༢༠༡༡ ལོའི་རྒྱ་ནག་ནང་གི་གསར་འགྱུར་ཆེ་ཁག་བཅུ།

ཕྱི་ཟླ་ ༢ ཚེས་ ༡༧ ནས་བཟུང་རྒྱ་ནག་མི་མང་གིས་རྒྱལ་སྤྱིའི་གནས་འཕྲིན་དྲ་རྒྱའི་སྟེང་། རྒྱ་ནག་ནང་གཟའ་ཉི་མ་ནམ་ཡིན་ལ་མེ་ཏོག་བ་སྤྲུའི་གསར་བརྗེ་ལས་འགུལ་སྤེལ་རྒྱུ་ཡིན་པའི་ཁྱབ་བསྒྲགས་བྱས་ཏེ། པེ་ཅིན་དང་། ཧྲང་ཧེ། ཀུང་ཀྲུག ཁྲིན་ཏུའུ་སོགས་གྲོང་ཁྱེར་ཆེ་ཁག་ ༣༠ ལྷག་ནང་བསྟུད་མར་བདུན་ཕྲག་འགའི་རིང་མི་མང་འདུ་ཚོགས་ཀྱི་ལས་འགུལ་སྤེལ་བར་བརྟེན། རྒྱ་ནག་སྤྱི་ཚོགས་ནང་དམངས་གཙོའི་གསར་བརྗེ་ཀྱི་བསམ་བློའི་གཡོ་འགུལ་ཤུགས་ཆེར་བྱུང་ཡོད།

ཕྱི་ཟླ་ ༡ པོའི་ཟླ་སྟོད་ལ་རྒྱ་ནག་ལྷོ་ཕྱོགས་མངའ་སྡེ་ཧའོ་ནན་དང་། སི་ཁྲོན། ཁྲུང་ཆིན། ཀོས་ཀྲུག་བཅས་ཀྱི་ནང་ཁ་བ་ཤུགས་ཆེན་བབས་ཏེེ། མི་མང་གི་སྡོད་ཁང་ ༡༢༠༠ ལྷག་རྡིབ་བཤིག་དང་ ༦༦༠༠ ལྷག་ལ་གནོད་སྐྱོན་ཐེབས་ཏེ། མང་ཚོགས་ཁྲི་ ༥་༨ ལྷག་དགུན་འཁྱག་གི་ནམ་ཟླའི་ནང་གནས་སྤོར་བྱེད་དགོས་བྱུང་བ་དང་། མང་ཚོགས་ཁྲི་ ༣༨༣་༣ འཚོ་བར་དཀའ་ངལ་འཕྲད་ཡོད་ལ། ས་ཞིང་མུའུ་ཁྲི་ ༡༤༢༤༠ གྱི་སོན་འབྲུ་དང་སྔོ་ཚལ་ཡོངས་རྫོགས་ཁེངས་ཤི་ཐེབས་པ་དང་། འགྲིམ་འགྲུལ་བརྒྱུད་ལམ་ཡོངས་རྫོགས་འགག་སྟེ། སྤྱིའི་གནོད་འཚེ་གྱོང་གུད་རྒྱ་སྒོར་དུང་ཕྱིར་ ༡༣་༥ ལ་སླེབས།

ཕྱི་ཟླ་ ༥ ཚེས་ ༡༠ ཉིན། རྒྱ་གཞུང་གི་རྡོ་སོལ་གཏེར་འདྲེན་རླངས་འཁོར་ཞིག་གིས་སོག་རིགས་འབྲོག་པ་མའོ་རི་ཀའེ་དམར་གསོད་བཏང་བར་བརྟེན། ཕྱི་ཚེས་ ༣༠ ཉིན་ནང་སོག་མཐོ་སློབ་ཁག་གཙོས་མི་མང་ཁྲི་སྟོང་མང་པོ་འདུ་འཛོམས་ཐོག ནང་སོག་ཏུ་འདས་པའི་ལོ་ ༥༠ རིང་བྱུང་མྱོང་མེད་པའི་གཞི་རྒྱ་ཆེ་བའི་ངོ་རྒོལ་རིམ་པར་བྱས་པ་དང་། ཕྱི་སྡོད་སོག་རིགས་ཚོས་ཀྱང་རྒྱའི་གཞུང་ཚབ་ཁག་གི་སྒོ་ཁར་ངོ་རྒོལ་སྐད་འབོད་བྱས་ཡོད། དེ་ནི་རྒྱ་དམར་གྱི་དབང་སྒྱུར་འོག་ཡོད་པའི་ལྷོ་སོག་པའི་ནང་འདས་ལོ་བཅུ་ཕྲག་འགའི་རིང་། ས་གནས་སོག་རིགས་མི་མང་གིས་སོ་སོའི་ས་ཁོངས་དང་རིག་གཞུང་གི་བདག་དབང་འཐབ་རྩོད་ཀྱི་ལས་འགུལ་གྱི་རླབས་རྒྱུན་གསར་བ་ཞིག་ཆགས་ཡོད།

