ཟླ་འདིའི་ཕྱི་ཚེས་ ༣ ཉིན་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཉེ་འགྲམ་དུ་ཕ་ཡུལ་ཁམས་བྲག་མགོ་ནས་ཡིན་ཤིང་ལྷོ་ཕྱོགས་འབྲས་སྤུངས་དགོན་པའི་ནང་སློབ་གཉེར་བྱེད་བཞིན་པའི་དགེ་འདུན་པ་ ༩ དང་། གཞན་མི་སྐྱ་ ༡ བཅས་བསྡོམས་མི་བཅུ་ཡིས་མ་སྐུལ་དང་བླངས་ཐོག བོད་ཀྱི་བདེན་པའི་འཐབ་རྩོད་ཆེད་རང་སྲོག་བློས་གཏོང་བྱེད་མཁན་རྣམས་དང་། ལྷག་པར་དུ་ཁམས་བྲག་མགོ་གཙོས་བོད་མདོ་དབུས་ཁམས་གསུམ་དུ་ཛ་དྲག་གི་གནས་སྟངས་འོག་ལྷག་ཡོད་པའི་བོད་མི་རྣམས་ལ་གདུང་སེམས་མཉམ་སྐྱེད་ཆེད། ཉིན་ ༡ རིང་མོན་གྷོ་འདོད་རྒུ་གླིང་གཞིས་ཆགས་སུ་ཟས་བཅད་ངོ་རྒོལ་གྱི་ལས་འགུལ་སྤེལ་ཡོད་པ་མ་ཟད། དེ་རིང་ལྷོ་ཕྱོགས་འབྲས་སྤུངས་ནས་ནས་ལྡི་ལིར་ཕྱིན་སྟེ། ད་ལྟའི་བོད་ནང་གི་ཛ་དྲག་གི་གནས་སྟངས་དང་བོད་མིའི་བདེ་སྡུག་སོགས་ཡིག་ཐོག་ཏུ་བཀོད་དེ་ཡིག་ཆ་འགྲེམས་སྤེལ་དང་ཟས་བཅད་ངོ་རྒོལ་གྱི་ལས་འགུལ་སྤེལ་འཆར་ཡོད་པ་མ་ཟད། ཕྱི་ཚེས་ ༨ ཉིན་ནས་མགོ་འཛུགས་བྱ་འཆར་ཡོད་པའི་གཞུང་འབྲེལ་ལས་འགུལ་མཇུག་གྲུབ་རྗེས། རྒྱ་གར་ལྷོ་ཕྱོགས་ཀྱི་བྷང་བྷེ་དང་བྷང་ལོར། པུ་ནེ་གྲོང་ཁྱེར་བཅས་སུ་གཅིག་མཚུངས་ཀྱི་ལས་འགུལ་སྤེལ་འཆར་ཡོད་འདུག
ཐེངས་འདིའི་དང་བླངས་ལས་འགུལ་བ་བཅུ་ཡིས་དམིགས་ཡུལ་གཙོ་བོ། རྒྱལ་སྤྱིའི་སྤྱི་ཚོགས་ཀྱི་ངོས་ནས་བོད་ཀྱི་བདེན་དོན་ཆེད་རང་སྲོག་བློས་གཏོང་གིས་རྒྱ་གཞུང་ལ་ངོ་རྒོལ་སྐད་འབོད་བྱས་པའི་དཔའ་བོ་དཔའ་མོ་རྣམས་ཀྱི་རེ་འདུན་དང་འབོད་སྐུལ་ལ་དོ་སྣང་དང་རྒྱབ་སྐྱོར་བྱ་ཆེད་དང་། བོད་ནང་གི་བོད་མི་ཚོས་མུ་མཐུད་རང་སྲོག་བློས་གཏོང་བྱེད་ཀྱིན་པའི་ལས་འགུལ་ལ་གདུང་སེམས་མཉམ་སྐྱེད་མཚོན་ཆེད་ཡིན་འདུག་ལ། ཁོང