ཨ་རིའི་ཕྱི་སྲིད་མགྲིན་ཚབ་མ་ལྕམ་ནཱ་ལན་ཌི་དང་ཨ་རིའི་གཞུང་གི་བོད་དོན་དམིགས་བསལ་འབྲེལ་མཐུད་པ་ལྕམ་མའེ་རེ་ཨོ་ཊི་རའོ་རྣམ་གཉིས་ཀྱིས་སྔ་ཕྱིར་གསལ་བསྒྲགས་སྤེལ་ཏེ། བོད་ནང་ཛ་དྲག་གནས་སྟངས་ཐད་སྐྱོན་བརྗོད་དང་། དོན་ཕན་ལྡན་པའི་བོད་རྒྱའི་བར་གྲོས་མོལ་གནང་དགོས་པའི་འབོད་སྐུལ་གནང་འདུག
ཁ་སང་ཕྱི་ཚེས་ ༢༤ ཉིན། ཨ་རིའི་གཞུང་གི་ཕྱི་འབྲེལ་མགྲིན་ཚབ་པ་ལྕམ་ནཱ་ལན་ཌི་(Victoria Nuland) ལགས་དང་། ཨ་རིའི་མི་དམངས་ཀྱི་བདེ་དོན་དང་དམངས་གཙོ། འགྲོ་བ་མིའི་ཐོབ་ཐང་ལས་དོན་དྲུང་ཆེ་དང་། བོད་དོན་དམིགས་བསལ་འབྲེལ་མཐུད་སྐུ་ཚབས་ལྕམ་མའེ་རེ་ཨོ་ཊི་རའོ་(Maria Otero)ལགས་རྣམ་གཉིས་ཀྱིས་སྔ་ཕྱིར་གསལ་བསྒྲགས་སྤེལ་ཏེ། ཉེ་ཆར་ལུགས་རྙིང་ལོ་གསར་ཚེས་ ༡ ཉིན་ཁམས་བྲག་མགོ་དང་གསེར་རྟ་བཅས་སུ་བོད་མིས་ཞི་རྒོལ་སྐབས། རྒྱ་དམག་དྲག་ཆས་ཉེན་རྟོག་པས་མང་ཚོགས་ཁྲོད་གང་བྱུང་མེ་མདའ་བརྒྱབ་སྟེ་དམར་གསོད་དྲག་གནོན་བྱས་པའི་ཛ་དྲག་གནས་སྟངས་ཐད། ཨ་རིའི་གཞུང་གིས་བློ་འཚབ་ཆེན་པོ་བྱེད་ཀྱི་ཡོད་པ་གསལ་འདོན་བྱས་ཡོད་པ་དང་། རྒྱ་གཞུང་གིས་༸གོང་ས་མཆོག་གི་སྐུ་ཚབ་དང་ལྷན་དུ་དོན་ཕན་ལྡན་པའི་གྲོས་མོལ་གྱི་ལམ་ནས་བོད་ཀྱི་གནད་དོན་སེལ་དགོས་པའི་འབོད་སྐུལ་གནང་ཡོད་པ་རེད།
ཨ་རིའི་ཕྱི་འབྲེལ་མགྲིན་ཚབ་པ་ལྕམ་ནཱ་ལན་ཌི་ལགས་ཀྱིས་བརྗོད་དོན། “ང་ཚོས་ཧ་ཅང་བློ་འཚབ་ཆེན་པོའི་སྒོ་ནས་བོད་ནང་མུ་མཐུད་ཛ་དྲག་གནས་སྟངས་འབྱུང་བཞིན་ཡོད་པར་དོ་སྣང་ཤུགས་ཆེན་པོ་བྱེད་ཀྱིན་ཡོད་ལ། གནས་ཚུལ་དེ་དག་ཁྲོད་ཟི་ཁྲོན་ཞིང་ཆེན་དྲག་ཆས་དམག་མིས་ཞི་རྒོལ་བའི་སྟེང་མེ་མདའ་བརྒྱབ་སྟེ། མི་འགའ་ཤས་དམར་གསོད་དང་། མི་འགའ་ཤས་ལ་རྨས་སྐྱོན་བཟོས་ཡོད་འདུག” ཅེས་བརྗོད་དེ། ཨ་རིའི་གཞུང་གིས་བོད་ནང་གི་ཛ་དྲག་གནས་སྟངས་ཐད་བློ་འཚབ་ཆེན་པོ་བྱེད་བཞིན་པ་གསལ་སྟོན་གནང་བ་མ་ཟད། རྒྱ་གཞུང་གིས་བོད་མིའི་བསམ་བློའི་དབུ་ཁྲིད་ཏཱ་ལའི་བླ་མ་མཆོག་དང་ཁོང་གི་སྐུ་ཚབ་ལྷན་དུ་གྲོས་མོལ་གནང་དགོས་པའི་འབོད་སྐུལ་དང་། རྒྱ་གཞུང་གིས་བོད་ཐོག་འཛིན་པའི་ནོར་འཁྲུལ་ཅན་གྱི་སྲིད་ཇུས་དེའི་རྐྱེན་པས། བོད་ནང་གནས་སྟངས་ཛ་དྲག་ཏུ་འགྱུར་བཞིན་པ་མ་ཟད། བོད་མིའི་ཐུན་མིན་ཆོས་དང་རིག་གཞུང་། སྐད་ཡིག་བཅས་ལ་དཀའ་ཉེན་འཕྲད་བཞིན་ཡོད་པར་བརྟེན། བོད་ཐོག་འཛིན་པའི་རྒྱ་གཞུང་གི་སྲིད་ཇུས་དེར་བསྐྱར་ཞིབ་བྱ་དགོས་པ་ནན་བརྗོད་བྱས་འདུག
ཨ་རིའི་གཞུང་གི་བོད་དོན་དམིགས་བསལ་འབྲེལ་མཐུད་ལྕམ་མའེ་རེ་ཨོ་ཊི་རའོ་ལགས་ཀྱིས། “ཨ་རིའི་གཞུང་གི་བོད་དོན་དམིགས་བསལ་འབྲེལ་མཐུན་པ་ཡིན་པའི་ངོས་ནས། ཉེ་ཆར་ཟི་ཁྲོན་ཞིང་ཆེན་དྲག་ཆས་ཉེན་རྟོག་པས་བོད་མི་ཞི་རྒོལ་བའི་ཁྲོད་མེ་མདའ་བརྒྱབ་སྟེ་མི་སེར་དཀྱུས་མར་ཤི་རྨས་དོན་རྐྱེན་བཟོས་པ་དང་། བོད་ནང་མུ་མཐུད་གནས་སྟངས་ཛ་དྲག་ཏུ་འགྲོ་བཞིན་པའི་ཐད་བློ་འཚབ་བྱེད་བཞིན་ཡོད” ཅེས་བརྗོད་པ་མ་ཟད། ཉེ་སྔོན་རྒྱ་གཞུང་ལ་འབོད་སྐུལ་ནན་བརྗོད་བྱས་པ་ལྟར། རྒྱ་གཞུང་གིས་ནོར་འཁྲུལ་ཅན་གྱི་སྲིད་ཇུས་མུ་མཐུད་ལག་སྟར་བྱས་ཏེ། ཆོས་སྤྱོད་ཀྱི་འཚོ་བ་དང་ཆོས་ལུགས་བྱ་འགུལ་བཅས་ལ་བཀག་སྡོམ་དང་། དགོན་སྡེ་ཁག་ནང་རྒྱལ་གཅེས་ཆོས་གཅེས་ཀྱི་སློབ་གསོ་སྲིད་ཇུས་སྤེལ་ཏེ་གྲྭ་བཙུན་ཚོར་བཙན་ཤུགས་ཀྱིས་༸གོང་ས་མཆོག་ལ་སྐྱོན་བརྗོད་བྱེད་འཇུག་པ། དགོན་སྡེ་ཁག་ནང་རྒྱ་གཞུང་དཔོན་རིགས་གཏན་སྡོད་ཀྱིས་དགོན་པའི་བྱ་བར་ལྟ་རྟོག་སུན་གཙེར་བཟོ་བ། རང་ལུས་མེར་བསྲེགས་གཏོང་མཁན་དག་གི་ནང་མི་ཉེ་འབྲེལ་རྣམས་ལ་གནོན་ཤུགས་སྤྲོད་པ། བོད་མི་ཚོ་གང་བྱུང་བཀག་སྐྱིལ་དང་འདྲི་གཅོད་བྱེད་ཤུགས་ཆེ་རུ་བཏང་སྟེ་བོད་མི་མང་པོ་གར་སོང་ཆ་མེད་དུ་འགྱུར