གསེར་དངུལ་རྒྱན་ཆ་གང་བྱུང་བཏགས་ན་ཡག་པོ་ཡོད་པ་མ་རེད།

དེ་རིང་༧གོང་ས་མཆོག་གིས་དུས་དབང་དངོས་གཞི་དང་བསྟུན་ཏེ་བཀའ་སློབ་གནང་དོན་ལ། དེ་སྔ་ཁོང་གིས་སྟག་གཟིག་གི་པགས་རིགས་གྱོན་ན་ཡག་པོ་མེད་སྐོར་བཤད་པ་དེར་མང་ཚོགས་ཀྱིས་དང་ལེན་ཡག་པོ་བྱས་སོང་། མ་འོངས་པར་གསེར་དངུལ་གཡུ་བྱུར་གྱི་རྒྱན་ཆ་རིགས་བཏགས་ན་ཡག་པོ་མེད་ཚུལ་གསུངས་སོང་།

དེ་རིང་ཕྱི་ཚེས་ ༩ ཉིན་གྱི་སྔ་དྲོའི་ཆུ་ཚོད་ ༡༡ སྟེང་དང་ཕྱེད་ཀའི་སྟེང་༧གོང་ས་མཆོག་གིས་གནས་མཆོག་རྡོ་རྗེ་གདན་དུ། བོད་ཀྱི་ཆོས་ལུགས་ཆོས་བརྒྱུད་ཁག་གི་བླ་ཆེན་རྣམ་པ་གཙོས་བྷེ་ཧཱར་མངའ་སྡེ་སྤྱི་ཁྱབ་བློན་ཆེན་མཆོག་དང་། ཨ་རིའི་གློག་བརྙན་འཁྲབ་སྟོན་པ་གྲགས་ཅན་རཱེ་ཆཱ་ཊི་གྷིར་དང་། འཛམ་གླིང་རྒྱལ་ཁབ་ ༦༣ ཙམ་ནས་ཕེབས་པའི་ཆོས་ཞུ་བ་ཉིས་འབུམ་ཙམ་ལ་ཉིན་དང་པོའི་དུས་འཁོར་གྱི་བཀའ་དབང་གནང་མགོ་འཛུགས་ཡོད་ཅིང་། ཐོག་མར་༧གོང་ས་མཆོག་གིས་མོན་རྟ་དབང་སྤྱི་ཚོགས་ཞབས་ཞུ་ལྟེ་གནས་ཀྱིས་པར་བསྐྲུན་ཞུས་པའི་ཨ་རུ་ཎ་ཅལ་མངའ་སྡེ་བློན་ཆེན་འདས་པོ་དམ་པ་དེའི་མི་ཚེ་ལོ་རྒྱུས་༼འབངས་ལ་བརྩེ་བའི་རྗེ་བོ་༽ཞེས་པ་དབུ་འབྱེད་གནང་སོང་། ཕྱི་དྲོར་ཆོས་ཞུ་བ་ཚོ་ཁག་བགོས་ཀྱིས་དཀྱིལ་འཁོར་ལ་མཇལ་ཁ་གཏོང་བཞིན་འདུག

