རྒྱ་གཞུང་གིས་མགོ་ལོག་ས་ཁུལ་གྱི་བླ་སྤྲུལ་ཚོར་རང་ལུས་མེར་བསྲེགས་ཀྱི་བྱ་སྤྱོད་དེར་ངོ་རྒོལ་དང་། ༧རྒྱལ་བ་རིན་པོ་ཆེ་མཆོག་ལ་སྐྱོན་བརྗོད་བྱ་དགོས་པའི་བཙན་བཀའ་གཏོང་བཞིན་ཡོད་འདུག
དེ་རིང་འདི་གར་གནས་ཚུལ་བཏང་འབྱོར་བྱུང་བ་ལྟར་ན། ཉེ་ལམ་ཨ་མདོའི་ལོ་གསར་རྗེས་ནས་བཟུང་ཁ་སང་བར་མགོ་ལོག་ཁུལ་ཐོག་ཏུ་བོད་མི་ ༣༠ ལྷག་ཙམ་འཛིན་བཟུང་བྱས་ཡོད་པ་དང་། རྔ་པ་དང་ཡུལ་ཤུལ་སྡེ་དགེ་སོགས་ཀྱི་མི་རྣམས་མགོ་ལོག་ནས་ཕྱིར་འཕུད་བཏང་ཚར་ཡོད་འདུག་ལ། ས་གནས་ཀྱི་བླ་མ་སྤྲུལ་སྐུ་ཚོར་ཉིན་འདི་འགར་འབྱུང་བཞིན་པའི་རང་ལུས་མེར་བསྲེགས་ཀྱི་བྱ་སྤྱོད་ལ་དགག་རྒྱག་ངོ་རྒོལ་དང་། ༧རྒྱལ་བ་རིན་པོ་ཆེར་ངོ་རྒོལ་སྐྱོན་བརྗོད་སོགས་བྱ་དགོས་པའི་བཙན་བཀའ་གཏོང་བཞིན་ཡོད་འདུག འོན་ཀྱང་། ད་ལྟའི་བར་རྒྱ་གཞུང་གི་བཙན་བཀའ་དེ་ལ་སུས་ཀྱང་ཁས་ལེན་བྱས་མེད་པ་མ་ཟད། བླ་སྤྲུལ་རེ་འགས་དེ་འདྲ་ཁས་ལེན་བྱ་ཐབས་མེད་པའི་ལན་འདེབས་ཀྱང་གནང་ཡོད་འདུག ཉིན་འདི་གར་མགོ་ལོག་ས་ཁུལ་གྱི་གཞུང་ལམ་ཆེ་ས་དང་མི་མང་འདུ་འཛོམས་བྱེད་ཡུལ་ཡོངས་སུ་དམག་མི་འགྲེམས་འཇོག་གིས་དམ་དྲག་ཤུགས་ཆེན་བྱེད་ཀྱི་ཡོད་པ་མ་ཟད། ཁྱིམ་ཚང་སྡོད་སའི་ཁང་ཁྱིམ་གྱི་གཡས་གཡོན་ཚང་མར་དམག་མིས་དམ་དྲག་བྱེད་བཞིན་ཡོད་འདུག
གསར་འགོད་པ། དོན་གྲུབ་བཀྲ་ཤིས།
