དབྱིན་ཇིའི་སྲིད་བློན་དང་སི་ཀཱོ་ཊི་ལན་ཌི་ས་གནས་བློན་ཆེན་གཉིས་ཐུག་འཕྲད་ཐོག སི་ཀཱོ་ཊི་ལན་ཌི་དབྱིན་ཇིའི་འོག་ནས་རང་བཙན་བྱ་རྒྱུར་མི་མང་བསམ་ཤོག་བསྡུ་རྒྱུའི་གནད་དོན་ཐད་གྲོས་བསྡུར་བྱ་རྒྱུ་ཡིན་འདུག
ཕྱི་ཚེས་ ༡༥ ཉིན་དབྱིན་ཇིའི་སྲིད་བློན་གྱི་མགྲིན་ཚབ་པས་བརྗོད་པ་ལྟར་ན། སྲིད་བློན་ཁཱ་མེ་རོན་(David Cameron) ཁོང་སི་ཀཱོ་ཊི་ལན་ཌིའི་(Scotland)བློན་ཆེན་ཨ་ལེག་ཛི་(Alez Salmond) དང་ཐུག་འཕྲད་ཀྱིས། སི་ཀཱོ་ཊི་ལན་ཌིའི་མི་མང་དབྱིན་ཇིའི་འོག་ནས་རང་བཙན་བྱ་རྒྱུའི་གདན་དོན་སྐོར་ལ་གྲོས་བསྡུར་བྱ་རྒྱུར་མོས་མཐུན་ཡོད་པར་བརྗོད་འདུག སི་ཀཱོ་ལན་ཊི་དབྱིན་ཇིའི་དབང་སྒྱུར་འོག་ཚུད་དེ་ལོ་ ༣༠༥ འཁོར་ཡོད་པ་དང་། ད་ལྟ་དབྱིན་ཇིའི་འོག་གི་ས་གནས་རང་སྐྱོང་གཞུང་ཞིག་ཆགས་ཡོད།
ལོ་སྔོན་མའི་ནང་སི་ཀཱོ་ཊི་ལན་ཌི་ས་གནས་གཞུང་གི་གྲོས་ཚོགས་ནང་ཐེངས་དང་པོར་དབྱིན་ཇིའི་འོག་ས་གནས་རང་སྐྱོང་བྱ་རྒྱུའམ་རང་བཙན་བྱ་རྒྱུའི་ཐད་བསམ་ཤོག་བསྡུས་ཏེ།གྲོས་ཚོགས་ནང་རང་བཙན་བྱ་རྒྱུའི་བསམ་ཤོག་ལ་རྒྱལ་ཁ་ཐོབ་རྗེས།ད་ལྟ་མི་མང་ཁྲོད་བསམ་ཤོག་བསྡུ་རྒྱུར་གྲ་སྒྲིག་བྱེད་བཞིན་ཡོད་ཀྱང་།ཕྱི་ཚེས་༡༧ཉིན་དབྱིན་གཞུང་གིས་གསལ་བསྒྲགས་ཤིག་སྤེལ་ཏེ།སི་ཀཱོ་ཊི་ལན་ཌིའི་མི་མང་ནང་རང་བཙན་བྱ་རྒྱུའམ་དབྱིན་ཇིའི་འོག་གནས་རྒྱུའི་ཐད་གང་མགྱོགས་བསམ་ཤོག་བསྡུ་ཆོག་ཀྱང་།བསམ་ཤོག་བསྡུ་རྒྱུའི་སྒྲིག་གཞི་ཁག་དབྱིན་གཞུང་གི་ཐག་གཅོད་ལྟར་འགྲོ་དགོས་པར་བརྗོད་ཡོད་འདུགའོན་ཀྱང་།ཨ་ལེག་ཛི་ཡིས་བསམ་ཤོག་དེ་༢༠༡༤ལོར་བསྡུ་རྒྱུ་གཏན་འཁེལ་བྱ་ཆོག་ཀྱང་།བསམ་ཤོག་བསྡུ་བའི་སྒྲིག་གཞི་ཁག་སི་ཀཱོ་ཊི་ལན་ཌི་ས་གནས་གཞུང་རང་གིས་ཐག་གཅོད་བྱ་དགོས་པར་བརྗོད་འདུག
