༼རྡོར་གདན་དུས་དབང་སྐབས་ཀྱི་བོད་ཀྱི་དུས་བབ་གསར་ཤོག་འདོན་ཐེངས་བཞི་བའི་སྟེང་གི་རྩོམ་སྒྲིག་པའི་གཏམ།༽
ང་ཚོས་ཤེས་གསལ་ལྟར། ༢༠༡༡ ལོ་ནི་འཛམ་གླིང་གི་གསར་བརྗེ་ཆེན་པོ་ཞིག་གི་སྟ་གོན་གྱི་ལོ་རེད། ལོ་དེར་དཀའ་རྙོག་མང་པོ་ཞིག་གླེང་ཞིང་དེར་ལག་པ་འཆང་བ་ཙམ་མ་གཏོགས་ཡོངས་སུ་སེལ་ཐུབ་ཡོད་པ་མ་རེད། བོད་ལ་མཚོན་ན་ཡང་། ཚད་མཐོ་ཤོས་ཀྱི་ཞི་བའི་ངོ་རྒོལ་དེ་བརྩམས་ཀྱང་། ནུས་པ་མ་ཐོན་སྟབས་ལས་འགུལ་དེ་ལོ་གསར་པ་འདིའི་མགོ་ནས་བསྐྱར་དུ་བརྩམས་ཤིང་། ད་ལོ་ནི་སླར་ཡང་ལོ་སྔོན་མ་ལྟར་ཛ་དྲག་ཡིན་པའི་གོ་བརྡ་སྤྲད་པ་རེད།
ལོ་སྔོན་མའི་འཛམ་གླིང་གི་ཡུལ་ལུང་སོ་སོའི་མི་དམངས་ཀྱི་ཞི་བའི་ངོ་རྒོལ་དེ་དག་ནི་ད་ལྟའི་འཛམ་བུའི་གླིང་གི་ཆབ་སྲིད་དང་དཔལ་འབྱོར། རང་དབང་བཅས་ཀྱི་སྤྱིའི་གནས་སྟངས་ལ་འབྲེལ་ཡོད་པ་མ་གཏོགས། ཡུལ་སྡེ་རེ་ཟུང་གི་དཀའ་རྙོག་མ་རེད། ངོ་རྒོལ་དེ་དག་གིས་འཛམ་བུའི་གླིང་ཁྱོན་ཡོངས་ལ་གསར་བརྗེ་བྱ་དགོས་པའི་ཆ་རྐྱེན་བཏོན་ཡོད་ལ། ངོ་རྒོལ་གྱི་འབོད་ཚིག་དང་དགོས་འདུན་སྣ་ཚོགས་ཀྱི་སྒོ་ནས་གཞུང་དང་། ཁེ་ལས་སྡེ་ཁག་ཆེན་པོ་རྣམས་ལ་རེ་འབོད་ཞུས་པ་རེད།
ནུབ་ཕྱོགས་ཨ་རི་དང་། དབུས་ཤར་ཨེ་ཤ་ཡ། ཨབ་རི་ཁ། ཡུ་རོབ། རྒྱ་དཀར་ནག་གཉིས་བཅས་སུ་རིམ་པར་ངོ་རྒོལ་བྱུང་ཡོད། འོན་ཀྱང་། སྐབས་ཐོག་གི་རྣམ་འགྱུར་ཕྲན་བུ་རེར་འགྱུར་ལྡོག་བྱུང་བ་ཡོད་ཀྱང་། སྤྱིའི་ཆ་ནས་ལོ་སྔོན་མའི་ངོ་རྒོལ་དེ་དག་ལ་གྲུབ་འབྲས་རྒྱ་ཆེན་པོ་ཐོབ་མེད་པས། ལོ་དེ་ནི་གསར་བརྗེ་ཆེན་པོ་ཞིག་གི་སྟ་གོན་ཙམ་མ་གཏོགས། གསར་བརྗེ་ལ་རྒྱལ་ཁ་ཐོབ་པའི་ལོ་མ་རེད། དེ་བས་ ༢༠༡༢ ལོར་མུ་མཐུད་ནས་ཡུལ་ལུང་གང་སར་ངོ་རྒོལ་གྱི་མཇུག་མཐུད་རྒྱུ་ཡིན་པ་ནི་ས་རིས་ཐང་གསལ་རེད།
