ལོ་ ༡༣ གྱི་ཁྲིམས་ཐག་བཅད།

ཨ་མདོ་ཅོ་ནེ་མཁར་ཆེན་དྲི་དྲི་དགོན་པའི་དགེ་འདུན་པ་རང་ལོ་ ༤༠ ལ་བསླེབས་པའི་ངག་དབང་མཁྱེན་རབ་ལ་ལོ་ངོ་ ༡༣  ཁྲིམས་ཆད་བཅད་པ།

འདི་གར་གནས་ཚུལ་བཏང་འབྱོར་བྱུང་བ་ལྟར་ན། ཕྱི་ལོ་ ༢༠༠༨ ཟླ་ ༣ ཚེས་ ༡༨ ཉིན་ཨ་མདོ་ཀན་ལྷོ་ཁུལ་ཇོ་ནེ་མཁར་ཆེན་དྲི་དྲི་དགོན་པའི་དགེ་འདུན་པ་ངག་དབང་མཁྱེན་རབ་གཙོས་པའི་དགེ་འདུན་པ་ ༡༦ དང་མང་ཚོགས་ ༧༣༠ ལྷག་བཅས་ཀྱིས་ཅོ་ནེ་མཁར་ཆེན་དགོན་པ་ནས་མཁར་ཆེན་ཞང་ཉེན་རྟོག་ལས་ཁུངས་མདུན་བར། ༧གོང་ས་མཆོག་བོད་ལ་ཕེབས་དགོས་པ་དང་། བོད་མི་རིགས་ལ་རང་དབང་དགོས་པ་སོགས་སྒྲོག་བཞིན་ཞི་བའི་ངོ་རྒོལ་གནང་ཡོད་ཀྱང་། སྐབས་དེར་ཞང་ཐོག་ཏུ་ཉེན་རྟོག་པ་དང་དམག་མི་ཉུང་ཤས་ཤིག་ལས་མེད་སྟབས་ཁང་པའི་ཕྱིར་ཐོན་ཐུབ་མེད།

དེའི་རྗེས་མཁར་ཆེན་ཞང་ཉེན་རྟོག་ལས་ཁུངས་ཀྱི་བརྡ་ཁྱབ་འབྱོར་ཏེ། གྲྭ་ངག་དབང་མཁྱེན་རབ་གཙོས་པའི་དགེ་འདུན་པ་ ༡༦ འཕྲལ་དུ་ཉེན་རྟོག་ལས་ཁུངས་སུ་མ་འབྱོར་ཚེ་དགོན་གྲོང་གཉིས་ལ་དྲག་གནོན་བྱ་རྒྱུ་ཡིན་ཚུལ་གྱི་བཀའ་རྒྱ་འབྱོར་ཡོད་སྟབས། གྲྭ་ངག་དབང་མཁྱེན་རབ་དང་དགེ་འདུན་པ་དེ་དག་ཉེན་རྟོག་ལས་ཁུངས་སུ་དང་བླང་གིས་ཕྱིན་སྐབས། འདྲི་བརྩད་གང་ཡང་མེད་པར་དེ་མ་ཐག་རྐང་ལྕགས་ལག་ལྕགས་བརྒྱབ་སྟེ་ཉེས་རྡུང་ཚད་མེད་བཏང་ཡོད་པ་དང་། མེ་མདའ་ཐོགས་པའི་དམག་མི་ཚོས་ཁྱེད་ཅག་རང་སར་འདུག་ཚོད་ཟིན་གྱི་མི་འདུག་པས་གསོད་རྒྱུ་ཡིན་ཚུལ་སོགས་ཀྱི་འཇིགས་ཡང་བྱས་ཡོད་འདུག

