་ཡོད་འདུག
གསར་འགོད་པ། དཔལ་ལྡན་གྱིས་རྡོ་རྗེ་གདན་ནས།
བོད་ལ་རང་སྐྱོང་མ་སྤྲད་པ་རེད་ཟེར་ན་ཏག་ཏག་ཞིག་མ་རེད།རྒྱ་ནག་གིས་བོད་རང་སྐྱོང་ཟེར་བ་དེ་རང་སྐྱོང་མ་ཡིན་པ་སྒྲུབ་དགོས་ཀྱི་འདུག
བོད་ལ་རང་སྐྱོང་མ་སྤྲད་པ་རེད་ཟེར་ན་ཏག་ཏག་ཞིག་མ་རེད།རྒྱ་ནག་གིས་བོད་རང་སྐྱོང་ཟེར་བ་དེ་རང་སྐྱོང་མ་ཡིན་པ་སྒྲུབ་དགོས་ཀྱི་འདུག
བོད་ཀྱི་སྲིད་སྐྱོང་མཆོག་གིས། བོད་པར་རང་སྐྱོང་མི་སྤྲོད་དོན་ནི་བོད་དེ་རྒྱ་ནག་དང་ལོགས་སུ་ཆགས་ཡོད་པ་སྟོན་གྱི་ཡོད། ཅེས་པའི་གསུང་བཤད་དུམ་བུ་འདིས་གུང་ཁྲན་གྱི་འགོ་གཙོ་དག་གི་སྙིང་དཀྱིལ་བརྣག་ཐོག་ལ་ཁབ་བཙགས་ནུས་པ་ལྡན་པ་ཞིག་གནང་འདུག་སྙམ་པ་བྱུང་། བྱས་ཙང་
བོད་ལ་རང་སྐྱོང་མ་སྤྲད་ན། རང་བཙན་ལོན་མ་ཐུབ་ཀྱང་། རང་བཙན་ལེན་ཐབས་ལ་བརྩན་དགོས་མ་རེད་པེ། ང་རང་ནི། ད་ལྟ་ཡང་ལམ་དབུ་མ་ལ་ཡིད་འཆེས་བྱེད་མཁན་ཅིག་ཡིན་ཀྱང་་་
འདི་འདྲའི་སྐད་ཆ་ཆོ་མེད་བཤད་མཁན་ཞིག་གང་ན་ཡོད། རང་སྐྱོང་མི་སྤྲོད་པ་དེ་ལོགས་སུ་ཡོད་པས་ཡིན་ན། དེང་བོད་ནང་མེས་རིམ་གྱིས་འཚིག་པའི་སྲིད་བྱུས་བཟུང་བ་དོན་འབྲས་སོན་པ་ཅི་ཞིག་ཡིན་ནམ། བོད་སེང་མིན་པའི་ཕྱི་སེང་ལགས། རང་སྐྱོང་མི་སྤྲོད་པ་དེ་རྒྱ་ནག་གིས་བོད་བློ་ཁོག་ལ་ཤོང་རྒྱུ་མང་དྲག་པས་རེད་ལ། མདོར་ན། བོད་དང་བོད་མིས་ཧོང་ཀོང་དང་ཐའེ་ཝན་ལྟར་རྒྱ་ནག་གི་ཐེ་བོང་གཅིག་ཀྱང་སྒུལ་མ་ཐུབ་པས་རེད། བྱས་ཙང་། ཁྱད་གསོད་དང་ཀྱག་ཀྱག་རང་རེད་མ་གཏོགས། དེར་གླེན་པ་རང་སེམས་གསོ་བའི་གཞི་ཞིག་ཁྱོན་ནས་ཡོད་པ་རེད། འོན་ཀྱང་། ཧ་ཝ་ཌིའི་རྒྱ་རིགས་གྲོགས་པོ་མཁས་པ་ཚོས་ཁྱེད་ལ་དེ་ལྟར་ཟེར་ན་གནས་ཚུལ་ཁ་ཁ་རེད། ཧཧཧཧ
བོད་ནི་རང་བཙན་གྱི་རྒྱལ་ཁབཅིག་ཡིན་ཙང རང་སྐྱོང་མི་སྤྲོད་པ་དངོས་གནས་ཡིན་ཙང. ད་ནས་ཟླ་ངོ་གསུམ་བཞིའི་དུས་བཅད་ནང་རྒྱ་དམར་གྱིསཡ་་ལན་མ་བྱས་པ་ཡིན་ན བོད་མི་ཚོས་ཐབས་ལམ་གཞན་པ་འཚོལ་རན་རེད དེ་ཨེ་རེད་མ་རེད
བོད་མའི་སྒྲིག་འཛུགས་ཀྱི་བཀའ་ཁྲི་བློ་སེང་ལགས་ཀྱིས།
་་་་་ཧོང་ཀོང་དང་ཨོ་མིན་གཉིས་ལ་རྩ་ཁྲིམས་གཞིར་བཟུང་སྟེ་རང་སྐྱོང་སྤྲད་པ་རེད། ཐའེ་ཝན་ལའང་རྩ་ཁྲིམས་ཐོག་རང་སྐྱོང་སྤྲོད་ལབ་ཀྱི་ཡོད། བོད་པར་རང་སྐྱོང་སྤྲོད་ཀྱི་ཡོད་པ་མ་རེད། བོད་པར་རང་སྐྱོང་མི་སྤྲོད་དོན་ནི་བོད་དེ་རྒྱ་ནག་དང་ལོགས་སུ་ཆགས་ཡོད་པ་སྟོན་གྱི་ཡོད་་་་་་
གསུང་གི་དོན་ལ་ཡང་ཡང་སོམས་དགོས་པ་མི་འདུག་གམ། བོད་རིགས་དང་རྒྱ་རིགས་མི་མང་ཚོས།
བཀའ་ཁྲི་མཆོག་མིའི་སེང་གེ་རང་རེད། དེང་བར་བསམ་མྱོང་དྲན་མྱོང་མེད་པའི་རིག་པའི་ཡང་རྩེ་ཕུལ་དུ་བྱུང་བ་མང་པོ་བརྗོད་འདུག གནད་ལ་ཕིགས་པ་དང་དོན་ལ་ཁེལ་བའི་ལན་འདེབས་གསེར་གྱི་སྙིང་ཁུ་ལྟ་བུ་རང་རེད་འདུག རྗེས་སུ་ཡིད་རང་ཞུ།
ཆབ་སྲིད་ཀྱི་གཏམ་བཤད་ཤི་མ་ཤི་ཚ་བོ་གནང་འདུག ཡག་མོ་འདུག དངོས་གནས་ཁྲིམས་ལུགས་ཆེད་སྦྱངས་པ་རང་རེད། མུ་མཐུད་ཤུགས་རྒྱོབས་ཤོག་དང་བོད་ལ་ཕན་ཐོགས་ངེས་རེད། གཞན་ཡང་། གསར་འགོད་པ་དཔལ་ལྡན་ལགས་ཀྱིས་ཧ་ཅང་གོ་བདེ་ཅན་དང་གནད་འགག་རྩལ་འདོན་བྱས་འདུག་པས་ཐུགས་རྗེ་ཆེ་ཞུ།
གསུང་བཤད་ཚ་བོ་གནང་འདུག དོན་དངོས་རང་གི་སྟེང་ནས་ལན་བརྒྱབབ་གནང་འདུག