ལོ་སྔོན་མའི་ངོ་རྒོལ་སྤྱིའི་ཆ་ནས་བཤད་ན། ངོ་རྒོལ་གྱི་རྣམ་པ་ཚད་མཐོ་ཤོས་དེ་བོད་ནང་དུ་བྱུང་བ་རེད། ཡིན་ཡང་། ང་ཚོའི་ཁ་སྟབས་ཞན་དྲག་པའི་དབང་གིས་ངོ་རྒོལ་ལ་དཔག་པའི་དོ་སྣང་ཞིག་འཛམ་བུའི་གླིང་ལ་སྤྲོད་མ་ཐུབ་པ་རེད། མི་གཅིག་གི་རང་ལུས་མེར་བསྲེག་དེས་དབུས་ཤར་ཨེ་ཤ་ཡ་ཡོངས་རྒུལ་ཐུབ་ཡོད་ཀྱང་། ང་ཚོའི་མི་བཅུ་གྲངས་ཤིག་གི་ངོ་རྒོལ་དེས་རྒྱ་ནག་གཞུང་དང་རྒྱལ་སྤྱིའི་སྲིད་གཞུང་དག་ཕར་ཞོག ཐ་ན་རང་དབང་གི་གསར་འགྱུར་བརྒྱུད་ལམ་ཁག་གི་དོ་སྣང་ཡང་འདྲེན་ཐུབ་ཡོད་པ་མ་རེད། དེ་མེད་པའི་གནས་ཚུལ་ནི་ཉེ་སྔོན་ཨ་རིའི་ ཊེམ་ བདུན་རེའི་དུས་དེབ་ཀྱིས་བསྒྲགས་པ་ལྟར་རེད།
ང་ཚོའི་སྲིད་དོན་པ་དག་གིས། རང་ལུས་མེར་སྲེག་གི་གྲངས་ཀ་མི་གཙོ་ངོ་བོ་གཙོ་ཞེས་གསུང་གིན་ཡོད། གསུང་བཤད་འདིའི་རིགས་ཀྱིས་མཚམས་རེར་ལྡོག་ཕྱོགས་ཀྱི་ཤུགས་རྐྱེན་རེ་ཡང་སྤྲོད་སྲིད། མི་གཅིག་སྲེག་པ་དང་མི་བཅུ་སྲེག་པའི་ནུས་པ་ལ་ཁྱད་པར་མེད་པའི་གོ་བ་ཞིག་ཀྱང་ངང་ངམ་ཤུགས་ཀྱིས་སྟེར་ལ། རྣམ་འགྱུར་འདི་ལྟ་བུ་ཞིག་གི་ཐོག་ནས་རྒྱལ་སྤྱིའི་སྟེང་ཕར་འགྲེལ་བཤད་བརྒྱབ་ཚེ་ཕྱིར་བསྟན་པའི་རྣམ་འགྱུར་ཡང་། མི་གཅིག་སྲེག་པའི་ཉེན་ཚབས་ཙམ་ལ་མ་གཏོགས་མི་ལྟ་ཡང་སྲིད་པ་རེད། གང་ལྟར། མེར་སྲེག་འདི་དག་གི་རྒྱབ་ཀྱི་དཀའ་རྙོག་ནི་འཛམ་བུའི་གླིང་གིས་ཤེས་ཡོད་རུང་། མི་མང་པོ་ཞིག་མེར་སྲེག་བཏང་བ་དེས་གནས་སྟངས་དེའི་ཛ་དྲག་གི་རང་བཞིན་གསལ་སྟོན་བྱེད་ཀྱི་ཡོད་སྟབས། ང་ཚོས་ཀྱང་གྲངས་ཀ་རེ་རེ་བཞིན་བགྲངས་ཏེ་འཛམ་བུའི་གླིང་ལ་ཞུ་གཏུགས་དང་རྒྱ་ནག་གཞུང་ལ་གྱོད་གཏུགས་བྱེད་དགོས་པར་འདོད།
