གཟའ་སྤེན་པའི་ཉིན་གྱི་ཐེ་ཝན་སྲིད་འཛིན་འོས་བསྡུའི་རྒྱལ་ཁ་གོ་མན་ཏང་ཚོགས་པའི་འོས་མི་མཱ་ཡན་ཅཱིག་ལ་ཐོབ་ཡོད་པ་དང་། དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་ཚེ་ཡཱན་ཝུན་གྱིས་ཚོགས་གཙོའི་ལས་ཁུར་དགོངས་ཞུ་བྱས་འདུག
ཁ་སང་ཕྱི་ཚེས་ ༡༤ ཉིན་གྱི་ཐེ་ཝན་སྲིད་འཛིན་འོས་བསྡུའི་འགྲན་རྩོད་ཁྲོད། གོ་མིན་ཏང་ཚོགས་པའི་སྲིད་འཛིན་འོས་མི་མཱ་ཡན་ཅཱིག་ལ་འོས་ཤོག་གྲངས་ ༦༨༩༡༡༣༩ ཐོབ་སྟེ་སྤྱིའི་གྲངས་འབོར་གྱི་བརྒྱ་ཆ་ ༥༡་༦ དང་། དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་ཚེ་ཡཱན་ཝུན་ལ་འོས་ཤོག་གྲངས་ ༦༠༩༣༥༧༨ ཐོབ་སྟེ་སྤྱིའི་གྲངས་འབོར་གྱི་བརྒྱ་ཆ་ ༤༥་༦༣ དང་། མི་དམངས་ཚོགས་པའི་སྲིད་འཛིན་འོས་མི་སུང་ཁྲུའུ་ཡུས་ལ་འོས་ཤོག་གྲངས་ ༣༦༩༥༨༨ ཐོབ་སྟེ་སྤྱིའི་གྲངས་འབོར་གྱི་བརྒྱ་ཆ་ ༢་༧༧ བཅས་ཐོབ་སྟེ། སྲིད་འཛིན་འོས་བསྡུའི་རྒྱལ་ཁ་གོ་མིན་ཏང་ཚོགས་པའི་སྲིད་འཛིན་འོས་མི་མཱ་ཡཱན་ཅཱིག་ལ་ཐོབ་ཡོད་པ་རེད། འོས་ཤོག་གྲངས་བཤེར་ཡོངས་སུ་མཇུག་སྒྲིལ་རྗེས། མཱ་ཡན་ཅཱིག་གིས་སྲིད་འཛིན་འོས་བསྡུའི་རྒྱལ་ཁའི་གསར་འགོད་ལྷན་ཚོགས་བསྐངས་ཏེ་གསར་འགོད་པའི་དྲི་བར་ལན་འདེབས་དང་། རྒྱབ་སྐྱོར་གནང་མཁན་མི་མང་ལ་ཐུག་འཕྲད་ཀྱིས་རྒྱལ་ཁའི་གཏམ་བཤད་བྱས་ཡོད་པ་དང་། དེ་བཞིན། ཚེ་ཡཱན་ཝུན་དང་སུའུ་ཁྲུའུ་ཡུས་གཉིས་ཀྱིས་ཀྱང་སོ་སོར་རྒྱབ་སྐྱོར་བྱེད་མཁན་མི་མང་ལ་ཐུག་འཕྲད་ཀྱིས་སེམས་གསོའི་གཏམ་བཤད་དང་། སྲིད་འཛིན་འོས་བསྡུའི་འགྲན་རྩོད་ཁྲོད་ཕམ་ཉེས་བྱུང་བའི་གསར་འགོད་ལྷན་ཚོགས་བསྐངས་ཏེ་གསར་འགོད་པའི་དྲི་བར་ལན་འདེབས་བྱས་ཡོད་པ་མ་ཟད། དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་ཚེ་ཡཱན་ཝུན་གྱིས་ཐེངས་འདིའི་འོས་བསྡུའི་ཁྲོད་ཕམ་ཉེས་བྱུང་བའི་ཁག་འགན་ཆ་ཚང་རང་ཉིད་ཀྱིས་འགན་ལེན་གནང་སྟེ། དམངས་གཙོ་ཡར་ཐོན་ཚོགས་པའི་ཚོགས་གཙོའི་ལས་གནས་ནས་དགོངས་ཞུ་ཞུས་ཡོད་པ་རེད།
ཐེངས་འདིའི་ཐེ་ཝན་སྲིད་འཛིན་འོས་བསྡུའི་རྒྱལ་ཁ་མཱ་ཡན་ཅཱིག་ལ་ཐོབ་མ་ཐག ཨ་རིའི་སྲིད་འཛིན་ཨོ་བྷ་མས་གཏམ་བཤད་ཅིག་སྤེལ་ཏེ། མཱ་ཡན་ཅཱིག་བསྐྱར་དུ་སྲིད་འཛིན་ལ་འདེམས་ཐོན་བྱུང་བར་འཚམས་འདྲི་དང་། ཐེ་ཝན་མི་མང་གིས་ཐེངས་འདིའི་སྲིད་འཛིན་དང་ཁྲིམས་བཟོ་ལྷན་ཚོགས་ཀྱི་འོས་མི་འདེམས་བསྐོ་ལེགས་འགྲུབ་བྱུང་བར་རྟེན་འབྲེལ་ཞུས་ཡོད་པ་མ་ཟད། ཐེངས་འདིའི་འོས་བསྡུ་བརྒྱུད་ཐེ་ཝན་གྱི་དམངས་གཙོའི་ལམ་ལུགས་སྔར་ལས་སྲ་བརྟན་དང་གསོན་ཤུགས་ལྡན་པ་གསལ་འདོན་བྱས་ཡོད་ལ། ཨ་རིའི་གཞུང་གིས་མུ་མཐུད་དུ་ཐེ་ཝན་ལ་མཉམ་འབྲེལ་བྱས་ཏེ། བཟོ་ཚོང་རྒྱ་བསྐྱེད་དང་མ་དངུལ་གཏོང་འཇོག་སོགས་ཕྱོགས་གཉིས་ཀྱི་ཁེ་ཕན་ཡར་རྒྱས་སུ་གཏོང་རྒྱུ་ཡིན་པ་མ་ཟད། ཨ་རི་དང་ཐེ་ཝན་མི་དམངས་བར་གྱི་འབྲེལ་བའི་རྨང་གཞི་ནི་ཕྱོགས་གཉིས་ཀྱི་ཁེ་ཕན་དང་། རང་དབང་དམངས་གཙོའི་རིན་ཐང་ལྟ་གྲུབ་ཐད་ཀྱི་སྤྱི་མཐུན་འགན་ལེན་བཅས་ཡིན་སྐོར་བརྗོད་འདུག
ཐེ་ཝན་སྲིད་འཛིན་མཱ་ཡན་ཅཱིག་ལ་བསྐྱར་དུ་སྲིད་འཛིན་འོས་བསྡུའི་རྒྱལ་ཁ་ཐོབ་རྗེས། ཁོས་རང་ཉིད་ལ་རྒྱབ་སྐྱོར་གནང་མཁན་ཚོར་ཐུག་འཕྲད་གཏམ་བཤད་དང་སྲིད་འཛིན་འོས་བསྡུའི་རྒྱལ་ཁའི་གསར་འགོད་ལྷན་ཚོགས་བསྐངས་ཡོད་པ་དང་། སྐབས་དེར་མཱ་ཡན་ཅཱིག་གིས། “འདི་ནི་ང་རང་མི་སྒེར་གྱི་རྒྱལ་ཁ་མ་ཡིན་པར། ཐེ་ཝན་མི་དམངས་ཀྱི་རྒྱལ་ཁ་རེད། ཐེ་ཝན་མི་དམངས་ཀྱིས་ང་ལ་འབྱུང་འགྱུར་ལོ་ ༤ རིང་བསྐྱར་དུ་སྲིད་སྐྱོང་བཅོས་སྒྱུར་གྱི་བཀའ་དབང་བསྩལ་བ་ཞིག་རེད། ངས་མི་དམངས་ཀྱི་རེ་འདུན་དེ་ཆུད་ཟོས་སུ་གཏོང་མི་སྲིད། རྒྱབ་སྐྱོར་བ་ཚང་མས་མཚན་གཅིག་ལ་དགའ་མགུ་བྱས་པ་ཙམ་གྱིས་འགྲིག་འདུག དམངས་གཙོ་ཡར་ཐོན་ཚོགས་པ་དང་མི་དམངས་ཚོགས་པ་གཉིས་ཀྱིས་ཀྱང་ཐེ་ཝན་ལ་གཅིག་མཚུངས་ཀྱི་སེམས་ཁུར་དང་འགན་ལེན་བྱེད་བཞིན་ཡོད་པ་རེད། ངས་འདིར་ཚོགས་པ་གཉིས་ལའང་ཐུགས་རྗེ་ཆེ་ཞུ་རྒྱུ་ཡིན།” ཞེས་བརྗོད་དེ། འོས་བསྡུའི་འགྲན་རྩོད་ཀྱི་བརྒྱུད་རིམ་ཁྲོད་ཚེ་ཡཱན་ཝུན་དང་སུང་ཁྲུའུ་ཡུས་གཉིས་ཀྱིས་རིན་ཐང་ལྡན་པའི་སྐྱོན་བརྗོད་གནང་བ་དེ་དག་ལ་བསམ་ཞིབ་དང་། མ་འོངས་པར་སྐྱོན་སྤོང་ལེགས་སྤེལ་གྱི་ཐོག་ནས་ཐེ་ཝན་ལ་ཞི་བདེ་ཡར་ཐོན་གྱི་ཁོར་ཡུག་ཅིག་བསྐྲུན་རྒྱུ་ཡིན་ལ། རྒྱལ་སྤྱིའི་སྤྱི་ཚོགས་དང་འབྲེལ་ལམ་རྒྱ་ཆེ་རུ་བཏང་སྟེ། ཐེ་ཝན་མི་དམངས་རྣམས་རང་བཀུར་བརྩི་མཐོང་ལྡན་པའི་ཐོག་ནས་འཛམ་གླིང་གང་སར་ལྟ་སྐོར་དང་། འཛམ་གླིང་གི་གཞུང་ལམ་སོ་སོའི་ཐོག་མགོ་བོ་མཐོན་པོར་བཏེགས་ཏེ་བསྐྱོད་ཐུབ་པ་ཞིག་མངོན་འགྱུར་བྱ་རྒྱུ་ཡིན་སྐོར་བརྗོད་ཡོད་པ་རེད།
དམངས་གཙོ་ཡར་ཐོན་ཚོགས་པའི་ཚོགས་གཙོ་ཚེ་ཡཱན་ཝུན་གྱིས་ཀྱང་། ཐེངས་འདིའི་སྲིད་འཛིན་འོས་བསྡུའི་ཁྲོད་ཕམ་ཉེས་བྱུང་པའི་ཐད་ནས་རྒྱབ་སྐྱོར་བ་རྣམས་ལ་ཐུག་འཕྲད་ཀྱིས་སེམས་གསོའི་གཏམ་བཤད་དང་། གསར་འགོད་ལྷན་ཚོགས་བསྐངས་ཏེ་འོས་བསྡུའི་ཁྲོད་ཕམ་ཉེས་བྱུང་བ་གསལ་བསྒྲགས་བྱས་ཡོད་པ་རེད། ཚེ་ཡཱན་ཝུན་གྱིས་གསར་འགོད་ལྷན་ཚོགས་སྟེང་། “ ང་ཚོས་འོས་བསྡུའི་འགྲན་རྩོད་ཁྲོད་ཕམ་ཉེས་བྱུང་བ་ངོས་ལེན་དང་། ཐེ་ཝན་མི་དམངས་ཀྱི་ཐེངས་འདིའི་འོས་བསྡུའི་ཁྲོད་ཀྱི་གདམས་ཀར་གུས་བརྩི་དང་ལེན་བྱ་རྒྱུ་ཡིན་ལ། དེ་བཞིན། སྲིད་འཛིན་མཱ་ཡན་ཅཱིག་ལའང་རྟེན་འབྲེལ་ཞུ།” ཞེས་བརྗོད་དེ། སྲིད་འཛིན་མ་ཡཱན་ཅཱིག་གིས་འབྱུང་འགྱུར་ལོ་བཞིའི་ནང་མི་དམངས་ཀྱི་བསམ་འདུན་ལ་ཉན་ཞིབ་ཡག་པོ་གནང་སྟེ་བློ་སེམས་བརྟན་པོའི་ཐོག་ནས་སྲིད་སྐྱོང་གནང་རྒྱུ་དང་། མི་དམངས་ཚང་མར་དྲང་སྙོམས་ཀྱི་ལྟ་སྐྱོང་བྱས་ཏེ་ཐེ་ཝན་མི་དམངས་ཀྱི་རེ་བཅོལ་ཆུད་ཟོས་སུ་མི་གཏོང་བའི་སྐུལ་འདེད་བྱས་པ་མ་ཟད། མཚོ་འགག་གཉིས་ཀྱི་འབྲེལ་བ་ནི་ཧ་ཅང་རྙོག་འཛིང་ཆེ་སྟབས། གནད་དོན་དེའི་ཐད་ཐེ་ཝན་ལ་སྤྱི་མོས་ཀྱི་ངོས་འཛིན་ཞིག་དགོས་ངེས་ཡིན་ལ། གལ་སྲིད་སྤྱི་མོས་ཀྱི་ངོས་འཛིན་ཞིག་གཏན་འབེབས་བྱ་མ་ཐུབ་ཚེ། མཚོ་འགག་གནད་དོན་ནི་ཐེ་ཝན་ཁ་བྲལ་དང་ཕན་ཚུན་ཁ་གཏད་ཀྱི་འབྱུང་རྩར་འགྱུར་ཉེན་ཆེ་བ་གསལ་འདེབས་བྱས་ཡོད་པ་རེད།
ཚེ་ཡཱན་ཝུན་གྱིས་འོས་བསྡུའི་ཁྲོད་རྒྱབ་སྐྱོར་གནང་མཁན་མི་མང་ལ་སེམས་གསོའི་ཐུག་འཕྲད་སྐབས། ཐེངས་འདིའི་འོས་བསྡུའི་འགྲན་རྩོད་ཁྲོད་ཕམ་ཉེས་བྱུང་བའི་ཁག་འགན་ཆ་ཚང་ཁོ་མོས་འགན་ལེན་བྱས་ཏེ། དམངས་གཙོ་ཡར་ཐོན་ཚོགས་པའི་ཚོགས་གཙོའི་ལས་གནས་ནས་དགོངས་ཞུ་གནང་རྒྱུ་ཡིན་པ་གསལ་བསྒྲགས་དང་། དེ་བཞིན་ཁོ་མོས་རྒྱབ་སྐྱོར་བ་རྣམས་ལ་སེམས་གསོ་དང་སྦྲགས། “ཐེ་ཝན་ལ་དུས་ནམ་ཡང་ཁ་གཏད་ཀྱི་འབོད་སྒྲ་དང་དྲང་སྙོམས་ཀྱི་སྟོབས་ཤིག་འདི་མེད་དུ་མི་རུང་བ་ཆགས་ཡོད། ཁྱེད་ཚོ་ཚང་མར་ཡིད་སྐྱོ་སེམས་སྡུག་ཡོད་པ་ངས་ཚོར་ཐུབ་ཀྱི་འདུག