ཁ་སང་ཕྱི་ཚེས་ ༡ ཉིན་གསེར་རྟ་བླ་རུང་སྒར་གྱི་དུར་ཁྲོད་དུ་སེར་སྐྱ་མི་མང་འདུ་འཛོམས་ཀྱིས་ཉེ་ལམ་གསེར་རྟ་རྫོང་ཐོག་ཏུ་རྒྱ་གཞུང་ལ་ཞི་བའི་ངོ་རྒོལ་སྐབས། རྒྱ་དམག་གིས་དམར་གསོད་བཏང་བའི་རྒྱལ་གཅེས་དཔའ་བོ་ཟླ་བ་གྲགས་པ་ལགས་སུ་མྱ་ངན་བསྔོ་སྨོན་གནང་ཡོད་འདུག བསྔོ་སྨོན་སྐབས་འདྲ་པར་ཆེན་པོ་ཞིག་གི་འོག་ཏུ་ “ ༢༠༡༢ ལོའི་ཕྱི་ཟླ་ ༡ ཚེས་ ༢༤ ཉིན་བོད་རང་དབང་གི་ཆེད་དུ་སྐུ་སྲོག་ཤོར་བའི་མདོ་ཁམས་གསེར་རྟའི་རྒྱལ་གཅེས་དཔའ་བོ་ཟླ་བ་གྲགས་པ་ཐུགས་རྗེའི་འཛིན་པར་ཞུ ” ཞེས་འཁོད་ཡོད་པ་རེད།
དོ་ནུབ་གནས་ཚུལ་འབྱོར་བ་ལྟར་ན། ཟླ་སྔོན་མའི་ཕྱི་ཚེས་ ༢༣ ཉིན་དཀར་མཛེས་ཁུལ་གསེར་རྟ་རྫོང་ཐོག་ཏུ་རྒྱ་ནག་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གཏོང་རྒྱུ་ཡིན་པའི་ཡིག་ཆ་ཞིག་བཀྲམ་ཡོད་པར་བརྟེན། ཉིན་དེར་བོད་མི་མང་པོ་རྫོང་ཐོག་ཏུ་འཛོམས་ཏེ། ངོ་རྒོལ་བྱེད་མཁན་གྱི་ཕུང་པོ་རྒྱ་ནག་གཞུང་གི་ལག་ཏུ་མ་ཤོར་བ་བྱེད་དགོས་སྐོར་བརྗོད་ཡོད་པ་དང་། རྒྱ་ནག་གཞུང་ངོས་ནས་ཀྱང་དྲག་གནོན་བྱེད་རྒྱུ་གྲ་སྒྲིག་ཆ་ཚང་བྱས་ཡོད་འདུག་ཀྱང་། ཉིན་དེར་ཛ་དྲག་གི་གནས་ཚུལ་བྱུང་མེད་མོད། ཕྱི་ཚེས་ ༢༤ ཉིན་མི་མང་གིས་གཞུང་ལ་ངོ་རྒོལ་སྐད་འབོད་བྱས་སྐབས། རྒྱ་ནག་གི་ཉེན་རྟོག་པས་མི་མང་ཁྲོད་མེ་མདའ་བརྒྱབ་སྟེ། གསེར་རྟ་རྫོང་ཤོ་རེབ་གྲོང་ཚོའི་རང་ལོ་ ༢༥ ཡིན་པའི་ཟླ་བ་གྲགས་པ་དམར་གསོད་བཏང་ཡོད་པ་དང་། དབོན་བཟའ་སྡེ་བའི་རང་ལོ་ ༣༥ ཡིན་པའི་པོ་པོ་ལགས་སུ་མེ་མདའ་ཕོག་སྟེ་ས་རུ་འགྱེལ་མ་ཐག་ཉེན་རྟོག་པས་བཙན་འཁྱེར་བྱས་ཡོད་ཀྱང་། མང་ཚོགས་ཀྱིས་ཁོང་འདས་གྲོངས་སུ་སོང་ཡོད་པར་ཚོད་དཔག་བྱེད་ཀྱིན་ཡོད་འདུག གཞན། ཉིན་དེར་མི་ཧ་ཅང་མང་པོར་རྨས་སྐྱོན་དང་མི་ ༣༠ ཙམ་འཛིན་བཟུང་བཙན་འཁྲིད་བྱས་ཡོད་འདུག