ད་ནི་ལོ་གསར་པ་འདི་ཚེས་ཤིང་། བོད་ནང་གི་རང་ལུས་མེར་སྲེག་གི་མེ་ལྕེ་དེ་སླར་ཡང་འབར་མགོ་བརྩམས་ཡོད་སྟབས། ང་ཚོས་ཀྱང་རང་ཉིད་ལ་དེའི་ཐད་ངེས་ཤེས་དང་གྲ་སྒྲིག འཐབ་བྱུས། ཆོད་སེམས་ཡོད་པའི་སྒོ་ནས་ཞི་བའི་ལས་འགུལ་འདི་དག་གི་དགོས་འདུན་ཇེ་གསལ་དང་། དེ་ལ་དཔག་པའི་གྲུབ་འབྲས་ཤིག་ལ་བློ་ཐག་ཆོད་པའི་སྒོ་ནས་བརྩོན་དགོས་པར་འདོད།
གསར་བརྗེ་ཟེར་བ་ཞིག་བྱེད་དགོས་ན་ངེས་པར་དུའང་དང་ཐོག་མི་དམངས་སྣེ་འཁྲིད་བྱེད་ཐུབ་མཁན་གྱི་འགོ་འཁྲིད་ཡག་པོ་ཞིག་དགོས།
འགོ་འཁྲིད་དེ་ཚོར་ཐ་ན་རང་ཉིད་གསར་བརྗེའི་རླབས་ཆེན་གྱི་བྱ་བཞག་འཁྲོད་དུ་ཤི་རྨས་སོགས་བདེ་འཇགས་ཀྱི་ཉེན་ཁ་ཇི་བྱུང་ལའང་བློས་བཏང་ཐུབ་མཁན་གྱི་འགོ་འཁྲིད་ཞིག་དགོས།
འགོ་འཁྲིད་དེ་འདྲའི་སེམས་ཤུགས་དང་། དཔའ་སྟོབས། མཆོད་སེམས། ཀླད་པ་ཚད་ལྡན་སྨིན་པ་དེ་འདྲ་བྱུང་ན་ད་གཟོད་ཁོང་ཚོས་རྒྱ་ཆེའི་མི་དམངས་ཀྱི་མདུན་སར་མཐོན་ནས་གསར་བརྗེའི་བྱ་བཞག་བཟང་པོ་གསར་གཏོད་བྱེད་དགོས་པའི་མི་དམངས་ཡར་ལངས་ཀྱི་བསམ་པའི་ཀུན་སློང་གི་རྨང་གཞིའི་རྩ་བ་སྲ་བརྟན་ཞིག་གཏིང་ཐུབ་པ་དགོས།
ཡིན་ནའང་ངས་བསམས་ན་ད་ལྟའི་འཆར་ང་ཚོའི་གཞི་ལུས་མི་དམངས་ཀྱི་ནང་སྙིང་སྟོབས་མི་དམན་པ་ཙམ་ཞིག་ཡོད་པ་དེ་མངོན་གསལ་དོད་པོ་ཡིན། དེ་དག་ཀྱང་མང་ཆེ་བ་༸ གོང་ས་མཆོག་ལ་ཡིད་ཆེས་དང་དད་འདུན་གྱི་དབང་ལས་བྱུང་དང་འབྱུང་བཞིན་ཡོད།
