དཔལ་ས་སྐྱ་གོང་མ་རིན་པོ་ཆེ་མཆོག་གིས་བོད་ནས་ཕེབས་པའི་ཆོས་ཞུ་བ་རྣམས་ལ་རྩྭ་ས་རྩོད་གླེང་སོགས་གནས་ཚུལ་ཕྲན་ཚེགས་ཐོག་བོད་པ་ནང་ཁུལ་མི་གསོད་ཁྲག་སྦྱོར་བྱེད་ཀྱི་ཡོད་པ་དེ་མཚམས་འཇོག་གནང་རོགས་ཞེས་འབོད་སྐུལ་གནང་སོང་།
ཟླ་འདིའི་ཕྱི་ཚེས་ ༧ ཉིན་གྱི་ཞོགས་པར་དཔལ་ས་སྐྱ་གོང་མ་རིན་པོ་ཆེ་མཆོག་གིས་གནས་མཆོག་རྡོ་རྗེ་གདན་གྱི་སྣེ་ལེན་ཁང་གི་ཚོགས་ཁང་དུ་བོད་ནས་ཕེབས་པའི་ཆོས་ཞུ་བ་རྣམས་ལ་དམིགས་བསལ་གསུང་བཤད་ཅིག་གནང་སོང་ལ། སྐབས་དེར་ཁོང་གིས་རང་རྒྱུད་ཀྱི་ཉོན་མོངས་དུག་གསུམ་དང་མི་དགེ་བཅུ་སོགས་སྤོང་ཐབས་ལ་འབད་པ་བྱ་དགོས་པ་དང་། བོད་ནང་གི་བོད་མི་ཚོས་རྩྭ་ས་རྩོད་གླེང་སོགས་དོན་རྐྱེན་ཆུང་ཚེགས་རིགས་ཀྱི་ཐོག་མི་གསོད་ཁྲག་སྦྱོར་བྱེད་ཀྱིན་ཡོད་པ་དེ་དག་མཚམས་འཇོག་བྱ་དགོས་པ། འཛམ་གླིང་ཡུལ་གྲུ་གང་སར་ཡར་རྒྱས་ཕྱིན་སྟེ་ཕྱིའི་དངོས་པོའི་མཐུན་རྐྱེན་འཛོམས་པོ་ཡོད་ཀྱང་སེམས་ཀྱི་དཀའ་ངལ་འཕྲད་དེ། སྔོན་མ་སངས་རྒྱས་ཀྱི་མཚན་ཐོས་མྱོང་མེད་པའི་ལུང་པ་ཁག་གིས་ཀྱང་ནང་པའི་ཆོས་ལ་དད་པ་དང་དོན་གཉེར་བྱེད་མཁན་ཉིན་རེ་བཞིན་ཇེ་མང་དུ་འགྲོ་བཞིན་ཡོད་པ། བོད་པར་མཚོན་ན། སྐྱེ་བ་སྔོན་མའི་ལས་སྨོན་དང་ཆོས་རྒྱལ་ཚོ་དང་རྒྱ་གར་མཁས་གྲུབ་དམ་པའི་བྱིན་རླབས། བོད་ཀྱི་ལོ་ཙཱ་བ་ཚོས་དཀའ་སྤྱད་སོགས་བརྟེན་ཏེ། མདོ་སྔགས་གཉིས་དང་བཅས་པའི་ཁྱད་འཕགས་རིག་གནས་ཤིག་ཡོད་པ་དེ་བོད་མི་ཚང་མས་གལ་ཆེན་ངོས་འཛིན་ཐོག དལ་བརྒྱད་འབྱོར་བཅུ་ཚང་བའི་མི་ལུས་ཐོབ་རྒྱུ་ཁག་པོ་ཡིན་པ་ལྟར། མི་ཚེ་ནང་ལས་རྒྱུ་འབྲས་དང་ཡ་རབས་བཟང་སྤྱོད་ཐོག་མི་ཚེ་དོན་དང་ལྡན་པ་ཞིག་བསྐྱལ་དགོས་པ། ཚེ་འདིར་གཉེན་ཉེ་མཛའ་གྲོགས་དང་རྒྱུ་ནོར་ལོངས་སྤྱོད་ག་ཚོད་ཡོད་ཀྱང་། འཆི་བ་བསླེབས་སྐབས་སྐྱོབ་མི་ཐུབ་པར། དགེ་སྒྲུབ་སྡུག་སྦོང་གི་ལས་ཁོ་ནའི་སྐྱོབ་ཐུབ་ཀྱི་ཡོད་ཚུལ་སོགས་གསུངས་བྱུང་།