ཉིན་དེར་མེ་མདའ་ཕོག་སྟེ་ས་ལ་འགྱེལ་པ་རྣམས་དེ་མུར་རྒྱ་དམག་གིས་རེ་རེ་བཞིན་བཙན་འཁྱེར་བྱས་ཡོད་སྟབས། ཤི་རྨས་ཀྱི་གནས་ཚུལ་གསལ་བོ་ཤེས་ཐུབ་མེད་ཀྱང་། ས་གནས་མི་མང་ཚོས་ཉུང་མཐར་མི་གསུམ་བཞི་ཞིག་བསད་ཡོད་པར་ཚོད་དཔག་བྱེད་ཀྱིན་ཡོད་འདུག་ལ། ཉིན་དེར་དྲག་ཆས་དམག་མི་བསླེབས་ཏེ་རྫོང་ཐོག་གི་ཟ་ཁང་དང་ཚོང་ཁང་ཚང་མ་སྒོ་རྒྱག་བཅུག་སྟེ་མི་མང་ཕྱིར་འཐོན་བཅུག་མེད་པ་དང་། ཁྲོམ་གཞུང་གི་མི་མང་ཁྲོད་གང་བྱུང་དུ་མེ་མདའ་རྒྱག་པ་དང་འཛིན་བཟུང་བྱེད་པ། རྡུང་རྡེག་ཚད་ལས་བརྒལ་བ་གཏོང་བ་སོགས་བྱས་ཡོད་ཅིང་། ཉིན་དེར་ཚོང་ཁང་དང་ཟ་ཁང་འགར་གཏོར་བཤིག་བཏང་ཡོད་འདུག་ལ། རྨས་མ་ཚོར་སྨན་བཅོས་ཀྱི་མཐུན་རྐྱེན་མེད་པའི་དཀའ་ངལ་ཡང་འཕྲད་བཞིན་ཡོད་པ་རེད།
ཕྱི་ཟླ་ ༡ ཚེས་ ༡༦ ཉིན་དཀར་མཛེས་ཁུལ་གསེར་རྟ་རྫོང་ཞོ་རོག་སྡེ་པའི་གྲྭ་བ་གཉིས་ཀྱིས་གསེར་རྟ་རྫོང་དཀྱིལ་དུ་ཡོད་པའི་གསེར་རྟའི་མདུན་ཐང་དུ་“ ལྷ་རྒྱལ་ལོ། ༧རྒྱལ་བ་བསྟན་འཛིན་རྒྱ་མཚོ་སྐུ་ཚེ་ཁྲི་ལོ་བརྟན་པར་ཤོག ” ཅེས་སོགས་ཀྱི་སྐད་འབོད་རྒྱག་བཞིན་རླུང་རྟ་གཏོར་ཏེ་རྒྱ་གཞུང་ལ་ངོ་རྒོལ་བྱས་སྐབས། རྒྱ་གཞུང་གི་ཉེན་རྟོག་པ་འབྱོར་ཏེ་ཁོང་གཉིས་འཛིན་བཟུང་བྱས་སྐབས། ཉེ་འཁོར་གྱི་བོད་མི་མང་པོ་འདུ་འཛོམས་བྱུང་སྟེ་སྐད་འབོད་ངོ་རྒོལ་བྱས་ཡོད་པ་མ་ཟད། གྲྭ་པ་དེ་གཉིས་ཉེན་རྟོག་པའི་ལག་ནས་ཚུར་འཕྲོག་ཡོད་འདུག སྐབས་དེ་ནས་བཟུང་ཉེན་རྟོག་པ་དང་དམག་མི་མང་དུ་བཏང་སྟེ་རྫོང་གི་སྲིང་ལམ་ཀུན་དུ་དྲག་ཆས་དམག་མི་འགྲེམས་འཇོག་གིས་དམ་དྲག་ཤུགས་ཆེན་བྱས་ཡོད་འདུག
དེ་བཞིན། ཟླ་ ༡ པོའི་ཚེས་ ༢༢ ཉིན་གསེར་རྟ་རྫོང་ཁོངས་ཤོལ་སྟོད་མའི་དོན་ཡོད་ཉི་མ་དང་ཤོལ་སྨད་མའི་དགེ་འདུན་གཉིས་ཀྱིས་བོད་རྒྱལ་ལོ་ཞེས་སྐད་འབོད་ཅིག་བྱས་པར་ཉེན་རྟོག་པས་འཛིན་བཟུང་གཅར་རྡུང་དྲག་པོ་བྱས་ཏེ། དོན་ཡོད་ཉི་མའི་ལག་གཡས་པ་བཅག་ཡོད་པ་རེད།།
གསར་འགོད་པ། དོན་གྲུབ་བཀྲ་ཤིས།