ཕྱི་ཟླ་ ༦ པའི་ནང་རྒྱ་ནག་གི་འབྲི་ཆུའི་འབབ་རྒྱུད་ས་ཁུལ་དུ་ཆར་ཞོད་རྒྱག་མགོ་བརྩམས་ཡོད་པ་དང་། ཕྱི་ཚེས་ ༡༡ དགོང་མོ་ཨན་ཧེ་དང་ཀྲེ་ཅང་། ཧྥུ་ཅན། ཅང་ཞི། ཧོ་པེ། ཧུའུ་ནན། ཁྲུང་ཆིན། ཀོས་ཀྲུག ཀུང་ཞི་བཅས་ཞིང་ཆེན་ ༡༣ ནང་ཆུ་ལོག་ཆེན་པོ་རྒྱུགས་ཏེ། མི་ ༩༤ རྐྱེན་འདས་དང་མི་ ༧༨ གར་སོང་ཆ་མེད་དུ་གྱུར་ཞིང་། ས་ཞིང་མུའུ་ ༦༩༧༥༠༠༠ དང་ཁང་ཁྱིམ་ ༢༧༡༠༠ ལྷག་གཏོར་སྐྱོན་བྱུང་པ་མ་ཟད། ཟམ་པ་དང་གཞུང་ལམ་སོགས་བསྣུབས་ཏེ་མང་ཚོགས་ཁྲི་ ༤༠ ལྷག་གི་འཚོ་བར་གནོད་འཚེ་ཐེབས་ཡོད།

ཕྱི་ཟླ་ ༦ ནས་བཟུང་རྒྱ་གཞུང་གིས་ལྷོ་ཤར་ཨེ་ཤ་ཡའི་ཞི་བདེ་རྒྱ་མཚོ་མངའ་ཁུལ་བདག་དབང་ཐད་ཧམ་བཤད་བྱས་ཏེ། ལོ་རྒྱུས་ཐོག་རྒྱའི་མཚོ་དམག་ཐོག་དང་པོར་རྒྱལ་ཁོངས་བརྒལ་ཏེེ་རྒྱལ་སྤྱིའི་མཚོ་ཁུལ་དུ་དམག་སྦྱོང་རིམ་པར་བྱས་པ་དང་། དམག་འཐབ་འཕུར་གྲུ་དང་གཡུལ་འཐབ་གྲུ་གཟིངས་ཆེན་མོ་བཅས་གསར་བཟོ་བྱས་ཏེ་དམག་ཤུགས་རྒྱ་བསྐྱེད་པར་བརྟེན། ཧྥི་ལི་བྷེན་དང་ཝེ་ཋི་ནམ། སིང་བྷ་པུར། འབར་མ་སོགས་ལྷོ་ཤར་ཨེ་ཤ་ཡའི་མཐའ་འབྲེལ་རྒྱལ་ཁབ་ཁག་དང་རྒྱ་ནག་བར་གྱི་ཕྱི་འབྲེལ་ཐད་ལྡོག་ཕྱོགས་ཀྱི་འགྱུར་བ་གསར་བ་ཞིག་སླེབས་མགོ་བརྩམས།