དཔལ་ས་སྐྱ་གོང་མ་རིན་པོ་མཆོག་གིས་བོད་ནང་རྩྭ་ས་རྩོད་གླེང་སྐོར་ལ་གསུངས་དོན། “ བོད་ནང་སྔོན་མ་ལས་གུ་ཡངས་སུ་ཕྱིན་སྐབས་བོད་རིགས་ནང་ཁུལ་ཏུ་རྩྭ་ཆུ་སོགས་རྐྱེན་ཕྲན་བུའི་ཐོག་ནང་ཁུལ་འཁྲུག་པ་ཤོར་ཏེ། ཕན་ཚུན་གསོད་རེ་བྱས་པའི་གནས་ཚུལ་གོ་རྒྱུ་འདུག དེའི་རིགས་ཧ་ཅང་ཐབས་སྐྱོ་བོ་རེད། གང་ཡིན་ཞེ་ན། སེམས་ཅན་གང་འདྲ་ཞིག་བསད་ཀྱང་དེ་སྡིག་པ་ཆེ་ཤོས་ཆགས་བསྡད་ཡོད་པ་དང་། ལྷག་པར་དུ་ཁོང་ཁྲོའི་ཀུན་ནས་བསླངས་ཏེ་མི་བསད་པ་ལས་ལྷག་པའི་སྡིག་པ་ཡོད་པ་མ་རེད། སྐལ་བ་ཟེར་བ་དེ་དུས་ཡུན་ཐུང་ཐུང་མིན་པར་དུས་ཡུན་རིང་པོ་ཞིག་ལ་མཆོད་པ་དང་སྦྱིན་པ་བཏང་བ་སོགས་དགེ་བའི་ལས་བྱས་པ་རེད། ཁོང་ཁྲོ་ཞིག་གིས་འཕྲོ་སྐལ་བ་སྟོང་དུ་བསགས་པའི་དགེ་བ་འཕྲོ་བརླགས་དུ་བཏང་བ་རེད། འཁྲུག་པ་བརྒྱབ་ཏེ་མི་བསད་པ་དེས་སྐྱེ་བ་འདིར་རང་ཉིད་གཙོས་པའི་ནང་མི་ཉེ་འབྲེལ་ཡོངས་སྡུག་ལ་སྦྱར་ཡོད་པ་མ་ཟད། སྐྱེ་བ་ཕྱི་མར་འབྲས་བུ་སྡུག་བསྔལ་ལས་མེད་སྟབས། སྤྱིར་སེམས་ཅན་དང་ནང་སྒོས་མི་གསོད་ཁྲག་སྦྱོར་གྱི་ལས་དེ་མྱུར་ཏུ་མཚམས་འཇོག་བྱ་དགོས་པ་རེད” ཅེས་གསུངས་བྱུང་།
མཐར་ཁོང་གིས་ “ ད་རེས་ཁྱེད་རང་ཚོ་ཆེད་དུ་རྒྱ་གར་ནང་གནས་བསྐོར་དུ་ཡོང་བ་རེད། དེ་ལས་སྐལ་བ་བཟང་བོ་ཞིག་ཡོང་རྒྱུ་ཡོད་པ་མ་རེད། གནས་བསྐོར་ལ་ཡོང་སྐབས་སངས་རྒྱས་བཅོམ་ལྡན་འདས་སྐུ་བལྟམས་ས་དང་མྱ་ངན་ལས་འདས་ས། ལིམ་ཝུ་ནེ། རྩ་མཚོག་གྲོང། སངས་རྒྱས་ས་རྡོ་རྗེ་གདན། དུས་ཀྱི་འཁོར་ལོ་བསྐོར་ས་ཝ་ར་ནཱ་སི། སངས་རྒྱས་རང་གི་གསུང་གི་ནང་དུ་གསུངས་ཡོད་པ་རེད། རིགས་ཀྱི་ཕོ་དང་ཕོ་མོ་རྣམས་ངེས་པར་དུ་གནས་ཆེན་དེ་དག་ལ་འགྲོ་དགོས་པ་རེད། དེ་དག་ལ་ཕྱིན་ཏེ་སངས་རྒྱས་ཀྱི་ཡོན་ཏན་དྲན་པ་ཡིན་ན། བསགས་པའི་སྡིག་པ་ཐམས་ཅད་དག་གི་ཡོད་ཅེས་གསུངས་པ་རེད། ཁྱེད་རང་ཚོ་གནས་བསྐོར་དུ་ཡོང་བ་ཡག་པོ་རེད། གཙོ་ཆེ་ཤོས། ཁ་འདོན་དང་ཕྱག་འཚལ་རྒྱུ་ལས་ཀྱང་གལ་ཆེ་བ་བྱང་ཆུབ་ཀྱི་སེམས་རིན་པོ་ཆེ་བསྐྱེད་པའི་ཐབས་ལ་འབད་བརྩོན་བྱ་དགོས། ངས་ནམ་རྒྱུན་ང་དང་འབྲེལ་ཡོད་ཚོར། ང་ཚོས་བོད་གངས་ཅན་ལྗོངས་ལ་སངས་རྒྱས་བསྟན་པའི་རྩ་བ་ཚུགས་པ་དང་་ཡར་རྒྱས་གོང་འཕེལ་གཏོང་ཐུབ་པ་ཡིན་ན། བྱིན་རླབས་གང་ཡོད་པ་གནས་ཐུབ་ཀྱི་རེད། གལ་སྲིད། རྩ་བ་འཛིན་མ་ཐུབ་པ་ཡིན་ན། རྒྱུན་གནས་ལ་དཀའ་ཁག་ཡོད་པ་རེད་ལ། གཙོ་བོ་བོད་རང་གི་བླ་མ་དང་དགེ་འདུན་པ་རྣམས་ཀྱིས་ཆོས་སྤུས་དག་པོ་ཞིག་དང་བཀའ་ལུང་དང་མཐུན་པ་ཞིག་བྱ་དགོས་པ་རེད། ཅེས་བཤད་ཀྱི་ཡོད། མ་འོངས་པར་ཡང་བླ་སྤྲུལ་དགེ་འདུན་རྣམས་པ་གཙོས། མི་མང་ལ་མཚོན་ནའང་གང་གཟབ་ཀྱིས་ཁུངས་ལུང་ཡོད་པ་སྤུས་དག་པོ་བྱ་རྒྱུ་གལ་ཆེན་པོ་རེད” ཅེས་གསུངས་བྱུང་།
གསར་འགོད་པ། དོན་གོ
དཔལ་ས་སྐྱའི་ཁྲི་འཛིན་གོང་མ་རྡོ་རྗེ་འཆང་ཆེན་པོ་མཆོག་གིས་དམིགས་བསལ་བཀའ་སློབ་རྩ་ཆེ་འདི་འདྲ་ཞིག་གནང་བར་སྙིང་དབུས་ནས་ཡི་རང་དང་བསྔགས་པའི་མེ་ཏོག་གཏོར་འོས་པ་ཞིག་ཡིན།
བླ་ཆེན་འདིས་སྔ་ཕྱིར་༸ གོང་ས་མཆོག་དང་བོད་གཞུང་དམངས་ལ་ལྷག་པའི་ཐུགས་བསྐྱེད་བཟང་པོས་སྲི་ཞུ་དང་མཛད་རྗེས་རླབས་ཆེན་བཞག་འཇོག་བཞིན་ཡོད།
ཁྱེད་སྐུ་ཚེ་ཡུན་དུ་བརྟན་པའི་སྨོནའདུན་ཞུ།
