བོད་རིགས་སློབ་ཕྲུག་གསུམ་གྱིས་བོད་དོན་དྲིལ་བསྒྲགས་ཆེད། ཟླ་གཅིག་རིང་གི་ལྕགས་རྟ་སྐོར་སྐྱོད་ཀྱི་ལས་འགུལ་ཞིག་མགོ་འཛུགས་བྱས་ཡོད་འདུག
ཟླ་འདིའི་ཕྱི་ཚེས་ ༢༠ ཉིན་གོལ་པར་པུར་བོད་ཁྱིམ་སློབ་གྲྭའི་སློབ་མ་ཚེ་ལོ་རྒྱལ་དང་ཀླུ་མགོན་ཐར། རྒྱལ་མཚན་གསུམ་གྱིས་རྒྱ་གར་ལྷོ་ཕྱོགས་སྦེལ་ཀོབ་ནས་མགོ་འཛུགས་ཀྱིས་ཟླ་གཅིག་རིང་བོད་དོན་ཁྱབ་བསྒྲགས་ཆེད་ལྕགས་རྟ་སྐོར་སྐྱོད་ཀྱི་ལས་འགུལ་ཞིག་མགོ་འཛུགས་གནང་ཡོད་འདུག རྐང་འཁོར་སྐོར་སྐྱོད་པ་ཚེ་ལོ་རྒྱལ་གྱིས་ཁ་པར་བརྒྱུད་དུས་བབ་གསར་ཁང་ལ་བརྗོད་ན། ཁོང་ཅག་གིས་འདི་ལྟར་ལས་འགུལ་སྤེལ་དོན་ནི། བོད་ནང་གི་ཛ་དྲག་གནས་བབ་དང་བོད་མིའི་དཀའ་སྡུག་གནས་སྟངས། ལྷག་པར་དུ་ཉེ་ཆར་བོད་ནང་རང་ལུས་མེར་བསྲེགས་བཏང་བའི་གནས་ཚུལ་དེ་དག་འཛམ་གླིང་གི་སྡིངས་ཆར་སྐྱེལ་ཆེད་དང་། རྒྱ་གཞུང་གིས་ཕྱི་ཕྱོགས་སུ་དྲིལ་བསྒྲགས་རྫུན་མ་བྱས་ཏེ། བོད་ནང་དཔལ་འབྱོར་ཡར་རྒྱས་དང་སྤྱི་ཚོགས་བདེ་འཇགས་ཡོད་ཚུལ། ལྷག་པར་དུ་བོད་ནང་རང་ལུས་མེར་བསྲེགས་གཏོང་བཞིན་པ་དེ་དག་༧གོང་ས་མཆོག་དང་ཕྱི་སྡོད་བོད་མིའི་ངལ་སྐུལ་ཡིན་ཚུལ་གྱི་འཁྱོག་བརྗོད་དེ་དག་ལ་ར་སྤྲོད་ཆེད་ཡིན་འདུག
རྐང་འཁོར་སྐོར་སྐྱོད་པ་དག་གི་དགོས་འདུན་དང་འབོད་སྐུལ་ཁག་ཅིག་ཞུས་ཡོད་པ་དག་ནི། རྒྱ་ནག་གཞུང་གིས་བཙན་བྱོལ་བོད་མིའི་སྒྲིག་འཛུགས་དང་༧གོང་ས་མཆོག་མཉམ་དུ་དོན་དམ་གྱིས་གྲོས་མོལ་མགོ་འཛུགས་བྱ་དགོས་པ་དང་། ༧གོང་ས་མཆོག་ཕྱིར་བོད་དུ་གདན་འདྲེན་ཞུ་དགོས་པ། རྒྱའི་བཙོན་འོག་ཏུ་ཡོད་པའི་ཉེས་མེད་བོད་མི་རྣམས་འཕྲད་དུ་ཀློད་གྲོལ་གཏོང་དགོས་པ། རྒྱ་གཞུང་གི་དྲག་ཆས་དམག་མི་རྣམས་འཕྲལ་དུ་བོད་ནས་ཕྱིར་འཐེན་བྱ་དགོས་པ་བཅས་རེད། དེ་བཞིན་ཁོང་ཅག་གིས་བོད་ནང་གི་དངོས་ཡོད་གནས་སྟངས་ལ་རྟོག་ཞིབ་ཆེད