འོན་ཀྱང་ད་ལྟའི་འཆར་མགོན་པོ་མཆོག་གིས་སྲིད་དབང་དེ་མི་དམངས་ལ་རྩིས་སྤྲོད་ཟིན་སྟབས། ད་ལྟ་མི་དམངས་ཀྱིས་བདམས་པའི་འཁྲིད་ལ་རག་ལུས་ཡོད།
ང་ཚོའི་འགོ་འཁྲིད་ཚོར་མཚོན་ན་རླབས་ཆེན་གྱི་གསར་བརྗེའི་བྱ་གཞག་གསར་པའི་རིགས་གསར་གཏོད་བྱེད་རྒྱུ་ཕར་བཞག་ཐ་ན་རང་རང་སོ་སོའི་བདེ་འཇགས་ལ་ཉེན་ཁ་ཡོད་པའི་ཆབ་སྲིད་ཀྱི་སྐད་ཆའི་རིགས་ཀྱང་མི་དམངས་འཁྲོད་གཏམ་བྱེད་ནུས་པའི་སྙིང་སྟོབས་དང་མཆོད་སེམས་བརྟན་པོ་མེད།
དཔེར་ན་དོལ་རྒྱལ་ལྟ་བའི་རྙོག་གླེང་འདི་རིགས་རང་གར་ཡན་པར་བཞག་ན་རྩ་བ་ནས་འགྲིག་ཐབས་མེད་པའི་ཆབ་སྲིད་ཀྱི་གནད་དོན་ལག་ཆེ་ཞིག་ཆགས་ཡོད་ཀྱང་ད་ལྟའི་འཆར་གོང་ས་མཆོག་དང་ཁྲི་ཟུར་ཟམ་དོང་ལས་གཞན་ཆབ་སྲིད་པ་གཞན་ཚོས་དེའི་ཐད་ལ་མི་དམངས་འཁྲོད་སྐད་ཆ་ཤོད་ནུས་པའི་སྙིང་སྟོབས་ཙམ་ཡང་མེད་པ་གསལ་པོར་རེད།
མི་ལ་སྙིང་སྟོབས་མེད་པའི་འགོ་འཁྲིད་འདི་འདྲིའི་རིགས་ཀྱི་ནམ་ཡང་གསར་བརྗེ་ཟེར་བ་དེ་འདྲ་དང་། རང་བཙན་ཟེར་བ་དེ་འདྲ། ཚད་མཐོའི་རང་སྐྱོང་སོགས་ཀྱི་དགོས་འདུན་བཏོན་ཏེ་ཐ་གཅིག་ཏུ་མི་དམངས་དང་ལོ་རྒྱུས་ཀྱི་ཁ་ལོ་བསྒྱུར་བའི་སྣེ་འཁྲིད་ཀྱི་རང་བཞིན་ཞིག་ཡོང་ཐབས་རྩ་བ་ནས་མེད།
རྒྱ་ནག་གི་གསར་བརྗེའི་འཁྲོད་ནམ་ཡང་ལོ་རྒྱུས་འཁྲོད་དུ་བྱུང་མ་མྱོང་བའི་གསར་བརྗེའི་བྱ་གཞག་ལ་མཛད་རྗེས་རླབས་ཆེན་བཞག་མཁན་གྱི་དབུ་འཁྲིད་མའོ་ཙེ་ཏུང་གིས་བཤད་པ་ལྟར། ་་་མི་ལ་སྙིང་སྟོབས་ཏོག་ཙམ་ཡོད་དགོས་པ་རེད་་་་་ཅེས་སོགས་གསར་བརྗེའི་བྱ་གཞག་བཟང་པོའི་འཁྲོད་མི་དམངས་སྣེ་འཁྲིད་ཡག་པོ་བྱས་ཏེ་ཡར་ལངས་ཀྱི་བསམ་པའི་ཀུན་སློང་བྱེད་དགོས་ན་ངེས་པར་དུའང་འགོ་འཁྲིད་དེ་ཚོར་སྙིང་སྟོབས་ཏོག་དགོས་པ་རེད།
