ཉིན་འདི་འགར་ཡུ་རོབ་ཁུལ་དུ་ཁ་བ་ཆེན་པོ་བབས་ཏེ་གྲང་ལྷགས་ཆེ་རུ་ཕྱིན་སྟབས། མི་མང་པོ་འཁྱགས་ཤི་ཐེབས་ཀྱི་ཡོད་པ་མ་ཟད། སྐྱེལ་འདྲེན་གཞུང་ལམ་དང་མཚོ་ལམ་འགག་སྟེ་ཡུ་རོབ་རྒྱལ་ཁབ་མང་པོའི་ནང་རླངས་རྫས་ཀྱི་དཀའ་ངལ་འཕྲད་མགོ་ཚུགས་འདུག
བདུན་ཕྲག་སྔོན་མ་ནས་བཟུང་ཡུ་རོབ་ཁུལ་དུ་ཁ་བ་ཆེན་པོ་བབས་ཏེ་གནམ་ཤིས་ཧ་ཅང་གྲང་མོ་ཆགས་ཡོད་ཅིང་། ཤར་ཡུ་རོབ་ཁུལ་གྱི་གནམ་གཤིས་འཁྱགས་ཚད་ཀོར་ཐིག་མན་གྱི་གྲངས་ ༣༥ (-35C) བར་ཟགས་ཡོད་ཅིང་། གནམ་གཤིས་གྲང་དྲག་པ་དང་གློག་འཕྲང་གི་ཆུར་འཁྱགས་པ་ཆགས་པ་སོགས་ཀྱི་དབང་གིས་ཚ་གློག་དཀོན་པོ་ཡིན་སྟབས། རླངས་རྫས་ཀྱི་ཚ་གློག་བེད་སྤྱོད་བྱེད་ཀྱི་ཡོད་ཀྱང་། ད་ཆར་རྒྱལ་མཚམས་ཁག་གི་སྐྱེལ་འདྲེན་གཞུང་ལམ་དང་མཚོ་ལམ་ཕལ་ཆེ་བར་འཁྱགས་རོམ་ཆགས་པ་དང་ཁ་བས་འགག་པར་བརྟེན། རླངས་རྫས་ཀྱི་དཀའ་ངལ་འཕྲད་ཀྱི་ཡོད་འདུག ད་ལྟའི་ཆར་རླངས་རྫས་སྐྱེལ་འདྲེན་གྱི་ལམ་ཁ་བཟང་ཤོས་རཱ་ཤི་ཡ་ཕྱོགས་ཡིན་འདུག གནད་དོན་དེའི་ཐད་ཕྱི་ཚེས་ ༣ ཉིན་ཡུ་རོབ་མཐུན་ཚོགས་ཀྱི་ནུས་ཤུགས་(energy) ཚན་པའི་མགྲིན་ཚབ་པ་ལྕམ་ཧོལ་ཛི་ནར་(Marlene Holzner) གྱིས་བརྗོད་པ་ལྟར་ན། ད་ལྟའི་ཆར་ཡུ་རོབ་རྒྱལ་ཁབ་མང་པོ་ཞིག་གིས་རཱ་ཤི་ཡ་ནས་རླངས་རྫས་སྐྱེལ་འདྲེན་བྱེད་ཀྱི་ཡོད་སྟབས། རཱ་ཤི་ཡའི་རླངས་རྫས་འགྲོ་རྒྱུག་ཆེ་རུ་འགྲོ་བཞིན་པ་དང་ལྷན་དུ་རིན་གོང་ཡང་དུས་ཚོད་རེ་རེ་བཞིན་འཕེལ་བཞིན་ཡོད་འདུག བདུན་ཕྲག་འདིའི་ནང་ཨེ་ཊི་ལེ་དང་ཧྥ་རན་སི། དབྱིན་ཡུལ་བཅས་ཀྱི་ནང་ཡང་ཁ་བ་འབབ་ཤུགས་ཆེ་རུ་འགྲོ་བཞིན་ཡོད་སྟབས། མི་འགྱང་བར་རྒྱལ་ཁབ་དེ་དག་ནང་ཡང་དཀའ་ངལ་གཅིག་མཚུངས་འཕྲད་རྒྱུར་ཚོད་དཔག་བྱེད་ཀྱི་ཡོད་འདུག