གསེར་ལྗོངས་བླ་མ་རུང་གི་དུར་ཁྲོད་དུ་སླེབས་པ་ཙམ་གྱིས་ངན་འགྲོའི་སྒོ་ཆེན་འགགས་པར་གསུང་ཡོད། ད་ཐེངས་དཔའ་བོ་དེ་རིགས་ལས་བཟང་རེད་འདུག
རྒྱལ་གཅེས་དཔའ་བོ་དང་དཔའ་མོ་མི་རིགས་ཀྱི་ཁྱད་དུ་སྐུ་གཤེགས་པ་ཚང་མར་མྱ་ངན་དང་སྔོ་བ་ཞུ། སྙིང་སྟོབས་ཀྱི་མེ་རླབས་འཁྱིལ་བཞིན་པའི་གཞིས་སྡོད་བོད་མི་ཡོངས་ལ་སྙིང་ཐག་པ་ནས་གུས་འདུད་ཞུ། བདེན་པ་ཉིད་རྒྱལ་གྱུར་ཅིག
ཁོང་གི་འདོད་དོན་བཞིན། བོད་ལ་སྐྱིད་པའི་ཉི་མ་ཤར་བར་ཤོག། འགྲོ་བ་མི་ལྟ་ཅི་སྲོག་ཆགས་ཐམས་ཅད་ཀྱིས་ཆེས་རྩ་ཆེའི་རྒྱུ་དངོས་ཐམས་ཅད་ལས། ལྷག་པའི་གཅས་འཛིན་བྱེད་ས་དེ་རང་ཉིད་ཀྱི་སྲོག་རེད། བོད་ནང་བསད་གཏུབ་ག་རེ་བྱེད་ནའང་ཡུལ་བྱོལ་ཚོ་ཁ་གདངས་མིག་བགྲད་ནས་བསྡད་རྒྱུ་ལས་ཅི། ཁོང་གིས་བོད་མི་རིགས་ཆེད་དུ་རང་སྲོག་བཏང་བ་རེད། དེར་རྒྱབ་སྐྱོར་གྱི་རྣམ་འབྱོར་ཅི་ཡང་མེད། ད་མི་ལབ། ངས་ལབ་ན་ཕན་འབྲས་ནི་མེད། རང་སྲོག་བློས་གཏོང་བས་སྐུལ་མ་ཐུབ་ན་ངས་སྡུག་སྐད་ཀྱིས་ག་ལ་ཡོང་། དེ་བས་ང་རང་ཁ་ཚུམས་ཏེ་མ་ཎི་རེ་མོས་ལ་མ་མོས་རེ་བཏོན་ན་དགའ། ཨོཾ་མ་ཎི་པདྨེ་ཧུཾཿ
ཨོཾ་མ་ཎི་པདྨེ་ཧུཾཿ ཨོཾ་མ་ཎི་པདྨེ་ཧུཾཿ འདྲེན་ཆོགས་སྤྱན་རས་གཟིགས་ཀྱི་རྗེས་བཟུང་སྟེ། ནུབ་ཕྱོགས་བདེ་བ་ཅན་ལ་སྐྱེ་བར་ཤོག།
ཕྱག་སྟོང་འཁོར་ལོས་བསྒྱུར་པའི་རྒྱལ་པོ་སྟོང་། སྤྱན་སྟོང་བསྐལ་བ་བཟང་པོ་སངས་རྒྱས་སྟོང་། གང་ལ་གང་འདོད་དེ་ལ་དེ་སྟོན་པ། བཙུན་པ་སྤྱན་རས་གཟིགས་ཀྱིས་ཁོང་ལ་གཟིགས།།
བོད་རིག་པའི་གནས་མཆོག་བླ་རུང་སྒར་ཁ།།
བོད་ཆོལ་ཁ་གསུམ་གྱི་རེ་འདུན་བཅོལ་ས།།
དགྲ་ནག་པོས་ཁྲག་ལ་བརྫི་ཉེན་ཆེ་དང་།།
དེའི་སྙིང་བོ་རྩ་ནས་འདོན་ཉེན་ཆེ་འོ།།
ཁྱེད་རྣམས་པས་རྒྱལ་ཁབ་དང་མི་རིག་གིས་ཆེད་དུ་་་བློད་བཏོང་ཆེན་པོ་གནང་བར་་་ཡིད་རང་དང་མི་རིང་བར་ལྡན་པའི་མཐའ་གསལ་ཡོང་བར་སྨོན།།