་བཞིན་པ། དེ་བཞིན། ལོ་སྔོན་ནས་བཟུང་རྒྱ་གཞུང་བདེ་སྲུང་དང་ཁྲིམས་ལུགས་སྡེ་ཁག་དག་གིས། རྒྱ་གཞུང་གི་སྲིད་ཇུས་ལ་སྐྱོན་བརྗོད་བྱེད་མཁན་བོད་མི་རྩོམ་པ་པོ་དང་། སྒྱུ་རྩལ་བ། ཤེས་ལྡན་པ། རིག་གནས་བྱ་འགུལ་བ་བཅས་འཇུ་བཟུང་བཙོན་འཇུག་དང་ཁྲིམས་གཅོད་བཞིན་པ་སོགས་ཐེར་འདོན་སྐྱོན་བརྗོད་བྱས་ཡོད་པ་རེད།
ད་དུང་། མའེ་རེ་ཨོ་ཊི་རའོ་ལགས་ཀྱིས་གསལ་བསྒྲགས་སྐབས། ཨ་རིའི་གཞུང་གིས་དེ་སྔོན་ནས་རྒྱུན་མཐུད་དང་ཐད་ཀར་གྱི་སྒོ་ནས་རྒྱ་གཞུང་ལ་བོད་ཀྱི་གནད་དོན་གླེང་སློང་བྱས་ཡོད་ལ། ཨ་རིའི་གཞུང་གིས་རྒྱ་ནག་གཞུང་གི་ནོར་འཁྲུལ་ཅན་གྱི་སྲིད་དེས་བོད་ཁུལ་གྱི་གནས་སྟངས་སྔར་བས་ཛ་དྲག་ཏུ་འགྱུར་བཞིན་པ་དང་། སྲིད་ཇུས་དེ་དག་གིས་བོད་ཀྱི་ཐུན་མིན་ཆོས་དང་རིག་གཞུང་། སྐད་ཡིག་བཅས་ལ་དཀའ་ཉེན་བཟོ་བཞིན་པར་བསྐྱར་དུ་ནན་བརྗོད་བྱས་ཡོད་པ་མ་ཟད། ཁོ་མོས་ “ ང་ཚོའི་ངོས་ནས་བོད་ནང་དུ་གསར་འགོད་པ་དང་ཕྱི་འབྲེལ་མི་སྣ། དེ་བཞིན་ལྟ་ཞིབ་ཚོགས་པ་སོགས་གཏོང་དགོས་པའི་འབོད་སྐུལ་བྱེད་རྒྱུ་ཡིན་ལ། ང་ཚོས་རེ་བར་རྒྱ་གཞུང་གིས་ཏཱ་ལའི་བླ་མ་མཆོག་དང་། ཁོང་གི་སྐུ་ཚབ་ལྷན་དུ་དོན་ཕན་ལྡན་པ་དང་། གཞི་འཛིན་ས་ཡོད་པའི་གྲོས་མོལ་བྱས་ཏེ་བོད་མིའི་གནད་དོན་མཐའ་དག་སེལ་ཐབས་བྱ་དགོས” ཅེས་བརྗོད་འདུག
བོད་ནང་དུ་གནས་སྟངས་སྔར་བའི་ཛ་དྲག་ཏུ་འགྲོ་བཞིན་ཡོད་སྐབས་འདིར། རྒྱ་གཞུང་སྲིད་འཛིན་གཞོན་པ་ཞི་ཅིན་ཕེན། ཕྱི་ཟླ་ ༢ ཚེས་ ༡༤ ཉིན་ཨ་རིའི་ནང་རྒྱལ་དོན་ལྟ་སྐོར་ལ་སྐྱོད་གཏན་ཁེལ་ཡོད་པ་རེད། ཨ་རིའི་གསར་ལམ་ཁག་ཏུ་དཔྱད་བརྗོད་སྤེལ་བ་ལྟར་ན། རྒྱ་གཞུང་གི་ངོས་ནས་ཨ་རིའི་སྲིད་འཛིན་ཟུར་པ་ནེ་ཁུ་སུང་(Richard Nixon )རྒྱ་ནག་ཏུ་གཟིགས་སྐོར་ལ་ཕྱིན་ཏེ་ལོ་ ༤༠ འཁོར་བའི་དུས་ཚིགས་སྲུང་གཙིའི་རྣམ་པའི་ཐོག་ཕན་ཚུན་འབྲེལ་མོལ་ལ་གྲུབ་འབྲས་འཐོན་རྒྱུའི་རེ་བ་འཆིང་བཞིན་ཡོད་ནའང་། མ་གཞི་ནས་འགྲོ་བ་མིའི་ཐོབ་ཐང་དང་བོད་ཀྱི་གནད་དོན་ཐད་ཨ་རྒྱ་གཉིས་བར་ལངས་ཕྱོགས་མི་མཐུན་པའི་རྩོད་པ་ཤུགས་ཆེན་པོ་ཡོད་པ་མ་ཟད། ཉེ་ཆར་ཨ་རིའི་ས་ཁུལ་ཁག་ནང་སྤྱི་མཐུན་ཚོགས་པའི་སྲིད་འཛིན་འོས་མི་འགྲན་རྩོད་ཀྱི་སྐབས་དང་ཁེལ་ཡོད་པ་དང་། སྤྱི་མཐུན་ཚོགས་པའི་སྲིད་འཛིན་འོས་མི་དག་གིས་ཨོ་བྷ་མ་གཞུང་གིས་འགྲོ་བ་མིའི་ཐོབ་ཐང་གནད་དོན་ཐད། རྒྱ་གཞུང་ལ་གུ་ཡངས་ཀྱི་རྣམ་འགྱུར་འཛིན་བཞིན་པར་སྐྱོན་བརྗོད་ཤུགས་ཆེན་བྱེད་བཞིན་ཡོད་སྟབས། ཐེངས་འདིར་ཨོ་བྷ་མ་གཞུང་གིས་གནད་དོན་དེ་དག་ཐད་ལངས་ཕྱོགས་མཁྲེགས་པོ་འཛིན་སྲིད་པའི་ངོས་འཛིན་བྱ་བཞིན་ཡོད་འདུག
གསར་འགོད་པ། ཚེ་རིང་རྒྱལ།
སྟོབས་ཆེན་ཨ་རིའི་ལྷ་ལྕམ་རྣམ་པ་གཉིས་ནས་རྒྱབ་སྐྱོར་འདི་འདྲ་གནང་བར་སྙིང་དབུས་ནས་ཐུགས་རྗེ་ཆེ་ཞུ།
ད་དུང་མུ་མཐུད་དེ་སྔ་ཕྱིའི་བརྒྱབ་སྐྱོར་རབ་དང་རིམ་པ་གང་མང་གནང་རྒྱུའི་རེ་འདུན་གྲངས་མེད་ཞུ།
མཉམ་འབྲེལ་རྒྱལ་ཚོགས་སྤྲང་པོའི་དབྱུག་པ་རེད། མཉམ་ཆུང་ཐུབ་ན་མ་གཏོགས་ཆེན་པོར་སྤྲེལ་ལས་བཤད་ནས་བསྡད་ཡོད། དེ་ལ་རེ་བ་དེ་ཙམ་མ་བྱས་ན་བཟང་ཀི།
ད་ལོ་སྐུ་ཚབ་གཏོང་གནང་ཐུབ་ན། ངེས་པར་དུ་རྒན་གཞོན་གཉིས་ཀ་དང་། དེ་ལས་ཀྱང་བོད་ནང་ནས་སློབ་སྦྱོང་ཐོན་པའི་གཞོན་སྐྱེས་ཤེས་ཡོན་པ་དང་། ཕྱི་ལོག་ནས་སློབ་སྦྱོང་ཐོན་པའི་གཞོན་སྐྱེས་ཤེས་ཡོན་པ་གཉིས་ཀ་ངེས་པར་དུ་གཏོང་གནང་ཐུབ་དགོས།
དེ་དགོས་ཡཱ། ཨ་རིས་དངོས་གནས་རོགས་རམ་གནང་ཐུབ་ན། རྒྱ་ནག་ལ་ཚོང་འབྲེལ་གཅོད་པ་དང་། ཕྱི་འབྲེལ་གང་ཡང་མེད་པ་བཟོ་རྒྱུ། རྒྱ་ཁབ་གཞན་ལའང་དེ་ལྟར་སྐུལ་མ་གནང་རྒྱུ་དེ་རེད། དེ་མི་ཐུབ་ན། སྐད་སྦུག་ནང་ལ་རླུང་ཞིག་བཏང་ནི་རེད། དོ་སྙིང་མེད་ཀི་པཱ།