་རྣམ་པས་ལས་འགུལ་སྐབས་བཀྲམས་པའི་ཡིག་ཆའི་ནང་། འཛམ་གླིང་མཉམ་འབྲེལ་རྒྱལ་ཚོགས་གཙོས་རྒྱལ་སྤྱིའི་རང་དབང་ཅན་གྱི་སྡེ་ཚན་ཁག་གིས། རྒྱ་ནག་གཞུང་གིས་བོད་མི་རིགས་ཀྱི་ཆོས་དང་རིག་གཞུང་རྩ་གཏོར་གཏོང་བཞིན་པ་དེར་གནོན་ཤུགས་སྤྲོད་རྒྱུ་དང་བོད་ནང་གནས་ཚུལ་རྟོགས་ཞིབ་ཆེད་རྒྱལ་སྤྱིའི་གསར་འགོད་པ་སོགས་ཆེད་གཏོང་གནང་དགོས་པའི་འབོད་སྐུལ་གནང་ཡོད་པ་མ་ཟད། རྒྱ་ནག་གཞུང་ངོས་ནས་ཉེ་བའི་དུས་ནས་བོད་ནང་གི་གསེར་རྟ་དང་འཛམ་ཐང་། བྲག་མགོ མགོ་ལོག རྔ་པ། ལྷ་ས་སོགས་སུ་རྒྱ་ནག་གཞུང་གིས་ལག་ཏུ་མེ་མདའ་སོགས་མཚོན་ཆ་ཅི་ཡང་མེད་པའི་བོད་མི་ཚོ་གང་བྱུང་དམར་གསོད་དང་གཅར་རྡུང་། འཛིན་བཟུང་སོགས་དྲག་སྤྱོད་ཀྱི་སྲིད་ཇུས་མཚམས་འཇོག་གིས། བོད་མི་ཞི་རྒོལ་བའི་རེ་འདུན་ལ་བསམ་གཞིགས་བྱ་རྒྱུ་དང་། ལས་འགུལ་ཁྲོད་རྨས་སྐྱོན་བྱུང་བའི་བོད་མི་ཚོར་སྨན་བཅོས་ཀྱི་མཐུན་རྐྱེན་སྤྲོད་རྒྱུ། བཙོན་འཇུག་བྱས་པའི་བོད་མི་རྣམས་མགྱོགས་མྱུར་གློད་གྲོལ་གཏོང་དགོས་པའི་དགོས་འདུན་སོགས་བཏོན་ཡོད་འདུག
ཟླ་འདིའི་ཚེས་༣ ཉིན་བོད་མདོ་ཁམས་གསེར་རྟ་རྫོང་ཕུ་འུ་ཡུལ་ཚོ་རུ་བོད་མི་གསུམ་གྱིས་རང་ལུས་མེར་བསྲེགས་ཏེ། རྒྱ་ནག་གཞུང་ལ་ངོ་རྒོལ་བྱས་པ་དང་། བོད་མི་གཅིག་འདས་གྲོངས་སུ་སོང་ཡོད་འདུག
མེར་བསྲེག་གཏོང་མཁན་གཅིག་ཕུ་འུ་ཡུལ་ཚོ་ཞོ་སང་སྡེ་བའི་ཚབ་ཚའི་ཚེ་རིང་དང་། (རང་ལོ་༦༠ ཡས་མས།) ཕུ་འུ་ཡུལ་ཚོ་འབུམ་ཤུལ་སྡེ་བའི་སྐྱ་རིས་(རང་ལོ་༣༠ ཡས་མས།) གཉིས་གྲོངས་མེད་པ་དང་། གཅིག་མེར་བསྲེག་བཏང་བ་དང་འདས་གྲོངས་སུ་སོང་ཡོད་ནའང་། ཁོང་ས་གནས་གང་གི་ཡིན་དང་། མིང་སོགས་གསལ་པོ་ཤེས་ཐུབ་ཀྱི་མེད་པ་རེད། དེ་བཞིན་དེང་སྐབས་ཕུ་འུ་ཡུལ་ཚོ་རུ་རྒྱ་ནག་གཞུང་གིས་དམག་ཧ་ཅང་མང་པོ་བཏང་སྟེ་དམ་དྲག་བྱེད་ཀྱི་ཡོད་པ་མ་ཟད།