སོ་སོའི་སེམས་ནང་གི་སྐྱོ་ཚོར་ཡོད་ཚད་ཕྱི་ལ་བཏོན་ཏེ། དོ་དགོང་ཁྱེད་ཚོས་མིག་ཆུ་འདོན་ཆོག་གི་རེད། འོན་ཀྱང་། བློ་སྟོབས་ཉམས་ཆོག་གི་མ་རེད། ཁྱེད་ཚོར་སྐྱོ་ཚོར་སྐྱེས་ཆོག་གི་རེད། འོན་ཀྱང་། བློས་གཏོང་བྱེད་ཆོག་གི་མ་རེད།” ཅེས་བརྗོད་ཡོད་པ་རེད།
ཐེངས་འདིའི་ཐེ་ཝན་སྲིད་འཛིན་འོས་བསྡུའི་ཐད་ཨ་རི་དང་རྒྱ་ནག་གཉིས་གཙོས་པའི་འཛམ་གླིང་རྒྱལ་ཁབ་ཁག་མང་པོས་དོ་སྣང་ཤུགས་ཆེན་པོ་བྱས་ཡོད་པ་དང་། རྒྱལ་སྤྱིའི་གསར་འགོད་པ་ ༦༠༠ ལྷག་གིས་ཐེ་ཝན་གྱི་སྲིད་འཛིན་འོས་བསྡུའི་གནས་ཚུལ་འཛམ་གླིང་ལ་དུས་ཐོག་བསྒྲགས་ཡོད་པ་མ་ཟད། རྒྱ་ནང་གི་དྲ་རྒྱ་ཁག་ཏུའང་དེའི་སྐོར་གྱི་གནས་ཚུལ་དང་བརྙན་རིས་སོགས་མང་པོ་བརྒྱུད་འགོད་ཤུགས་ཆེན་པོ་བྱུང་ཡོད་སྟབས། སྤྱི་ཚོགས་དཔྱད་བརྗོད་པ་མང་པོས་ཐེངས་འདིའི་ཐེ་ཝན་སྲིད་འཛིན་འོས་བསྡུའི་རྒྱ་ནག་མང་ཚོགས་ཁྲོད་ཤུགས་རྐྱེན་ཆེན་པོ་ཐེབས་ཡོད་པར་ངོས་འཛིན་བྱེད་བཞིན་ཡོད་འདུག
གསར་འགོད་པ། ཚེ་རིང་རྒྱལ།
གུང་ཁྲན་ཏང་གིས་མུ་མཐུད་དེ་གྲངས་ཉུང་མི་རིགས་ཀྱིས་གཙོས་མི་དམངས་ལ་དོན་དམ་གྱི་དམངས་གཙོའི་ཁེ་དབང་མི་སྤྲོད་ན་ཚེ་ཐག་ཇེ་ཐུང་ནས་ཇེ་ཐུང་ལས་མེད་ངེས་ཡིན། གུང་ཁྲན་ཏང་རྫུན་མའི་ཀྲུང་དབྱང་སྲིད་གཞུང་མགོ་རྟིང་སློག་དགོས། ཕམ་པར་གྱུར་ཅིག ཟེར།
རང་མགོ་མ་ཐོན་གཞན་མགོར་འཇུ་འདོད་མེད། །མཐའ་མ་ཅི་ཡང་མེད་པའི་སྟོང་ལ་ཉེན། །དང་པོ་རང་ཉིད་གོམ་པར་ཚུགས་པའི་རྗེས། །གཞན་གྱི་སྲིད་འཛིན་ཡག་སྡུག་གླེང་ན་རན། །
ཐའེ་ཝན་ནང་དུ་གོ་མིན་ཏང་གི་སྟོབས་ཤུགས་ཇེ་ཆེར་ཅི་ཙམ་སོང་ན་བོད་དོན་ལ་གནོད་པ་ཆེ་བ་མ་ཟད། རྒྱ་ནག་གི་སྟོབས་ཤུགས་སམ་ངར་ཤུགས་སྔ་བས་ཇེ་ཆེ་དང་། གྲངས་ཉུང་མི་རིགས་ལ་གཉའ་ནོན་དང་དྲག་གནོན་ཡང་ཇེ་ཆེར་འགྲོ་རྒྱུ་རེད། དེ་ནི་རྒྱ་ནག་གིས་ཞང་ཀང་དང་ཐའེ་ཝན། བོད་བཅས་ནི་ཅིས་ཀྱང་གཅིག་གྱུར་གཙང་སང་ངེ་བ་ཞིག་བྱ་དགོས་སྐོར་རྒྱ་ནག་གི་དཔོན་རབས་སྔ་མ་ཚོ་ནས་ད་ལྟའི་བར་གྱི་རྒྱ་དཔོན་ཚོའི་ལས་ཀ་ཆེ་ཤོས་དང་། དམིགས་ཡུལ་ངེས་ཅན་ལྡན་པའི་སྒོ་ནས་ཤུགས་རྒྱག་ས་ཞེ་གཅིག་དེ་མ་ཡིན་ནམ། ནམ་རྒྱུན་ཁ་གཡེང་དང་གུང་ཁྲན་ལ་ཁ་ལོག་ཚིག་རྒྱག་པ་ལས་དོན་དངོས་རྣལ་ལ་འཁེལ་བ་རེར་འབད་ན་ཅི་མ་རུང་།
སྨོན་ཚིག་སྒྲོག་ནས་འདུག་པར་གོམས་འདྲིས་ཐེབས་པ་བཟང་མོད། གང་སར་སྨོནཔ་རྐྱང་བྱས་ན་མི་ཚེ་ཟད་རོགས་རེད་སྙམ།
འདི་ནི་ཧ་ཅང་དོ་མཉམ་པའི་འགྲན་རྩོད་ཅིག་རེད། འདིས་ཐེ་ཝན་མི་དམངས་ཀྱི་བསམ་བློའི་གོ་རྟགས་ཚད་ངེས་ཅན་ཡིན་པ་མཚོན་ཐུབ། དམངས་གཙོ་ཚོགས་པ་ལས་ཀྱང་གོ་མིན་ཏང་ཚོགས་པར་རྒྱལ་ཁ་ཐོབ་པ་འདི་ང་ཚོར་མཚོན་ན་མཐུན་རྐྱེན་གྱི་ཕྱོགས་གཅིག་རེད། རྒྱ་ནག་གུང་ཁྲན་ཏང་གིས་ཐོག་མཐའ་བར་གསུམ་ལ་རྒྱལ་ནང་དུ་གུང་ཁྲན་ཏང་བཟང་བ་དང་གོ་མིན་ཏང་ངན་ཚུལ་བཤད་ནས་བསྡད་ཡོད། དེ་བས་འདི་ནི་གོ་མིན་ཏང་གི་གཟི་བརྗིད་དང་གུང་ཁྲན་ཏང་གི་སེམས་ཁྲལ་ཞིག་ཀྱང་རེད། འདི་ནི་གུང་ཁྲན་ཏང་གི་དམངས་གཙོ་ལས་གོ་མིན་ཏང་གི་དམངས་གཙོ་ཚད་ལྡན་ཡིན་པའི་དཔང་རྟགས་རེད། མི་དམངས་ཀྱི་ངོས་ལེན་ལས་ལྷག་པའི་བདེན་དཔང་མེད་པས་སོ། གུང་ཁྲན་ཏང་གིས་མུ་མཐུད་དེ་གྲངས་ཉུང་མི་རིགས་ཀྱིས་གཙོས་མི་དམངས་ལ་དོན་དམ་གྱི་དམངས་གཙོའི་ཁེ་དབང་མི་སྤྲོད་ན་ཚེ་ཐག་ཇེ་ཐུང་ནས་ཇེ་ཐུང་ལས་མེད་ངེས་ཡིན། གུང་ཁྲན་ཏང་རྫུན་མའི་ཀྲུང་དབྱང་སྲིད་གཞུང་མགོ་རྟིང་སློག་དགོས། ཕམ་པར་གྱུར་ཅིག