ཕྱི་ཚེས་ ༣ ཉིན་རཱ་ཤི་ཡའི་རླངས་རྫས་ཕྱིར་ཚོང་ཚན་པའི་མགྲིན་ཚབ་པ་ཀོམ་ལེ་ཝི་(Sergey Komlev) ཡིས་ “ང་ཚོས་རླངས་རྫས་ཚོང་བསྒྱུར་གྱི་ལས་དོན་རྣམས་ཚགས་ཚུད་ངང་སྒྲུབ་ཀྱི་ཡོད་པ་དང་། རླངས་རྫས་ཐོན་སྐྱེད་དང་སྐྱེལ་འདྲེན་འཕྲུལ་ཆས་རིགས་རྒྱུན་ལྡན་ཡིན་ལ། གང་ཐུབ་ཀྱིས་ཕྱིར་འཚོང་བྱ་རྒྱུ་ཡིན”ཞེས་བརྗོད་ཡོད་པ་རེད།
ཡུ་ཀི་རེ་ཡན་(Ukraine) གཞུང་གིས་བརྗོད་པ་ལྟར་ན་ད་སྔ་མི་ ༡༠༠ ཙམ་འཁྱགས་ཤི་ཐེབས་ཡོད་འདུག་ལ། པོ་ལེ་སི་(Poland) ནང་སྲིད་བློན་ཆེན་གྱིས་པོ་ལན་ཌིའི་མི་ ༨ ཙམ་འཁྱགས་ཤི་ཐེབས་ཡོད་སྐོར་བརྗོད་ཡོད་འདུག འོན་ཀྱང་། གོང་གི་གྲངས་ཚད་དེ་དག་ནི་གཞུང་གིས་ཕྱིར་བསྒྲགས་བྱས་པའི་རིགས་ཡིན་འདུག་ལ། སྤྱི་ཡོངས་ནས་འཁྱགས་ཤི་ཐེབས་མཁན་དང་གངས་སྐྱོན་གྱིས་སྡོད་གནས་མེད་པར་གྱུར་པའི་རིགས་ཤུགས་ཆེན་པོ་བྱུང་ཡོད་འདུག
གསར་འགོད་པ། བནྡེ་སྐྱབས།
![China's Vice Minister of Foreign Affairs Sun Weidong in Tokyo, Japan in 2023 [File: Issei Kato/Pool via Reuters]](https://tibettimes.net/wp-content/uploads/2026/04/Screen-Shot-2026-04-15-at-2.32.14-PM-360x180.png)
གསར་འགོད་པ་ལགས།
གཤམ་གྱི་འདི་ཚོ་ལ་བསྐྱར་ཞིབ་ཅིག་གནང་བའི་རེ་བ་ཞུ་ཡི་ཡོད།
གྲངས་ལྷག་ཆེ་རུ་ཕྱིན་
དཀའ་ངལ་འཕྲད་མགོ་ཚིགས་
ཧ་ཅང་གྲངས་མོ་ཆགས་
འཁྱགས་ཚད་ཀོར་ཐུག་མན་
གནམ་གཤིས་གྲངས་དྲག་
གློག་ཕྲང་གི་ཆུ་འཁྱགས་པ་
གཞུང་ལམ་དང་མཚོ་ལམ་ཕལ་ཆེ་བར་འཁྱགས་རོམ་ཆགས་
ཡུ་རོམ་མཐུན་ཚོགས་
རིན་གོང་ཡང་དུས་ཚོད་རེ་རེ་བཞིན་འཕེར་བཞིན་ཡོད་
གོང་གི་གངས་ཚད་དེ་དག་ནི་གཞུང་གིས་ཕྱིར་བསྒྲགས་བྱས་པའི་རིགས་