ད་རེས་རྡོ་གདན་དུ་ཕྱི་རྒྱལ་ཡལ་ཁག་ ༣༦ ཙམ་ནས་དད་ལྡན་མི་དམངས་འབུམ་གཉིས་ཙམ་འཛོམས་པའི་ཐོག་ཏུ་ད་ལྟའི་བཙན་བྱོལ་བོད་མིའི་འགོ་འཁྲིད་ཚོས་ཆབ་སྲིད་ཀྱི་འཚོར་ཤུགས་ཆེན་པོའི་ཐོག་ནས་མི་དམངས་ཡར་ལངས་ཀྱི་བསམ་པའི་ཀུན་སློང་གི་སྐད་ཆ་ལྗིད་ཆེ་བའི་རིགས་གཅིག་ཀྱང་བཤད་ཐུབ་མེད།
ཐ་ན་བདེ་འཇགས་ལ་ཉེན་ཁ་ཡོད་པའི་དོལ་རྒྱལ་གྱི་སྐོར་ལའང་གླེང་ཙམ་བྱེད་ནུས་པའི་སྙིང་སྟོབས་མེད་མཁན་གྱི་འགོ་འཁྲིད་ཤ་སྟག་རེད། འགོ་འཁྲིད་དེ་འདྲའི་རིགས་ཀྱིས་བོད་ཀྱི་མི་དམངས་སྣེ་འཁྲིད་བྱེད་རྒྱུར་ཆབ་སྲིད་དང་། སྙིང་སྟོབས། ཐབས་ཇུས་སོགས་ཀྱི་ཆ་རྐྱེན་ནམ་ཡང་ཚང་མེད་པའི་འཚོར་སྣང་ཞིག་མངོན་སོང་།
གནས་སྐབས་འདི་འདྲ་ཞིག་གི་ངང་སེམས་ཤུགས་ཆེ་བའི་རྒྱལས་གཅེས་དཔའ་བོ་དང་དཔའ་མོ་ཚོར་གདུང་སེམས་མཉམ་བསྐྱེད་བྱེད་རྒྱུ་ཙམ་ལས་གཞན་གང་གི་མདུན་བསྐྱོད་ཞིག་མེད་ཙང་སཐདུག་ས་བཤད་ན་ཚེ་སྲོག་བློས་བཏང་བྱེད་མཁན་གྱི་མི་ཉུང་ཤས་ཤིག་གི་སྡུག་གྱོང་རང་དུ་འགྲོ་ལས་གཞན་ཇི་ཡོད།
བོད་ཀྱི་ཆབ་སྲིད་ཀྱི་རྐུབ་སྟེགས་དེ་དག་དྲག་ཆར་རླུང་འཚུབ་ཀྱི་ངང་ནས་གང་ནས་བབ་དང་གང་ནས་བརྒྱབ། གང་ནས་འཁྱེར་མིན་ཚོད་མི་འཐིབ་པའི་སྐབས་བབ་སུ་བཙན་བྱོལ་གྱི་འགོ་འཁྲིད་ཚོས་རྐུབ་སྟེགས་སྟེང་ལྷོད་ལྷོད་བྱས་ནས་བསྡད། སྐུ་མགྲོན་དུ་ཕྱིན། ཞལ་ལག་འདྲ་བཞེས། ཞལ་བགད་འདྲ་བྱས། སྐུ་རྩེད་འདྲ་རྩེད། གླུ་གཞས་འདྲ་སྙན་བྱས་ནས་བསྡད་ན་བོད་ལ་གསར་བརྗེ་ཟེར་བ་ག་དུས་ཡོང་གི་རེད་དམ། སུས་བོད་ལ་རང་བཙན་ཟེར་བ་ཞིག་སྤྲོད་ཀྱི་རེད་དམ།