ཉེ་བའི་ཆར་ནས་བོད་མདོ་ཁམས་གསེར་རྟ་རྫོང་ཁོངས་སུ་རྒྱ་ནག་གཞུང་ལ་ངོ་རྒོལ་གྱི་ལས་འགུལ་ཐེངས་མང་བྱུང་བར་བརྟེན། རྒྱ་ནག་གཞུང་གིས་དྲག་བྱས་པ་མ་ཟད། བརྒྱུད་ལམ་ཚང་མ་བཀག་འགོག་བྱས་ཡོད་པས། འབྲེལ་བ་བྱེད་རྒྱུ་ཧ་ཅང་དཀའ་ངལ་ཡོད་པ་རེད།
ཕྱི་ཟླ་༡ ཚེས་༡༨ ཉིན་སླར་ཡང་གསེར་རྟ་རྫོང་ཕུའུ་ཤང་དུ་ཡང་རླུང་རྟའི་རྒྱབ་ངོས་སུ་བོད་དར་དང་དེའི་མཐའ་སྐོར་དུ་༧རྒྱལ་དབང་བསྟན་འཛིན་རྒྱ་མཚོ་ཁྲི་ལོ་བརྟན་པར་ཤོག བོད་རྒྱལ་ལོ།། སོགས་བྲིས་འདུག་པའི་ཡིག་ཆ་ས་གནས་གང་སར་གཏོར་འགྲེམས་བྱས་ཡོད་འདུག
___བོད་ཀྱི་བང་ཆེན་ནང་འདུག
ལས་འགུལ་ནི་ནུས་ཤུགས་ཆེ་ཆུང་ལ་མ་སྟོས་པར་སྤེལ་དགོས། རྗེས་སུ་ཡི་རང་ཡོད། ལས་འགུལ་ཆེ་ཕྲ་གང་ཡིན་སྤེལ་དགོས། ཏིང་ཞོ་ཕིང་གིས་བསམ་ཚུལ་ལྟར། ཆབ་སྲིད་ནི་ཉིན་རེའི་འཚོ་བའི་ཐམས་ཅད་ལ་ཁྱབ་པར་བྱེད་དགོས། བོད་པ་དཔའ་རྟུལ་རྣམས་ཀྱི་ཚེ་སྲོག་ཆུད་ཟོས་སུ་མི་འགྲོ་བའི་ཆེད་འཚེ་མེད་གཞིར་བཟུང་ཐོག་གང་འཇོན་ཅི་འཇོན་བྱེད་དགོས།
ང་ཚོ་ལངས་དགོས། རང་དབང་ལུང་པ་ན་གང་ན་སུ་བཞུགས་པ་རྣམས་ལངས་དགོས། རྒྱ་ནག་ཐེར་འདོན་བྱེད། ཁ་གཏད་གཅོག
བོད་ནང་སྤུན་ཟླ་མེ་མདའི་ཁ་རུ་ལངས་ཏེ། ཡོད་ཚད་བློས་གཏོང་བཞིན་འདུག བཟའ་ཟླ་བུ་ཕྲུག་ཐམས་ཅད་བློས་གཏོང་བཞིན་འདུག རང་ལ་ཡོད་པའི་གཟུགས་ཕུང་ཚེ་སྲོག་དང་བཅས་པ་མེར་སྒྲོན་ཏེ་བློས་གཏོང་བཞིན་པ་རེད། ད་ལོངས་ཤོག དམངས་གཙོའི་ཡུལ་ལ་ཡོད་མཁན་ཚང་མ་ལོངས་ཤོག ང་ཚོ་ལངས་ན་བདེ་འཇགས་ལ་ཉེན་ཁ་མེད་ལ། ཚེ་སྲོག་ལ་ཉེན་ཁ་དེ་བས་ཀྱང་མེད། ཚ་ཚ་འུར་འུར་ངང་ནས། བཙན་བྱོལ་བོད་མི་ལོངས་ཤོག བོད་རྒྱལ་ལོ།།