ཕྱི་ཚེས་ ༢༤ ཉིན་བོད་ནང་ཞི་བདེ་དང་རང་དབང་ཆེད་དད་པའི་གོམ་བགྲོད་བྱེད་མཁན་ལྷ་རྒྱ་རི་རྣམ་རྒྱལ་སྒྲོལ་དཀར་དང་འཇར་མན་པ་ཇོ་ཧཱ་མེལ་ཊོན། ལ་དྭགས་པ་གྲྭ་དཀོན་མཆོག་ནོར་བུ་དང་བཀྲ་ཤིས་རྣམ་རྒྱལ་བཅས་མི་སྣ་བཞི་རྒྱ་བལ་ས་མཚམས་བརྒལ་ཏེ་སངས་རྒྱས་སྐུ་འཁྲུངས་ཡུལ་ལིམྦི་ནེར་འབྱོར་ཏེ། ཕྱི་ཚེས་ ༢༥ ཉིན་འབྲི་གུང་དགོན་པའི་གྲྭ་མང་དང་ལྷན་དུ་བོད་ནང་རང་ལུས་མེར་བསྲེགས་གཏོང་མཁན་རྣམས་ཀྱི་ཆེད་དུ་བསྔོ་སྨོན་མཆོད་འབུལ་གནང་ཡོད་འདུག
བོད་ནང་ཞི་བདེ་དང་རང་དབང་ཆེད་དད་པའི་གོམ་བགྲོད་ཅེས་པའི་ལས་འགུལ་དེ་ཕྱི་ཚེས་ ༩ ཉིན་གནས་མཆོག་རྡོ་རྗེ་གདན་དུ་དཔལ་དུས་ཀྱི་འཁོར་ལའི་དབང་ཆེན་ཐེངས་ ༣༢ པའི་སྟེང་མགོ་འཛུགས་གནང་སྟེ། ཝ་རཱ་ནཱ་སི་དང་རྩ་མཆོག་དྲུང་། ལིམྦི་ནེ་བཅས་ནང་པའི་གནས་ཆེན་བཞིར་གོམ་བགྲོད་གནང་སྟེ། བོད་རྒྱ་དམར་གྱིས་བཙན་འཛུལ་བྱས་པ་ནས་བོད་རྒྱལ་ཁབ་དང་མི་རིགས་ཀྱི་ཆེད་དུ་རང་སྲོག་ཤོར་པ་རྣམས་དང་། རྒྱའི་བཙོན་འོག་ཏུ་དཀའ་སྡུག་མྱངས་དང་མྱོང་བཞིན་པ་རྣམས། ལྷག་པར་དུ་ཉེ་ལམ་ནས་བོད་མི་རིགས་ཀྱི་རྩ་དོན་ཆེད་རང་ལུས་མེར་བསྲེགས་གཏོང་མཁན་དཔའ་བོ་དཔའ་མོ་རྣམ་པར་བསྔོ་སྨོན་མཆོད་འབུལ་གནང་བཞིན་ཡོད་འདུག
ཁ་པར་བརྒྱུད་གོམ་བགྲོད་པ་ཚོར་འབྲེལ་བ་བྱས་པར། གོམ་བགྲོད་ཀྱི་ལམ་བར་ནས་བོད་རིགས་འདུས་སྡོད་ཀྱི་ས་གནས་གང་དུ་བསླེབས་ཀྱང་། ས་གནས་བོད་མི་དང་གཞོན་ནུ། བུད་མེད་སོགས་ཀྱི་ཚོགས་མི་ཚོས་སྣེ་ལེན་དང་། མཉམ་ཞུགས་ཐོག་མར་མེ་ཁྲོམ་སྐོར་སོགས་ཀྱི་ལས་འགུལ་སྤེལ་ཡོད་ཀྱང་། ལིམྦི་ནེ་རུ་བལ་ཡུལ་ཉེན་རྟོག་པས་བཀག་སྡོམ་འོག་མཆོད་འབུལ་ཙམ་ལས་ལས་འགུལ་གཞན་སྤེལ་ཐུབ་མི་འདུག་ལ། བོད་ཀྱི་རྒྱལ་དར་དང་གོམ་བགྲོད་པའི་འཕྲེད་དར་སོགས་ཀྱང་ཕྱིར་བསྡུ་བྱེད་དགོས་བྱུང་འདུག