་རྒྱལ་སྤྱིའི་རང་དབང་ཞིབ་བཤེར་པ་བོད་ནང་ཆེད་གཏོང་བྱ་དགོས་པ་དང་། འཛམ་གླིང་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་སྡེ་ཚན་གྱི་ཡན་ལག་ལས་ཁུངས་བོད་ནང་འཛུགས་དགོས་པ་བཅས་ཀྱི་འབོད་སྐུལ་འོག་ས་གནས་ཁག་ཏུ་མཚན་རྟགས་བསྡུ་རུབ་ཀྱང་བྱེད་བཞིན་ཡོད་འདུག
རྐང་འཁོར་སྐོར་སྐྱོད་པ་དག་གིས་འགྲེམས་སྤེལ་ཞུ་བཞིན་པའི་ཡིག་ཆའི་ནང་། བོད་ནང་གི་བོད་མི་ཚོས་ཞི་རྒོལ་བྱས་དོན། རྒྱ་གཞུང་གིས་བོད་ཐོག་འཛིན་པའི་སྲིད་ཇུས་དྲང་སྙོམས་མིན་པ་མ་ཟད། ནམ་རྒྱུན་བོད་མི་ཚོར་མཐོང་ཆུང་དང་མི་རིགས་དབྱེ་འབྱེད། མི་སྤྱོད་ལས་འདས་པའི་དྲག་གནོན་ལག་བསྟར་བྱས་ཏེ། བོད་རྒྱ་མི་རིགས་བར་འཁོད་སེམས་དང་། སྤྱི་ཚོགས་གཉིས་འགལ་བ་སློང་བཞིན་ཡོད་པ་དང་། ༧གོང་ས་མཆོག་ནི་བོད་མིའི་ཆོས་ཕྱོགས་ཀྱི་དབུ་ཁྲིད་ཙམ་མིན་པར། བོད་མི་རིགས་ཀྱི་མཚོན་རྟགས་ཞིག་ཡིན་པས། རྒྱ་གཞུང་གིས་༧གོང་ས་མཆོག་ལ་མཚན་སྨོད་བྱེད་པ་དེས་བོད་མིའི་ཆེ་མཐོང་ལ་བརྩི་བཀུར་མ་བྱས་པ་ཡིན་ཚུལ་སོགས་བཀོད་འདུག
དེ་རིང་ཁ་པར་བརྒྱུད་ཁོང་ཚོར་འབྲེལ་བ་བྱས་སྐབས། ད་ལྟ་ཁོང་ཅག་མེ་སོར་(Mysore) གྲོང་ཁྱེར་དུ་བསླེབས་ཏེ། ས་གནས་གཞོན་ནུ་དང་བུད་མེད་ཀྱི་གོ་སྒྲིག་འོག ས་གནས་རྒྱ་གར་གསར་འགོད་པར་ཐུག་འཕྲད་དང་། མི་མང་ལ་མཚན་རྟགས་བསྡུ་རུབ་སོགས་བྱེད་བཞིན་ཡོད་འདུག མེ་སོར་ནས་བྷང་ལོར་དང་ཅི་ནཱ་ཡེ། གྷོ་ཝ། པུ་ནེ། མུམ་བྷ་ཡེ་སོགས་བརྒྱུད་ཟླ་གཅིག་ནང་ལྡི་ལིར་འབྱོར་རྒྱུ་ཡིན་སྐོར་བརྗོད།
རྐང་འཁོར་སྐོར་སྐྱོད་པ་ཚེ་ལོ་རྒྱལ་ལགས་ནི་ལོ་སྔོན་མར་ཡང་རྒྱ་གར་ནང་བོད་སྐད་ཡིག་སྐོར་ལ་རྐང་འཁོར་སྐོར་སྐྱོད་ཅིག་གནང་ཡོད་ཅིང་། ཁོང་གིས་ “ཉེ་ཆར་བོད་ནང་རང་ལུས་མེར་བསྲེགས་ཀྱི་ཛ་དྲག་བྱུང་སྟབས། གུང་སེང་དང་བསྟུན་ནས་བསྐྱར་དུ་ལས་འགུལ་འདི་སྤེལ་པ་ཡིན། ང་ཚོས་བོད་ནང་གི་གནས་སྟངས་དང་བོད་དོན་ཁྱབ་བསྒྲགས་ཙམ་ལས་གཞན་གང་ཡང་བྱེད་ཐུབ་མི་འདུག ”ཟེར།