རྒྱལ་གཅེས་དང་མི་རིགས་ཀྱི་དཔའ་བོ་དཔའ་མོ་སྐུ་གཤེགས་ཚང་མར་མྱ་ངན་དང་གུས་འདུད་ཞུ། གཞིས་ལུས་བོད་མི་ཡོངས་ལ་གུས་འདུད་ཞུ། བདེན་པ་ཉིད་རྒྱལ་འགྱུར་ངེས།
2012 ལོ་འདིར་བོད་མདོ་ཁམས་གཉིས་ནས་རྒྱ་གཞུང་ལ་སྔ་ཕྱི་བསྟུན་མར་ཡར་ལང་དང་ཞི་རྒོལ་གང་མང་བྱས་བྱེད་བཞིན་པ་ཞིག་རེད། འོན་ཀྱང་ཆ་མ་སྙོམ་པ་ཞིག་ལ་དབུས་ལྷ་ས་དང་མདོ་སྟོན་ཕྱོགས་རྣམས་བདེ་འཇགས་ཡིན་པ་མངོན་གསལ་རེད།
གནས་ཚུལ་འདིའི་ཐད་ལ་བལྟ་ཚུལ་མི་འདྲ་བ་འབྱུང་བཞིན་ཡོད།
ངའི་སྙིང་ཉེ་བའི་སྤུན་ཟླ་ཚོར་ཀླ་ཀློ་རྒྱ་དམར་གྱིས་ཚོད་ལས་རྒལ་བའི་མནར་སྤྱོད་འདི་འདྲ་གཏོང་བཞིན་འདུག རྒྱ་འདྲེ་དེ་ཚོའི་བྱེད་སྟངས་དེ་མཐོང་དུས། བཟོད་མི་ཐུབ་པའི་ཁོང་ཁྲོ་དང་། སྤུན་ཟླ་དེ་ཚོའི་སེམས་ཤུགས་དང་དཔའ་ངར་དེ་མཐོང་དུས་སྨྲ་མི་ཐུབ་པའི་ཚོར་ཤུགས་དང་དགའ་སྐྱོ། ད་ང་ཚོས་ཅི་བྱས་ན་དྲག་་་་་་་་་
གོང་གི་འདྲ་པར་དག་དཔེ་ཡག་པོ་བླངས་འདུག ཐུགས་རྗེ་ཆེ།
གོང་གི་རྨས་སྐྱོན་ཚབ་ཆེན་ཕོག་པ་དེ་སྐུ་གཤེགས་དཔའ་བོ་ཟླ་བ་གྲགས་པ་ལགས་རེད་པས།
བོད་རྒྱལ་ཁབ་ཆེན་པོའི་རྒྱལ་གཅེས་དཔའ་བོ་དཔའ་མོ་ཡོངས་དང་སྒོས་སུ་དཔར་རིས་འདི་ནས་མཐོང་ཐོས་བྱུང་བའི་སྙིང་སྟོབས་དང་ལ་རྒྱ་ཅན་གྱི་རྒྱལ་གཅེས་དཔའ་བོ་དམ་པ་ཟླ་བ་གྲགས་པ་ལགས་དམར་གསོད་བཏང་བའི་ཡིད་སྐྱོའི་གནས་ཚུལ་ཐབས་སྡུག་དེར་མྱ་ངན་དང་གུས་འདུད་གྲངས་ཞུ།
རྒྱལ་གཅེས་ཀྱི་སྔོན་གཤེགས་དཔའ་རྒོད་འདི་ཚོ་ནི་ང་ཚོའི་བོད་རྒྱལ་ཁབ་དང་བོད་མི་རིགས་རྣམས་གཅིག་ཏུ་བསྒྲིལ་ཏེ་དམངས་གཙོ་དང་རང་དབང་གི་ཆེད་དུ་ལུས་སྲོག་ལོངས་སྤྱོད་དང་བཅས་པ་བློས་བཏང་གནང་མཁན་གྱི་རླབས་ཆེན་གྱི་མི་སྣ་ཤ་སྟག་ཡིན།
སྐུ་གཤེགས་དམ་པ་ཁོང་རྣམས་བོད་ཆོས་ལྡན་གྱི་རིགས་སྨྱུག་ཏུ་སྐུ་བལྟམས་པ་དེ་ནི་ང་ཚོ་བོད་མི་རིགས་ཀྱི་གཟི་བརྗིད་ཆེ་ཤོས་དེ་ཡིན་ལ། ཁོང་སྐུ་རྣམས་རྒྱལ་ཁབ་དང་མི་རིགས་ཀྱི་རང་དབང་ཆེད་སྐུ་སྲོག་བློས་བཏང་གནང་བ་དེ་ནི་ཁོང་རྣམས་པའི་གཟི་བརྗིད་གཅིག་ཡིན།