རྣམ་རྒྱལ་སྒྲོལ་དཀར་ལགས་ཀྱིས་ཁ་པར་བརྒྱུད་བརྗོད་པ་ལྟར་ན་ཕྱི་ཚེས་ ༨ ཉིན་ཁོང་ཅག་ལ་༧གོང་ས་མཆོག་གི་དམིགས་བསལ་མཇལ་ཁ་དང་བཀའ་སློབ་གནང་ཡོད་འདུག མོས་བརྗོད་དོན། “བོད་ནང་དུ་རང་སྲོག་བློས་གཏོང་གིས་རྒྱ་གཞུང་ལ་ངོ་རྒོལ་བྱེད་སྐབས། ཐུན་མོང་གི་འབོད་ཚིག་གཅིག་ནི་༧རྒྱལ་བ་རིན་པོ་ཆེ་བོད་དུ་གདན་འདྲེན་ཞུ་དགོས་ཞེས་པ་འདི་རེད། འོན་ཀྱང་། སྐུ་གཤེགས་དཔའ་བོ་དཔའ་མོ་ཁོང་ཚོའི་མི་ཚེའི་ནང་༧གོང་ས་མཆོག་ལ་མཇལ་ཐུབ་མེད་སྟབས་ཁོང་ཚོའི་རྟེན་སྐལ་དུ་རྡོ་རྗེ་གདན་ནས་སྟོན་པའི་སྐུ་བརྙན་ཞིག་བླུས་ཏེ། ༧གོང་ས་མཆོག་གི་དྲུང་ནས་བྱིན་འཇུག་དང་། གོམ་བགྲོད་སྐབས་གནས་ཆེན་ཁག་ལ་གདན་འདྲེན་གྱིས་སྐུ་གཤེགས་བོད་ཀྱི་དཔའ་བོ་དཔའ་མོ་རྣམས་ཀྱི་ཆེད་བསྔོ་སྨོན་མཆོད་འབུལ་སོགས་བྱེད་བཞིན་ཡོད་”ཅེས་བརྗོད་བྱུང་།
ཇོ་ཧཱ་མེལ་ཊོན་ལགས་ཀྱིས་ “ང་རང་བོད་དོན་འཐབ་རྩོད་འདྲ་མིན་ནང་མཉམ་ཞུགས་བྱས་ཏེ་ལོ་ ༧ ཙམ་འགྲོ་བཞིན་ཡོད་པའི་ཉམས་མྱོང་ལས། བོད་ཀྱི་འཐབ་རྩོད་ལ་བོད་མི་རང་གིས་འགན་འཁུར་དགོས་པ་རེད། ནུབ་ཕྱོགས་པ་ལ་ནམ་ཡང་རེ་བ་རྒྱག་རྒྱུ་མེད། ”ཅེས་བརྗོད་སོང་།
ཐེངས་འདིའི་གོམ་བགྲོད་ནང་མཉམ་ཞུགས་བྱེད་མཁན་ལ་དྭགས་ནས་ཡིན་པ་གྲྭ་དཀོན་མཆོག་ནོར་བུ་ལགས་ལ་བོད་དོན་ཆེད་གོམ་བགྲོད་བྱ་དགོས་པའི་སྐོར་དྲིས་པར། ཁོང་གིས་གཅིག་ནས་ཧི་མ་ལ་ཡའི་རི་རྒྱུད་དང་བོད་མི་རིགས་གཉིས་ས་བབ་དང་ལོ་རྒྱུས། རིག་གཞུང་སོགས་ཀྱི་ཐད་ནས་འབྲེལ་བ་དམ་པོ་ཡོད་པ་དང་། གཉིས་ནས་ཁོང་གི་དགེ་རྒན་སྔོམ་མ་བོད་དུ་ནང་ཆོས་སློབ་གཉེར་དུ་ཕེམས་པའི་སྐོར་དུས་རྒྱུན་གསུང་མྱོང་པའི་བག་ཆགས། ཁོང་ཡོད་སའི་དགོན་བདག་བོད་པ་ཡིན་པ་བཅས་ཀྱིས། བོད་ཀྱི་རྩ་དོན་ནི་རང་ཉིད་ཀྱི་རྩ་དོན་ཞིག་ཏུ་མཐོང་གི་ཡོད་པར་བརྗོད་བྱུང་། དེ་བཞིན་ངྷ་སྟེང་བོད་ཁྱིམ་སློབ་གྲྭའི་ནང་སློབ་སྦྱོང་བྱེད་ཀྱིན་པའི་སློབ་མ་བཀྲ་ཤིས་རྣམ་རྒྱལ་ལགས་སུ་གོམ་བགྲོད་སྐབས་དཀའ་ངལ་ཆེ་ཤོས་ག་རེ་འཕྲད་སྐོར་དྲིས་པར། ཁོང་གིས་ “ཉིན་ལྟར་སོ་སོའི་ཅ་དངོས་མང་པོ་ཁུར་ཏེ་གོམ་པ་རྒྱག་དགོས་སྟབས། ང་ཚོའི་རྐང་པ་སྐྲང་པ་དང་། རྐང་པར་ཆུ་བུར་མང་པོ་ཐོན་ནས་གོམ་པ་རྒྱག་ཁག་པོ་བྱུང་། འོན་ཀྱང་། སྐབས་དེར་རང་ལུས་མེར་བསྲེགས་བྱེད་མཁན་ཚོ་བསམ་བློའི་ནང་དྲན་གསོ་བྱས་པ་ཡིན། དེ་འདྲ་བྱས་དུས་སོ་སོའི་དཀའ་ངལ་དྲན་པ་བརྗེད་དེ་གོམ་པ་རྒྱག་རྒྱུར་བློ་སྟོབས་སྐྱེ་ཡོང་གི་འདུག་”ཟེར།
བོད་ནང་ཞི་བདེ་དང་རང་དབང་ཆེད་དད་པའི་གོམ་བགྲོད་ཅེས་པའི་གོམ་བགྲོད་པ་བཞི་ནི། ལྷ་རྒྱ་རི་རྣམ་རྒྱལ་སྒྲོལ་དཀར་དང་། འཇར་མན་ནས་ཡིན་པ་བོད་དོན་རྒྱབ་སྐྱོར་པ་སྐུ་ཞབས་ཇོ་ཧཱ་མེལ་ཊོན་ (Joe Hamilton)། ལ་དྭགས་པ་གྲྭ་དཀོན་མཆོག་ནོར་བུ་དང་བཀྲ་ཤིས་རྣམ་རྒྱལ་བཅས་ཡིན་འདུག
གསར་འགོད་པ། བནྡེ་སྐྱབས།
དབྱིན་ཇི་རྒན་པོའི་གཏམ་དེ་གནད་ཁེལ་རེད།།
མི་བརྗེད་དམ་པ་ཆོས་བཞིན་བརྩིས་ན་འགྲིག །
མི་འགྱུར་བླ་མ་བཞིན་དུ་བཀུར་ན་ཆོག །
རང་རིགས་སྐྱོབ་པའི་གདམས་ངག་དེ་ལྷག་ཅི།།
ཕྱི་གླིང་མི་ལ་རེ་བ་བཅང་ན་ཆོངས།།
རང་རྒྱལ་མི་རིགས་གང་ལ་ཁེ་མེད་ན།།
གཞན་དོན་ཆེད་དུ་ལག་པ་མི་བསྲིང་བ།།
རང་རེའི་ལོ་རྒྱུས་གཟིགས་དང་ཤེས་རྒྱུ་ཡོད།།
བུ་མོ་རྣམ་རྒྱལ་སྒྲོལ་དཀར་ལགས་ལས་འགུལ་དེར་མཉམ་ཞུགས་གནང་བར་ཡག་པོ་བྱུང་། དེ་མ་གཏོགས་མོ་རང་གིས་བོད་པ་ཚང་ལ་ཉེས་པ་ཆེན་པོ་བསགས་ཡོད་པ་རེད། འདི་ན་བོད་མི་ཚང་མས་བོད་པའི་ངོ་བོ་མ་བརླགས་པར་བོད་མི་བོད་མིའི་ས་ནས་སྡོད་ཐུབ་རྒྱུར་ཨུ་ཚུགས་གནང་སྟེ་བཙན་བྱོལ་ནང་རུག་རུག་བྱེད་ཀྱི་ཡོད་དུས་རྣམ་རྒྱལ་སྒྲོལ་དཀར་ཀྱིས་ཁྲིམས་ཐོག་ནས་རྒྱ་གར་གྱི་མི་སེར་བཟོས་སོང་བ་རེད། ཨཱ་རབ་ལུང་པ་ལྟ་བུ་ཡིན་ན་མོ་རང་གི་གདོང་པའི་ལྤགས་པ་བཀོག་ཚར་བ་རེད། ངས་རེ་བ་ལ་རྣམ་རྒྱལ་སྒྲོལ་དཀར་གྱིས་རྗེས་མ་ལྷ་རྒྱ་རི་མིང་གི་མགོ་ལ་མ་འཇོག་རོགས་གནང་། ངས་འདིའི་སྐོར་དེ་རིང་འདི་ནས་གསལ་བོ་བྱས་ནས་མི་ལབ། ཕ་ཡོས་དང་བོད་ཀྱི་ཉི་མ་དྲ་རྒྱ་སོགས་སུ་གསལ་བོར་ཡོད། http://www.tibetsun.com / http://www.phayul.com གཉིས་ལ་གཟིགས་དང་གསལ་བོ་མཁྱེན་ཡོང་གི་རེད། དེ་ཙམ་བྱོས།
འདི་འདྲིའི་སྙིང་སྟོབས་ཅན་གང་མང་ཡོང་དགོས་པ་མ་ཟད་ཡོངས་འོས་པ་ཞིག་རེད། ངོ་མ་ཁྱེད་ཚོ་ལ་གདུང་སེམས་མཉམ་བསྐྱེད་བྱེད་བཞིན་ཡོད། དབྱིན་ཇི་ཁོ་རང་གིས་བཤད་པ་དེ་རྟག་པར་དྲན་གྱིན་ཡོད། ཁ་ཤས་ཤིག་གི་ཁ་གནམ་ལ་གདེངས་ནས་བསྡད་ན་ཅོག་ཁ་ནང་དུ་སླེབས་ཡོང་བའི་རེ་བ་དེ་མི་སྲིད་པ་མ་ཟད་གླེན་རྟག་ཞིག་ཏུ་ངོས་བཟུང་ན་མི་ཆོག་པ་མེད། བོད་མི་རང་གིས་བོད་དོན་བརྩོན་རོགས། མུ་མཐུད་ནས་བརྩོན་རོགས། ལས་འགན་ཆེན་པོ་འགོ་རྩམས་རོགས་ཞུ།
ལྷ་རྒྱ་རི་རྣམ་རྒྱལ་སྒྲོལ་མའི་རྒྱབ་ཏུ། རྒྱ་ཆེ་བོད་མི་མངས་འཕྲལ་དུ་ལངས་དགོས་མི་འདུག་གམ། རང་གཞན་གྱི་ཚེ་སྲོག་ལ་མ་གནོད་པར་ཞི་བའི་ངོ་རྒོལ་མཐར་ཕྱིན་པར་གནོངས་རོགས་གནང་ཐུགས་རྗེས་གཟིགས། གཞིས་བྱེས་བོད་མི་ཚོ། ད་ལོངས་ཤོག ཚང་མ་ལོངས་ཤོག ལོངས་ཤོག ལོངས་ཤོག བོད་རིགས་ཚོ་ལོངས་ཤོག །
རྣམ་རྒྱལ་སྒྲོལ་མས་རང་ཉིད་རྒྱ་གར་གྱི་ས་ཐོགཏུ་སྐྱེས་པའི་བུ་ཕྲུག་གཅིག་ཡིན་པ་དེ་ན་ནིང་ཁྲིམས་ཐོག་ནས་བདེན་པ་མཐར་བསྐྱེལ་བྱས་ཏེ་རྒྱ་གར་གྱི་མི་སེར་ཐོབ་ཐང་གི་ལག་འཁྱེར་དེ་རག་ཟིན་མོད།
རང་ཉིད་སྐྱེ་བའི་རྒྱུ་འབྲས་ཀྱི་གནད་ལུགས་དེ་ཤ་དང་རུས་འབྲེལ་ཐག་དམ་པོར་བཅིངས་པའི་དོང་དམར་བོད་ཀྱི་རིགས་སྨྱུག་ཏུ་མཆེད་པའི་དབང་གིས་ཐེངས་འདིར་ཞི་བའི་གོམ་བགྲོད་བྱས་པ་དེར་སེམས་གཏིང་ནས་བསྔགས་བརྗོད་མ་མེད་ཀ་མེད་གཅིག་ཆགས་སོང་།
འདི་ཡང་སོ་སོའི་ནུས་པར་གཞིགས་ཏེ་སྤེལ་བའི་བའི་ལས་འགུལ་ཞིག་ཡིན་སྟབས་གང་ལྟར་ཡག་པོ་རེད།