ཕྱི་ཟླ་ ༧ ཚེས་ ༦ ཉིན། ཧོང་ཀོང་གི་ཨེ་ཤ་ཡ་བརྙན་འཕྲིན་ཁང་(ATV) གིས་རྒྱ་ནག་གི་སྲིད་འཛིན་ཟུར་པ་ཅང་ཙེ་མེན་འདས་གྲོངས་ཕྱིན་བ་བསྒྲགས་མ་ཐག་རྒྱལ་སྤྱིའི་གསར་ལམ་ཁག་ཏུ་ཁྱབ་པ་དང་། ལྕགས་ཕག་ལོའི་གསར་བརྗེ་ལོ་ ༡༠༠ འཁོར་བའི་དུས་དྲན་མཛད་སྒོའི་ཐོག ཅང་ཙེ་མེན་ཆེས་མཐོའི་གནད་ཡོད་མི་སྣ་ཨང་གཉིས་པའི་རྣམ་པའི་ཐོག་ཡང་བསྐྱར་སྲིད་སྟེགས་སུ་ཐོན་པའི་གནས་ཚུལ་གཉིས་ཀྱིས། ལོ་རྗེས་མའི་རྒྱ་ནག་དཔོན་རིགས་གསར་རྙིང་འཕོ་འགྱུར་ཐད་ནང་ཁུལ་དུ་འགལ་བ་ཤུགས་ཆེ་རུ་འགྲོ་བཞིན་པ་མངོན་ཡོད་སྟབས།  རྒྱལ་ཁབ་ཕྱི་ནང་གི་རྒྱ་རིགས་སྤྱི་ཚོགས་གཙོས་རྒྱལ་སྤྱིའི་སྒང་གླེང་གཞི་ཆེན་པོ་ཞིག་ཏུ་གྱུར་ཡོད།

ཕྱི་ཟླ་ ༧ ཚེས་ ༢༣ ཉིན་རྒྱ་ནག་ནང་མྱུར་བགྲོད་མེ་འཁོར་གདུང་ཐུག་ཀྱི་དོན་རྐྱེན་བྱུང་སྟེ། ཉུང་མཐར་ཡང་མི་ ༣༩ རྐྱེན་འདས་དང་། མི་ ༡༩༢ ལ་རྨས་སྐྱོན་ཕོག མེ་འཁོར་གྱི་རྒྱུ་སྤུས་གནད་དོན་སྦས་གསང་ཆེད་དོན་རྐྱེན་བྱུང་ཡུལ་དམག་མིས་སྐོར་རྗེས། མྱུར་སྐྱོབ་ལས་གཞི་མ་རྫོགས་པར་བེམ་རོ་མང་པོ་དང་ལྷན་དུ་འཁོར་སྒམ་ས་འོག་ཏུ་སྦས་པ་དང་། ཕྱི་ཟླ་ ༩ ཚེས་ ༢༧ ཉིན་ཧྲང་ཧེ་རུ་ཡང་བསྐྱར་མེ་འཁོར་གདུང་ཐུག་དོན་རྐྱེན་བྱུང་སྟེ་མི་ ༢༧༡ ལ་རྨས་སྐྱོན་བཟོས་པར་བརྟེན། རྒྱ་ནག་གི་ལྕགས་ལམ་བཟོ་སྐྲུན་གྱིས་མཚོན་པའི་ཐོན་སྐྱེད་ལག་རྩལ་དང་རྒྱུ་སྤུས་ནི་རྒྱལ་སྤྱིའི་སྤྱི་ཚོགས་ཀྱིས་དོ་སྣང་བྱ་ཡུལ་གཙོ་བོ་ཞིག་ཏུ་གྱུར་ཡོད།  