དགེ་འདུན་པ་དེ་དག་ཉིན་ཁ་ཤས་རིང་བཀག་འགོག་གིས་ཉེས་རྡུང་ཚབས་ཆེན་བཏང་བར་བརྟེན། དེ་གའི་མང་ཚོགས་ ༧༢ ཙམ་ཁང་མཁར་ཆེན་ཞང་ཉེན་རྟོག་ལས་ཁུངས་སུ་ཕྱིན་ཏེ་ཉེས་པ་གང་ཡང་མེད་པའི་དགེ་འདུན་པ་ཚོ་ཀློད་གྲོལ་གཏོང་དགོས་ཚུལ་བརྗོད་སྐབས། རྒྱ་གཞུང་གིས་མང་ཚོགས་ ༧༢ ལ་རྒྱ་སྒོར་ ༣༠༠༠ རེའི་ཉེས་ཆད་བཅད་པ་མ་ཟད། རྗེས་ཕྱོགས་ས་གནས་གཞན་དུ་འགྲོ་མི་ཆོག་པ་དང་། གལ་སྲིད་འགྲོ་དགོས་བྱུང་ཚེ་ཉེན་རྟོག་ལས་ཁུངས་ལ་བཀའ་འཁྲོལ་ཞུ་དགོས་པ་སོགས་ཀྱི་ཆ་རྐྱེན་འོག་སྟེ་ཕྱིར་ལོག་ཏུ་བཅུག་ཡོད་འདུག

དེའི་རྗེས་རྒྱ་གཞུང་གིས་དགོན་གྲོང་གཉིས་སུ་སློབ་གསོའི་ལས་དོན་མགོ་འཛུགས་བྱས་ཏེ། སྲིད་གཞུང་ལ་ངོ་རྒོལ་བྱ་མི་རུང་བ་དང་། ༧ཏཱ་ལའི་བླ་མར་དགག་པ་རྒྱག་དགོས་པ་སོགས་ལ་བཙན་སྐུལ་བྱས་ཡོད་ཅིང་། ལོ་དེའི་ཕྱི་ཟླ་ ༡༠ ཚེས་ ༢༠ ཉིན་གྲྭ་ངག་དབང་མཁྱེན་རབ་གློ་བུར་དུ་འཛིན་བཟུང་བྱས་ཏེ། ཅོ་ནེ་རྫོང་ཐོག་ཏུ་འཁྲིད་དེ་ལོ་ ༡༣ གྱི་ཁྲིམས་ཐག་བཅད་རྗེས་ལན་ཀྲུའུ་བཙོན་ཁང་ཞིག་ཏུ་བསྐྱལ་ཡོད་འདུག རྗེས་སུ་གྲྭ་ངག་དབང་མཁྱེན་རབ་ལ་ཐུག་འཕྲད་བྱེད་དུ་འགྲོ་མཁན་ཚོར་ཁོང་གིས་རྒྱ་གཞུང་གིས་ས་གནས་མང་ཚོགས་ལ་དྲག་གནོན་མ་བྱས་ཚེ་རང་ཉིད་བཙོན་ཁང་ནས་ཅི་ཙམ་འདུག་དགོས་ཀྱང་འགྱོད་པ་མེད་སྐོར་བརྗོད་འདུག

ས་གནས་མང་ཚོགས་ཚོས་རྒྱ་གཞུང་གིས་གྲྭ་ངག་དབང་མཁྱེན་རབ་འཛིན་བཟུང་བྱས་དོན་ནི། ཁོང་དེ་སྔོན་བླ་བྲང་བཀྲ་ཤིས་འཁྱིལ་ནང་བསྟན་སློབ་གླིང་ནས་སློབ་མཐར་ཕྱིན་ཞིང་། དྲི་དྲི་དགོན་པའི་བླ་མའི་ཕྱག་མཛོད་དང་དགོན་པའི་ལས་དོན་གང་ཅིའི་ཐད་ཀྱི་གཙོ་འགན་འཁུར་མཁན་ཡིན་པ། ཕྱི་ནང་གི་གནས་ཚུལ་མང་པོར་ཐུགས་སྣང་དང་སེམས་འཁུར་ཡོད་མཁན་ཞིག་ཡིན་པ་བཅས་ལ་བརྟེན་ཏེ། རྒྱ་གཞུང་གིས་ཁོང་དམིགས་སུ་བཀར་ཏེ་འཛིན་བཟུང་བྱས་པ་ཡིན་ཚུལ་རྗོད་ཀྱི་ཡོད་འདུག