རྒྱ་གཞུང་གི་འགྲོ་བ་མིའི་ཐོབ་ཐང་ཐད་སྐྱོན་བརྗོད།

གཟའ་ཟླ་བའི་ཉིན་ཨ་རིའི་གཞུང་ཚབ་ལའོ་ཁའེ་ཡིས་རྒྱ་ནག་ནང་འགྲོ་བ་མིའི་ཐོབ་ཐང་ཆེས་ཉམས་ཆག་ཀྱི་དུས་སྐབས་སུ་སླེབས་ཡོད་པ་ཐེར་འདོན་སྐྱོན་བརྗོད་བྱས་འདུག

ཕྱི་ཚེས་ ༡༦ ཉིན་རྒྱ་ནག་གནས་སྡོད་ཨ་རིའི་གཞུང་ཚབ་ལའོ་ཁའེ་(Gary Locke)ལགས་ཀྱིས། ཨ་རིའི་ཕའེ་བྷི་སི་(PBS) བརྙན་འཕྲིན་ཁང་གི་བཅར་འདྲིའི་ལེ་ཚན་བརྒྱུད། རྒྱ་ནག་ནང་འགྲོ་བ་མིའི་ཐོབ་ཐང་གནས་སྟངས་ཆེས་ཉམས་ཆག་གི་དུས་སྐབས་སུ་བསླེབས་ཡོད་པ་མ་ཟད། ད་དུང་མུ་མཐུད་དུ་ཇེ་ཞན་ཇེ་སྡུག་ཏུ་འགྲོ་བཞིན་པ་ཐེར་འདོན་སྐྱོན་བརྗོད་བྱས་འདུག ཡིན་ནའང་། རྒྱ་གཞུང་གིས་ཁོ་ཚོས་འཛིན་བཟུང་བཙོན་འཇུག་བྱེད་བཞིན་ཡོད་པའི་དམངས་གཙོ་དོན་གཉེར་བ་དང་མང་ཚོགས་རྣམས་ནི་ཁྲིམས་འགལ་ཉེས་ཅན་ཡིན་པར་སྙད་འཛུགས་ཀྱིས། དེ་ནི་འགྲོ་བ་མིའི་རང་དབང་ཐོབ་ཐང་གི་གནད་དོན་དང་འབྲེལ་བ་གང་ཡང་ཆགས་མེད་སྐོར་བརྗོད་འདུག 