ཕྱི་ཟླ་ ༧ ཚེས་ ༡༧ ཉིན་ཤིན་ཅང་ཧི་ཐེན་གྲོང་ཁྱེར་ནང་ཡུ་གུར་མི་མང་གིས་ཞི་རྒོལ་སྐབས། རྒྱ་དམག་གིས་དྲག་གནོན་བྱས་ཏེ་མི་ ༢༠ དམར་གསོད་དང་མི ༡༠༠ ལྷག་འཇུ་བཟུང་བྱས་སྟབས། ཕྱི་ཚེས་ ༣༠ དང་ ༣༡ ཉིན་གུ་ཧྲི་གྲོང་ཁྱེར་ནང་རྒྱ་གཞུང་ལ་ངོ་རྒོལ་གྱི་འགས་གཏོར་དོན་རྐྱེན་གཉིས་བྱུང་སྟེ། མི་ ༡༡ རྐྱེན་འདས་དང་མི་ ༣༡ ལ་རྨས་སྐྱོན་ཕོག རྒྱ་དམག་གིས་ཡུ་གུར་ངོ་རྒོལ་བ་མི་ ༥ ་དམར་གསོད་དང་མི་ ༥ འཇུ་བཟུང་བྱས་པ་མ་ཟད། ཕྱི་ཟླ་ ༨ ཚེས་ ༢ ཉིན་ཉེན་ཡོལ་བྲོས་བྱོལ་པ་ ༢ དམར་གསོད་བཏང་རྗེས། ཤིན་ཅང་ཨ་ཁི་སུའུ་དང་ཡའེ་ལིས་ས་ཁུལ་ནང་རང་བཙན་སྦྱར་ཡིག་བཀྲམས་ཏེ་མི་མང་གིས་ངོ་རྒོལ་སྐད་འབོད་བྱས་པར། རྒྱ་གཞུང་གིས་མུ་མཐུད་དྲག་གནོན་བྱས་ཏེ་གནས་སྟངས་ཛ་དྲག་འོག་ལྷག་ཡོད།

ཕྱི་ཟླ་ ༡༠ ཚེས་ ༡༣ ཉིན་གྱི་ཕྱི་དྲོ་རྒྱ་ནག་ཀུང་ཏུང་ཧཱོ་ཧྲན་ས་ཁུལ་གྱི་ཁྲོམ་ར་ཞིག་ཏུ། ལོ་གཉིས་ཅན་གྱི་བུ་མོ་ཡའེ་ཡའེ་གཞུང་ལམ་སྟེང་རླངས་འཁོར་འོག་བརྫིས་རྗེས། ལམ་འགྲོ་བ་མི་ ༡༨ ཀྱིས་མིག་གིས་མཐོང་བཞིན་དུ་ཚོར་མེད་སྣང་མེད་དུ་གཡུགས་པའི་གནས་ཚུལ་བྱུང་རྗེས། རྒྱལ་སྤྱིའི་གསར་ལག་ཁག་ཏུ་དེའི་སྐོར་གྱི་བརྙན་རིས་བརྒྱུད་འགོད་བྱས་ཤིང་།   རྒྱ་དམར་གཞུང་གིས་སྤྱི་ཚོགས་རིང་ལུགས་ཀྱི་རིག་གནས་གསར་བ་འཛུགས་སྐྲུན་ཞེས་འུད་སྒྲོག་དབང་སྒྱུར་འོག་ཡོད་པའི་ད་ལྟའི་རྒྱ་མི་རིགས་ཀྱི་བརྩེ་སེམས་བྲལ་བའི་འདུ་ཤེས་དང་། ཡ་ང་བའི་ཀུན་སྤྱོད་ཀྱི་ཚད་དེ་རྒྱལ་སྤྱིའི་སྒང་ཚ་ཚ་འུར་འུར་གྱི་གླེང་གཞི་ཆེན་པོ་ཞིག་ཆགས་ཡོད།  

ཕྱི་ཟླ་ ༡༠ ཚེས་ ༢༡ ཉིན་རྒྱ་ནག་པེ་ཅིན་ཐེན་ཨན་མེན་མདུན་ཐང་དུ། རུས་ཝང་ཡིན་པའི་རང་ལོ་ ༤༢ ཅན་གྱི་སྐྱེས་པ་ཞིག་གིས་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་བྱས་ཡོད། དེ་ནི་འདས་པའི་ལོ་བཅུ་ཕྲག་འགའི་རིང་རྒྱ་ནག་ཐེན་ཨན་མེན་ཐང་ཆེན་དུ་བསྐྱར་དུ་རང་ལུས་མེར་བསྲེགས་ཀྱི་ངོ་རྒོལ་ལས་འགུལ་བྱུང་བ་ཐོག་མ་ཆགས་ཡོད། དེ་བཞིན། རྒྱ་ནག་ཧི་ནན་ཀྲིན་ཀྲུག་ཏུའང་ལོ་ ༨༡ ཅན་གྱི་རྒན་མོ་ཞིག་གིས་རང་ལུས་མེར་བསྲེགས་བཏང་སྟེ་རྒྱ་གཞུང་ལ་ངོ་རྒོལ་གྱིས་རྐྱེན་འདས་སུ་གྱུར་ཡོད།