བོད་
བཙན་བྱོལ་གྱི་ཐོག་མའི་ལོ་ངོ་སུམ་ཅུ་ཙམ་གྱི་རིང་ལ། མཐོ་སྒང་གི་སྒལ་ཚིགས་ལྟ་བུའི་ཧི་མ་ལ་ཡའི་རི་རྒྱུད་འཁྱགས་ལ་འབྱར་ཞིང་། རྒྱ་དཀར་ནག་གཉིས་ཀྱི་བར་མཚམས་ནམ་མཁའ་དམར་པོས་བཅད་དེ། བོད་མི་ཚོ་ད་ལྟ་བཞིན་ཕར་འགྲོ་ཚུར་འོང་གི་ལམ་ཁ་འགག་ཅིང་། ཐ་ན་ཡིག་འབྲེལ་ཙམ་ཡང་མེད་པར་ཕྱི་ཡི་གནས་སྟངས་ནང་གིས་མ་གོ ནང་གི་དཀའ་སྡུག་ཕྱི་ཡིས་མ་ཚོར་བར་དྲན་གདུང་དང་སྡུག་ཡུས་ཀྱིས་ལོ་ངོ་སུམ་བཅུ་བསྐྱལ་དགོས་བྱུང་ཡོད།
ད་སྐབས་ཀྱང་སྤྱིའི་ཆ་ནས་དམ་དྲག་འདྲ་ཡོད་མོད། སྔོན་གྱི་གནས་སྟངས་དང་བསྡུར་ན་བསྡུར་ཚད་མེད་པའི་སྐབས་ཤིག་རེད། དཔེར་ན། ད་ལོ་ནི་གཞིས་ལུས་བོད་མི་རྣམས་༧གོང་ས་མཆོག་གི་དུས་དབང་ཞུ་བར་ཡོང་བའི་ཁ་གྲངས་མང་ཤོས་ཐེངས་གཉིས་པ་དེ་རེད། དེ་མིན་ལོ་ལྟར་རྒྱ་གར་ནང་གནས་མཇལ་དང་སྨོན་ལམ་༧གོང་ས་མཆོག་གི་གསུང་ཆོས་ཞུ་བར་ཡོང་མཁན་ཡང་ཆད་མྱོང་མེད་པ་ལྟ་བུ་རེད། རྒྱ་ནག་གཞུང་གིས་གནས་སྟངས་འདི་ཤེས་མེད་པར་འདོད་ན་ནི་ང་ཚོའི་མགོ་ཤ་ད་དུང་དྭངས་མེད་པའི་རྟགས་རེད།
གཞན་ཡང་། བྱེས་སྡོད་བོད་མི་ཚོའི་ནང་ནས་ཕྱིར་ཕ་ཡུལ་ལ་གཉེན་འཕྲད་ལ་འགྲོ་བཞིན་པའི་གྲངས་ཀ་ཡང་ཉུང་ཉུང་མ་རེད། ཉིན་རྟག་པར་ལྡི་ལི་དང་བལ་ཡུལ་དུ་ཡོད་པའི་རྒྱ་ནག་གཞུང་ཚབ་ཁང་གི་སྒོ་འགྲམ་དུ་བང་སྒྲིག་བསྡད་པའི་རིང་ཐུང་ལ་བལྟས་ན་ཤེས་ཐུབ་པ་ཞིག་རེད། འདི་ལྟར་བལྟས་ན། གཞིས་བྱེས་གཉིས་བར་གྱི་རྩིག་གྱང་དེ་སྔར་ནས་འགྱེལ་ཚར་བ་འདྲ་བོ་རེད་ལ། སྲིད་ཕྱོགས་ནས་ཀྱང་རྩེད་མོའི་ཚུལ་གྱིས་རྒྱང་འཇལ་ཞིག་དང་དོགས་པའི་ཚུལ་དུ་ཚོད་ལྟ་ཞིག་ཅི་ལ་མིན།
དུས་ཀྱི་འགྱུར་འགྲོས་དང་མི་རབས་བརྗེ་འགྲོ་ཡིས་བོད་པའི་ཤེས་ཡོན་པའི་དཔུང་ཁག་གི་ཕྱོགས་ནས་ཀྱང་རྩིག་གྱང་དེ་འགྱེལ་ཚར་བ་རེད་འདོད། ༢༠༡༠ ལོ་དང་ ༢༠༡༡ ལོ་གཉིས་ཀར་བོད་པའི་ཤེས་ཡོན་པ་དག་གི་རྒྱལ་སྤྱི་རང་བཞིན་གྱི་ཚོགས་ཆེན་གཉིས་འཚོགས་པ་རེད། དེར་མདོ་དབུས་ཁམས་གསུམ་དང་རྒྱ་བལ་འབྲུག་གསུམ་ནས་བོད་པའི་ཤེས་ཡོན་པ་དག་ཕེབས་ཤིང་། བོད་ཀྱི་རིག་གནས་སྤྱི་དང་སྐད་ཡིག་གི་ཐད་བགྲོ་གླེང་གནང་བ་རེད། འདི་ཡང་བཙན་བྱོལ་བོད་གཞུང་དང་རྒྱ་ནག་གཞུང་གཉིས་ཀའི་མཐུན་འགྱུར་དང་རྒྱབ་སྐྱོར་འོག་ནས་བྱུང་བ་རེད།