ཨ་ལིག་ཛི་ཡིས་ཟླ་འདིའི་ཕྱི་ཚེས་༢༥ཉིན་དུས་རབས་༡༨པའི་ནང་སི་ཀཱོ་ཊི་ལན་ཌི་ཡིས་དབྱིན་ཇི་ཕམ་པར་བརྒྱབ་པའི་དུས་ཚིགས་སྲུང་གཙི་དང་སྦྲགས།མི་མང་བསམ་ཤོག་བསྡུ་བའི་སྒྲིག་གཞི་གཏན་འབེབ་ཁྱབ་བསྒྲགས་བྱ་འཆར་ཡིན་པ་དང་།རྒྱལ་སྤྱིའི་འོས་བསྡུའི་ཐོབ་ཐང་ནི་ལོ་༡༨ཡན་ཡིན་ཀྱང་།ཨ་ལེག་ཛི་ཡིས་ལོ་༡༦ཡན་ལ་འོས་བསྡུའི་ཐོབ་ཐང་སྤྲོད་འཆར་ཡོད་པ་དེར་དབྱིན་གཞུང་གིས་ངོ་རྒོལ་བྱེད་ཀྱི་ཡོད་པ་མ་ཟད། བསམ་ཤོག་བསྡུ་སྐབས་དབྱིན་ཇི་དང་མཉམ་གནས་བྱ་རྒྱུའམ་ཕྱིར་འབུད་རྒྱུ་ཡིན་པ་ཙམ་ལས་གནད་དོན་མང་པོ་གླེང་འགོད་བྱ་མི་ཆོག་པར་བརྗོད་ཡོད་འདུག
རྒྱལ་སྤྱིའི་ཆབ་སྲིད་དཔྱད་བརྗོད་པ་དག་གིས་གལ་སྲིད་སི་ཀཱོ་ཊི་ལན་ཌིའི་མི་མང་གི་བསམ་ཤོག་ལ་རྒྱལ་ཁ་ཐོབ་སྟེ། དབྱིན་ཇིའི་འོག་ནས་རང་བཙན་བྱས་ཚེ། སི་ཀཱོ་ཊི་ལན་ཌི་ལ་དཔལ་འབྱོར་དང་སྤྱི་ཚོགས་བདེ་འཇགས་སོགས་ཀྱི་ཐད་ཉེན་ཁ་ཆེན་པོ་འཕྲད་རྒྱུར་ཚོད་དཔག་བྱེད་ཀྱི་ཡོད་ཅིང་། ཨ་ལེག་ཛི་ཡིས་ཀྱང་སི་ཀཱོ་ཊི་ལན་ཌིའི་མི་མང་གིས་རང་བཙན་གདམ་ཀ་བྱས་ཀྱང་། དབྱིན་གཞུང་དང་མུ་མཐུད་འབྲེལ་ལམ་འཛིན་རྒྱུ་དང་། ལྷག་པར་དུ་ཕྱོགས་གཉིས་ཀྱི་དམག་དོན་མཉམ་འབྲེལ་བྱ་རྒྱུའི་བསམ་ཚུལ་བཏོན་ཡོད། ཡུ་རོབ་མཐུན་ཚོགས་ཀྱིས་སི་ཀཱོ་ཊི་ལན་ཌི་རང་བཙན་ཆགས་ཚེ་དངུལ་སྒོར་ག་རེ་བེད་སྤྱོད་གཏོང་རྒྱུ་ཡིན་མིན་དང་། དེ་བཞིན་ད་སྔ་དབྱིན་གཞུང་གིས་ཡུ་རོབ་མཐུན་ཚོགས་ནང་གཏོང་བཞིན་པའི་མ་དངུལ་འབོར་ཆེན་ཉུང་དུ་གཏོང་ངེས་ཡིན་པ་བཅས་ཀྱི་ཐད་བློ་འཚབ་ཅིག་འབྱུང་བཞིན་ཡོད་འདུག
དུས་རབས་ ༡༨ པའི་ནང་སི་ཀཱོ་ཊི་ལན་ཌི་ཡི་དབྱིན་ཇིའི་དབང་སྒྱུར་ལ་ངོ་རྒོལ་ཕམ་ཉེས་བྱུང་ཡོད་ཅིང་། དེ་ནི་༼སྙིང་སྟོབས་ཆེན་པོ༽འམ་དབྱིན་སྐད་དུ་(Brave Heart) ཞེས་པའི་གློག་བརྙན་ནང་གི་བྱུང་རབས་དེ་ཆགས་ཡོད་པ་རེད།
གསར་འགོད་པ། བནྡེ་སྐྱབས།
རང་མགོ་ཐོན་ན་རང་བཙན་བཟང་ན་ཡང་རང་མགོ་མི་ཐོན་རང་བཙན་མིང་ཙམ་ཡིན། རྒྱལ་ཁབ་ལ་ལ་ཆེ་ན་བཟང་་རྒྱལ་ཁབ་ལ་ལ་ཆུང་ན་བཟང། བོད་རྒྱ་གཞུང་གི་ཧམ་སེམས་ཀྱི་སྡེར་དབར་ནས་ཇི་ལྟར་ཐར་རམ། བོད་ཀྱིས་རང་མགོ་ཐོན་ནམ། འདང་རྒྱག་ས་མང་པས་་་
རྒྱ་ནག་གིས་འདི་ལྟ་བུའི་དཀྱེལ་ཡངས་ཀྱི་བསམ་བློ་ཞིག་གཏོང་ཐུབ་བམ། བོད་དང་སོག་པོ། ཤུན་ཅང་། ཐའེ་ཝན། ད་དུང་ཟ་ཟུར་དུ་རང་དབང་སྤྲོད་དགོས་ཟེར་གསར་པ་རེ་ཡང་ཐོན་ཡོང་སྲིད།