སྔ་དྲོའི་གསུང་ཆོས་སྐབས་༧གོང་ས་མཆོག་གིས་ཆོས་ཞུ་བ་ཚོར་ནང་ཆོས་ཀྱི་སྙིང་པོ་བྱང་ཆུབ་སེམས་ཡིན་སྐོར་གསུངས་དོན། “བྱང་ཆུབ་སེམས་སྐྱེད་དང་སྟོང་ཉིད་ལྟ་བ་གཉིས་སྒོམ་རྒྱུ་ནི། ཉི་མ་རེ་རེ་བཞིན་བསམ་བློ་གཏོང་དགོས་པ་ཞིག་དང་མ་ཤི་བར་བསམ་བློ་གཏོང་དགོས་པ་ཞིག་ཡིན། དེ་ལྟར་བྱས་ན་ག་ལེར་གོམས་པའི་དབང་གིས་ཤུགས་ཆེ་རུ་འགྲོ་ཡི་རེད། ཤུགས་ཆེ་རུ་ཕྱིན་ན་རྨི་ལམ་ཚུད་ཆད་ལ་བྱང་ཆུབ་སེམས་དང་སྟོང་ཉིད་ལྟ་བར་བསམ་བློ་གཏོང་བ་ཞིག་ཡོང་གི་ཡོད། དེ་བསླེབ་ན་ཤི་རྗེས་བར་དོིའི་མཚམས་སུ་བསླེབ་ན་ཏན་ཏན་བྱང་ཆུབ་སེམས་དང་སྟོང་ཉིད་ལྟ་བ་དྲན་ཐུབ་ཀྱི་རེད། དེའི་ཐོག་ནས་ལུས་རྟེན་བཟང་པོ་ཞིག་ཡོང་རྒྱུ་བརྒྱ་ཆ་བརྒྱ་ཐག་ཆོད་པ་ཞིག་རེད། ཚེ་རབས་ནས་ཚེ་རབས་བར་སྟོང་ཉིད་ལྟ་བ་དང་མ་བྲལ་བའི་ཐོག་སྐྱེ་བ་ལེན་ཐུབ་ཀྱི་ཡོད།  ང་ལའང་མཚོན་ནའང་ཞོགས་པ་ཡར་ལངས་རྗེས་ཐུབ་དབང་གི་བསྟོད་པ་ཞིག་སྐྱོར་ཏེ། ཐུགས་རྗེ་ཆེན་པོའི་བྱང་ཆུབ་སེམས་ལ་བསམ་བློ་གཏོང་གི་ཡོད། བྱང་ཆུབ་སེམས་ཀྱིས་གཞན་གྱི་སྡུག་བསྔལ་ཕྱིན་ཅི་ལོག་པའི་ལྟ་བ་སེལ་ཆེད་ཡང་དག་པའི་ལྟ་བར་བསམ་བློ་གཏོང་དགོས་པ་རེད། དེ་ཡོང་བའི་རྩ་བ་རྟེན་འབྱུང་གི་ལྟ་བར་བསམ་བློ་གཏོང་པ་རེད་ཅེས་གསུངས་སོང་།

༧གོང་ས་མཆོག་གིས་མུ་མཐུད་དུ་གསུངས་དོན། “ཕན་པའི་བསམ་པ་ནི་བདེ་སྐྱིད་ཀྱི་རྩ་བ་རེད། དུད་འགྲོ་ལ་ཆ་བཞག་ནའང་ཕན་སེམས་བཅངས་ན་དགའ་པོ་བྱེད་ཀྱི་རེད། ཕན་སེམས་མེད་ན་ཤེས་ཡོན་ཡོད་པ་དང་། རྒྱུ་ནོར་ལོངས་སྤྱོད་ཡོད་པ། དབང་ཤུགས་ཡོད་ཀྱང་མིས་ཞེད་སྣང་བྱ་ཡུལ་ཞིག་ལས་ཕན་ཐོགས་པ་ཞིག་ཡོང་ཐུབ་ཀྱི་མེད། སེམས་པ་བཟང་པོ་ཡོད་ན། མི་མཐོ་དམན་བར་གསུམ་གཉེན་དུ་འགྲོ་བ་ཞིག་དང་གྲོགས་པོ་ཆགས་ཐུབ་པ་ཞིག་ཡོང་གི་ཡོད། སོ་སོའི་སེམས་དེ་ལྷོད་ལྷོད་ཡོང་ཐུབ་ཀྱི་ཡོད། སེམས་སྐྱིད་ན་ལུས་བདེ་བ་ཡོང་གི་ཡོད། ཆོས་ཀྱི་ནང་བྱང་ཆུབ་སེམས་ལས་ལྷག་པའི་ཆོས་ཞིག་ཡོད་པ་མ་རེད། བྱང་ཆུབ་ཀྱི་སེམས་ལས་ལྷག་པའི་ཆོས་ཞིག་འདས་པའི་སངས་རྒྱས་ཀྱིས་གསུངས་མེད་ལ། མ་འོངས་པའི་སངས་རྒྱས་ཀྱིས་ཀྱང་དེ་ལས་ལྷག་ཅིག་གསུང་རྒྱུ་ཡོད་པ་མ་རེད་ ” ཅེས་གསུངས་བྱུང་། 

