གཟའ་ལྷག་པའི་ཉིན་ཨེ་ཇིབ་ནང་རྐང་སྤོལ་རྩེད་འགྲན་སྐབས་འཁྲུག་རྩོད་ཆེན་པོ་བྱུང་སྟེ། མི་ ༧༤ ཙམ་རྐྱེན་ལམ་དུ་བཏང་ཡོད་པ་དང་། མི་བརྒྱ་ཕྲག་མང་པོར་རྨས་སྐྱོན་ཕོག་ཡོད་འདུག
ཁ་སང་ཕྱི་ཚེས་ ༡ ཉིན་ཨེ་ཇིབ་ཀྱི་པཱོར་ཊི་ (Port) གྲོང་ཁྱེར་ནང་རྒྱལ་ཡོངས་རྐང་སྤོལ་རྩེད་འགྲན་ཞིག་གི་སྐབས། ཨེ་ཇིབ་ནང་སྐད་གྲགས་ཆེ་ཤོས་ཀྱི་རྐང་སྤོལ་རུ་ཁག་ཨལ་ཨྷ་ལེ་ (Al Ahli team) དང་། པཱོར་ཊི་ས་གནས་རྐང་སྤོལ་རུ་ཁག་ཨལ་མཱ་སི་རེ་(al-Masry team) གཉིས་རྩེད་འགྲན་མཇུག་སྒྲིལ་མ་ཐག ཨེ་ཇིབ་རྒྱལ་ས་ཀཱ་རོ་(Carior) ནས་ཡོང་པའི་ཨལ་ཨྷ་ལེ་རུ་ཁག་གི་རྩེད་འགྲན་པ་དང་ཁོ་ཚོར་དགའ་མོས་བྱེད་མཁན་གྱི་ལྟད་མོ་བའི་ཐོག་ལ། ས་གནས་རུ་ཁག་རྩེད་འགྲན་པ་དང་ཁོང་ཚོར་དགའ་མོས་བྱེད་མཁན་ཚོ་རུབ་རྒྱུགས་བྱས་ཏེ། རྩེད་ཐང་ནང་རྡོ་དང་ཤེལ་དམ་སོགས་གང་བྱུང་གཡུག་པ་མ་ཟད། མེ་རྫས་དང་གྲུ་སོགས་མཚོན་ཆ་བེད་སྤྱོད་ཀྱིས་དྲག་འཛིང་བྱས་ཏེ། མི་ ༧༤ ཙམ་ལ་སྲོག་སྐྱོན་དང་མི་བརྒྱ་ཕྲག་མང་པོར་རྨས་སྐྱོན་བཟོས་ཡོད་འདུག
ལྟད་མོ་བ་ཁག་ཅིག་གིས་གསར་ལམ་དུ་བརྗོད་པ་ལྟར་ན། ཐེངས་འདིའི་རྩེད་འགྲན་སྐབས་དམག་མིའི་བདེ་སྲུང་ཡག་པོ་མེད་པའི་ཁར། ཉེན་རྟོག་པ་དང་སྲུང་དམག་གིས་འཁྲུག་འཛིང་སྐབས་འགོག་སྲུང་མི་བྱེད་པར་རྒྱང་ནས་ལྟད་མོར་བལྟས་བསྡད་འདུག་ལ། དོན་རྐྱེན་བྱུང་རྗེས་ཨེ་ཇིབ་གཞུང་གིས་ཐད་འཕུར་གནམ་གྲུ་བཏང་སྟེ་ཨལ་ཨྷ་ལེ་རྩེད་འགྲན་པ་རྣམས་ཕྱིར་རྒྱལ་ས་ཀཱེ་རོ་རུ་མྱུར་སྐྱོབ་དང་སྨན་བཅོས་བྱེད་དུ་ཁྲིད་ཡོད་འདུག ཉིན་དེར་རྩེད་འགྲན་ཐང་ཆེན་དུ་འཁྲུག་རྩོད་ཤི་རྨས་ཚབས་ཆེན་བྱུང་པའི་ཐད། མི་མང་གིས་གཞུང་གི་བདེ་སྲུང་དོ་དམ་གྲ་སྒྲིག་ཡག་པོ་མ་བྱུང་པའི་རྐྱེན་གྱིས་ཡིན་པའི་སྐྱོན་བརྗོད་དང་། ངོ་རྒོལ་ཤུགས་ཆེན་འབྱུང་བཞིན་པར་བརྟེན། ད་ཆར་ཨེ་ཇིབ་གྲོས་ཚོགས་ཀྱིས་ཛ་དྲག་ཚོགས་འདུ་འཚོགས་ཡོད་པ་དང་། དེ་རིང་ཞོགས་པར་ཨེ་ཇིབ་དམག་མིའི་གཞུང་གིས་ཐེངས་འདིའི་རྐང་སྤོལ་རྩེད་ཐང་དུ་འཁྲུག་འཛིང་ཁྲོད་རྐྱེན་འདས་སུ་གྱུར་པ་རྣམས་ཀྱི་ཆེད་དུ་ཉིན་གསུམ་རིང་རྒྱལ་ཡོངས་མྱ་ངན་ཞུ་རྒྱུའི་ཁྱབ་བསྒྲགས་བྱས་འདུག
ཨེ་ཇིབ་རྒྱལ་ཡོངས་རྐང་སྤོལ་རྩེད་འགྲན་སྐབས་ཀྱི་དོན་རྐྱེན་དེ་བྱུང་རྗེས། རྒྱལ་སྤྱིའི་རྐང་སྤོལ་མཉམ་འབྲེལ་མཐུན་ཚོགས་(FIFA) ཀྱི་ཚོགས་གཙོ་བྷི་ལཱ་ཊར་ (Sepp Blatter) ལགས་ཀྱིས། དེ་ནི་རྐང་སྤོལ་རྩེད་འགྲན་ལོ་རྒྱུས་ཁྲོད་ཀྱི་ཉི་མ་ནག་པོ་ཞིག་ཆགས་ཡོད་པ་དང་། བསམ་ཡུལ་ལས་འདས་པའི་དོན་རྐྱེན་དེ་འདྲ་འབྱུང་འགྱུར་མི་ཡོང་པ་བྱ་དགོས་པ་ནན་བརྗོད་བྱས་འདུག་ལ། ཨ་ཧྥི་ར་ཀའི་རྐང་སྤོལ་རྩེད་འགྲན་མནམ་འབྲེལ་མཐུན་ཚོགས་ཀྱིས་དོན་རྐྱེན་དེར་ཆུ་ཚོད་སྐར་མ་གཅིག་རིང་མྱ་ངན་ཞུས་འདུག
ཆབ་སྲིད་དཔྱད་བརྗོད་པ་དག་གིས་ཐེངས་འདིའི་ཨེ་ཇིབ་རྐང་སྤོལ་རྩེད་འགྲན་སྐབས་ཀྱི་དོན་རྐྱེན་དེ་ནི། ཐད་གར་ཆབ་སྲིད་རྩོད་རྙོག་ཅིག་ཆགས་མེད་ཀྱང་། དོན་རྐྱེན་དེས་ཨེ་ཇིབ་ནང་ཆབ་སྲིད་བརྟན་བརླིང་མེད་པ་དང་། གཞུང་གིས་མང་ཚོགས་ཀྱི་བདེ་འཇགས་ལ་འགན་སྲུང་ཡག་པོ་བྱེད་ཀྱིན་མེད་པའི་གནས་སྟངས་ཤིག་ཆགས་ཡོད་པར་བརྗོད་འདུག
གསར་འགོད་པ། བནྡེ་སྐྱབས།
རྩེད་མོ་ནི་རྩེད་མོ་རང་ཡིན་ནའང་། ལྐོག་ཞུ་བ་དང་སྐབས་འཚོལ་རང་ལུགས་པས་ལྐོག་མིག་གིས་དེ་གར་འཚང་ཁ་རྒྱབ་ཡོད་པས། བྱ་བ་གང་ཞིག་ཡིན་ཡང་ངོ་མས་དོགས་ཟོན་བྱེད་གལ
ཨ་་་ཧ་ཧ།་ངོ་མས་སེམས་པ་སྐྱོ་བའི་གནས་སུ་གྱུར་འདུག དོན་དག་འདི་ལྟ་བུ་རྒྱལ་ཁབ་གང་དུའང་བྱུང་སྲིད་པ་ཞིག་རེད། དེ་བས་ན་ངོ་མས་གཟབ་གཟབ་བྱེད་རྒྱུ་གལ།