སུས་བོད་བོད་ལ་རང་སྐྱོང་ཟེར་བ་ཞིག་སྤྲོད་ཀྱི་རེད་དམ། སུས་བོད་ལ་ཤ་ཚ་ཟེར་བ་ཞིག་བྱེད་ཀྱི་རེད་དམ། སུས་བོད་ལ་རང་དབང་ཟེར་བ་ཞིག་སྤྲོད་ཀྱི་རེད་དམ། སུས་བོད་ལ་སྙིང་རྗེ་ཟེར་བ་ཞིག་བྱེད་ཀྱི་རེད་དམ། ངས་བལྟས་ན་སུས་ཀྱང་བྱེད་ཀྱི་མ་རེད་ཅེས་ཚིག་ཐག་ཆོད་པོས་བཤད་ཐུབ།
འདས་པའི་ལོ་ ༥༠ ནང་སུས་བོད་ལ་རང་བཙན་སྤྲད་མྱོང་ངམ། རང་སྐྱོང་སྤྲད་མྱོང་ངམ། རང་དབང་སྤྲད་མྱོང་ངམ། གསར་བརྗེའི་བྱ་གཞག་མཛད་མྱོང་ངམ།
གཞི་ལུས་བོད་མིའི་སྙིང་སྟོབས་ལ་ཧ་ལས་པའི་བསྔགས་བརྗོད་བྱེད་འོས་པ་ཞིག་ཡིན་ཀྱང་ད་ལྟའི་ང་ཚོའི་འགོ་འཁྲིད་ཚོའི་ཆབ་སྲིད་དང་། ཐབས་ཇུས། སྙིང་སྟོབས། སྣེ་འཁྲིད། ཀུན་སློང་། གསར་བརྗེ་སོགས་བྱེད་ཐུབ་པའི་ཆ་རྐྱེན་ཕྱོགས་གང་ས་ནས་འདང་ངེས་ཞིག་མེད་པའི་གནས་སྟངས་ལ་རག་ལུས་ཀྱིན་འདུག
སྐྱེས་བུ་གཅིག་གི་སྐུ་སྲོག་བློས་གཏོང་ལ་རིན་ཐང་ཅི་ཙམ་ཆེ་ན་སྐྱེས་བུ་དུ་མའི་སྐུ་སྲོག་བློས་གཏོང་གི་རིན་ཐང་དེ་ཙམ་གྱིས་ཆེ་བ་ཡིན་ངེས།
མ་གཞི་ནས་འདི་དག་ནི་བོད་ཀྱི་སྡུག་བསྔལ་བདེན་པའི་དཔང་རྟགས་ཤིག་ཡིན་ལ། བོད་ཀྱི་འཚེ་མེད་ཞི་བའི་དཔང་རྟགས་ཀྱང་ཡིན་པར་མ་ཟད། བོད་ཀྱི་རླབས་ཆེན་གཟི་བརྗིད་ཀྱི་སྙིང་སྟོབས་དང་རྒྱལ་ཁའི་འོད་སྣང་ཞིག་ཀྱང་ཅི་ལ་མིན།
གོང་དུ་རྩོམ་སྒྲིག་པས་གསུང་དོན་བཞིན། དགོས་འདུན་ཇེ་གསལ་དང་། ཞེས་པ་འདི་རེད། དགོས་འདུན་གྱི་གྲངས་ཀ་ཧ་ཅང་གཙོ། མ་ཟད་གྲངས་ཧ་ཅང་མང་ངེས།
དེས་ན་ཕར་ངོ་སྤྲོད་དང་འགྲེལ་བཤད་གནང་དུས་ང་ཚོ་བོད་མིའི་མགྲིན་ཚབ་དངོས་གནས་ཤིག་ཡིན་པའི་ཆ་ནས་ཆད་ལྷག་མེད་པ་དང་། གཙོ་ཕལ་གྱི་གོ་རིམ་ཡང་ནོར་མི་ཉན།