གསར་འགོད་པ། བནྡེ་སྐྱབས།
ངའི་སྤུན་ཟླ་ཚེ་ལོ་རྒྱལ་དང་ཀླུ་མགོན་ཐར་རྒྱལ་མཚན་གསུམ་གྱིས་བོེད་མི་རིགས་གྱིས་སྤྱིའི་དཀའ་ངལ་སེལ་ཐུབ་དང་ནང་གི་སྡུག་སྔལ་སེལ་ ཆེད་ཁོང་ཚོས་ལས་ཀ་འདི་ལྷག་བསམ་རྣམས་དག་གི་བྱ་བ་བྱེད་པ་འདི་ལ་བར་ཆད་མེད་པའི་སྨོན་འདུན་དང་ཐུགས་རྗེ་ཆེ་ཞུ་བཞིན་ཡོད། སེམས་ཤུགས་མ་ཆད་སེམས་ཤུགས་མ་ཆད། གྲོགས་པོ་ལགས།
རྒྱང་མིག་ལགས་ཀྱིས་《མོ་ཌ་སེ་ཀ་》ལ་<<འཕྲུལ་རྟ>>ཟེར་གྱིན་ཡོད་པ་ངོ་སྤྲོད་གནང་བ་ཐུགས་རྗེ་ཆེ། འོན་ཀྱང་ངས་《མོ་ཌ་སེ་ཀ་》ལ་<<འཕྲུལ་རྟ>>ཟེར་གྱིན་མ་རེད་ཟེར་གྱིས་མེད། བོད་པའི་སྤྱི་ཚོགས་ནང་ཐ་སྙད་གསར་པ་རྣམས་གཅིག་མཐུན་ཞིག་བྱུང་ན་ཡག་པོ་རེད་ཟེར་གྱིས་ཡོད།
བཟོད་པ་ལྷ་རྩེ་ལགས་《མོ་ཌ་སེ་ཀ་》ལ་<<འཕྲུལ་རྟ>>ཟེར་གྱིན་ཡོད་པ་རེད།
ཁ་སང་དེ་རིང་གི་ངེད་བོད་པ་ཚང་གི་མིག་མཆུ་དང་ན་ཟུག་གི་ཉིན་མཚན་ཁྱེད་རྣམ་པས་འདི་ལྟར་བསུ་དུས་སེམས་ནས་དགའ་སྐྱོ་འདྲེས་མའི་ཚོར་འདུ་ཞིག་དང་སྙིང་སྟོབས་ཤིག་ཕེར་ཡོང་གི ཁྱེད་ཚོའི་ལས་དོན་ལ་བར་ཆད་དང་ངན་འགག་མེད་པར་ཡིད་སེམས་ལྟར་ལམ་ལྷོངས་ཡོང་བའི་སྨོན་འདུན་དང་བསྔགས་བརྗོད་གྲངས་མེད་ཞུ
རྐང་འཁོར་དང་ལྕགས་རྟ་གཉིས་ལ་ཁྱད་པར་ཅུང་ཡོད་ན་བསམ། 《མོ་ཌ་སེ་ཀ་》ལྕགས་རྟ་དང་《སེ་ཀ》ལ་རྐང་འཁོར་གྱི་ཐ་སྙད་གཅིག་སྒྱུར་ཞིག་གནང་བ་ཡིན་ན་ཡག་པོ་མེད་དམ།
སེམས་ཡོད་ན་ལས་འགུལ་སྤེལ་རྐྱང་ཡིན།།
བུ་ཡིན་ན་འཛམ་གླིང་སྐོར་རྐྱང་ཡིན།།
མིག་ཡོད་ན་བོད་ཀྱི་ཡུལ་ལ་ལྟོས།།
རྣ་ཡོད་ན་མེ་མདའི་སྐད་ལ་ཉོན།།
ལྕགས་རྟ་ཟེར་ན། རྐང་འཁོར་ལ་ཟེར་བགྱིད་ཡོད་པེ། ཨ་ལེ། གསེར་རྟ་དང་། དངུལ་རྟ། ཟངས་རྟ་ག་དུས་བཟོ་ཐུབ་བགྱི་རེད། ལགས།