གཟའ་ཟླ་བའི་དགོང་མོར་ཨ་རིའི་ཕའེ་བྷི་སི་བརྙན་འཕྲིན་ཁང་གི་ལེ་ཚན་གསོ་སྐྱོང་བ་ཪའོ་སི་(Charlie Rose) ལགས་ཀྱི་བཅར་འདྲིའི་སྐབས། ཨ་རིའི་གཞུང་ཚབ་ལའོ་ཁའེ་ལགས་ཀྱིས། ལོ་སྔོན་མར་དཀྱིལ་ཤར་ཡུལ་གྲུ་དང་བྱང་ཨ་ཧྥི་རི་ཁའི་ནང་དམངས་གཙོའི་ཡར་ལངས་ལས་འགུལ་བྱུང་སྟེ། སྒེར་གཅོད་སྲིད་གཞུང་ཁག་མགོ་རྟིང་བསློགས་པའི་གསར་བརྗེ་རྦ་རླབས་བྱུང་པའི་རྗེས། རྒྱ་གཞུང་དཔོན་རིགས་ཚོས་རྒྱ་ནག་ནང་དུའང་དེ་མཚུངས་ཀྱི་དམངས་གཙོའི་གསར་བརྗེ་འབྱུང་བར་བློ་འཚབ་སྐྱེས་ཏེ། གཞུང་དང་ལྟ་བ་ཐ་དད་འཛིན་མཁན་ཚང་མར་ཕྱོགས་ཡོངས་ནས་དྲག་གནོན་བྱེད་ཤུགས་ཆེ་རུ་བཏང་ཡོད་པ་མ་ཟད། ཐ་ན། དུག་ལྡན་ཟས་རིགས་ཐོན་རྫས་ཀྱི་རྐྱེན་པས་གཟུགས་གཞི་དང་འཚོ་བར་གནོད་འཚེ་ཐེབས་མཁན་མང་ཚོགས་ཀྱི་ཁྲིམས་མཐུན་ཁེ་དབང་རྩོད་ལེན་པ་དང་ཁྲིམས་རྩོད་པ་དག་ཀྱང་འཇུ་བཟུང་བཙོན་འཇུག་བྱས་ཡོད་པའི་གནས་སྟངས་ཐེར་འདོན་བྱས་ཡོད་པ་མ་ཟད།   ཁོང་གིས་ “ ༢༠༠༨ ལོའི་པེ་ཅིན་ཨོ་རྩེད་མ་ཚོགས་པའི་ཡར་སྔོན་དུ། རྒྱ་གཞུང་གིས་རྒྱ་ནག་ནང་བཀག་སྡོམ་སྲིད་ཇུས་ལྷོད་ཡངས་ཀྱི་རྣམ་པ་བསྟན་ཡོད་མོད། ཡིན་ནའང་། ཨོ་རྩེད་ཀྱི་རྗེས་ནས་བཟུང་བསྐྱར་དུ་འགྲོ་བ་མིའི་ཐོབ་ཐང་ཐད་དྲག་གནོན་བྱེད་ཤུགས་ཆེ་རུ་བཏང་ཡོད་ལ། ད་ལྟ་རྒྱ་ནག་གི་འགྲོ་བ་མིའི་ཐོབ་ཐང་གནས་སྟངས་ཆེས་ཉམས་ཆག་ཀྱི་དུས་སྐབས་སུ་བསླེབས་ཡོད་པ་མ་ཟད། ད་དུང་མུ་མཐུད་ཇེ་ཞན་ཇེ་སྡུག་ཏུ་འགྲོ་བཞིན་འདུག” ཅེས་བསྐྱོན་བརྗོད་བྱས་ཡོད་པ་རེད།

ཕྱི་ཚེས་ ༡༧ ཉིན་རྒྱ་ནག་ཕྱི་འབྲེལ་མགྲིན་ཚབ་པ་ལིས་ཝེ་མིན་གྱིས་གསར་འགོད་ལྷན་ཚོགས་ཐོག རྒྱ་གཞུང་གིས་རྒྱལ་སྤྱིའི་སྤྱི་ཚོགས་ཀྱིས་འགྲོ་བ་མིའི་ཐོབ་ཐང་ཡར་རྒྱས་ལས་དོན་ཐད་ཕན་ཚུན་གྲོས་སྡུར་དང་མཉམ་འབྲེལ་གྱི་འདོད་མོས་ཡོད།   ཡིན་ནའང་། འགྲོ་བ་མིའི་ཐོབ་ཐང་གནད་དོན་ལ་ཁ་གཡར་ཏེ་རྒྱ་ནག་ནང་སྲིད་ལ་ཐེ་ཇུས་དང་རྒྱ་གཞུང་གི་སྲིད་ཁྲིམས་བདག་དབང་ལ་བར་ཆད་བཟོ་བར་ངོ་རྒོལ་ཡོད་སྐོར་བརྗོད་དེ། རྒྱ་ནག་གི་འགྲོ་བ་མིའི་ཐོབ་ཐང་ཐད་ཨ་རིའི་གཞུང་ཚབ་ཀྱི་སྐྱོན་བརྗོད་དེ་ནི་དོན་དངོས་དང་མཐུན་གྱི་མེད་ཚུལ་དང་། རྒྱ་གཞུང་གིས་རྒྱལ་སྤྱིའི་འགྲོ་བ་མིའི་ཐོབ་ཐང་ལ་བརྩི་འཇོག་བྱེད་བཞིན་ཡོད་སྐོར་སླར་ཡང་བསྐྱར་ཟློས་བྱས་ཡོད་པ་མ་ཟད། ལིག་ཝེ་མིན་གྱིས་ “ རྒྱ་གཞུང་གིས་མི་ཁ་ཤས་ལ་ཁྲིམས་ཆད་བཏང་བ་དེ་ནི། རྒྱ་གཞུང་གིས་སྨྲ་བརྗོད་རང་དབང་དང་ཆོས་ལུགས་རང་དབང་ཐོག་དྲག་གནོན་བྱས་པ་ཞིག་མིན་པར། མི་དེ་དག་གིས་རྒྱ་ནག་བཅའ་ཁྲིམས་རྡོག་རོལ་དང་ཁྲིམས་སྒྲིག་གི་ས་མཚམས་ལས་བརྒལ་བའི་བྱ་སྤྱོད་སྤེལ་བའི་རྒྱུ་མཚན་གྱིས་རེད།  དེར་བརྟེན་ཁོ་ཚོར་རང་བཞིན་གྱིས་ཉེས་ཆད་གཏོང་དགོས་ངེས་རེད་ལ། དེ་ནི་འགྲོ་མིའི་རང་དབང་ཐོབ་ཐང་དང་འབྲེལ་བ་གང་ཡང་ཆགས་མེད། ” སོགས་བརྗོད་འདུག