ཡག་པོ་མ་རེད་ཐེ་ཝེན་ད་དུང་རྒྱལ་སྤྱིའི་ནང་མེད་པ་མ་རེད་དམ།
ཐའེ་ཝན་སྲིད་འཛིན་གྱི་རྒྱལ་ཁ་གོ་མིན་ཚོགས་པར་ཐོབ་པ་འདིས་རྒྱ་ནག་གིས་སྟོབས་ཤུགས་ལྐོག་ལྐོག་སིབ་སིབ་ཀྱིས་ཐའེ་ཝན་ནང་དུའང་རྒྱས་བཞིན་པ་མངོན་གསལ་བཏོད་པོ་རེད། ཁ་སྔོན་སྲིད་འཛིན་ཟུར་བ་ལའེ་ཏིན་དཔེ་ཡིས་བརྗོད་པ་བདེན་པ་ཡིན་མོད། རང་གི་ཁེ་ཕན་སྟེ་སྒོར་མའི་ཆེད་དུ་སྲིད་ཀྱི་འཕོ་འགྱུར་དང་མ་འོངས་ཁ་ཕྱོགས་ལ་མིག་རྒྱང་རིང་པོའི་བསམ་བློ་གཏོང་མེད་པར་སྙམ། མཱ་སྐུ་ཞབས་སྲིད་འཛིན་དུ་བསྡད་མ་ཐག་ནས་རྒྱ་ནག་སྐམ་སའི་རྒྱུ་ཅན་དག་ལ་ཐའེ་ཝན་ནང་ནས་ས་ཆ་བཙོང་ནས་གཏན་སྡོད་ཆོག་པའི་མགོ་བཙུགས། འདིས་མ་འོངས་པར་ཐའེ་ཝན་ནང་དུའང་ཐའེཝན་པ་གྲངས་ཉུང་མི་རིགས་ཆགས་རྒྱུའམ་ཡང་ན། སྐམ་སའི་མི་གྲངས་ཐའེ་ཝན་སྟོབས་ཇེ་ཆེར་འགྱུར་རྒྱུར་རམ་འདེགས་སུའང་འགྱུར་རྒྱུ་མ་རེད་དམ། གང་ལྟར་ཕྱི་མ་གཏོགས་ཐའེ་ཝན་དེ་ཡང་སྐམ་སའི་ནང་འཐིམས་རྒྱུ་ཉག་གཅིག་རེད་སྙམ།
“ཐེ་ཝན་ལ་དུས་ནམ་ཡང་ཁ་གཏད་ཀྱི་འབོད་སྒྲ་དང་དྲང་སྙོམས་ཀྱི་སྟོབས་ཤིག་འདི་མེད་དུ་མི་རུང་བ་ཆགས་ཡོད། ཁྱེད་ཚོ་ཚང་མར་ཡིད་སྐྱོ་སེམས་སྡུག་ཡོད་པ་ངས་ཚོར་ཐུབ་ཀྱི་འདུག སོ་སོའི་སེམས་ནང་གི་སྐྱོ་ཚོར་ཡོད་ཚད་ཕྱི་ལ་བཏོན་ཏེ། དོ་དགོང་ཁྱེད་ཚོས་མིག་ཆུ་འདོན་ཆོག་གི་རེད། འོན་ཀྱང་། བློ་སྟོབས་ཉམས་ཆོག་གི་མ་རེད། ཁྱེད་ཚོར་སྐྱོ་ཚོར་སྐྱེས་ཆོག་གི་རེད། འོན་ཀྱང་། བློས་གཏོང་བྱེད་ཆོག་གི་མ་རེད།” ཅེས་བརྗོད་ཡོད་པ་རེད། ཟེར་བ་འདི་ལ་བློ་སྐྱེད་མི་འདུག་གམ།
ཡ་ཡ་འདི་ཡང་དོན་སྐྱེན་མི་ལེགས་པ་ཞིག་རེད།