བོད་དང་ཆོས་དང་རིག་གཞུང་གཅིག་པའི་ལ་དྭགས་པ་གཉིས་དང་། ལྷག་པར་དུ་ཕྱི་རྒྱལ་མི་རིགས་ཡིན་པའི་ཇར་མན་པ་ཞིག་གིས་བོད་པའི་རྩ་དོན་ཐོག་ལས་འགུལ་སྤེལ་བར་སྙིང་ཁུངས་རུས་པའི་སྟེང་ནས་ཐུགས་རྗེ་ཆེ་ཞུ། འོན་ཀྱང་ལྷ་རྒྱ་རིའི་བུ་མོ་ཟེར་ན་མི་ཤེས། རྣམ་རྒྱལ་སྒྲོལ་དཀར་ཟེར་བའི་བུ་མོ་ཆུང་ཆུང་འདིས་ན་ནིང་སོ་སོའི་ཤ་ཁྲག་གི་འབྱུང་ཁུངས་སྦེད་དེ་ཁྲིམས་ཐོག་ནས་རྒྱ་གར་གྱི་མི་རིགས་བཟོ་མཁན་དང་པོ་དེ་རེད། ཡིན་ནའང་ད་རེས་ཆེ་ཆུང་ལ་མ་ལྟོས་པའི་ཐོག་ནས་ལས་འགུལ་ཞིག་སྤེལ་བར་ཐུགས་རྗེ་ཆེ་ཙམ་ཞུ་རྒྱུ་ཡིན།
ཁོ་ཚོའི་བསམ་དོན་མྱུར་འགྲུབ་ཡོང་བར་སྨོན། མི་རེ་ངོས་གནས་ལས་འགུལ་སྤེལ་རྒྱུ་གལ་ཆེན་རེད།
གཞན་ཉེ་སྔོན་རྡོར་གདན་ནས་ཁོ་ཚོ་ལ་དར་དཀར་པོ་དྲི་མའི་མ་གོས་པ་རེ་འཐེན་པ་དང་། མཆོད་རྟེན་ལ་བསྐོར་ར་དང་དེ་ནས་རྙིང་མ་དགོན་པ་བར་དུ་སྐྱེལ་མ་བྱས་ཡིན། གསུང་ཆོས་ཡོད་པས་དེ་ག་ནས་མཚམས་བཞག་ཡིན།
གོང་དུ་༼ ཇོ་ཧཱ་མེལ་ཊོན་ལགས་ཀྱིས་ “ང་རང་བོད་དོན་འཐབ་རྩོད་འདྲ་མིན་ནང་མཉམ་ཞུགས་བྱས་ཏེ་ལོ་ ༢༠ ཙམ་འགྲོ་བཞིན་ཡོད་པའི་ཉམས་མྱོང་ལས། བོད་ཀྱི་འཐབ་རྩོད་ལ་བོད་མི་རང་གིས་འགན་འཁུར་དགོས་པ་རེད། ནུབ་ཕྱོགས་པ་ལ་ནམ་ཡང་རེ་བ་རྒྱག་རྒྱུ་མེད། ”ཅེས་བརྗོད་སོང་།༽ སྐད་ཆ་འདི་ནི་ལྕི་ཁོག་ཆེ་བའི་སྐད་ཆ་ཞིག་ཏུ་ཚོར།
གཞན། རྣམ་རྒྱལ་སྒྲོལ་དཀར་གྱིས ་༼ ཐུན་མོང་གི་འབོད་ཚིག་གཅིག་ནི་༧རྒྱལ་བ་རིན་པོ་ཆེ་བོད་དུ་གདན་འདྲེན་ཞུ་དགོས་ཞེས་པ་འདི་རེད༽ ཅེས་བཤད་པ་འདི་ཡང་ཆབ་སྲིད་པ་ཚོས་ཤེས་དགོས་པའི་རིགས་རེད།
ཞི་བདེའི་སེམས་པ་འཛམ་གླིང་ཡུལ་དུ་ཕྱོགས།།
ཞི་བའི་གོམས་པ་རང་གི་ཡུལ་དུ་བསྒྱུར།།
ཞི་འཇམ་གནས་མལ་རེག་པའི་སྨོན་ལམ་གྱིས།།
ཞི་བདེའི་མི་རིགས་སྐྱོབ་པའི་འདུན་པ་དྲངས།།
གལ་འགངས་ཆེ་གསར་འགྱུར་འདི་སླེབས་པར་དགའ་བོ་བྱུང་། འདི་ནི་བོད་མི་གཅིག་གིས་རང་གི་རྩ་དོན་ཆེད་བསྒྲུབ་ནུས་པའི་ལས་འགུལ་རླབས་ཆེན་ཞིག་རེད།