དེ་བཞིན་དུ། བོད་ཕྱི་ནང་གི་གཞོན་སྐྱེས་ཚོར་མཚོན་ན་ཡང་། སྤྱིར་སྐད་ཡིག་གི་བཀག་རྒྱ་རེ་དང་གོམས་ལོབ་ཀྱི་བར་ཐག་ཕྲན་བུ་རེ་ཡོད་ཀྱང་། གཞི་རྩའི་ཆ་ནས་སོ་སོའི་ཉིན་ཐོ་དང་དྲ་རྩོམ་སོགས་ཕར་བཞུར་ཚུར་བཞུར་རེད་ལ། གླུ་གཞས་དང་འདྲ་པར་སོགས་ཀྱང་དེ་མཚུངས་རེད། ཁ་པར་དང་དྲ་ཐོག་གི་གླེང་མོལ་ཡང་ཉིན་བཤད་མཚན་བཤད་རེད། ལྷག་པར་དུ་རླུང་འཕྲིན་དང་བརྙན་འཕྲིན་སོགས་ཀྱི་གནས་ཚུལ་ཕར་སྐྱེལ་ཚུར་ལེན་སྐད་ཅིག་སྐད་ཅིག་རེད་ལ། སྤྱི་ཚོགས་དྲ་འབྲེལ་ལའང་དཀའ་ངལ་མེད་པའི་ཚད་རེད། འདི་ཡང་རྩིག་གྱང་དེ་སྔར་ནས་འགྱེལ་ཚར་བའི་རྟགས་ཤིག་རེད་འདོད།
ད་འོ་ན་ཅི་ཞིག་ལྷག་འདུག་ཅེ་ན། ༧གོང་ས་མཆོག་ཕྱིར་བོད་གངས་ཅན་ལྗོངས་སུ་ཞབས་སོར་འཁོད་རྒྱུ་འདི་རེད། ཁོང་གི་ཆིབས་སྒྱུར་དང་མཉམ་དུ་ད་ཡོད་ཀྱི་ཛ་དྲག་དང་དཀའ་ངལ་གྱི་རིམ་པ་གཞན་དེ་དག་ཀྱང་རང་བཞིན་གྱིས་སེལ་འགྲོ་པ་རེད། དེས་ན། ད་རེབ་གཞིས་བྱེས་གཉིས་ཀ་འདིར་འཛོམས་ཤིང་། འདི་ནས་ཕྱིར་རང་རང་གི་གནས་སུ་ལོག་རྗེས་དུས་དབང་གི་བྱིན་རླབས་དང་ཚེ་དབང་གི་གདམས་པ་ལས་ཀྱང་ལས་དོན་གལ་ཆེན་ཞིག་ཡོད་པ་ནི། ༧གོང་ས་མཆོག་ཕྱིར་གདན་འདྲེན་ཞུ་རྒྱུ་འདི་གཅིག་པུ་ཡིན། དེ་ནི་ལོ་འདིའི་ནང་བོད་མི་སྐྱ་སེར་བཅུ་གསུམ་གྱིས་སྐུ་ལུས་མཆོད་འབུལ་བྱས་པའི་མེ་ལྕེ་ཁྲོད་ཀྱི་འབོད་ཚིག་རེད་ལ། ད་ལྟའི་སྲིད་སྐྱོང་བ་བློ་བཟང་སེང་གེ་མཆོག་གིསདབུ་ཁྲིད་པའི་བཙན་བྱོལ་བོད་མིའི་སྲིད་བྱུས་ཀྱི་དགོངས་དོན་དང་ཕྱག་ལས་གཙོ་བོ་ཡང་། ༧གོང་ས་མཆོག་ཕྱིར་བོད་གངསཅན་ལྗོངས་སུ་གདན་དྲངས་ཏེ་ལྷ་ལྡན་གཙུག་ལག་ཁང་གི་ཁྲི་འཕངས་ལ་མངའ་གསོལ་རྒྱུ་འདི་རེད།