གོང་མ་བདག་ཁྲི་རིན་པོ་ཆེས། ཕ་ཡུལ་གྱི་ཆོས་མཇལ་བ་རྣམས་ལ་རྩ་ས་འབུ་གསུམ་གྱི་དོན་དུ་ནང་ཕུ་ནུ་དམར་གསོད་གཏོང་རེས་མ་བྱེད་གསུང་པ་ལ་སྙིང་ནས་དད་པའི་ཐལ་མོ་དང་། ཐུགས་རྗེ་ཆེ་ཞེས་ཡང་ཡང་ཞུ་གི་ཡོད། ད་དུང་༧གོང་ས་ཡིད་བཞིན་ནོར་བུའི་ཞལ་གསུང་གནད་དུ་སྨིན་པ་ཞིག་ཅི་ནས་ཀྱང་ཕ་ཡུལ་གྱི་གནས་མཇལ་བ་རྣམས་ལ་དེའི་བསྐོར་ཅིག་གསུང་ཐུབ་པའི་རེ་བ་དང་གསོལ་འདེབས་སྔོན་ནས་ཞུས་ཞུས་པ་ཡིན་ཡང་། ད་དུང་ཡང་འདི་བརྒྱུད་ནས་གསོལ་བ་ལན་བརྒྱར་བཏབ་ཀྱི་ཡོད་ཞེས་འབོད་བསྐུལ་ནན་མོ་ཞུ་གི་ཡོད།།།།།།།།།།།།།
མི་གཅིག་གིས་ཆོས་སྲིད་གཉིས་མི་ཡོང་ན་ད་བར་དུ་བོད་ཀྱི་རྒྱལ་པོ་དང་བླ་དཔོན་དག་གིས་རང་གཞན་ཕུང་ལ་སྦྱར་ཡོད་ངེས་ལ། དུས་འཁོར་དབང་ཆེན་ཞུ་མཁན་དད་ལྡན་འདི་དག་ཀྱང་མི་ཡ་མ་བརླ་རྐྱང་རྐྱང་དུ་གྱུར་བ་མིན་ནམ།
ཆོས་ཀྱིས་སྲིད་དང་སྲིད་ཀྱིས་ཆོས་ལ་ཡང་ཕན་པའི་དབུ་མའི་ལམ་བུ་ཞིག་གནའ་ནས་ད་བར་དུ་ཡོད་པ་སྤྱིར་བཏང་གི་མིག་གིས་མི་མཐོང།
ཆོས་སྲིད་ལུགས་གཉིས་ཀྱི་རྒྱལ་སྲས་དམ་པ་ཁོང་ལ་སྙིང་ནས་གུས་ཤིང་སྐུ་ཚེ་ཞབས་བརྟན་དང་འཕྲིན་ལས་རྣམ་པར་རྒྱས་པའི་སྨོན་ལམ་འདེབས།
༧བདག་ཁྲི་གོང་མ་མཁྱེན་་
དངོས་གནས་ཆོས་པ་རྣལ་མ་ཞིག་རེད་་ཆོས་བྱེད་མི་ཡིས་ཆོས་རྣམ་དག་སྒྲུབ་
སྲིད་དོན་མི་སྣས་སྲིད་ཡག་པོ་སྒྲུབ་ན་འགྲིག་གུ་
མི་གཅིག་གིས་གཉིས་བྱས་ན་གང་ཡང་མི་འགྲུབ
གོང་ས་མཆོག་ནས་ཆོས་ལུགས་ཚོགས་འདུ་སྐབས་གསུང་པ་བཞིན་རེད་མངོན་པར་བསྟོད་དོ་་་
༧ དཔལ་ས་སྐྱ་གོང་མ་རིན་པོ་ཆེ་མཆོག་གིས་བོད་མི་རྣམས་ལ་བཀའ་སློབ་ཧ་ཅང་ཟབ་རྒྱས་ཞིག་གནང་བ་ལ་ཐུགས་རྗེ་ཆེ་ཞུ། ཁོང་གིས་གསུངས་པ་ནང་བཞིན་སློབ་ཚོགས་་ཚོའི་ཉམས་སུ་ལེན་ཅི་ནུས་བྱེད་ངེས་རེད། ད་དུང་སྙིང་མ་སོགས་ཆོས་རྒྱུད་ཁག་གི་བླ་སྤྲུལ་མཁན་གསུམ་ཚོས་བཀའ་སློབ་དང་ཆོས་འབྲེལ་གནས་ན་ཆེས་ཡག་པོ་རེད།
བཀའ་དྲིན་ཆེ་ཞུ།