བོད་ནང་དུ་ཤོ་དང་མཱ་ཅང་རྒྱག་པ་དང་། རྒྱན་ཆར་དོ་སྣང་ཆེན་པོ་བྱས་ཏེ་རྒྱས་སྤྲོས་བྱེད་བཞིན་པར་༧གོང་ས་མཆོག་གིས་བསྐྱར་དུ་ནན་བརྗོད་གནང་དོན། “ཁ་སང་ཞུས་པ་བཞིན་ཧི་མ་ལ་ཡའི་རི་རྒྱུད་དང་བོད་ནང་དུ། དཔལ་འབྱོར་གནས་སྟངས་ཕྲན་བུ་དྲག་ཏུ་ཕྱིན་སྐབས། མཱ་ཅང་རྒྱག་པ་དང་རྒྱན་ཆེན་པོ་འཇོག་གི་ཡོད་ཚོད་རེད། དེ་ཚོ་ཁྱོན་ནས་བྱ་རྒྱུ་ཡོད་པ་མ་རེད། དངུལ་ཏོག་ཙམ་ཡོད་ན་རྒྱན་ཆ་ལ་དང་དོད་བྱས་ཏེ། གསེར་དངུལ་རྒྱན་ཆ་གང་བྱུང་བཏགས་ན་ཡག་པོ་ཡོད་པ་མ་རེད། དེ་སྔོན་ངས་གཅན་གཟན་གྱི་པགས་རིགས་གྱོན་ན་ཡག་པོ་མི་འདུག་ལབ་པ་རེད། ངས་ལབ་པ་ལྟར་མང་པོ་ཞིག་གིས་ཚུལ་བཞིན་དུ་ཡག་པོ་བྱས་སོང་། རང་རྒྱུད་ན་ཡོན་ཏན་གང་ཡང་མེད་པར་ཕྱི་ལོགས་སུ་བྱུ་རུ་རྒྱན་ཆ་འདྲ་མིན་བཏགས་ཏེ། འཆོར་པོ་ག་ཚོད་བྱས་ཀྱང་སོ་སོ་དཀའ་ལས་ཁག་རྒྱུ་མ་གཏོགས་ཆོ་ཡོད་པ་མ་རེད། ནོར་ངོ་མ་དེ་ཡོན་ཏན་ཡོད་པ་དང་། སྤྱོད་པ་ཡོད་པ། འཆད་མཁས་པ་ལ་སོགས་འཕགས་པའི་ནོར་བདུན་ཡོད་པ་རེད། ནོར་ངོ་མ་དེ་ཚོ་ཆགས་ཡོད་པ་རེད། ནོར་དེ་ཚོ་ཚེ་འདི་ལ་ཕན་གྱི་རེད་ལ། ཚེ་ཕྱི་མར་ཡང་ཕན་གྱི་ཡོད་སྟབས། ཁྱེད་ཚོས་དེའི་དོ་སྣང་བྱ་དགོས་ཀྱི་འདུག” ཅེས་གསུངས།