རྒྱ་རིགས་དམངས་གཙོ་ཚོགས་པ་གསར་འཛུགས་གནང་མཁན་ཀྲུའུ་ཡུས་ཧྥུ་ཡིས། ཉེ་ཆར་རྒྱ་ནག་ནང་དམངས་གཙོ་དོན་གཉེར་བ་ཁྲིན་ཝེ་དང་ཁྲིན་ཞིས་གཉིས་ཀྱིས་དྲ་རྒྱའི་སྟེང་རྩོམ་ཡིག་སྤེལ་བ་ལ་བརྟེན་ནས། རྒྱ་གཞུང་གིས་ལོ་ ༩ དང་ ༡༠ བཙོན་འཇུག་ཁྲིམས་ཐག་བཅད་པ་སོགས་ཀྱིས་མཚོན་པའི། དམངས་གཙོ་དོན་གཉེར་བ་དང་འགྲོ་བ་མིའི་ཐོབ་ཐང་རྩོད་ལེན་པ་མང་པོ་འཇུ་བཟུང་བཙོན་འཇུག་གིས་སྤྱི་ཚོགས་ཁྱོན་ཡོངས་ལ་བཀག་སྡོམ་ཤུགས་ཆེན་བྱེད་བཞིན་པར་སྐྱོན་བརྗོད་བྱས་ཡོད་པ་མ་ཟད། ཐཱེན་ཝང་དྲ་ཚིགས་གསར་སྐྲུན་གནང་མཁན་དམངས་གཙོ་དོན་གཉེར་བ་ཧུང་ཆིས་ཀྱིས་ཀྱང་། ཨ་རབ་དམངས་གཙོའི་གསར་བརྗེ་ཡི་ཤུགས་རྐྱེན་འོག་རྒྱ་ནག་ནང་དམངས་གཙོའི་ལས་འགུལ་གྱི་འདུ་ཤེས་ཤུགས་ཆེ་རུ་གྱུར་ཡོད་པ་མ་ཟད། འདས་པའི་ལོ་གཅིག་ཙམ་གྱི་རིང་རྒྱ་ནག་ནང་གཞི་རྒྱ་ཆེ་བའི་མི་མང་འདུ་འཛོམས་ཀྱི་ངོ་རྒོལ་ལས་འགུལ་ལྡབ་འགྱུར་གྱིས་མང་དུ་འཕེལ་ཡོད་པ་བརྗོད་འདུག