ཇག་པས་ཐུབ་ནིའི་ཐོག་ལ། རོགས་པས་ཀྱང་ཐུབ། ཟེར་བ་ལྟར་ང་ཚོ་ལའང་ཀི་འདེབས་རྒྱུ་དང་། རྡོ་འཕེན་རྒྱུ་བྱུང་ཡོད་ལ། ཇི་འདྲ་རེད་དམ། ངོ་ཚོ་རྒྱུ་དང་། ཡ་ང་རྒྱུ་ཡོད་ན། རྗེས་སུ་ཕྱོགས་ཡོངས་ལ་ཐུགས་དགོངས་བཞེས་རོགས། འདིའི་ཕྱོགས་ལ་༸བཀའ་སློབ་ཀྱང་མང་པོ་ཡོད་ལ། རྐང་ལག་ཅིག་འགུལ་ཤེས་སོང་ན་དེ་འདྲའི་ང་རྒྱལ་ཞིག དངོས་གནས་བསམ་བློ་གཏོང་དགོས་ཀྱི་འདུག་དཱ།
ཨི་ཇིབ་ཀྱི་གནོད་འཚེ་ཕོག་སའི་ནང་མི་ཚོ་སྙིང་རྗེ།
དོན་རྐྱེན་འདིས་ཨི་ཇིབ་ཀྱི་མི་མང་ལ་དཀའ་ངལ་ཆེན་པོ་ཡོད་པ་གསལ་བཤད་བྱས་པ་རེད་འདོད།རྒྱ་ནག་ལ་ཡང་འདི་འདྲ་བྱུང་བར་དུས་ཚོད་ཞེ་དྲག་ལྷག་ཡོད་པ་མ་རེད་བསམ།
སྲིད་པ་ཁམས་གསུམ་འཁོར་བ་ཞེས་པའི་ཚིག་དེར་བསམ་བློ་ཞིག་ཐོངས་དང་ཐམས་ཅད་འབྱུང་རྒྱུ་དང་། སྲིད་རྒྱུ་ཡིན་པ་ཉག་གཅིག་རེད། དེ་ཙམ་དུ་མ་ཟད། དེང་སང་བླ་མ་མི་གདམ་གདོན་འདྲེ་གདམ་པའི་དུས་ཡིན་པས་ད་དུང་ཅི་རེད་སུས་ཤེས། བོད་པ་ཚོ་གཟབ་གཟབ་གྱིས་ན་དྲགས།
དེང་སང་རྩེད་མོ་རྩེ་སར་ཡང་དམག་གི་སྲུང་སྐྱོབ་མཁོ། མ་གཞི་ནས་རྩེད་མོ་ཚང་མ་རྩེད་མོ་མིན་པ་དང་ལྷག་པར་དུ་ཡང་ང་རྒྱལ་དང་ཧམ་སེམས་ཀྱི་རྩེད་འགྲན་འདི་རིགས་ཉེན་ཚབས་ཆེ་ཚུལ་སྐོར་ལ་དམ་པ་མང་པོས་བཀའ་སློབ་ཕེབས་མྱོང་ཡོད། ཉིན་ཞིག་ལ་རྒྱལ་སྤྱིའི་རྩེད་འགྲན་ཆེན་མོའི་དཔལ་འབར་དེ་ཡང་དུག་མཚོན་དུ་མི་འགྱུར་བའི་འགན་ལེན་སུ་ཞིག་གིས་ནུས། རང་རེས་འདི་རིགས་ལས་བསླབ་བྱ་སྔ་ལེན་གྱིས་རང་གི་ཡ་རབས་རིག་གཞུང་གི་སྲོལ་མ་ཉམས་རྒྱུན་འཛིན་བྱ་རྒྱུར་བསམ་ཤེས་ཐུབ་དགོས།
དེ་སྔོན་བཞུགས་སྒར་རྡ་རམ་ས་ལར་ཡང་རྒྱལ་ཡུམ་ཆེན་མོའི་རྐང་རྩེད་འགྲན་སྡུར་ཞིག་ལ་དོན་རྐྱེན་འབྱུང་ཉེན་བྱས་ཏེ་འགྲན་སྡུར་མཚམས་འཇོག་དགོས་ཆགས་པ་རེད། ངོ་མ་འདང་རེ་བརྒྱབ་ན་ཕྱི་དགྲ་ལས་ལྷག་པའི་ནང་དགྲ་དག་ཀྱང་གང་ན་ཡོད་པ་དང་ནམ་ཞིག་ཐོན་མིན་ནི་ཅི་འདྲའི་བཤད་དཀའ་བ་ཞིག་མ་ཡིན་ནམ།