ང་ཚོས་བསྐལ་པ་ཇི་སྲིད་ཀྱི་བར་ནམ་ཡང་དཔའ་བོ་དཔའ་མོ་འདི་དག་གི་བཀའ་དྲིན་དང་གཟི་བརྗིད་དེ་ནམ་ཡང་ཉམས་པ་མེད་པར་དྲན་གསོ་བྱེད་དགོས་ལ་རྒྱལ་རབས་དང་ལོ་རྒྱུས་གསེར་གྱིཐང་མའི་ནང་དུ་བཀོད་པ་དེ་ཡང་ང་ཚོའི་འགན་ཁྲི་བླ་མེད་དེ་ཡིན།
༸ བོད་ཀྱི་བླ་ན་མེད་པའི་༸ གོང་ས་མཆོག་སྐུ་ཚེ་ཁྲི་ལོར་བརྟན་པ་དང་བོད་ཀྱི་བདེན་མཐའ་གསལ་བའི་སྨོན་འདུན་གྲངས་ཞུ།
བོད་མི་རིགས་ཀྱི་རྩ་དོན་ཆེད་དུ་རང་སྲོག་གཏོང་མཁན་གྱི་རྒྱ་སྤྱིའི་དཔའ་བོ་ཟླ་བ་གྲགས་པ་ལགས་ལ་གུས་འདུད་དང་མྱ་ངན་ཞུ་རྒྱུ་མ་ཟད་ཡི་རིང་དང་བསྔགས་བརྗོད་ཡོད་སྐྱེ་བ་རྗེས་མ་འཕགས་མཆོག་ཐུགས་རྗེ་ཆེན་པོའི་གདུལ་གཞིང་དུ་སྐྱེ་བའི་གསོལ་འདེབས་ཞུ།
ང་ཚོས་གནར་གཅོད་མང་ཙམ་རེག་ཡང་བདེན་དཔང་ཉུང་ཙམ་མ་གཏོགས་མི་རེག་པས།ད་རེས་ཀྱི་དཔར་འདི་ཚོ་རེག་པར་བཟང་འདུག
བོད་ནང་གི་བོད་མི་ཚོའི་དཔའ་སྟོབས་ལ་བསྟོད་པ་བྱེད་པའི་ཚིག་མི་འདུག
ངོ་མ་རྒྱའི་ཉེན་རྟོག་པ་རྣམས་ཇི་འདྲའི་གདུག་རྩུབ་ཆེ་བ་ལ། འཛམ་གླིང་གི་ནང་ནས་གདུག་རྩུབ་ཆེ་ཤོས་ཀྱི་དམག་མི་རེད་ཟེར་ན་ཡང་མི་འགྲིག་པ་མེད། དཔར་པ་སུ་ཡིན་རུང་ཐུགས་རྗེ་གྲངས་མེད་ཆེ། པར་འདི་ནི་འཛམ་གླིང་གི་མདུན་དུ་བོད་ཀྱི་གནས་སྟངས་མཚོན་བྱེད་ཀྱི་དཔང་པོ་ཞིག་ཏུ་གྱུར་ཡོད། བོད་ནང་གི་དཔའ་རྒོད་ཚོའི་བྱས་རྗེས་ལ་སྙིང་ཐག་པ་ནས་བཀའ་དྲིན་རྗེས་དྲན་ཞུ།
གནས་ཚུལ་བོད་མིའི་རང་དབང་གི་ཚགས་ཤོག་ཐོག་སྐུར་རོགས་་འབོད་སྐུལ་ཞུ་ཞུ།
ཀྱེ་མ་བོད་པའི་ལས་དབང་འདི་ངོ་མ་སྐྱོ་པོ་རེད། ད་ནི་མི་རབས་གསར་པ་གཞོན་སྐྱེས་ཚོ་ཡར་ལང་ཤོག ངོ་མ་ལང་ཤོག གཞིས་བྱེས་གཉིས་ཀ་ཡར་ལང་ཤོག བོད་རང་བཙན་རྒྱལ་འགྱུར་ཅིག
མདོ་ཁམས་སྟོད་སྨད་ཀྱི་དཔའ་རྒོད་ཚོར་སྙིང་ཐག་པ་ནས་རྗེས་དྲན་ཞུ་རྒྱུ་མ་གཏོགས་ཐབས་ཤེས་ཟད། ཁྱེད་རྣམ་པའི་ཚེ་སྲོག་བློས་བཏང་གནང་བ་དོན་འབྲས་མྱུར་ཏུ་འབྱུང་བར་བོད་མི་ཚོར་རེ་བ་ཤིན་ཏུ་ཆེ།