དེ་བས་ང་ཚོས་རང་གིས་རང་དབང་རང་གིས་རྩོད་དགོས། དེ་མིན་འདི་ལྟ་བུ་ཞིག་ཡོང་རྒྱུ་ནི་སྲིད་མཐའ་རེད་སྙམ།
སྔ་མོའི་བཙན་རྒྱལ་རིང་ལུགས་པ་དབྱིན་མག་སེར་ཚོར་དེ་ལྟ་བུའི་དཀྱེལ་ཡངས་ཀྱི་བསམ་བློ་ཡོད་པ་ངོ་མ་ངོ་འཚར་ཆེ། སི་ཁོ་ཌི་ལན་ལ་དབྱིས་ཇིས་བཙན་རབས་དང་རིམ་པར་བྱས་པ་དང་། ཧ་ལམ་མི་ལོ་༨༠༠ ཡས་མས་ཤིག་འགོད་ཡོད་སྙམ། དུས་རབས་ཉེར་གཅིག་པའི་ལོ་རབས་༢ པའི་འགོ་བཙུག་ཙམ་ལ་གཞི་ནས་རང་བཙན་སྤྲོད་རྒྱུའི་གྲོས་མོལ་བཻད་པ་འདི་སི་ཁོཌི་བ་ཚོས་མི་ལོ་༨༠༠ ལྷག་པ་ལ་སྒུག་པའི་རེ་འདོད་ཆེ་ཤོས་དེ་ཡིན་སྲིད། དུས་རབས་༡༩ དང་༢༠ འགོ་སྟོད་དུ་དབྱིན་ཇི་བཙན་རྒྱལ་རིང་ལུགས་པས་འཛམ་གླིང་གི་རྒྱལ་ཁབ་དང་ཡུལ་གྲུ་༡༧༠ ལྷག་ལ་བཙན་འཛིན་དང་ཧམ་བཟུང་། དེ་ཚང་ལ་གསེར་དངུལ་སོགས་རྒྱུ་ནོར་ཁོ་ནས་ཆེད་ཡིད་སྐད་དེ། དབྱིན་ཇིའི་རྒྱལ་པོ༼ མིང་མི་དྲན༽ཞིག་གིས། ཟླ་བའི་གོ་ལའི་སྟེང་དུ་གསེར་ཡོད་ཞེས་པའི་ལན་དུ། ཟླ་བའི་གོ་ལར་གསེར་ཡོད་ན་ངས་སྔ་ས་ནས་ཟླ་བའི་སྟེང་ཡང་བཙན་འཛིན་དང་དམག་དཔུང་བཏང་ཡོད་ཅེས་བཤད་མྱང་། ད་གང་ལྟར་རང་དབང་རང་བཙན་འདོད་མཁན་ཚོར་གང་མགྱོགས་རང་དབང་རང་བཙན་ཐོབ་ན་བཟང་། ང་ཚོ་བོད་ལའང་མི་འགྱངས་པར་འདི་འདྲའི་གོ་སྐབས་ཤིག་ཐོབ་ངེས་སོ།།
དབྱིན་གཞུང་ངམ་དབྱིན་ཇིའི་མི་རིགས་ནི་གོ་རྟོགས་དང་། གུ་ཡངས་མང་བའི་རྒྱལ་ཁབ་དང་། མི་རིགས་རེད། དོན་དངོས་གནས་ང་ཚོ་ལའང་འདི་ལྟར་འབྱུང་བའི་རེ་བ་དང་། ཡིད་ཆེས་བྱས་ཆོག
དབྱིན་ཇིའི་རྒྱལ་བོ་རྐང་རིང་གི་སྐབས་སུ་སི་ཁོ་ཌི་ལན་ཌིར་རང་དབང་འཐབ་རྩོད་པ་སྐད་གྲགས་ཅན་ཞིག་བྱུང་མྱོང་བ་རེད་ལ། ད་བར་དུ་སི་ཁོ་ཌི་ལན་ཌིའི་མི་མང་གིས་ཁོང་ལ་སློབ་སྦྱོང་དང་གུས་བཀུར་བྱེད་ཀྱིན་ཡོད། ད་ནི་དཔའ་བོ་ཁོང་གི་མངོན་འདོད་ངོ་མ་དེའི་སྟེང་ལ་འབབ་ཀྱི་ཡོད་པ་རེད། འདི་ནི་རང་དབང་གི་ཆེད་དུ་རང་སྲོག་བློས་གཏོང་མཁན་དག་གི་སེམས་ཁོང་གི་རེ་བ་དེ་འགྲུབ་པའི་དན་རྟགས་དངོས་གནས་དེ་རེད།