དེ་རིང་ཞོགས་པའི་ཆུ་ཚོད་ ༩། ༣༠ ཀའི་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་ཁང་དུ། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་སྤྱི་འཐུས་རྒྱུན་ལས། ཚོགས་དྲུང་བཅས་ལྷན་འཛོམས་ཐོག་ཉེ་ཆར་མདོ་སྟོད་སྤྱི་འཐུས་དགེ་བཤེས་གཡུང་དྲུང་རྒྱལ་མཚན་ལགས་ཀྱིས་དགོངས་ཞུ་གནང་བའི་ཚབ་ཏུ་བཙན་བྱོལ་བོད་མིའི་བཅའ་ཁྲིམས་དོན་ཚན་ ༥༧ ནང་གསེས་ ༣ པའི་དགོངས་དོན་ལྟར་། དབུས་འོས་བསྡུ་ལས་ཁང་ནས་མདོ་སྟོད་སྤྱི་འཐུས་དངོས་གཞིའི་འོས་བསྡུའི་སྐབས་ཀྱི་སྒུག་ཐོའི་བང་རིམ་དང་པོ་བློ་བཟང་ཡེ་ཤེས་ལགས་ཀྱིས། སྤྱི་འཐུས་ཚོགས་གཙོ་མཆོག་གི་མདུན་ནས་སྐབས་ ༡༥ པའི་མདོ་སྟོད་སྤྱི་འཐུས་ཀྱི་ལས་འཁུར་དམ་འབུལ་ཞུས་ཡོད་འདུག
སྤྱི་འཐུས་བློ་བཟང་ཡེ་ཤེས་ལགས་ནི། ཕྱི་ལོ་ ༡༩༨༨ ལོར་ཧ་པ་སྤུར་གཏན་སློབ་ནས་གཞི་རིམ་སློབ་གྲྭ་ཐོན་ཏེ་སློབ་མ་རྩེ་ཕུད་ཀྱི་གཟེངས་རྟགས་ཐོབ་མྱོང་ཞིང་། ༡༩༩༢ ལོར་ཅན་ངྷི་སྒར་མཐོ་སློབ་དུ་སྲིད་དོན་ཚན་རིག་ཐོག་རིག་གནས་རབ་འབྱམས་པ་ (B.A) དང་དགེ་རྒན་འོས་སྦྱོང་ (B.ed) སློབ་ཐོན་བྱུང་ཡོད། སློབ་སྦྱོང་གི་ཞོར་དུ་ཅན་ངྷི་སྒར་ས་གནས་རང་བདེན་ཚོགས་ཆུང་གི་དྲུང་ཆེ་དང་ས་གནས་གཞོན་ལྷན་གྱི་ཚོགས་གཙོ། ཅན་ངྷི་སྒར་ཕྱི་རྒྱལ་སློབ་མའི་མཐུན་ཚོགས་ཀྱི་ཚོགས་གཞོན་བཅས་ཀྱི་ལས་འཁུར་གནང་མྱོང་བ་དང་། ཕྱིས་སུ་སྤོན་ཊ་གཏན་སློབ་ཏུ་ལོ་ཤས་རིང་དགེ་རྒན་གྱི་ཕྱག་ལས་གནང་རྗེས། ༡༩༩༤ ནས་ལོ་ ༦ ལྡི་ལི་བོད་གནས་ཉམས་ཞིབ་ཁང་དུ་ཉམས་ཞིབ་དང་དབྱིན་བསྒྱུར་གྱི་ཕྱག་ལས་གནང་བ་དང་། ༡༩༩༩ ནས་ལོ་ ༦ རིང་སྦེལ་ཀོབ་སེར་བྱེས་སློབ་གྲྭའི་དགེ་རྒན་གྱི་ཕྱག་ལས་གནང་ཡོད། ༢༠༠༡ ནས་ ༢༠༠༧ བར་བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་སྒྲིག་འཛུགས་ཀྱི་འགན་འཛིན་དང་ཚོགས་གཞོན་གྱི་ལས་འཁུར་ཞུས་ཡོད་ཅིང་། སྐབས་དེ་དག་ཏུ་བོད་དོན་དང་འབྲེལ་བའི་ཟས་བཅད་ངོ་རྒོལ་དང་ཞི་བའི་གོམ་བགྲོད། རྔམ་སྟོན་ཁྲོམ་སྐོར། བོད་དོན་གོ་རྟོག་སྤེལ་བའི་ཟབ་སྦྱོང་། རང་བཙན་གོམ་འགྲོས་ཀྱི་སྣེ་ཁྲིད། མཉམ་སྦྲེལ་རྒྱལ་ཚོགས་གཙོས་པའི་རྒྱལ་སྤྱིའི་ཚོགས་སྡེ་ཁག་ལ་བོད་དོན་སྙན་ཐོ་དང་རྒྱ་ནག་གི་འཁྱོག་བཤད་ཡིག་ཆ་ཁག་ལ་ལན་འདེབས་བཅས་གནང་ཡོད་པ་དང་། ༢༠༠༢ དང་ ༢༠༠༦ ལོ་སོ་སོར་དུས་འཁོར་དབང་ཆེན་སྐབས་ཀྱི་གཞོན་ལྷན་སྤྱི་ཚོགས་ཞབས་ཞུའི་སྣེ་ཁྲིད་འགན་འཁུར་བ་གནང་བ་མ་ཟད། དེ་བཞིན། བོད་མི་གཞིས་ཆགས་ཁག་དང་སློབ་གྲྭ མཐོ་སློབ་ཁག་བཅས་སུ་བོད་དོན་དྲིལ་བསྒྲགས་དང་ཆབ་སྲིད་གོ་ རྟོགས། རྒྱལ་ཞེན་སློབ་གསོའི་ཟབ་སྦྱོང་སོགས་ལས་འགུལ་སྣ་མང་སྤེལ་ཡོད། ༢༠༠༧ ལོར་གཉན་ནད་རག་དུག་གི་ནད་གཞི་འགོག་ཐབས་སུ་འདེམ་ཀ་ཚོགས་པ་ (CHOICE) གསར་འཛུགས་ལ་རམ་འདེགས་གནང་སྟེ། ད་ལྟའི་བར་ལྷོ་གཞིས་ཁག་ལྔའི་ནད་པར་ལྟ་སྐྱོང་གནང་མུས་སུ་ཡོད།
གསར་འགོད་པ། དོན་གོ
![Because of high altitudes in the Himalayas, difficult terrain and often poor weather, the Kailash Manasarovar pilgrimage if one of the most challenging in the world [File: Purnima Shrestha/Reuters]](https://tibettimes.net/wp-content/uploads/2026/05/Screen-Shot-2026-05-14-at-5.25.22-PM-360x180.png)
སྤྱི་མཐུས་གསར་བ་བློ་བཟང་ཡེ་ཤེས་ལ་བཀྲ་ཤིས་བདེ་ལེགས་ཞུ། སྐུ་ཉིད་ཀྱིས་སྤྱི་ཡི་ལས་དོན་ཐམས་ཅད་ལ་གེགས་མེད་ལམ་འགྲོ་ཡོང་བའི་སྨོན་ལམ་གྲངས་མེད་ཡོད།
སྤྱི་འཐུས་གསར་བ་བློ་བཟང་ཡེ་ཤེས་ལགས་སུ་སྙིང་ནས་རྟེན་འབྲེལ་ཞུ། རྒན་ལགས་ནི་དངོས་གནས་ཤེས་འཇོན་གཉིས་ལྡན་ཞིག་རེད་བསམ་ཡོད།
བློ་བཟང་ཡེ་ཤེས་ལགས་མདོ་སྟོད་སྤྱི་འཐུས་ལ་སླེབས་པར་འཚམས་འདྲི་ཞུ། མི་འདི་ངོ་མ་ཁ་ལག་ཐོད་ཐུག་གི་ལས་ཀ་བྱེད་མཁན་ལྷག་བསམ་རྣམ་པར་དག་པའི་མི་ཞིག་ཡིན་པར་ཡིད་ཆེས་སྔ་མོ་ནས་ཡོད་ལ། སྤྱི་འཐུས་སུ་སླེབས་ན་སྙམ་པའི་རེ་བ་ཡང་སྔར་ནས་ཡོད། ད་ཡང་མི་གོ་ཆོད་ཅིག་གྲོས་ཚོགས་སུ་སླེབས་ཐུབ་སོང་བ་རེད།
རྒན་ལགས་སྤྱི་འཐུས་སར་སླེབས་པ་གུས་པའི་བརྟེན་འབྲེལ་ཞུ ། ལྷག་བསམ་གཅིག་པོ་ལས་ཤེས་རིག་བློ་མིག་བཀྲ་ཞིག་ཡིན། གཡུང་དྲུང་རྒྱལ་མཚན་ལས་བརྒྱ་འགྱུར་གྱི་རྒན་བློ་བཟང་ཡི་ཤེས་བཟང་།