དེ་རིང་ཕྱིར་དྲོ་བྷེ་ཧཱར་མངའ་སྡེ་བློན་ཆེན་མཆོག་གསུང་ཆོས་ར་བར་ཕེབས་སྐབས་དང་བསྟུན་ཏེ། ༧གོང་ས་མཆོག་གིས་སྐུ་རྩེད་དང་སྦྲགས་གསུངས་དོན། “དེ་སྔོན་ང་རང་པཱ་ཊི་ཌར་འབྱོར་སྐབས་བྷེ་ཧཱར་མངའ་སྡེ་སྤྱི་ཁྱབ་བློན་ཆེན་ཎེ་ཊེ་ཁཱི་མིར་ (NITISH KURMAR) མཆོག་གིས། སྟོན་པ་ཐུགས་རྗེ་ཅན་གྱིས་བྱིན་རླབས་ལ་བརྟེན་ཏེ། བྷེ་ཧཱར་མངའ་སྡེ་ཡར་རྒྱས་གང་མགྱོགས་འགྲོ་རྒྱུར་རེ་བ་ཡོད་ཅེས་གསུངས་པ་རེད། དེ་ནས་ངས་རྩེད་མོ་དང་སྦྲགས་སྟོན་པའི་བྱིན་རླབས་ཀྱིས་བྷེ་ཧཱར་ཡར་རྒྱས་འགྲོ་དགོས་ན། སྟོན་པ་བཅོམ་ལྡན་བྱོན་ཏེ་ལོ་ ༢༥༠༠ ལྷག་ཕྱིན་ཡོད་པ་རེད། བྷེ་ཧཱར་སྔོན་མ་ནས་ཡར་རྒྱས་འགྲོ་དགོས་པ་ཞིག་རེད་ཅེས་བཤད་པ་ཡིན། སྟོན་པ་ཐུགས་རྗེ་ཅན་གྱི་བྱིན་རླབས་སྔོན་མ་ནས་ཡོད་ཀྱང་། ལས་ཀ་ཚགས་ཚུད་མེད་དུས་བྱིན་རླབས་མངོན་ཐུབ་པ་མ་བྱུང་བ་རེད། མངའ་སྡེ་བློན་ཆེན་ལྷག་བསམ་དང་སྤྱི་སེམས། འཇོན་ཐང་ཅན་ཞིག་ཡོང་སྐབས་གཞི་ནས་བྱིན་རླབས་མངོན་པ་རེད། སྟོན་པའི་བྱིན་རླབས་མངའ་སྡེ་བློན་ཆེན་གྱིས་ལག་ནས་ཡོང་དགོས་པ་རེད་ཅེས་བཤད་པ་ཡིན་ ” ཞེས་གསུངས་བྱུང་།

མཐར་༧གོང་ས་མཆོག་གིས་དུས་དབང་གི་ཕན་ཡོན་སྐོར་གསུངས་དོན། “ཁྱེད་རང་ཚོས་དུས་འཁོར་དབང་ཞུས་ཏེ་སོ་སོའི་གནས་ལ་ལོག་སྐབས། ང་རང་ལ་དུས་འཁོར་དབང་ཐོབ་སོང་སྙམ་སྟེ་མགོ་ཀྲོག་ཀྲོག་བྱ་རྒྱུ་དང་ཡིན་མདོག་བྱ་རྒྱུ་རྩ་བ་ནས་ཡོད་པ་མ་རེད། དེ་ལྟར་བྱས་ན་ང་རྒྱལ་གྱི་རྐྱེན་ལ་འགྲོ་རྒྱུའི་ཉེན་ཁ་ཡོད་པ་རེད། དབང་ཞུས་རྗེས་གཉོམ་ཆུང་བྱས་ཏེ་སྡོད་དགོས་པ་རེད། ཁ་ཁུ་སིམ་པོ་བྱས་ཏེ་སྡོད་དགོས་པ་རེད་ ” ཅེས་གསུངས་སོང་།

འདི་ནི་༧གོང་ས་མཆོག་གིས་བོད་མིའི་ཆབ་སྲིད་འགན་དབང་རྩིས་སྤྲོད་གནང་རྗེས་དུས་འཁོར་བཀའ་དབང་བསྩལ་བ་ཐོག་མ་ཆགས་ཡོད་འདུག

གསར་འགོད་པ། དཔལ་ལྡན་གྱིས་རྡོ་རྗེ་གདན་ནས།