ཨ་རིའི་རྒྱལལ་པོ་ནག་རིལ་གཞུང་ལ་བཀའ་དྲིན་ཆེ་ཞེས་ཞུའོ། །ཐུགས་རྗེ་ཆེ། ཆེ། ཆེེེ། །
ང་ཡི་མཆན་འདི་གསར་ཤོག་སྟེང་བཀྲམ་ཐུབ་གནང་རོགས་་་་
གསར་འགོད་པ་ཐུགས་ཆཻ
ད་སྐབས་བོད་ནང་ཡོད་པའི་རྒྱལ་གཅེས་དཔའ་བོ་དང་དཔའ་མོ་རྣམས་ཀྱི་རླབསས་ཆེན་ཀྱི་མཛད་རྣམ་དེས་རྒྱ་ནག་གཙོས་པའི་འཛམ་གླིང་ཡོངས་ལ་བོད་མི་རིགས་ཀྱི་གནས་ཚུལ་ངོ་སྤྲོད་གནང་གནང་བ་རེད་་་་དེར་བརྟེན་ཞི་བདེ་དང་མི་རིགས་འདྲ་མཉམ་ཀྱི་བསམ་བློ་ཡོད་པའི་དབུ་ཁྲིད་དེ་ཚོས་ཉམས་ཐག་གི་རྒྱབ་སྐྱོར་བྱས་ནས་འབོད་བསྐུལ་ཞུ་བཞིན་པའི་སྐབས་འདིར།་་་གོ་སྐབས་ཅིག་བཟུང་ནས་༧གོང་ས་མཆོག་གི་སྐུ་ཚབ་ཅིག་བོད་དུ་ཕེབས་ཐུབ་པ་གལ་ཆེན་མཐོང་།་་་དེ་ཡང་ད་ལམ་རྒྱ་ནག་གི་དབུ་ཁྲིད་རྣམས་ཀྱི་སེམས་ལ་དམིགས་གསལ་གི་ཚོར་བ་ཞིག་སླེབས་པ་གསལ་བོ་རེད།་་་་ཕྱོགས་ཅིག་ནས་བོད་མི་མང་པོས་རང་ལུས་མེ་བསྲེགས་གཏོང་བ་དང་།་་་ཕྱོགས་གཅིག་ནས་དབུ་ཁྲིད་རྣམས་ཀྱིས་འབོད་བསྐུལ་ཞུ་བ་་་འདི་གཉིས་བོད་རྒྱ་ཞི་བའི་ཐབས་ལམ་གཙོ་བོ་རེད་འདུག་བསམ་་་དེར་བརྟེན་རྒྱ་ནག་ལ་སྐུ་ཚབ་གྱིས་འབྲེལ་བ་མགྱོགས་པར་བྱེད་དགོས།་་་་དེ་ཡང་ད་སྔོན་སྐུ་ཚབ་དེ་ཚོས་མི་འགྲིག་པ་གསལ་བོ་རེད།།།་ཁོང་ཚོ་སོང་ཀྱང་རྒྱ་ནག་གི་ངོས་ལེན་སྔོན་མ་ནང་བཞིན་ལས་ཅི་ཡང་བྱེད་ཀྱི་མ་རེད།།།།དེས་ན་༧གོང་ས་མཆོག་གི་སྐུ་ཚབ་ངོ་མ་དེ་སྲིད་བློན་བློ་བཟང་སེང་གེ་རེད་ལ་་་་ད་ཐེངས་ངེས་པར་ཁོང་རང་ཕབས་ཐུབ་པ་ཞིག་བྱུང་ན་བོད་ཀྱི་རེ་བ་ཅང་ཡོད་་་་རྒྱ་ནག་ལ་འབྲེལ་བ་གཙོ་བོ་ཁོང་གི་བྱེད་དགོས་་་་ཁོང་ཕེབས་ནས་འབྲེལ་བ་བྱེད་དགོས་་་ངེས་པར་ཁྱེད་རྒྱ་ནག་ཕེབས་ཐུབ་བྱེད་རོགས་་ཐུགས་རྗེ་གཟིགས་་་བློ་སེང་རྒྱལ་གྱུར་ཅིག
བཀའ་དྲིན་ཆེ། ཤུགས་ཆེ་ཙམ་གྱི་རོགས་རམ་རེ་གནང་ཐབས་མེད་དམ། མཉམ་འབྲེལ་རྒྱལ་ཚོགས་བརྒྱུད་དེ་་་་ཁ ཡོད་ལག་ཡོད། ནུས་པ་ཆེ་ཙམ་ཞིག་་་